ក្រុមហ៊ុនអូស៊ីអាយស៊ី (OCIC) ដែលទទួលសិទ្ធិអភិវឌ្ឍន៍ក្រុងរណបជ្រោយចង្វារនិងអាជ្ញាធរ កោះហៅអ្នកភូមិដើមគរដែលមានផ្ទះកំពុងរស់នៅ ហើយបានរងនូវផលប៉ះពាល់ មកជួបប្រជុំគ្នា នៅក្នុងបរិវេណក្រុមហ៊ុនក្នុងខណ្ឌជ្រោយចង្វារនៅថ្ងៃទី១១ សីហា។
ការកោះប្រជុំនេះ ដើម្បីស្រង់ឈ្មោះអ្នកដែលព្រម និងមិនព្រមទទួលគោលការណ៍ដោះស្រាយផលប៉ះពាល់ពីគម្រោងអភិវឌ្ឍន៍នោះ។
ប្រជាពលរដ្ឋ ភូមិដើមគរជើង សង្កាត់ជ្រោយចង្វារ ប្រមាណ៣៥ នាក់ក្នុងចំណោមអ្នកចូលរួមប្រជុំសរុប៤៨នាក់ ព្រមទទួលយកសំណងពីក្រុមហ៊ុនដោយស្ថិតក្រោមការសម្របសម្រួលរបស់អាជ្ញាធរដែន។
វត្ថុសំណងនោះ មួយគ្រួសារទទួលបានផ្ទះល្វែងមួយល្វែងទំហំ ៤គុណ១៤ម៉ែត្រ និងតូបលក់ដូរនៅផ្សារក្រុមហ៊ុនមួយនៅក្នុងតំបន់តែមួយនៃក្រុងរណបនោះ។
ពលរដ្ឋដែលព្រមទទួលយកសំណងដោះដូរនោះថ្លែងប្រហាក់ប្រហែលគ្នាថា ពួកគាត់មានទំហំដីតូច ខ្លះ៧គុណ៧ម៉ែត្រ ខ្លះទំហំ៣គុណ ៥ ឬ ១០ ម៉ែត្រជាដើម។
ពួកគាត់ថាការទទួលយកនោះដោយអស់ជម្រើសគ្មានឱកាសតវ៉ាច្រើនជាមួយអ្នកមាន ហើយម្យ៉ាងទៀតបច្ចុប្បន្នផ្ទះគាត់ ត្រូវលិចទឹក ខ្លះត្រូវកប់ខ្សាច់ដែលក្រុមហ៊ុនបូមចាក់បំពេញដីតំបន់នោះព័ទ្ធជុំវិញអស់ហើយ។
លោក សួន ឆើត អាយុ៣២ឆ្នាំ ដែលមានក្បាលដី២ ម៉ែត្រ កន្លះ បណ្ដោយ១០ម៉ែត្រ ជាប្រភេទដីភូមិ ដែលលោកកាន់កាប់ច្រើនឆ្នាំមកហើយ។ លោកថាសំណងនេះអាចទទួលយកបាន ហើយម្យ៉ាងលោកអត់ពេលតវ៉ាសម្រាប់ក្នុងរឿងនេះតទៅទៀតទេ៖ «វាជាសំណងដែលខ្ញុំអាចទទួលយកបានព្រោះនៅក្នុងតំបន់នោះខ្ញុំដីតូចជាងគេ ហើយវាពិបាកនឹងខ្សាច់ វាពិបាកនឹងអី ព្រោះកូនខ្ញុំវានៅតូចៗណាស់ ហើយផ្លូវវាចង្អៀតផង បើមានគឡគ្រោះថ្នាក់អីវាពិបាកដែរ»។
ចំណែកពលរដ្ឋម្នាក់ទៀតក្នុងចំណោម១០នាក់ផ្សេងទៀតនៅភូមិជាមួយគ្នាដែលមិនព្រមទទួលយកសំណងនោះ លោកទី ជា បញ្ជាក់ថា ដីគាត់ធំជាងគេ គឺទទឹង១៨ម៉ែត្រ បណ្ដោយ ៨០ម៉ែត្រ ប៉ុន្តែលោកត្រូវទទួលសំណងដូចអ្នកដែលមានដីតូចដែរ ម្យ៉ាងគ្រួសារលោកមិនចង់បាត់បង់កេរ្តិ៍ដំណែលភូមិចាស់របស់គាត់នោះទេ៖ «ដីធំកូនចៅនៅយូរហើយខ្ញុំស្ដាយស្រណោះដីភូមិម្ដាយខ្ញុំដែលទុកឲ្យយើងតាំងពីយូរហើយ ផ្ទះខ្ញុំតូចទាបយ៉ាងម៉េចក៍ដោយ ក៏ល្អជាងគេរហូតខ្ញុំមោទនភាពខ្លួនខ្ញុំ ផ្ទះខ្ញុំប្រឹងល្អ កញ្ចាស់ម៉េចក៏ជារបស់ខ្ញុំដែរអញ្ចឹងបានជាខ្ញុំអត់ព្រម»។
ពលរដ្ឋដែលចូលមកដោះស្រាយផ្ទាល់នៅក្រុមហ៊ុនចំនួន៣៥គ្រួសារនេះ ស្ថិតនៅក្នុងចំណោមពលរដ្ឋសរុបប្រមាណជាង៨០គ្រួសារទៀតនៅក្នុងភូមិនោះ។
ទាក់ទងបញ្ហានេះ អគ្គនាយករងក្រុមហ៊ុន OCIC លោក ទូច សំណាងដែលមានវត្តមានក្នុងកិច្ចប្រជុំរកដំណោះស្រាយនោះ មានប្រសាសន៍ថា បើពលរដ្ឋណាដែលមិនចង់ចាកចេញទៅរស់កន្លែងថ្មីទេក្រុមហ៊ុននឹងឆ្វៀលចេញពីគម្រោងអភិវឌ្ឍន៍ ហើយក្រុមហ៊ុននឹងជួយដោះស្រាយប្រព័ន្ធលូ ឬមួយក៏ផ្លូវភូមិទៅតាមលទ្ធភាពជាក់ស្ដែង៖ «ដូច្នេះយើងធ្វើនេះមានលក្ខណមិនបង្ខំទេ ឯកភាពទាល់តែស្របគ្នាទៀតព្រោះអ្វីដែលយើងផ្ដល់ឲ្យគឺមានច្រើនជាង ធំជាងគ្រាន់ថាដោះស្រាយជាផ្ទះប៉ុណ្ណឹង»។
ជាមួយគ្នានេះដែរមន្ត្រីទទួលបន្ទុកផ្នែកច្បាប់ នៃអង្គសិទ្ធិលំនៅឋាន លោក ណន អូនី ដែលចុះឃ្លាំមើលបញ្ហានេះដែរ មានប្រសាសន៍ថាការដោះស្រាយផ្ដល់សំណងទៅលើខ្នងផ្ទះ ដោយមិនដោះស្រាយតាមទំហំដី ឬចំនួនសមាជិកគ្រួសារនីមួយៗនោះ លោកយល់ថាជាការដោះស្រាយមួយដែលមិនសូវឆ្លើយតបនូវសេចក្ដីត្រូវការពិតប្រាកដនិងស្នើភាពគ្នានោះទេ។
បញ្ហានេះនឹងពិបាករកដំណោះស្រាយដែលឆាប់ទៅដល់ទីបញ្ចប់ដោយយុត្តិធម៌បានណាស់៖ «បើយើងដោះស្រាយទៅលើខ្នងផ្ទះឧទាហរណ៍គ្រួសារមួយមានគ្រួសារ ៣ នាក់ មួយទៀតមានគ្រួសារ៨នាក់ ឬ១០នាក់សួរថាតើការរស់នៅរបស់ពួកគាត់វាមានផលប៉ះពាល់របៀបម៉េច ចំណុចនេះហើយខ្ញុំពិនិត្យឃើញថា បើសិនក្រុមហ៊ុនអាចបន្ថែមខ្នងផ្ទះ ទៅឲ្យគ្រួសារដែលមានសមាជិកច្រើន ឬគ្រួសារដែលមានទំហំដីធំ ខ្ញុំគិតថានេះទើបជាដំណោះស្រាយ »។
លោកបន្តថានៅមានពលរដ្ឋប្រហែលជាងពាក់កណ្ដាលទៀតក្នុងភូមិដើមគរជើងដែលយល់ព្រមទទួលការដោះដូរនោះ ហើយពលរដ្ឋទាំងនោះភាគច្រើន គឺអ្នកដែលមានដីធំ និងផ្ទះរស់នៅសមល្មម បានទាមទារឲ្យក្រុមហ៊ុនគិតសំណងតាមតម្លៃដីទីផ្សារ ប៉ុន្តែខាងក្រុមហ៊ុន យល់ព្រមផ្ដល់ឲ្យតែ១៥ដុល្លារក្នុងមួយម៉ែត្រការ៉េ។
តែទោះយ៉ាងណា តំណាងក្រុមហ៊ុន និងអាជ្ញាធរថា អ្នកដែលមិនទាន់ត្រូវរ៉ូវគ្នាពេលនេះ មិនមានន័យថាបិទផ្លូវចរចា ឬពិភាក្សាគ្នាទៀតនោះទេ ក្រុមហ៊ុន នៅមានពេលដោះស្រាយជាដំណាក់ការក្រោយទៀត ហើយនៅផ្នែកណាដែលមិនត្រូវរ៉ូវគ្នាធ្ងន់ធ្ងរដែលអាចឈានឡើងដល់តុលាការនោះ ក្រុមហ៊ុនបានទម្លាក់ទៅឲ្យសាលាក្រុងជាអ្នកទទួលខុសត្រូវជំនួស។
ក្រុមហ៊ុន OCIC ទទួលបានសិទ្ធិវិយោគ៩៩ ឆ្នាំ ក្នុងអភិវឌ្ឍន៍ក្រុងរណបជ្រោយចង្វារបន្ទាប់ ពីគម្រោងទីមួយរបស់ខ្លួននៅកោះពេជ្រ។
ក្រុងរណបជ្រោយចង្វារនេះមានទំហំដីជិត៤រយ(៣៨៧)ហិកតារ គ្របដណ្ដប់លើសង្កាត់បី គឺសង្កាត់ ជ្រោយចង្វារ ព្រែកតាសេក និងព្រែកលៀប ស្ថិតតាមបណ្ដោយផ្លូវជាតិលេខ៦អា ចាប់ពីគល់ស្ពានជ្រោយចង្វារទៅ។
ទាំងអាជ្ញាធរ និងក្រុមហ៊ុន មិនទាន់បង្ហាញច្បាស់ថា មានពលរដ្ឋដែលមានផលប៉ះពាល់សរុបប៉ុន្មានពិតប្រាកដនោះទេរហូតមកដល់ពេលនេះ។
ការដោះស្រាយជំហ៊ានទី១នៅពេលនេះ គឺផ្ដោតលើពលរដ្ឋដែលមានផ្ទះនិងកំពុងរស់នៅជាក់ស្ដែងតាមការចង្អុលបង្ហាញពីអាជ្ញាធរមូលដ្ឋាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។