ពលរដ្ឋក្នុងសហគមន៍បុរីកីឡា បានស្នើឲ្យអង្គការសង្គមស៊ីវិលចំនួន៥ ដែលសាលារាជធានីភ្នំពេញ ជ្រើសរើសដាក់បញ្ចូលក្នុងគណៈកម្មការត្រួតពិនិត្យឯកសារ ឲ្យដកខ្លួនចេញពីគណៈកម្មការនេះ។
ពលរដ្ឋសហគមន៍បុរីកីឡា យល់ឃើញថា សមាសភាពមួយចំនួនក្នុងគណៈកម្មការនេះមិនបានបម្រើផលប្រយោជន៍ឲ្យពលរដ្ឋ ឬធ្វើការប្រកបដោយតម្លាភាព ដើម្បីឈានទៅដោះស្រាយវិវាទដីធ្លីនៅតំបន់បុរីកីឡា នោះបានទេ។
អង្គការសង្គមស៊ីវិលចំនួន៥ បានលុបចោលការប្រជុំវាយតម្លៃ និងពិនិត្យឯកសារស្នាក់នៅរបស់ពលរដ្ឋក្នុងសហគមន៍បុរីកីឡា ជាមួយសាលារាជធានីភ្នំពេញ តាមការស្នើសុំរបស់ពលរដ្ឋ នៅថ្ងៃទី៩ ខែកញ្ញា។
នាយកលេខាធិការដ្ឋានក្រុមការងារពិសេសសិទ្ធិលំនៅឋាន លោក សៀ ភារម្យ មានប្រសាសន៍ថា អង្គការលោក និងអង្គការចំនួន៤ទៀត បានពិភាក្សាគ្នាឯកភាពដាក់លិខិតមួយទៅសាលារាជធានីជាផ្លូវការ នៅថ្ងៃទី៩ ខែកញ្ញា ដោយយោងទៅតាមការស្នើសុំរបស់អ្នកបុរីកីឡា ដែលសុំផ្អាកការប្រជុំវាយតម្លៃនេះ ដោយហេតុផលការមិនទុកចិត្តសមាសភាពក្នុងគណៈកម្មការនេះ។ លោកថា ពលរដ្ឋធ្លាប់បានស្នើឲ្យមានតំណាង ដើម្បីមានសំឡេងក្នុងគណៈកម្មការនេះ ប៉ុន្តែសាលាក្រុងបដិសេធ។
លោក សៀ ភារម្យ៖ «យើងថាយើងទៅចូលរួមសហការ ដើម្បីស្វែងរកដំណោះស្រាយជូនពួកគាត់ ចឹងដល់ពេលពួកគាត់ឃើញថាអត់សូវមានផលប្រយោជន៍អី ឬក៏សារសំខាន់អីសម្រាប់ពួកគាត់ អ៊ីចឹងយើងត្រូវតែស្ដាប់តាមគាត់សិនទៅ»។
គណៈកម្មការត្រួតពិនិត្យឯកសារប្រជាពលរដ្ឋដែលសេសសល់ រួមមាន សាលារាជធានីភ្នំពេញ ក្រុមហ៊ុនផានអ៊ីមិច (PhanImex) ប្រធានសហគមន៍ចាស់ អង្គការសង្គមស៊ីវិល និងអាជ្ញាធរពាក់ព័ន្ធ ប្រជុំបានចំនួនពីរលើក គឺថ្ងៃទី៣ និងថ្ងៃទី៤ ខែកញ្ញា ដើម្បីវាយតម្លៃ និងពិនិត្យឯកសារជូនពលរដ្ឋ។ ក្រុមការងារនេះវាយតម្លៃបានចំនួន ៤៩គ្រួសារក្នុងចំណោម ១៨០គ្រួសារ។ ការប្រជុំគណៈកម្មការនេះ បានធ្វើឡើងបន្ទាប់ពីពលរដ្ឋដាក់ឯកសារអំណះអំណាងថារស់នៅតំបន់បុរីកីឡា តាមរយៈវេទិកាសាធារណៈកាលពីថ្ងៃទី១២ សីហា។
ទាក់ទងទៅនឹងបញ្ហានេះ តំណាងពលរដ្ឋក្នុងសហគមន៍បុរីកីឡា អ្នកស្រី ឆាយ គឹមហ៊ន ថ្លែងថា តំណាងក្រុមហ៊ុននឹងការពារប្រយោជន៍ក្រុមហ៊ុន ប្រធានសហគមន៍ចាស់ធ្លាប់បានបំប៉ោងចំនួនពលរដ្ឋរស់នៅ និងមានអំពើពុករលួយ។ អ្នកស្រីបារម្ភពីការវែកញែកវាយតម្លៃទៅឯកសារពលរដ្ឋមិនបានល្អិតល្អន់ ពីព្រោះអង្គការសង្គមស៊ីវិលទាំងនោះមិនបានដឹងពីស្ថានភាពពិតដូចពលរដ្ឋរងគ្រោះ។ ដូច្នេះ សមាសភាពក្នុងគណៈកម្មការដោះស្រាយដីធ្លីនេះ ពួកគាត់ពុំអាចជឿទុកចិត្តបាន។
អ្នកស្រី ឆាយ គឹមហ៊ន៖ «ពួកសហគមន៍ចាស់នោះ ហើយនិងក្រុមហ៊ុនផានអ៊ីមិច នោះហើយតែងតែធ្វើបាបពួកខ្ញុំ ឲ្យពួកខ្ញុំបាត់បង់ដីបាត់បង់ផ្ទះ ក៏ដោយសារតែពួកនោះដែរ ដោយសារតែមានភាពមិនពុករលួយដែលកើតឡើងនៅក្នុងសហគមន៍នោះ ហើយដែលធ្វើឲ្យពួកខ្ញុំគ្មានជម្រកជ្រកកោនមកដល់ពេលនេះ»។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានឆ្លើយតបថា ក្ដីបារម្ភរបស់អ្នកភូមិ គឺហួសហេតុ ពីព្រោះកិច្ចប្រជុំវាយតម្លៃនេះប្រកបដោយតម្លាភាព យោងទៅតាមគោលការណ៍ដែលបានឯកភាពគ្នា និងកំណត់។ លោកបានបន្ទោសទៅអង្គការសង្គមស៊ីវិលទាំងនោះថា មិនមានការទទួលខុសត្រូវ និងមានឆន្ទៈក្នុងការដោះស្រាយបញ្ហាពិតប្រាកដ ជាអង្គការដែលពុំមានភាពឯករាជ្យ។
លោក ឡុង ឌីម៉ង់៖ «នៅពេលដែលពួកគាត់ចាប់ផ្ដើមឃើញថា ការងារហ្នឹងវាអាចត្រូវយកទៅជជែកគ្នាបាន មើលទៅថាអាចស៊ីបានហើយគាត់ចាប់ផ្ដើមចូលធ្វើ។ បំផុសបំផុលញុះញង់បងប្អូនប្រជាពលរដ្ឋទាំងអស់ ឲ្យចាប់ផ្ដើមធ្វើការគាត់អាងលើនេះលើនោះ ដល់ពេលចាប់ផ្ដើមថាអូខេដាក់លើតុ ដាក់លើតុទាំងអស់គ្នា រៀបចំវេទិកាសាធារណៈមួយឲ្យមានតម្លាភាព យកឯកសារមកហើយ មិនមែនប្រលាំប្រកូវទៀតដាក់អង្គុយប្រជុំគ្នា ជជែកគ្នាទៀតមកអង្គការសង្គមស៊ីវិល មកតំណាងនេះតំណាងនោះមកៗ ហើយជជែកគ្នាមក ឃើញថាបន្តិចម្ដងៗចាប់ផ្ដើមធ្វើការ ឃើញថា អ៊ីយ៉ាការដែលគាត់ជួយប្រជាពលរដ្ឋកន្លងមក ឃើញថាអត់ស្រួលហើយ អ៊ីចឹងគាត់ចាប់ផ្ដើមគេចវេសហើយ គាត់ជួយបានម៉េច បើឯកសារជាក់ស្ដែងពិតប្រាកដវាចឹងហើយ ឲ្យគាត់ធ្វើម៉េច។ ចឹងគាត់ត្រូវដកខ្លួនថយ»។
អង្គការសង្គមស៊ីវិលទាំង៥ ដែលមានឈ្មោះនៅក្នុងគណៈកម្មការនោះរួមមាន ក្រុមការងារពិសេសសិទ្ធិលំនៅឋាន មជ្ឈមណ្ឌលសិទ្ធិមនុស្សកម្ពុជា សមាគមអាដហុក គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា និងអង្គការធាងត្នោត។ សាលារាជធានីភ្នំពេញ កំពុងធ្វើការវាយតម្លៃឯកសារពលរដ្ឋចំនួន ១៨០គ្រួសារនៅតំបន់បុរីកីឡា ដែលកំពុងមានវិវាទជាមួយក្រុមហ៊ុន ផានអ៊ីមិច។ ការវាយតម្លៃដើម្បីផ្ដល់លំនៅឋានឲ្យពលរដ្ឋនោះ ផ្អែកទៅលក្ខខណ្ឌ ៤បាន ៤អត់។ ៤បាន គឺទី១ ពលរដ្ឋជាម្ចាស់ផ្ទះមានឯកសារគ្រប់គ្រាន់ មានសៀវភៅស្នាក់នៅ និងសៀវភៅសន្សំប្រាក់។ ទីពីរ ពលរដ្ឋជាម្ចាស់ផ្ទះរស់នៅអចិន្ត្រៃយ៍ ពុំទាន់មានសៀវភៅស្នាក់នៅ។ ទី៣ ពលរដ្ឋជាម្ចាស់ផ្ទះរស់នៅអចិន្ត្រៃយ៍ មិនទាន់ចងក្រងជាសហគមន៍ និងទី៤ ពលរដ្ឋជាសមាជិកសហគមន៍ជួលផ្ទះស្នាក់នៅអចិន្ត្រៃយ៍រយៈពេល ៣ឆ្នាំឡើងទៅមុនឆ្នាំ២០០៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។