ប្រជាពលរដ្ឋមានទំនាស់ដីធ្លីមកពីស្រុកស្នួល ខេត្តក្រចេះ រាប់រយនាក់ នៅព្រឹកថ្ងៃទី៥ ខែសីហា បាននាំគ្នាដើរហែក្បួនទៅផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដើម្បីស្នើឲ្យជួយដោះស្រាយទំនាស់ដី និងផ្តល់ប្លង់កម្មសិទ្ធិជូនពួកគាត់។ ប៉ុន្តែកិច្ចខិតខំប្រឹងប្រែងនេះ ត្រូវកម្លាំងបង្ក្រាបបាតុករប្រដាប់ដោយដំបង និងខែល រាប់រយនាក់ រារាំង និងបំបែកមិនឲ្យចូលទៅដល់មុខផ្ទះប្រមុខដឹកនាំទេ។
បុរសឈ្មោះ សុន មិនា ស្ថិតក្នុងចំណោមប្រជាពលរដ្ឋផ្សេងទៀត ឲ្យដឹងថា ការដើរហែក្បួននេះ គឺចេញពីវត្តសាមគ្គីរង្សី សង្កាត់ស្ទឹងមានជ័យ ក្រុងភ្នំពេញ។ លោកបន្តថា ការប្រមូលផ្តុំគ្នានេះ គឺមានបំណងស្នើឲ្យប្រមុខដឹកនាំ ជួយអន្តរាគមន៍ទៅសាលាខេត្តក្រចេះ ឲ្យផ្តល់ប័ណ្ណកម្មសិទ្ធិដីធ្លី ដែលក្រុមយុវជនស្ម័គ្រចិត្តបានវាស់វែង និងចេញសលាកបត្ររួចជិត ៤០០ក្បាលដី (៣៩១) ជូនពួកគាត់។ លោកថា បច្ចុប្បន្ននេះ ដីបង្កបង្កើនផលរបស់ពួកគាត់កំពុងត្រូវក្រុមហ៊ុនឯកជនក្នុងមូលដ្ឋាន រំលោភយក ហើយមន្ត្រីស្ថាប័នពាក់ព័ន្ធខេត្តក្រចេះ មិនរកដំណោះស្រាយជូនទេ។
ពលរដ្ឋផ្សេងទៀត បានចោទមន្ត្រីស្ថាប័នពាក់ព័ន្ធមួយចំនួនក្នុងខេត្តក្រចេះ ថាបានឃុបឃិតបើកដៃឲ្យឈ្មួញប្រើគ្រឿងចក្រឈូសឆាយរំលោភយកដីបង្កបង្កើនផល និងព្យាយាមមិនផ្តល់ប្លង់កម្មសិទ្ធិដីធ្លី ដែលក្រុមនិស្សិតបានវាស់រួចជូនពួកគាត់ប្រើប្រាស់ទេ។
ក្នុងសំឡេងយំខ្សឹបខ្សួលអួលដើមក ក្រុមប្រជាពលរដ្ឋប្រុសស្រីបានលើកដៃសំពះ សំណូមពរដល់លោកនាយករដ្ឋមន្ត្រី ហ៊ុន សែន ជួយរកយុត្តិធម៌លើទំនាស់ដីធ្លីនៅស្រុកស្នួល ខេត្តក្រចេះ និងស្នើផ្តល់ប័ណ្ណកម្មសិទ្ធិជូនពួកគាត់៖ «វាយកវិញហើយឥឡូវនេះ វាឈូសឆាយដំឡូងប្រជាពលរដ្ឋ។ វាវាស់វែងហើយ វាមិនចេញប្លង់ជូនប្រជាពលរដ្ឋទេ។ សន្យា១ខែថា១ខែ តែឥឡូវ២ឆ្នាំហើយ ប្រជាពលរដ្ឋមកទាមទារ ហើយ លោក ស ចំរ៉ុង គាត់មិនព្រមឲ្យសោះប្លង់។ ភូតខ្ញុំត្រឡប់ត្រឡិន ដាក់ឲ្យខ្ញុំទៅសួរសម្ដេច ហ៊ុន សែន ដែលគាត់បានមកចុះសម្ពោធនៅខេត្តក្រចេះ»។
សកម្មភាពដើរហែក្បួនរបស់ពលរដ្ឋមកពីខេត្តក្រចេះ មានទាំងកុមារតូចៗ និងមានទាំងលើកបដា មានរូបថត លោក ហ៊ុន សែន និងអ្នកស្រី ប៊ុន រ៉ានី ព្រមទាំងសលាកបត្រសម្គាល់ក្បាលដី មានបិទរូបថតប្រជាពលរដ្ឋមួយគ្រួសារៗថែមទៀត។
ទោះយ៉ាងណា ក្រុមប្រជាពលរដ្ឋមិនមានលទ្ធភាពចូលទៅដល់មុខផ្ទះ លោក ហ៊ុន សែន ទេ ព្រោះត្រូវកម្លាំងចម្រុះប្រដាប់ដោយខែល និងដំបងឆក់រាប់រយនាក់ រាំងខ្ទប់ និងរុញផ្ទប់បំបែកការប្រមូលផ្តុំ។
បន្ទាប់ពីត្រូវកម្លាំងចម្រុះរារាំង ក៏មានវត្តមានមន្ត្រីរដ្ឋាភិបាលបានចេញមុខមកទទួលយកញត្តិ ឬពាក្យបណ្ដឹងរបស់ប្រជាពលរដ្ឋនៅខាងកើតសួនច្បារនាគបាញ់ទឹក ខាងកើតវិមានឯករាជ្យ។
មេធាវីរាជរដ្ឋាភិបាលកម្ពុជា លោក ប៉ាល់ ចន្ទតារា ដែលចេញទទួលយកញត្តិពីអ្នកភូមិ ដោយសន្យាថា នឹងដាក់ជូនសំណូមពររបស់ប្រជាពលរដ្ឋនៅស្រុកស្នួល ដាក់ជូនប្រមុខដឹកនាំពិនិត្យ។ ប៉ុន្តែមិនបានបញ្ជាក់ថា នឹងដោះស្រាយនៅថ្ងៃណាឲ្យពិតប្រាកដទេ។
យ៉ាងណាក៏ដោយ លោក ណៃ វ៉ង់ដា ប្រធានក្រុមមេធាវីសមាគមអាដហុក (adhoc) ដែលចុះឃ្លាំមើលសកម្មភាពតវ៉ារបស់ប្រជាពលរដ្ឋ បានរិះគន់នីតិវិធីដោះស្រាយរបស់មន្ត្រីពាក់ព័ន្ធខេត្តក្រចេះ លើជម្លោះដីធ្លីនេះ។ លោកថា ទំនាស់នេះ លោក ហ៊ុន សែន គួរអន្តរាគមន៍ និងស្វែងរកយុត្តិធម៌ជូនពលរដ្ឋឲ្យបានឆាប់៖ «ការដែលគាត់ឡើងមកស្នើសុំឲ្យមានដំណោះស្រាយពីលោកនាយករដ្ឋមន្ត្រី ហ៊ុន សែន នេះ មិនមែនជារឿងខុសឆ្គងទេ។ ខ្ញុំគិតថា ជារឿងត្រឹមត្រូវណាស់ នៅពេលដែលអាជ្ញាធរមូលដ្ឋានមិនអាចដោះស្រាយជម្លោះដីធ្លីជាមួយក្រុមហ៊ុន ជាពិសេសក្រុមហ៊ុន ហ៊រីហ្សិន នេះ យើងឃើញថាមានតែនាយករដ្ឋមន្ត្រីនេះឯង អាចមានសិទ្ធិអំណាចអារកាត់ដោះស្រាយជូនប្រជាពលរដ្ឋបាន»។
បន្ទាប់ពីមន្ត្រីរដ្ឋាភិបាលទទួលយកញត្តិ ក្រុមប្រជាពលរដ្ឋក៏បានបំបែកការប្រមូលផ្តុំ និងវិលមកស្នាក់នៅក្នុងបរិវេណវត្តសាមគ្គីរង្សី ក្នុងសង្កាត់ស្ទឹងមានជ័យ ដើម្បីរង់ចាំស្តាប់ដំណោះស្រាយជាបន្តទៀត។
ពលរដ្ឋឲ្យដឹងថា ពួកគាត់បានធ្វើដំណើរមកពីខេត្តក្រចេះ និងស្នាក់នៅក្នុងវត្តសាមគ្គីរង្សី ប្រមាណ ២សប្ដាហ៍មកហើយ។
លោក ស ចំរ៉ុង អភិបាលខេត្តក្រចេះ មិនលើកទូរស័ព្ទ ដើម្បីបំភ្លឺជុំវិញទំនាស់ដីធ្លីរវាងប្រជាពលរដ្ឋ និងក្រុមហ៊ុនវិនិយោគនៅស្រុកស្នួល នេះទេ។
ញត្តិ ឬលិខិតរបស់ប្រជាពលរដ្ឋ ដាក់ជូនលោកនាយករដ្ឋមន្ត្រី ហ៊ុន សែន ឲ្យដឹងថា ដីកំពុងមានទំនាស់នេះ ពួកគាត់បានមកតាំងទីលំនៅ និងបង្កបង្កើនផល តាំងពីឆ្នាំ២០០០ រហូតដល់ឆ្នាំ២០០៨ ទើបមានក្រុមហ៊ុនឈ្មោះ ហ៊រីហ្សិន អាគ្រីខាល់ឆ័រ ឌីវឡុបមេន (Horizon Agriculture Development Co.,Ltd) បានមកឈូសឆាយលើដំណាំកសិកម្មពួកគាត់។ ពលរដ្ឋចោទថា សកម្មភាពក្រុមហ៊ុននេះ គឺមិនអនុវត្តតាមសេចក្តីជូនដំណឹង ឬ ស.ជ.ណ ដែលចេញ និងចុះហត្ថលេខាដោយលោកនាយករដ្ឋមន្ត្រី ហ៊ុន សែន នោះទេ។
ក្រោយមក ក្រុមប្រជាពលរដ្ឋក៏បានទទួលនូវបទបញ្ជាលេខ០០១ និងបានទទួលការវាស់វែងដី និងបានទទួលសលាកបត្រត្រឹមត្រូវពីក្រុមនិស្សិតស្ម័គ្រចិត្តរបស់លោកនាយកមន្ត្រីថែមទៀត។ ហេតុអ្វីបានជាក្រុមហ៊ុននៅបន្តរំលោភដីធ្លី និងអាជ្ញាធរខេត្តក្រចេះ មិនផ្តល់ប័ណ្ណកម្មសិទ្ធិដីធ្លីជូនពួកគាត់ដូច្នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។