ពលរដ្ឋមានបញ្ហាដីធ្លីនៅសង្កាត់ចាក់អង្រែលើ ខណ្ឌមានជ័យ និងសង្កាត់ដង្កោ រាជធានីភ្នំពេញ នៅថ្ងៃទី២៧ មេសា លើកគ្នាមកក្រសួងរៀបចំដែនដី នគរូបនីយកម្ម និងសំណង់ ដើម្បីសួរអំពីការដោះស្រាយដីធ្លីរបស់ពួកគាត់ ដែលអូសបន្លាយមកជាច្រើនឆ្នាំហើយ។
ពលរដ្ឋមានបញ្ហាដីធ្លីនៅភូមិព្រែកតាគង់១ និងភូមិខ្វា ខណ្ឌដង្កោ ប្រមាណ ១០០នាក់ មកជួបជុំ និងស្រែកទាមទារនៅមុខក្រសួងរៀបចំដែនដី នគរូបនីយកម្ម និងសំណង់ ឲ្យមន្ត្រីក្រសួងនេះផ្ដល់ព័ត៌មានអំពីការវិវឌ្ឍន៍ក្នុងការដោះស្រាយរឿងដីធ្លី ដែលពួកគាត់ចង់បានប័ណ្ណកម្មសិទ្ធិ និងអភិវឌ្ឍនៅនឹងកន្លែង។
ពលរដ្ឋទាំងនេះ គឺក្នុងចំណោមពលរដ្ឋ ៥០០គ្រួសារកំពុងរស់នៅក្នុងតំបន់បឹងទំពុន និងបឹងជើងឯក ដែលមួយផ្នែកត្រូវបានរាជរដ្ឋាភិបាលចាត់ទុកថាជាអាងស្តុកទឹក និងមួយផ្នែកទៀត ត្រូវបានរដ្ឋាភិបាលប្រគល់ឲ្យក្រុមហ៊ុន អាយ.អិន.ជី (ING Holding) អភិវឌ្ឍក្រុងរណបនៅភាគខាងត្បូងភ្នំពេញ។
អ្នកភូមិមួយរូប គឺកញ្ញា ម៉ៅ លុនហេង ថ្លែងថា មូលហេតុដែលអ្នកភូមិនាំគ្នាមកក្រសួងដែនដី ព្រោះអ្នកភូមិកាន់តែបារម្ភអំពីការបាត់បង់ដី និងផ្ទះសម្បែង ដោយសារគម្រោងអភិវឌ្ឍន៍ទាំងនេះ៖ « ថ្ងៃនេះ គឺដើម្បីទាមទារឲ្យក្រសួងជួយរៀបចំការងារទាំងអស់ហ្នឹងឲ្យលឿនឲ្យពួកខ្ញុំ ពីព្រោះថាឥឡូវ កន្លែងពួកខ្ញុំ គឺកាន់តែស្ថិតក្នុងការភ័យខ្លាចមែនទែនហើយ គឺដោយសារគេបានចេញគម្រោងមកហើយ គឺភូមិខ្ញុំហ្នឹងប៉ះពាល់ដល់អាងស្តុកទឹក និងប៉ះពាល់ដល់ក្រុមហ៊ុន អាយ . អិន . ជី។ អ៊ីចឹង ពួក ខ្ញុំអត់ អាចរស់នៅបន្តការភ័យខ្លាចអ៊ីចឹងរហូតទេ។ ពួកខ្ញុំត្រូវការការដោះស្រាយពីក្រសួង ស្នើសុំក្រសួង រៀបចំឲ្យពួកខ្ញុំ ហើយក៏ស្នើសុំឲ្យក្រសួងចុះទៅពិនិត្យ ហើយ ធ្វើការ លើការស្នើសុំរបស់ពួក ខ្ញុំឲ្យ បានឆាប់ »។
កាលពីខែមិថុនា ឆ្នាំ២០១៦ អ្នកភូមិដែលប៉ះពាល់ បានស្នើសុំឲ្យរដ្ឋមន្ត្រីក្រសួងដែនដី ជួបពិភាក្សាដើម្បីកាត់ឆ្វៀលដីរបស់ពលរដ្ឋចេញពីគម្រោងទាំងនេះ និងផ្ដល់ប័ណ្ណកម្មសិទ្ធិដល់ពួកគាត់។ កាលពីថ្ងៃទី២ ខែមីនា ឆ្នាំ២០១៧ មន្ត្រីក្រសួងដែនដី បានបញ្ជូនសំណើសុំរបស់អ្នកភូមិទៅរដ្ឋបាលរាជធានីភ្នំពេញ។
ពលរដ្ឋមួយរូបទៀត គឺលោក សុខ ឃីម មានប្រសាសន៍ថា ពួកលោកចង់បានការឆ្លើយតបពីក្រសួងដែនដី៖ « ខែ៤ ជិតចូល ខែ៥ ទៀតហើយ វាស្ងាត់ឈឹង។ ដូច្នេះពួកយើងរស់នៅក្នុងសហគមន៍ ដែលជា សហគមន៍ក្នុងតំបន់អភិវឌ្ឍន៍ក្រុមហ៊ុន ។ យើងរស់នៅក្នុងសេចក្ដីភ័យខ្លាចបារម្ភជានិច្ច។ ដូច្នេះយើង មកបញ្ជាក់ឲ្យច្បាស់ថា ក្រសួង ធ្វើការ ដល់ណាហើយ កុំចេះតែសម្ងំស្ងៀមដោយមិន ផ្ដល់ព័ត៌មាន ដល់ពលរដ្ឋ។ យើងរស់ក្នុងភ័យខ្លាចជានិច្ចយ៉ាងនេះ យើងមិនអាចនៅសុខបានទេ។ អ៊ីចឹងយើងត្រូវតែមកទីនេះ ដើម្បីចង់ដឹងព័ត៌មានរបស់ពួកយើង »។
តំណាងអ្នកភូមិព្រែកតាគង់១ គឺលោក អ៊ុំ ណារី ថ្លែងក្រោយពេលជួបជាមួយមន្ត្រីដោះស្រាយបញ្ហាដីធ្លីនៅក្រសួងដែនដី គឺលោក ជា ស្រ៊ុន នៅថ្ងៃដដែលណែនាំឲ្យអ្នកភូមិមកជួបលោកម្ដងទៀតនៅថ្ងៃទី៣ ខែឧសភា។ លោករំពឹងថា ក្រសួងដែនដី នឹងមានព័ត៌មានអំពីដំណោះស្រាយល្អពេលជួបគ្នានៅខែឧសភា នោះ៖ « សង្ឃឹម ថាថ្ងៃ ទី៣ នោះ យើងនឹងមានដំណោះស្រាយល្អជាងនេះទៅទៀត គឺជួប ទាំង សាលាក្រុង ជួបទាំងក្រសួង។ យើងនឹងយកផលប៉ះពាល់ទាំងប៉ុន្មានមកដាក់លើតុ ដើម្បីជជែកទាំងអស់គ្នា ទាំង សាលាក្រុង ទាំងក្រសួង និងសហគមន៍ពួកខ្ញុំ ដើម្បីដោះស្រាយផលប៉ះពាល់ ។ ក្រសួងគាត់មានចំណាត់ការមួយថា ឯកសារនេះគាត់នឹងមិនយកទៅទុកដូចមុនទេ។ គាត់នឹងបន្តធ្វើមិនឈប់ទេ ដើម្បីដំណោះស្រាយជូនប្រជាពលរដ្ឋ »។
អ្នកភូមិសម្រេចរំសាយគ្នាវិញនៅវេលាថ្ងៃត្រង់ បន្ទាប់ពីទទួលបានការឆ្លើយតបរបស់មន្ត្រីដោះស្រាយបញ្ហាដីធ្លីនៅក្រសួងដែនដី។ ពួកគាត់ចាត់ទុកការឆ្លើយតបរបស់មន្ត្រីនៅព្រឹកថ្ងៃទី២៧ មេសា ថាជាលទ្ធផលវិជ្ជមាន។
ក្នុងលិខិតរបស់ក្រសួងដែនដី បង្ហាញថា ក្រុមការងារដោះស្រាយវិវាទដីធ្លីទី២៧ ស្រាវជ្រាវឃើញថា ដីដែលអ្នកភូមិស្នើសុំកាត់ចេញនោះ គឺពិតជាស្ថិតនៅក្នុងគម្រោងអភិវឌ្ឍន៍របស់ក្រុមហ៊ុន អាយ.អិន.ជី (ING Holding) ដែលរដ្ឋាភិបាលផ្ដល់ឲ្យកាលពីឆ្នាំ២០១១ និងដីមួយចំនួនទៀត ស្ថិតនៅក្នុងអាងស្តុកទឹក ដែលរដ្ឋាភិបាលកំណត់តាមអនុក្រឹត្យកាលពីឆ្នាំ២០០៨ ស្ដីពីការកំណត់ផ្ទៃបឹងជើងឯក និងប្រឡាយនៅក្នុងខណ្ឌដង្កោ និងខណ្ឌមានជ័យ រាជធានីភ្នំពេញ និងស្រុកតាខ្មៅ ខេត្តកណ្ដាល ជាសម្បត្តិរដ្ឋ។
លោក អ៊ុំ ណារី ឲ្យដឹងថា ផ្ទៃគម្រោងនេះមានទំហំ ៥២០ហិកតារ។ ពួកលោកក៏សុំឲ្យរដ្ឋាភិបាលលុបចោលអនុក្រឹត្យទាំងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។