Opens in new windowប្រជាពលរដ្ឋក្រីក្រក្នុង ៣សង្កាត់ ចំនួន ៣០គ្រួសារ ក្នុងចំណោម ៨២គ្រួសារ ដែលរស់នៅសំណង់អនាធិបតេយ្យនៅក្រុងបាត់ដំបង ខេត្តបាត់ដំបង នៅរសៀលថ្ងៃទី៦ តុលា នាំគ្នាចាប់ឆ្នោតទទួលដីឡូដែលរៀបចំឡើងដោយអង្គការលំនៅឋានមនុស្សជាតិកម្ពុជា និងអាជ្ញាធរក្រុងបាត់ដំបង។ ការចាប់ឆ្នោតទទួលដីឡូនេះ ដើម្បីសម្រួលដល់ការរស់នៅប្រជាពលរដ្ឋ បន្ទាប់ពីពួកគាត់រស់នៅលើដីសំណង់អនាធិបតេយ្យអស់ជាច្រើនឆ្នាំ។
ប្រជាពលរដ្ឋដែលរស់នៅលើដីសំណង់អនាធិបតេយ្យទាំង ៣០គ្រួសារ នៅក្រុងបាត់ដំបង ត្រូវបានអាជ្ញាធរក្រុងបាត់ដំបង និងអង្គការលំនៅឋានមនុស្សជាតិកម្ពុជា រៀបចំឲ្យចាប់ឆ្នោតទទួលដីឡូនៅសាលាសង្កាត់ព្រែកព្រះស្ដេច ក្រុងបាត់ដំបង ក្រោមការឃ្លាំមើលពីអង្គការសង្គមស៊ីវិលមួយចំនួននៅក្នុងខេត្តបាត់ដំបង។
ប្រធានកម្មវិធីអង្គការលំនៅឋានមនុស្សជាតិកម្ពុជា ប្រចាំខេត្តបាត់ដំបង លោក តេង គឹមសាន មានប្រសាសន៍នៅក្នុងពិធីចាប់ឆ្នោតចែកដីឡូជូនប្រជាពលរដ្ឋនៅរសៀលថ្ងៃទី៦ តុលា ថា ប្រជាពលរដ្ឋចំនួន ៣០គ្រួសារ ក្នុងចំណោម ៨២គ្រួសារដែលមានជីវភាពក្រីក្រ ហើយរស់នៅលើដីសំណង់អនាធិបតេយ្យនៅសង្កាត់ចំនួន៣ គឺសង្កាត់ព្រែកព្រះស្ដេច សង្កាត់រតនៈ និងសង្កាត់ស្វាយប៉ោ ក្រុងបាត់ដំបង ខេត្តបាត់ដំបង។ លោកបន្តថា ប្រជាពលរដ្ឋទាំងនោះនឹងទទួលបានដីមួយគ្រួសារមួយឡូ ដែលមានទំហំទទឹង ៤ម៉ែត្រកន្លះ និងបណ្ដោយ ៨ម៉ែត្រ នៅចំណុចភូមិអូរខ្ជាយ សង្កាត់ព្រែកព្រះស្ដេច ក្រុងបាត់ដំបង៖ «បាទ! ក្រោយពីប្រជាពលរដ្ឋចាប់ឆ្នោតបានហើយ យើងនឹងផ្ដល់បង្កាន់ដៃដែលមានកិច្ចសន្យាមួយជូនពួកគាត់ គឺតម្រូវឲ្យប្រជាពលរដ្ឋត្រូវទៅរស់នៅលើដីនោះតាមកិច្ចសន្យានៃដីសង្គមកិច្ច»។
លោកបន្តថា ប្រជាពលរដ្ឋចំនួន ៥២គ្រួសារទៀត នឹងបែងចែកជាបន្តបន្ទាប់នៅពេលក្រោយ គឺបន្ទាប់ពីអង្គការលំនៅឋានមនុស្សជាតិកម្ពុជា ធ្វើការចាក់ដី និងរៀបចំប្រព័ន្ធលូរួច។
ប្រជាពលរដ្ឋមួយចំនួនដែលបានចូលរួមចាប់ឆ្នោតទទួលដីឡូនៅសាលាសង្កាត់ព្រែកព្រះស្ដេច ថ្លែងថា ពួកគាត់ទន្ទឹងរង់ចាំឲ្យអាជ្ញាធរដោះស្រាយបែងចែកដីឡូ ដើម្បីសង់លំនៅឋាននេះជាច្រើនឆ្នាំមកហើយ ប៉ុន្តែទើបតែមានឱកាសចាប់ឆ្នោតទទួលដីជាលើកដំបូងនេះ។ អ្នកភូមិបន្តថា ពួកគាត់មានក្ដីសប្បាយរីករាយជាខ្លាំង ដែលបានចាប់ឆ្នោតទទួលដីធ្វើជាកម្មសិទ្ធិរបស់ខ្លួននេះ៖ «ពួកខ្ញុំសប្បាយចិត្តដែលទទួលបានដី ប៉ុន្តែពួកខ្ញុំមិនដឹងថាដីដែលអង្គការ និងអាជ្ញាធរផ្ដល់ឲ្យនេះ ទៅជាយ៉ាងណានោះទេទៅថ្ងៃអនាគត»។
ទាក់ទងនឹងបញ្ហានេះដែរ អភិបាលរងក្រុងបាត់ដំបង លោក ឌី ពៅ មានប្រសាសន៍ថា ប្រជាពលរដ្ឋដែលចាប់ឆ្នោតទទួលដីនេះ អ្នកខ្លះរស់នៅសំណង់អនាធិបតេយ្យតាមទីវត្តអារាម និងតាមដងផ្លូវនានាក្នុងក្រុងបាត់ដំបង ធ្វើឲ្យប៉ះពាល់ដល់សណ្ដាប់ធ្នាប់សាធារណៈ ទើបអាជ្ញាធរក្រុងបានសហការជាមួយអង្គការលំនៅឋានមនុស្សជាតិកម្ពុជា រៀបចំឲ្យពួកគាត់ចាប់ឆ្នោតបែងចែកដីឡូជូនប្រជាពលរដ្ឋ ដើម្បីឲ្យមានរបៀបរៀបរយក្នុងក្រុងបាត់ដំបង។ លោកអះអាងថា ប្រជាពលរដ្ឋបន្ទាប់ពីទទួលបានដីហើយ ត្រូវទៅរស់នៅលើដីនោះយ៉ាងហោចណាស់ឲ្យបាន ៦ខែក្នុងមួយឆ្នាំ៖ «ការជ្រើសរើសប្រជាពលរដ្ឋឲ្យទទួលយកដីឡូនេះ ធ្វើឡើងដោយគ្មានការបង្ខិតបង្ខំពួកគាត់នោះទេ គឺប្រជាពលរដ្ឋស្ម័គ្រចិត្តទៅរស់លើដីបែងចែកនេះដោយខ្លួនឯង»។
ទោះជាយ៉ាងនេះក្ដី ដីឡូដែលប្រជាពលរដ្ឋទទួលបាននោះ អាជ្ញាធរពុំទាន់ចេញប្លង់រឹងស្របច្បាប់ជូនពួកគាត់នៅឡើយទេ។ ដីនេះ ប្រជាពលរដ្ឋនឹងទទួលបានប័ណ្ណកម្មសិទ្ធិដីធ្លីស្របច្បាប់ ឬហៅថាប្លង់រឹង លុះណាពួកគាត់ទៅរស់នៅលើដីនោះរយៈពេល ១០ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។