អភិបាលខេត្តព្រះសីហនុ ស្នើប្រជាពលរដ្ឋដែលសង់ផ្ទះរស់នៅលើដីអនុក្រឹត្យលេខ៧៦ ដែលរដ្ឋហាមឃាត់សម្រាប់រក្សាប្រភពទឹកស្អាតនៅតំបន់ក្បាលឆាយ ឬនៅក្នុងបរិវេណដី ៥៥ហិកតារនៅសង្កាត់១ ឲ្យទៅចុះឈ្មោះទទួលយកចំណែកដីនៅទីតាំងផ្សេង ដែលរដ្ឋបាលខេត្តផ្តល់ជូន និងមានសុវត្ថិភាពតាមផ្លូវច្បាប់។
បញ្ហានេះ អ្នកឃ្លាំមើលសង្គម បានស្នើដល់រដ្ឋបាលខេត្តនេះថា ក្រោយបណ្ដេញពលរដ្ឋចេញពីទីតាំងបរិវេណដីទាំង ៥៥ហិកតារ អាជ្ញាធរត្រូវតែយកទីតាំងនោះដាំដើមឈើឡើងវិញ ដោយមិនត្រូវប្រគល់ ឬលក់បន្តឲ្យឈ្មួញដូចធ្លាប់អនុវត្តនាពេលកន្លងមកទៀតទេ។
អភិបាលខេត្តព្រះសីហនុ លោក យន្ត មីន បានអំពាវនាវជាថ្មីទៀតឲ្យប្រជាពលរដ្ឋទាំងអស់ដែលបានទៅសង់ផ្ទះ ឬមានឈ្មោះរស់នៅលើដីរដ្ឋបានហាមឃាត់ លើដីអនុក្រឹត្យលេខ៧៦ នៅតំបន់រក្សាប្រភពទឹកស្អាតក្បាលឆាយ ឬក្នុងបរិវេណដី ៥៥ហិកតារ មានទីតាំងនៅសង្កាត់១ ក្រុងព្រះសីហនុ ត្រូវទៅចុះឈ្មោះចាប់ឆ្នោតយកចំណែកដីសង់ផ្ទះថ្មី ដែលរដ្ឋបាលខេត្តរៀបចំជូនមានទីតាំងនៅជាប់ទីតាំងចាស់។
លោកបញ្ជាក់ថា ទំហំដីដែលរដ្ឋបាលខេត្តបម្រុងទុកជូនពលរដ្ឋដែលរស់នៅលើដីខុសច្បាប់ទាំង ៥៥ហិកតារ អាចមានចន្លោះពី ២៥០ ទៅ ៣០០គ្រួសារ ហើយទំហំដីដែលអាជ្ញាធរផ្តល់ជូន គឺមានទំហំ ៥ គុណ ២០ម៉ែត្រ និងមានសុវត្ថិភាពរស់នៅស្របច្បាប់។
លោក យន្ត មីន បានព្រមានថា រដ្ឋបាលខេត្តនេះនឹងមិនអនុញ្ញាតឲ្យប្រជាពលរដ្ឋទៅសង់ផ្ទះរស់នៅលើដីរដ្ឋហាមឃាត់ សម្រាប់រក្សាប្រភពទឹកស្អាតតំបន់ក្បាលឆាយ ក្នុងបរិវេណដីទាំង ៥៥ហិកតារទៀតទេ ហើយបើមានពលរដ្ឋណាម្នាក់ប្រឆាំងនឹងផែនការការពារតំបន់រក្សាប្រភពទឹកស្អាតរបស់អាជ្ញាធរ នឹងត្រូវផ្ដន្ទាទោសតាមច្បាប់៖ « ពេលនេះអ្នករស់នៅក្នុងបរិវេណដី ៥៥ហិកតារហ្នឹង ត្រូវតែរុះរើផ្ទះ ឬទីលំនៅមករស់នៅ ឬសង់ផ្ទះរស់នៅខាងក្នុងវិញ ដើម្បីប្រគល់ទីតាំងនោះជូនសម្រាប់ប្រភពទឹកស្អាតតំបន់ក្បាលឆាយគ្រប់គ្រងវិញ។ តាមស្មារតីអនុក្រឹត្យថ្មីលេខ១១៦ របស់រដ្ឋាភិបាលនេះ គឺបានផ្តល់អំណាចដល់រដ្ឋបាលខេត្តព្រះសីហនុ រៀបចំចាត់ចែងដោយធ្វើការជម្លៀសបងប្អូនពលរដ្ឋរស់នៅក្នុងបរិវេណដីរដ្ឋហាមឃាត់ ៥៥ហិកតារ ទៅកាន់ទីតាំងផ្សេង ហើយសម្រាប់ពលរដ្ឋណាមានទំហំដីធំនៅខាងក្នុងបរិវេណ ៥៥ហិកតារហ្នឹង ពេលមករស់នៅខាងក្រៅ គឺត្រូវរុះរើខ្លះ ដើម្បីចែកដល់អ្នកផ្សេង »។
ប្រជាពលរដ្ឋមួយចំនួនដែលមានផ្ទះសង់នៅលើដីក្នុងបរិវេណដីតំបន់ក្បាលឆាយ ៥៥ហិកតារ ផ្ទះសម្បែងរបស់ពួកគាត់ត្រូវអាជ្ញាធរខេត្តព្រះសីហនុ ឈូសកម្ទេចរាបដល់ដី និងបានគំរាមពលរដ្ឋរស់នៅតំបន់នេះមិនឲ្យតវ៉ា ឬថតយករូបភាពនៃសកម្មភាពគ្រឿងចក្រឈូសបំផ្លាញផ្ទះរបស់ពួកគេថែមទៀត។
ប្រជាពលរដ្ឋមួយចំនួន ស្នើមិនបញ្ចេញឈ្មោះ បានទទូចដល់លោកនាយករដ្ឋមន្ត្រី ហ៊ុន សែន ជួយរកយុត្តិធម៌ និងស្នើរស់នៅលើដីធ្លាប់រស់នៅយូរឆ្នាំ។ ជាងនេះទៀត ក្រុមប្រជាពលរដ្ឋដែលរដ្ឋបាលខេត្តព្រះសីហនុ ចោទថាបានមកតាំងទីលំនៅលើដីរដ្ឋហាមឃាត់ក្នុងបរិវេណដី ៥៥ហិកតារ សង្កាត់១ នាតំបន់ក្បាលឆាយ ថ្លែងថា ទំហំដីដែលរដ្ឋបាលខេត្តផ្តល់ជូនពួកគេមានទំហំតូចពេក ហើយទីតាំងដីផ្តល់ជូននោះហាក់មិនមានភាពស្របច្បាប់ត្រឹមត្រូវទេ ព្រោះដីផ្តល់ជូននោះនៅលើទីតាំងដីរបស់ប្រជាពលរដ្ឋផ្សេង។
ក្រុមពលរដ្ឋ ឲ្យដឹងថា ទំហំដីផ្ទះ និងដីកសិកម្មដែលពួកគេកំពុងរស់នៅក្នុងសង្កាត់១ ដែលត្រូវអាជ្ញាធរបណ្ដេញចេញមានទំហំធំ និងមានដាំរុក្ខជាតិ ឬដំណាំហូបផ្លែនៅលើដីនោះជាច្រើនឆ្នាំមកហើយ៖ « គឺអាជ្ញាធរបានបិទសិទ្ធិគ្រប់បែបយ៉ាង ហើយបានដើររុះរើផ្ទះប្រជាពលរដ្ឋ និងបង្ខិតបង្ខំប្រជាពលរដ្ឋឲ្យផ្ដិតមេដៃ ត្រូវយល់ព្រមទទួលយកដីក្បាល ៥ គុណ ២០ម៉ែត្រ ដែលរដ្ឋបាលខេត្តផ្តល់ជូន។ ជាងនេះ គេយកស្នាមមេដៃរបស់ប្រជាពលរដ្ឋទទួលបានពីការគំរាមកំហែងនោះ យកទៅផ្សព្វផ្សាយឲ្យអ្នកកាសែតដែលត្រូវដងត្រូវផ្លែជាមួយអាជ្ញាធរ ផ្សព្វផ្សាយថា ប្រជាពលរដ្ឋរស់នៅតំបន់នេះបានយល់ព្រមទទួលយក និងការដោះដូរលំនៅឋានទៅកាន់ទីតាំងផ្សេងរួចហើយ។ ប៉ុន្តែតាមការពិតជាក់ស្តែង គឺមិនដែលពលរដ្ឋទៅឆោតល្ងង់យកដីមានទំហំធំ ទៅដូរយកដីតូចចង្អៀតនោះទេ »។
បញ្ហានេះដែរ មន្ត្រីសង្គមស៊ីវិលឃ្លាំមើលការគោរពសិទ្ធិមនុស្សមួយចំនួននាខេត្តព្រះសីហនុ បានស្នើដល់រដ្ឋបាលខេត្តនេះ ត្រូវស្វែងរកដំណោះស្រាយដីធ្លីជូនប្រជាពលរដ្ឋដែលនៅសេសសល់ និងបន្តការតវ៉ានេះដោយសន្តិវិធី ជាជាងប្រើអំពើហិង្សា ឬប្រើប្រព័ន្ធតុលាការ និងកម្លាំងប្រដាប់អាវុធ ដើម្បីគំរាមកំហែងបំបិទសិទ្ធិមិនឲ្យពលរដ្ឋសម្ដែងមតិ។ បន្ថែមលើនេះ រដ្ឋបាលខេត្តគួរតែបែងចែកចំណែកដីបម្រុងទុកជូនពលរដ្ឋ ដែលយល់ព្រមប្ដូរទីតាំងរស់នៅទៅកាន់ទីតាំងផ្សេងពីបរិវេណដីរដ្ឋហាមឃាត់ទាំង ៥៥ហិកតារនោះ ឲ្យមានទំហំធំជាង ៥ គុណ ២០ម៉ែត្រ ព្រោះទំហំដីដែលអាជ្ញាធរផ្តល់ជូននេះតូចពេក មិនអាចឲ្យពួកគេដាំដំណាំរួមផ្សំ ដើម្បីចិញ្ចឹមជីវិតបានទេ។
ពលរដ្ឋរំពឹងថា រដ្ឋបាលខេត្តនឹងយកដីនោះទៅដាំកូនឈើ និងអភិរក្សឲ្យបានគង់វង្ស ដោយមិនត្រូវលក់ដូរបន្ត ឬវិនិយោគទៅឲ្យឈ្មួញ ដូចរដ្ឋបាលខេត្តនេះធ្លាប់បានអនុវត្តនៅតាមទីតាំងមួយចំនួននាមូលដ្ឋានខេត្តព្រះសីហនុ នាពេលកន្លងទៅទៀតទេ។ ហើយម្យ៉ាងទៀត ត្រូវចៀសវាងកុំឲ្យដូចពាក្យមួយឃ្លាដែលគេនិយមនិយាយតគ្នាថា «ដេញអាតូច យកឲ្យអាធំ»។
ឆ្លើយតបបញ្ហានេះ អភិបាលខេត្តព្រះសីហនុ លោក យន្ត មីន បញ្ជាក់ថា ដីអនុក្រឹត្យលេខ៧៦ ឬដីរដ្ឋហាមឃាត់សម្រាប់រក្សាប្រភពទឹកស្អាតនៅតំបន់ក្បាលឆាយ នាបរិវេណដី ៥៥ហិកតារ ដែលរដ្ឋបាលខេត្តមិនតម្រូវឲ្យពលរដ្ឋទៅសង់ផ្ទះរស់នៅអនាធិបតេយ្យនេះ គឺរដ្ឋបាលខេត្តនឹងយកមកដាំកូនឈើឡើងវិញទាំងអស់។ អភិបាលរូបនេះបានប្រកាសក្ដែងៗថា បរិវេណដីទាំង ៥៥ហិកតារនេះ នឹងមិនត្រូវលក់ដូរ ឬដកហូតពីប្រជាពលរដ្ឋ ដើម្បីយកទៅឲ្យឈ្មួញ ឬបុគ្គលផ្សេងដូចពាក្យចចាមអារ៉ាមបានផ្សព្វផ្សាយនាពេលកន្លងទៅនោះទេ គឺរដ្ឋបាលខេត្តនឹងដាំកូនឈើ ហើយអភិរក្សឲ្យបានគង់វង្ស៖ « យើងត្រូវអនុវត្តតាមអនុក្រឹត្យថ្មី១១៦ ឲ្យបានទាំងអស់គ្នា ហើយបងប្អូនដែលសង់ផ្ទះរស់នៅលើដី ៥៥ហិកតារ ដែលរដ្ឋបានហាមឃាត់នោះ ត្រូវរុះរើផ្ទះមករស់នៅលើដីដែលរដ្ឋបាលខេត្តបម្រុងទុកផ្តល់ជូន មានទីតាំងនៅក្បែរនោះ និងមានសុវត្ថិភាពផ្លូវច្បាប់ត្រឹមត្រូវ។ សូមបងប្អូនប្រជាពលរដ្ឋ ត្រូវជឿជាក់លើរដ្ឋបាលខេត្តព្រះសីហនុ ពិសេសសម្ដេចតេជោ ដែលខ្ញុំជាកូនចៅនៅថ្នាក់ខេត្តនេះ នឹងខំអនុវត្តតាមមិនឲ្យឃ្លៀងឃ្លាតពីគោលនយោបាយរបស់សម្ដេចនោះទេ គឺខិតខំបម្រើបងប្អូនប្រជាពលរដ្ឋ ឲ្យការរស់នៅមានការរីកចម្រើនជាបន្តបន្ទាប់ពីមួយថ្ងៃទៅមួយថ្ងៃ »។
បច្ចុប្បន្ននេះ រដ្ឋបាលខេត្តព្រះសីហនុ បានស្នើកម្លាំងប្រដាប់អាវុធចម្រុះរាប់សិបនាក់ក្នុងខេត្តនេះ មានកម្លាំងកងរាជអាវុធហត្ថ កម្លាំងនគរបាល និងកម្លាំងយោធា ជាដើម ដើម្បីពង្រាយកម្លាំងរង់ចាំការពារសកម្មភាពប្រើគ្រឿងចក្រឈូសកំណត់ព្រំដីការពារប្រភពទឹកស្អាតនៅតំបន់ក្បាលឆាយនាបរិវេណដី ៥៥ហិកតារ មានទីតាំងនៅសង្កាត់១ ក្រុងព្រះសីហនុ។
ប្រធានក្រុមការងារដឹកនាំសកម្មភាពឈូសឆាយកំណត់ព្រំដីរក្សាប្រភពទឹកស្អាតនៅតំបន់ក្បាលឆាយ និងប្រើធម៌ក្តៅទៅលើពលរដ្ឋ ដែលរដ្ឋបាលខេត្តនេះចោទថាសង់ផ្ទះរស់នៅលើដីរដ្ឋហាមឃាត់នេះ លោក ស្រ៊ុន ស្រ៊ន់ អភិបាលរងខេត្តព្រះសីហនុ។
សកម្មភាពនេះ ត្រូវប្រជាពលរដ្ឋមានផ្ទះសង់នៅលើបរិវេណដី ៥៥ហិកតារនោះ ឲ្យដឹងថា មានផ្ទះប្រជាពលរដ្ឋរាប់សិបខ្នង ត្រូវគ្រឿងចក្រ និងត្រូវអាជ្ញាធរខេត្តព្រះសីហនុ រុះរើ និងឈូសកម្ទេចចោល ហើយបានគំរាមចាប់ពលរដ្ឋដាក់គុកច្រវាក់ បើសិនជាពលរដ្ឋណាម្នាក់ហ៊ានចេញមុខតវ៉ា និងថតរូបសកម្មភាពរបស់អាជ្ញាធររុះរើផ្ទះ ឬលំនៅឋានរបស់ពួកគេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។