Opens in new windowគណៈកម្មការទី១ នៃរដ្ឋសភា ទទួលបន្ទុកសិទ្ធិមនុស្ស អង្កេត និងទទួលពាក្យបណ្ដឹង នឹងពិនិត្យមើលសំណុំរឿងជម្លោះដីធ្លីរវាងប្រជាពលរដ្ឋ ២០គ្រួសារ និងក្រុមហ៊ុនចម្ការកៅស៊ូពាមជាំង នៅឃុំត្រស់ ស្រុករមាសហែក ខេត្តស្វាយរៀង ឡើងវិញ នៅបន្ទាប់ពីអាជ្ញាធរខេត្តដោះស្រាយមិនចេញ។
ជម្លោះដីធ្លីរវាងក្រុមហ៊ុនចម្ការកៅស៊ូពាមជាំង ជាមួយនឹងប្រជាពលរដ្ឋក្រីក្រ ២០គ្រួសារ នៅតែមានបញ្ហាស្មុគស្មាញក្នុងការដោះស្រាយ។
ប្រធានគណៈកម្មការទី១ នៃរដ្ឋសភា ទទួលបន្ទុកសិទ្ធិមនុស្ស អង្កេត និងទទួលពាក្យបណ្ដឹង លោក អេង ឆៃអ៊ាង មានប្រសាសន៍នៅថ្ងៃទី១៥ ខែកញ្ញា ថា អាជ្ញាធរខេត្តស្វាយរៀង មិនអាចទម្លាក់ចោលសំណុំរឿងជម្លោះដីធ្លីនៅភូមិបឹង ឃុំត្រស់ ស្រុករមាសហែក បានទេ គឺត្រូវតែមានគោលការណ៍ច្បាស់លាស់ក្នុងការដោះស្រាយដីធ្លី ដើម្បីធានាយុត្តិធម៌ជូនប្រជាពលរដ្ឋ៖ «ខ្ញុំនឹងពិនិត្យមើលសំណុំរឿង និងឯកសារពាក់ព័ន្ធទាំងអស់រួចហើយ ក្នុងករណីចាំបាច់ ខ្ញុំនឹងបញ្ជូនសំណើទៅអាជ្ញាធរជាតិដោះស្រាយទំនាស់ដីធ្លី ដើម្បីពិនិត្យ និងដោះស្រាយ»។
ការពិនិត្យសើរើសំណុំរឿងឡើងវិញនេះ នៅបន្ទាប់ពីប្រជាពលរដ្ឋទាំង ២០គ្រួសារអះអាងថា អភិបាលរងខេត្តស្វាយរៀង លោក រស់ ឆាយ បានប្រាប់ពួកគាត់នៅសាលាខេត្តកាលពីថ្ងៃទី១៤ ខែកញ្ញា ថា អាជ្ញាធរខេត្តគ្មានសិទ្ធិកាត់ដីទំហំជាង ៩១ហិកតារ ចែកជូនប្រជាពលរដ្ឋទាំង ២០គ្រួសារឡើយ ពោលគឺមានតែរដ្ឋាភិបាលប៉ុណ្ណោះ។ មិនអាចដកហូត ដោយសារក្រុមហ៊ុនចម្ការកៅស៊ូពាមជាំង ទទួលបាន ស.ជ.ណ ចុះថ្ងៃទី៣ ខែមករា ឆ្នាំ២០០៧ ស្ដីពីការផ្តល់ដីសម្បទានវិនិយោគដាំដើមកៅស៊ូ។
តំណាងឲ្យប្រជាពលរដ្ឋមានទំនាស់ដីធ្លី លោក តាត សេដ្ឋា និយាយទាំងខកចិត្តថា ដីអាជីវកម្ម ឬដីសម្បទានឲ្យក្រុមហ៊ុននោះ គឺរំលោភលើដីដែលធ្លាប់កាន់កាប់តាំងពីឆ្នាំ១៩៩៥ មក និងមានលិខិតស្នាមត្រឹមត្រូវពីអាជ្ញាធរភូមិ-ឃុំ។ លោកដាក់ការសង្ស័យថា អាជ្ញាធរខេត្តទំនងទទួលបានផលប្រយោជន៍ពីក្រុមហ៊ុន ទើបរកលេសមិនចង់ដោះស្រាយបញ្ចប់បញ្ហា៖ «លិខិតអនុញ្ញាតអាជីវកម្ម ឬស.ជ.ណ គឺកើតឡើងក្រោយពេលប្រជាជនកាន់កាប់យូរហើយ មិនមែនកើតមុនទេ ហើយប្រសិនបើអាជ្ញាធរខេត្តឲ្យតែដីក្រុមហ៊ុនធ្វើអាជីវកម្មហើយ គឺគ្មានសិទ្ធិដក មានន័យថា ក្រុមហ៊ុនទៅឈូសឆាយកន្លែងណាក៏បាន ពេលណាមានច្បាប់ហ្នឹងហើយ។ វាបំពានលើប្រជាពលរដ្ឋស្របច្បាប់ ហើយអាជ្ញាធរខេត្តគ្មានសិទ្ធិដោះស្រាយ អ៊ីចឹងវាដូចជាសម្ពាធមួយពិបាកមែនទែន»។
វិទ្យុអាស៊ីសេរី មិនអាចសុំការបំភ្លឺពីអភិបាលរងខេត្តស្វាយរៀង លោក រស់ ឆាយ បានទេនៅថ្ងៃទី១៥ ខែកញ្ញា ដោយទូរស័ព្ទចូលគ្មានអ្នកទទួល។
ទោះយ៉ាងណាក៏ដោយ មន្ត្រីសម្របសម្រួលនៃអង្គការសិទ្ធិមនុស្សលីកាដូ (LICADHO) ប្រចាំខេត្តស្វាយរៀង លោក នុត បូពិណ្ណារ័ត្ន យល់ឃើញថា អាជ្ញាធរខេត្តស្វាយរៀង គ្មានឆន្ទៈដោះស្រាយរឿងនេះនោះទេ។ លោកបញ្ជាក់ថា ជម្លោះដីធ្លីនេះកើតឡើងយូរយារណាស់មកហើយ ដូច្នេះអាជ្ញាធរខេត្តត្រូវរកដំណោះស្រាយឲ្យបានឆាប់ មិនត្រូវទុកឲ្យប្រជាពលរដ្ឋរស់នៅគ្មានដីបង្កបង្កើនផលចិញ្ចឹមជីវិតនោះទេ៖ «រឿងស្អីក៏ដោយ បើមានឆន្ទៈដោះស្រាយចេញហើយ។ ម្យ៉ាងវិញទៀត នៅក្នុងអនុក្រឹត្យលេខ០១ បានចែងហើយ ទោះបីជា ស.ជ.ណ ឬសម្បទានជាផ្លូវការតាមច្បាប់សេដ្ឋកិច្ចក៏ដោយ គឺគេឲ្យឆ្កៀល មិនឲ្យប៉ះពាល់ដីរបស់ប្រជាពលរដ្ឋ ប៉ុន្តែអ្នកអនុវត្តន៍ មិនធ្វើតាមអនុក្រឹត្យរបស់សម្ដេចនាយករដ្ឋមន្ត្រីទេ»។
ទាក់ទិននឹងជម្លោះដីធ្លីនេះ កាលពីខែមិថុនា កន្លងទៅ រដ្ឋសភាធ្លាប់ចេញលិខិតមួយច្បាប់ស្នើឲ្យអភិបាលខេត្តស្វាយរៀង ពន្លឿនការដោះស្រាយទំនាស់ដីធ្លីនេះឲ្យឆាប់ចប់ ដើម្បីកុំឲ្យប៉ះពាល់ដល់ផលប្រយោជន៍ និងជីវភាពរស់នៅរបស់ប្រជាពលរដ្ឋ ក្រោយពីប្រជាពលរដ្ឋតវ៉ានៅមុខរដ្ឋសភា ហើយបើមិនមានអ្វីប្រែប្រួលទេ នៅសប្ដាហ៍ខាងមុខនេះ ប្រជាពលរដ្ឋទាំង ២០គ្រួសារនោះ នឹងទៅទីក្រុងភ្នំពេញ ដើម្បីសុំអន្តរាគមន៍ពីរដ្ឋសភាជាថ្មីម្តងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។