អាជ្ញាធរ​ខេត្ត​ពោធិ៍សាត់​អះអាង​ថា​នឹង​ដោះស្រាយ​វិវាទ​ដី​ជាមួយ​ក្រុមហ៊ុន​ឧកញ៉ា​ទ្រីភាព​ជូន​ពលរដ្ឋ

ដោយ ជិន ជេដ្ឋា
2014.10.20
ជម្លោះ​ដី ពោធិ៍សាត់ ៣០៥ ប្រជាពលរដ្ឋ​មក​ពី​ស្រុក​វាលវែង ភ្នំក្រវាញ និង​ស្រុក​ក្រគរ ដើរ​ចូល​សាលា​ខេត្ត​ពោធិ៍សាត់ ដើម្បី​តវ៉ា​រឿង​ជម្លោះ​ដី​ជាមួយ​ក្រុមហ៊ុន​សម្បទាន កាល​ពី​ថ្ងៃ​ទី​១១ ឧសភា ឆ្នាំ​២០១៣។
RFA/Mondulkeo

អាជ្ញាធរ​ស្រុក​វាលវែង ខេត្ត​ពោធិ៍សាត់​អះអាង​ថា អាជ្ញាធរ​ស្រុក និង​ខេត្ត​កំពុង​ខ្នះខ្នែង​រក​វិធីសាស្ត្រ​ដោះស្រាយ​បញ្ចប់​វិវាទ​ដីធ្លី​រវាង​ប្រជា​ពលរដ្ឋ និង​ក្រុមហ៊ុន អឹម ឌី អេស(MDS) របស់​លោក​ឧកញ៉ា ទ្រី ភាព នៅ​តំបន់​អភិវឌ្ឍន៍​សេដ្ឋកិច្ច​ពិសេស​ឃុំ​ថ្មដា​ឲ្យ​បាន​ឆាប់។ ការ​អះអាង​របស់​អាជ្ញាធរ​ជា​ថ្មី​ទៀត​នេះ គឺ​នៅ​បន្ទាប់​ពី​ក្រុម​ពលរដ្ឋ​ស្រុក​វាលវែង រួម​ជាមួយ​ពលរដ្ឋ​មក​ពី​ស្រុក​ចំនួន​ពីរ​ទៀត​ក្នុង​ខេត្ត​ពោធិ៍សាត់ គ្រោង​នាំ​គ្នា​ដង្ហែ​ញត្តិ​ដាក់​ជូន​អភិបាល​ខេត្ត រដ្ឋសភា​ជាតិ និង​ផ្ទះ​របស់​លោក​នាយករដ្ឋមន្ត្រី ហ៊ុន សែន។

ក្រុម​ពលរដ្ឋ​ដែល​មាន​ជម្លោះ​ដីធ្លី​រ៉ាំរ៉ៃ​នៅ​តាម​តំបន់​មួយ​ចំនួន នៃ​ស្រុក​ក្រគរ ស្រុក​ភ្នំ​ក្រវាញ និង​ស្រុក​វាលវែង ខេត្ត​ពោធិ៍​សាត់ ឲ្យ​ដឹង​នៅ​ថ្ងៃ​ទី​១៩ ខែ​តុលា​ថា ពួកគាត់​ខ្លះ​កំពុង​ធ្វើ​ដំណើរ​តាម​ផ្លូវ និង​ខ្លះ​ទៀត​នឹង​ត្រូវ​ចេញ​ដំណើរ​នៅ​ពេល​ព្រឹក​ថ្ងៃ​២០ តុលា មក​កាន់​ទី​រួម​ខេត្ត​ពោធិ៍សាត់ ដើម្បី​រៀបចំ​ពិធី​ដង្ហែ​ញត្តិ​រួម​គ្នា។ ចំណែក​ក្រុម​ពលរដ្ឋ​ដែលធ្វើ​ដំណើរ​ឡើង​មក​ពី​ស្រុក​វាលវែង​ត្រូវ​អាជ្ញាធរស្រុក​ឃាត់​ទៅសាកសួរនៅសាលាស្រុក និង​បាន​សន្យាថា នឹងជួយ​ដោះស្រាយ​បញ្ហា​ដីធ្លី​ជូន​ពួកគាត់ឲ្យបានឆាប់ ជា​ថ្នូរ​នឹង​ការ​មិន​ឲ្យ​នាំគ្នា​ឡើង​តវ៉ា ឬ​ដង្ហែ​ញត្តិ។

អភិបាល​ស្រុក​វាលវែង​ដែល​ទើប​ឡើង​កាន់​តំណែង​ថ្មី​លោក ហេង សុភាណា មាន​ប្រសាសន៍​ថា អាជ្ញាធរ​បាន​ជួប​ជជែក​ជាមួយ​ពលរដ្ឋ និង​ពន្យល់​នូវ​ការ​ខិតខំ​ស្វែង​រក​ដំណោះ​ស្រាយ​លើ​បញ្ហា​ដីធ្លីជូន​ប្រជាពលរដ្ឋ​ពី​សំណាក់​អាជ្ញាធរ។ លោក​ថា​ក្រុម​ការងារ​នឹង​ចុះ​ពិនិត្យ​មើល​ទីតាំង​ដី​មាន​ជម្លោះ​នោះ​ឲ្យ​បាន​ជាក់​ស្ដែង​ម្ដង​ទៀត​ក្នុង​ពេល​ឆាប់​ៗ ប៉ុន្តែ​អាជ្ញាធរ និង​មន្ត្រី​ជំនាញ​ពាក់ព័ន្ធ​ត្រូវ​ការ​ពេល​វេលា​សមស្របក្នុងការសហការគ្នា ដើម្បី​ដោះស្រាយ​បញ្ចប់បញ្ហា​ជូន​ប្រជា​ពលរដ្ឋ៖ «ទាក់ទង​ជាមួយ​នឹង​ការ​ដោះស្រាយ​នេះ គឺ​ខាង​អាជ្ញាធរ​កំពុង​ដំណើរ​ការ​រៀបចំ​អស់​ហើយ ប៉ុន្តែ​ឥឡូវ​ខ្ញុំ​បាន​ជួប​ជជែក​ហើយ​គាត់​ថា​នឹង​យក​ឯកសារ​ដែល​ពាក់ព័ន្ធ​ធ្វើ​សំណើ​ទាំង​អស់​ហ្នឹង​មក​ជួប​ខ្ញុំ​ស្អែក»

តំណាង​ពលរដ្ឋ​ម្នាក់​មក​ឃុំ​ថ្មដាលោក ជា សាយ័ន មាន​ប្រសាសន៍​ថា ក្រុម​ពលរដ្ឋ​ពុំ​មាន​ជំនឿ​ច្រើន​លើ​ការ​សន្យា​ដោះស្រាយ​របស់​អាជ្ញាធរ​ស្រុក​ឡើយ ប៉ុន្តែ​លោកនឹង​រៀបចំ​ឯកសារ និង​ថតចម្លង​ញត្តិ​ទាមទារ​របស់​ពលរដ្ឋ​ជូន​អភិបាល​ស្រុក​ដែរ បន្ទាប់​ពី​ដាក់​ជូន​អភិបាល​ខេត្ត ប្រធាន​រដ្ឋសភា និង​លោក​នាយករដ្ឋមន្ត្រី ហ៊ុន សែន ​រួច​ហើយ។ លោកបន្ដថា លោក និង​អ្នក​ភូមិ​ចំនួន​៥​នាក់​ផ្សេង​ទៀតកំពុង​ធ្វើ​ដំណើរ​រួមគ្នានាំ​យក​ញត្តិ​របស់​ប្រជាពលរដ្ឋ​ចំនួន​៣៣​គ្រួសារ​មក​ពី​ភូមិ​ឯកភាព និង​ភូមិ​កណ្ដាល នៃ​ឃុំ​ថ្មដា​មកកាន់​ទី​រួម​ខេត្តពោធិ៍សាត់៖ «ថ្ងៃ​ស្អែក​នេះ​គ្រោង​ទៅ​ជួប​ចៅហ្វាយ​ខេត្ដ​ផង ប្រធាន​សភា​ជាតិ​ផង ហើយ​នឹង​សម្ដេច​នាយក​ផង។ បើ​គិត​ទៅ​ចៅហ្វាយ​ស្រុក​ដូរ​បី​ហើយ​នៅ​ខេត្ដ​ពោធិ៍​សាត់ មិន​ទាន់​បាន​ដំណោះស្រាយ​ឲ្យ​ប្រជា​ពលរដ្ឋ​ទេ ដោះស្រាយ​តែ​ខ្យល់។ គាត់​ថា​ចាំង​រាំង​ភ្លៀង​បាន​គាត់​ទៅ! អីចឹង​ខ្ញុំ​តម្កល់​ញតិ្ដ​ហ្នឹង​ទុក​សម្រាប់​ទៅ​ជូន​អភិបាល​ស្រុក ឲ្យ​ដាំ​ដុះ​ៗ​បើ​ក្រុមហ៊ុន​ដុះ​ទេ​ខ្ញុំ​លែង​មាន​ជំនឿ​ជា​ដាច់​ខាត​ទៅ​ថ្ងៃ​ក្រោយ»។

មន្ត្រី​សម្របសម្រួល​សមាគម​អាដហុក(Adhoc) ប្រចាំ​ខេត្ត​ពោធិ៍​សាត់​លោក ភួង សុធា ថ្លែង​ថា ជា​ច្រើន​ឆ្នាំ​មក​ហើយ​ដែល​អាជ្ញាធរ​បាន​សន្យា​ថា​នឹង​ដោះស្រាយ​ជូន​ប្រជា​ពលរដ្ឋ ប៉ុន្តែ​រហូត​មក​ដល់​បច្ចុប្បន្ន​ពុំ​មាន​លទ្ធផល​អ្វី​ទាំង​អស់។ លោក​យល់​ថា​អាជ្ញាធរ​ថ្នាក់​ស្រុក និង​ខេត្ត​​មិន​ងាយ​នឹងដោះ​ស្រាយ​បញ្ហា​នេះ​ចេញ​ឡើយ ពី​ព្រោះ​ទីតាំង​ដី​ដែល​កំពុង​មាន​ជម្លោះ​នោះ គឺ​ស្ថិតនៅ​ក្នុង​ដែន​អភិរក្ស និង​​តំបន់​អភិវឌ្ឍន៍​សេដ្ឋកិច្ច​ពិសេស​របស់​ក្រុមហ៊ុន អឹម ឌី អេស(MDS) ប៉ុន្ដែអ្នកភូមិធ្លាប់កាន់កាប់ និងអាស្រ័យផលជាច្រើនឆ្នាំមកហើយ៖ «ទាំង​អស់​ហ្នឹង​ហើយ​ដែល​រដ្ឋ ឬ​មួយ​ក៏​រាជរដ្ឋាភិបាល​ចេញ​អនុក្រិត្យ​ដក​ដី​ហ្នឹង​ទុក​សម្រាប់​ប្រជា​ពលរដ្ឋ តែ​បើ​សិន​ត្រឹម​តែ​កម្រិត​អាជ្ញាធរ​ស្រុក​គឺ​មិន​មាន​លទ្ធភាព​ក្នុង​ការ​ដោះស្រាយ​រឿង​ហ្នឹង​បាន​ទេ»។

តាម​គម្រោង​របស់​តំណាង​ពលរដ្ឋ​មក​ពី​ស្រុក​ទាំង​បី នឹង​មាន​អ្នកចូលរួមពិធីដាក់ញត្ដិនេះសរុប​ប្រមាណជា​១០០​នាក់ នាំ​គ្នា​ជួបជុំ​នៅ​ខាង​មុខ​សាលាខេត្ត​ពោធិ៍​សាត់ ហើយ​អាច​នឹង​អាច​នាំ​គ្នា​ដង្ហែ​ញត្តិ​តាម​បណ្ដោយ​ផ្លូវ​ជា​លេខ​៥ ឆ្ពោះ​ទៅ​កាន់​រាជធានី​ភ្នំពេញទៀត ប្រសិន​បើ​អាជ្ញាធរ​ខេត្ដមិន​ទទួល​យក​ញត្ដិ និង​ផ្ដល់​កាលបរិច្ឆេទ​ច្បាស់​ក្នុង​ការ​ដោះស្រាយ​បញ្ហា​ដីធ្លី​ជូន​ពួកគាត់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។