យោធិនចូលនិវត្តន៍ជាង ២០០គ្រួសារ ដែលរដ្ឋាភិបាលកាត់រំសាយ ហើយបញ្ជូនពួកគាត់ឲ្យទៅរស់នៅឃុំបឹងប្រាំ ស្រុកបវេល ខេត្តបាត់ដំបង ស្នើឲ្យអាជ្ញាធរពាក់ព័ន្ធពន្លឿនការដោះស្រាយទំនាស់ដីធ្លីឲ្យបានឆាប់រហ័ស ដើម្បីដាំដុះដោះស្រាយជីវភាពគ្រួសារ។ ការស្នើសុំនេះ បន្ទាប់ពីពួកគាត់ជួបការខ្វះខាតជីវភាពប្រចាំថ្ងៃ ហើយពុំមានដីសម្រាប់បង្កបង្កើនផល។
មន្ត្រីយោធិនចូលនិវត្តន៍នៅស្រុកបវេល លើកឡើងថា កន្លងមក អាជ្ញាធរពាក់ព័ន្ធបានចុះមកជួបពួកគាត់ខ្លះដែរ ប៉ុន្តែបានត្រឹមតែសន្យាខ្យល់ ហើយត្រឡប់ទៅវិញដោយពុំបានដោះស្រាយអ្វីឡើយ។
តំណាងយោធិនចូលនិវត្តន៍ម្នាក់ គឺលោក ម៉ុង សាន ឲ្យដឹងនៅថ្ងៃទី១៧ ឧសភា ថា ពួកគាត់ជាមន្ត្រីយោធិនចូលនិវត្តន៍ចំនួន ២៥០គ្រួសារ រស់នៅឃុំបឹងប្រាំ ស្រុកបវេល តាំងពីឆ្នាំ២០១២ មក មិនទាន់បានដីមួយម៉ែត្រក្រឡាដែលរដ្ឋាភិបាលសន្យាថា នឹងចែកជូនពួកគាត់ ២ហិកតារក្នុងមួយគ្រួសារនៅឡើយ។ លោកថា អាជ្ញាធរបានយកពួកគាត់មកទុកចោល ដោយមិនខ្វល់ពីទុក្ខលំបាក និងបែងចែកដីធ្លីជូនពួកគាត់សម្រាប់ដាំដុះឡើយ។ លោកបន្ថែមថា ពួកគាត់ប្រមាណ ៣០គ្រួសារ កំពុងជួបការលំបាកជាខ្លាំង ពីព្រោះគ្មានដីសម្រាប់ដាំដុះ ហើយម្យ៉ាងទៀតពុំមានលទ្ធភាពចេញទៅស្វែងរកការងារធ្វើឆ្ងាយពីផ្ទះសម្បែងបានឡើយ៖ « ពួកខ្ញុំគិតថា ប្រសិនបើរដ្ឋាភិបាលរកដីកសិកម្មចែកឲ្យពួកខ្ញុំមិនបានទេ បង្វែរចែកជាថវិកាទៅតាមតម្លៃដីក៏បានដែរ ដើម្បីជាការតបស្នងដែលពួកគាត់ខ្ញុំការពារជាតិកន្លងមក »។
ឆ្លើយតបនឹងបញ្ហានេះ មេឃុំបឹងប្រាំ លោក ឈា នី មានប្រសាសន៍ថា អាជ្ញាធរពាក់ព័ន្ធមិនបានព្រងើយកន្តើយចំពោះមន្ត្រីយោធិនចូលនិវត្តន៍ទាំងនោះឡើយ។ លោកអះអាងថា ទាំងមន្ត្រីយោធិន និងប្រជាពលរដ្ឋមានទំនាស់ដីធ្លីនៅឃុំបឹងប្រាំ ជាង ១៩០គ្រួសារ ជួបការលំបាកដោយសារខ្វះខាតដីដាំដុះដូចគ្នា។ លោកបន្ថែមថា បញ្ហាទាំងអស់នេះ អាជ្ញាធរខេត្តបាត់ដំបង នឹងចុះដោះស្រាយជូនពួកគាត់ក្នុងពេលឆាប់ៗ៖ « បាទ ! យើងមិនអាចទុកពេលវេលាឲ្យវែងឆ្ងាយតទៅទៀតបានទេ ពីព្រោះដល់រដូវដែលបងប្អូនត្រូវបង្កបង្កើនផលហើយ »។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី មានប្រសាសន៍ថា បញ្ហាយឺតយ៉ាវក្នុងការបែងចែកដីធ្លីជូនមន្ត្រីយោធិនចូលនិវត្តន៍ ដោយសារអាជ្ញាធរពាក់ព័ន្ធគ្មានចេតនាក្នុងការដោះស្រាយជូនពួកគាត់។ លោកកត់សម្គាល់ថា កន្លងមក អាជ្ញាធរមូលដ្ឋានបានត្រឹមតែសន្យាខ្យល់ជាមួយពលរដ្ឋ ដោយមិនហ៊ានសម្រេចចិត្តខ្លួនឯងដើម្បីដោះស្រាយជូនពួកគាត់ឡើយ៖ « បញ្ហាច្រើនណាស់សម្រាប់ពួកគាត់។ យើងមើលឃើញទី១ គឺរឿងជីវភាព។ ទី២ បញ្ហាការសិក្សាកូនចៅរបស់ពួកគាត់។ បើកាលណាពួកគាត់ប្រឈមបញ្ហាច្រើន ធ្វើឲ្យប៉ះពាល់ដល់ការអភិវឌ្ឍប្រទេសជាតិយើងដែរ »។
មន្ត្រីយោធិនចូលនិវត្តន៍ចំនួន ២៥០គ្រួសារនោះ ភាគច្រើនជាជនពិការ និងជនបាត់បង់សមត្ថភាពការងារ គឺរស់នៅពឹងផ្អែកប្រាក់ខែប្រមាណ ៤០ម៉ឺនរៀលក្នុងម្នាក់សម្រាប់ដោះស្រាយជីវភាពប្រចាំថ្ងៃ។ ក្នុងចំណោមនោះ មានតែយោធិនប្រមាណ ៣០គ្រួសារប៉ុណ្ណោះ ដែលបានរស់នៅលើផ្ទះមួយខ្នងដែលរដ្ឋាភិបាលបែងចែកឲ្យពួកគាត់ ក្រៅពីនោះបានធ្វើចំណាកស្រុកទៅប្រទេសថៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។