ប្រជាពលរដ្ឋជិត ២០០នាក់ដែលជាតំណាងគ្រួសារមានជម្លោះដីធ្លីជាមួយក្រុមហ៊ុនភ្នំពេញស៊ូហ្គើរ (Phnom Penh Sugar) របស់ឧកញ៉ា លី យ៉ុងផាត់ នៅស្រុកថ្ពង ខេត្តកំពង់ស្ពឺ នាំគ្នាមកដាក់ញត្តិនៅសាលាខេត្តកំពង់ស្ពឺ ស្វែងរកដំណោះស្រាយសមរម្យ។ អាជ្ញាធរខេត្តកំពង់ស្ពឺ បញ្ជាក់ថា មិនទាន់មានដំណោះស្រាយណាមួយនៅឡើយទេ ដោយត្រូវរង់ចាំការសិក្សាស្រាវជ្រាវលើបញ្ហាឲ្យលម្អិតសិន។
ពលរដ្ឋដែលចោទក្រុមហ៊ុនភ្នំពេញស៊ូហ្គើរថារំលោភដីធ្លី នៅព្រឹកថ្ងៃទី២ មីនា លើកគ្នាទៅកាន់សាលាខេត្តកំពង់ស្ពឺ ដើម្បីដាក់ញត្តិសុំអន្តរាគមន៍ពីអាជ្ញាធរលើជម្លោះដីធ្លីរ៉ាំរ៉ៃ។
អ្នកមកដាក់ញត្តិដែលធ្វើដំណើរមកពីភូមិចំនួន៦ នៃឃុំអមលាំង ចម្ងាយជិត ៦០គីឡូម៉ែត្រពីសាលាខេត្តកំពង់ស្ពឺ អះអាងថា មានប្រជាពលរដ្ឋចំនួន ៣២៤គ្រួសារនៅឃុំអមលាំង ដែលរងផលប៉ះពាល់ដោយគម្រោងដីសម្បទានសេដ្ឋកិច្ចរបស់រដ្ឋាភិបាល ឲ្យទៅក្រុមហ៊ុនភ្នំពេញស៊ូហ្គើរ។
ញត្តិរបស់ប្រជាពលរដ្ឋបញ្ជាក់ថា ក្រុមហ៊ុនភ្នំពេញស៊ូហ្គើរ នៅឆ្នាំ២០១០ បានឈូសឆាយប៉ះដីរបស់ប្រជាជន ហើយក្រុមហ៊ុនមិនបានផ្តល់សំណងសមរម្យឲ្យពលរដ្ឋឡើយ។
តំណាងសហគមន៍ប្រជាជនដែលមានជម្លោះដីធ្លីនៅឃុំអមលាំង លោកស្រី សុទ្ធ ទីម ត្អូញត្អែរថា ក្រោយពេលដែលបាត់បង់ដីធ្លី ប្រជាជននៅសហគមន៍របស់គាត់ពិបាករស់នៅ៖ « ប្រជាពលរដ្ឋជួបការលំបាកយ៉ាងច្រើន បាត់បង់ដីស្រែ អត់មានដីអាស្រ័យផល ជីវភាពគ្រួសារ កូនចៅទៅរៀន មានអ្នកខ្លះ កូនគាត់អត់បានទៅសិក្សាក៏មាន ដោយសារជីវភាពរបស់គាត់ខ្វះខាត »។
អ្នកដែលមកហែញត្តិ បាននាំគ្នាឈរនៅមុខរបងសាលាខេត្ត ស្រែករកដំណោះស្រាយ តែក្រោយមក ត្រូវសន្តិសុខប្រាប់ឲ្យចាកចេញពីរបង ដើម្បីថែរក្សាសណ្ដាប់ធ្នាប់សាធារណៈ។
តំណាងសហគមន៍ចំនួន ៧នាក់ ត្រូវបានអាជ្ញាធរហៅទៅជួប ដើម្បីពិភាក្សាពីញត្តិនោះ។ ដោយអភិបាលខេត្តកំពង់ស្ពឺ មានធុរៈចេញទៅបរទេស មន្ត្រីសាលាខេត្តកំពង់ស្ពឺ ប្រាប់ឲ្យអ្នកមកដាក់ញត្តិត្រឡប់ទៅផ្ទះវិញ ហើយថានឹងយកញត្តិរបស់ប្រជាសហគមន៍នេះ ជូនថ្នាក់លើដើម្បីសិក្សា។
ប្រធានអង្គការសមធម៌កម្ពុជា លោក អៀង វុទ្ធី ជំរុញឲ្យអាជ្ញាធរដោះស្រាយជម្លោះដីធ្លីនៅឃុំអមលាំង ឲ្យបានកាន់តែឆាប់ ដើម្បីឲ្យប្រជាពលរដ្ឋរស់នៅស្មើភាព៖ « កាលណាយើងពន្យារយូរ ធ្វើឲ្យប៉ះពាល់ដល់ជីវភាព និងការសិក្សារបស់ក្មេងៗ »។
លទ្ធផលនៃកិច្ចប្រជុំរបស់ក្រុមប្រឹក្សាខេត្តកំពង់ស្ពឺ នៅថ្ងៃទី១០ ខែកុម្ភៈ ឆ្នាំ២០១៦ បានស្នើឲ្យមន្ត្រីដែលធ្វើការពាក់ព័ន្ធវិស័យដីធ្លី ដោះស្រាយជម្លោះដីធ្លីជូនប្រជាពលរដ្ឋឲ្យបានសមស្រប និងត្រឹមត្រូវតាមនីតិវិធី។
ទោះបីជាយ៉ាងណា ប្រជាពលរដ្ឋដែលមានជម្លោះដីធ្លីនៅឃុំអមលាំង រំឭកថា ពួកគាត់ធ្លាប់ដាក់ញត្តិសុំដំណោះស្រាយសមរម្យអស់រយៈពេលជាង ៥ឆ្នាំមកហើយ ក៏ប៉ុន្តែអាជ្ញាធរមិនទាន់អន្តរាគមន៍នៅឡើយទេ។
ប្រជាពលរដ្ឋដែលមកដាក់ញត្តិ ប្រកាសថា ប្រសិនបើនៅតែគ្មានដំណោះស្រាយសមរម្យ ប្រជាសហគមន៍នឹងលើកគ្នាមកធ្វើបាតុកម្មនៅតាមស្ថាប័នដែលពាក់ព័ន្ធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។