ស្ត្រីអ្នកបឹងកក់ ប្រមាណ ៣០នាក់ តវ៉ានៅមុខស្ថានទូតសហរដ្ឋអាមេរិក និងស្ថាប័នធនាគារពិភពលោក (World Bank) ជាថ្មីនៅព្រឹកថ្ងៃទី១៥ ខែកុម្ភៈ ឆ្នាំ២០១៦ ដើម្បីទាមទារឲ្យមានដំណោះស្រាយបន្ថែមទៀត ចំពោះបញ្ហាជម្លោះដីធ្លីរ៉ាំរ៉ៃរបស់ពួកគាត់នៅតំបន់បឹងកក់ រាជធានីភ្នំពេញ។
អតីតអ្នកបឹងកក់ លោកស្រី ស៊ា ណារ៉េត មានប្រសាសន៍ថា ការដែលពួកលោកស្រីនាំគ្នាមកតវ៉ានៅមុខស្ថាប័នទាំងពីរ ព្រោះស្ថាប័នទាំងពីរនេះជាអ្នកផ្ដល់លុយជំនួយដល់រដ្ឋាភិបាល ដើម្បីអភិវឌ្ឍនៅទីនោះ៖ « ព្រោះធនាគារពិភពលោក ជាអ្នកផ្ដល់ប្រាក់កម្ចីទៅឲ្យរដ្ឋាភិបាលយ៉ាងច្រើន ។ ម៉្លោះហើយខ្ញុំត្រូវតែមកធ្វើឲ្យគាត់ធ្វើកិច្ចអន្តរាគមន៍ទៅរដ្ឋាភិបាល ឲ្ យដោះស្រាយនៅតំបន់បឹងកក់នេះ។ ខ្ញុំនៅតែបន្តរហូតទាល់តែមានដំណោះស្រាយ មិនឈប់ទេ ព្រោះគាត់រើសអើងប្រជាពលរដ្ឋខ្មែរណាស់ មកនៅប្រទេសកម្ពុជា មិនចេញជួបប្រជាពលរដ្ឋកម្ពុជា ទេ។ គាត់សម្ងំសុខ ហើយប្រជាពលរដ្ឋ យើងខ្ញុំ ឈឺចាប់ យ៉ាងខ្លាំង។ យើងធ្វើអីក៏ហ៊ានធ្វើដែរ មិនខ្លាចជាប់គុកជាប់ច្រវាក់ឡើយ » ។
ការតវ៉ារបស់អតីតអ្នកបឹងកក់ នៅស្ថាប័នទាំងពីរនេះ មិនទទួលបានការឆ្លើយតបណាមួយទេ ព្រោះថ្ងៃទី១៥ កុម្ភៈ ជាថ្ងៃឈប់សម្រាករបស់មន្ត្រីបម្រើការងារនៅក្នុងស្ថាប័នទាំងពីរនេះ។
អ្នកបឹងកក់ ស្រែកតវ៉ា គោះចានឆ្នាំង អង្រួនទ្វាររបង និងគប់ពងមាន់ដាក់ស្លាកឈ្មោះរបស់ធនាគារពិភពលោក។ កងសន្តិសុខសាលារាជធានីភ្នំពេញ ដាក់កម្លាំងតាមឃ្លាំមើលការតវ៉ានេះរហូតដល់ចប់ ប៉ុន្តែមិនមានការប៉ះទង្គិចគ្នាទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។