Oxfam៖ ធនាគារ ANZ មិន​ជួយ​ពលរដ្ឋ​ដែល​រង​ផល​ប៉ះពាល់​ដោយ​គម្រោង​ស្ករ​អំពៅ

ដោយ សាន សែល
2016-02-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
តវ៉ា ធនាគារ អេ.អិន.ហ្សិត ៦២០
ប្រជាពលរដ្ឋ​មាន​បញ្ហា​ដីធ្លី​មក​ពី​ស្រុក​ថ្ពង និង​ស្រុក​ឱរ៉ាល់ ខេត្ត​កំពង់ស្ពឺ តវ៉ា​នៅ​ខាង​មុខ​ធនាគារ អេ.អិន.ហ្សិត (ANZ) នា​រាជធានី​ភ្នំពេញ នៅ​ថ្ងៃ​ទី​១៤ សីហា ២០១៤។
RFA/Uon Chhin

ទាក់ទង​នឹង​រឿង​ស្ករ​អំពៅ​របស់​ឧកញ៉ា លី យ៉ុងផាត់ អង្គការ​អន្តរជាតិ​មួយ​ឈ្មោះ អុកស្វាម អូស្រា្តលី (Oxfam's Australia) បាន​ចេញ​ផ្សាយ​របាយការណ៍​មួយ​រក​ឃើញ​ថា ធនាគារ អេ.អិន.ហ្ស៉ិត (ANZ) ដែល​បាន​ផ្តល់​ប្រាក់​កម្ចី​ឲ្យ​ក្រុមហ៊ុន​ភ្នំពេញ​ស៊ូហ្គើរ (Phnom Penh Sugar) មិន​ទាន់​បាន​ចេញ​មុខ​ដោះស្រាយ​ផល​ប៉ះពាល់​បណ្ដាល​មក​ពី​គម្រោង​អភិវឌ្ឍន៍​ស្ករ​អំពៅ ជូន​អ្នក​ភូមិ​នៅ​ឡើយ។ ពលរដ្ឋ​ដែល​ត្រូវ​បាន​គេ​បណ្ដេញ​ចេញ អះអាង​ថា គ្រួសារ​គាត់​កំពុង​លំបាក​ក្នុង​ការ​រស់នៅ។

ប្រធាន​អង្គការ​សមធម៌​កម្ពុជា លោក អៀង វុទ្ធី នៅ​ថ្ងៃ​ទី​១៦ កុម្ភៈ សម្ដែង​ការ​សោកស្ដាយ​នៅ​ពេល​ធនាគារ អេ.អិន.ហ្ស៉ិត មិន​បាន​ចូលរួម​ដោះស្រាយ​បញ្ហា​ដល់​ប្រជាជន​រងគ្រោះ។ លោក​ចង់​ឃើញ​ធនាគារ​របស់​អូស្ត្រាលី មួយ​នេះ ប្ដេជ្ញា​ជា​សាធារណៈ​លើក​កម្ពស់​ការ​គោរព​សិទ្ធិ​មនុស្ស៖ «ទាក់ទង​នឹង​ស្ករ​អំពៅ ឃើញ​ថា​ធនាគារ​មិន​បាន​ធ្វើ​ដូច​គោល​នយោបាយ​របស់​ខ្លួន​បាន​ចែង​នោះ​ទេ។ ឃើញ​ថា​មិន​មាន​ការ​សិក្សា​ឲ្យ​បាន​ស៊ី​ជម្រៅ នៅ​ពេល​ដែល​បញ្ហា​កើត​ឡើង​ហើយ ខ្លួន​បែរ​ជា​មិន​ធ្វើ​ការ​ដោះស្រាយ​ទៅ​វិញ»

ការ​សម្ដែង​ការ​សោកស្ដាយ​របស់​ប្រធាន​អង្គការ​សមធម៌​កម្ពុជា រូប​នេះ នៅ​បន្ទាប់​ពី​របាយការណ៍​ដាក់​ចំណង​ជើង​ថា «នៅ​បន្ត​វិនិយោគ​លើ​ការ​រំលោភ​ដីធ្លី (Still Banking on Land Grabs)» ដែល​ត្រូវ​ចេញ​ផ្សាយ​នៅ​ថ្ងៃ​ទី​១៥ កុម្ភៈ រក​ឃើញ​ថា ធនាគារ អេ.អិន.ហ្ស៉ិត មិន​បាន​ចាត់​វិធានការ​ជា​ដុំ​កំភួន​ណា​មួយ ដើម្បី​ជួយ​សហគមន៍​ដែល​បាត់បង់​ដីធ្លី​ដោយសារ​ប្រាក់​កម្ចី​របស់​ខ្លួន បន្ទាប់​ពី​ធនាគារ​នេះ​បង្ហាញ​ពី​ឆន្ទៈ​ចរចា​ជាមួយ​សហគមន៍​ដែល​រង​ផល​ប៉ះពាល់​កាល​ពី​ពីរ​ឆ្នាំ​មុន។

របាយការណ៍​ដដែល​នេះ បង្ហាញ​ភស្តុតាង​ថា ធនាគារ​ចំនួន​បួន​របស់​អូស្ត្រាលី មាន​ធនាគារ អេ.អិន.ហ្ស៉ិត ធនាគារ ស៊ី.ប៊ី.អេ (CBA) ធនាគារ អិន.អេ.ប៊ី (NAB) ធនាគារ វេសត៍ផេក (Westpac) ជាប់​ពាក់ព័ន្ធ​នឹង​ក្រុមហ៊ុន​មួយ​ចំនួន​នៅ​ប្រទេស​កម្ពុជា ប្រទេស​ប្រេស៊ីល (Brazil) និង​ប្រទេស​ឥណ្ឌូនេស៊ី (Indonesia) ករណី​ការ​កាប់​ឈើ​ដោយ​ខុស​ច្បាប់ ការ​បណ្ដេញ​ចេញ​ដោយ​បង្ខំ និង​ពលកម្ម​កុមារ ជាដើម។

របាយការណ៍​របស់ អុកស្វាម ចង់​បង្ហាញ​ដល់​អ្នក​ដែល​ប្រើប្រាស់​សេវាកម្ម​ធនាគារ​ទាំង​៤ ពី​ការ​គ្រប់គ្រង​លំហូរ​សាច់​ប្រាក់​របស់​ពួក​គេ។ សាច់​ប្រាក់​របស់​ពួក​គេ ត្រូវ​បាន​ធនាគារ​ទាំង​បួន​នេះ​យក​ទៅ​វិនិយោគ​លើ​គម្រោង​ដែល​រំលោភ​សិទ្ធិ​មនុស្ស និង​បំផ្លាញ​បរិស្ថាន​របស់​ប្រជាជន។

ក្រុមហ៊ុន​ ភ្នំពេញ ស៊ូហ្គើរ ៦២០
ទីតាំង​ក្រុមហ៊ុន ភ្នំពេញ ស៊ូហ្គើរ (Phnom Penh Sugar Co., LTD) របស់​លោក លី យ៉ុងផាត់ ស្ថិត​ក្នុង​ស្រុក​ឱរ៉ាល់ ខេត្ត​កំពង់ស្ពឺ។ RFA/Keo Nimol

នៅ​ឆ្នាំ​២០១១ ធនាគារ អេ.អិន.ហ្ស៉ិត បាន​ផ្តល់​កម្ចី​រាប់​លាន​ដុល្លារ​ដល់​ក្រុមហ៊ុន​ភ្នំពេញ​ស៊ូហ្គើរ របស់​ឧកញ៉ា លី យ៉ុងផាត់ ក្នុង​គម្រោង​ផលិត​ស្ករ​អំពៅ​ក្នុង​ខេត្ត​កំពង់ស្ពឺ ក៏ប៉ុន្តែ​បន្ទាប់​ពី​រឿង​អាស្រូវ​ស្ករ​ឈាម ពាក់ព័ន្ធ​នឹង​ការ​រំលោភ​សិទ្ធិ​មនុស្ស​ផ្ទុះ​ឡើង ធនាគារ អេ.អិន.ហ្ស៉ិត ប្រកាស​ថា ក្រុមហ៊ុន​ភ្នំពេញ​ស៊ូហ្គើរ បាន​សង​ប្រាក់​កម្ចី​ត្រឡប់​មក​វិញ​កាល​ពី​ខែ​កក្កដា ឆ្នាំ​២០១៤។

យ៉ាង​ណា​ក៏ដោយ របាយការណ៍​កម្រាស់ ៦១​ទំព័រ ជា​ភាសា​អង់គ្លេស តាម​ដាន​ឃើញ​ថា ធនាគារ អេ.អិន.ហ្ស៉ិត មិន​បាន​យក​ប្រាក់​ចំណេញ​ពី​ការប្រាក់​ដែល​ឲ្យ​ក្រុមហ៊ុន​ភ្នំពេញ​ស៊ូហ្គើរ​ខ្ចី មក​ជួយ​ប្រជាជន​ដែល​រង​ផល​ប៉ះពាល់​នោះ​ទេ។

វិទ្យុ​អាស៊ីសេរី មិន​អាច​ទាក់ទង​តំណាង​ធនាគារ អេ.អិន.ហ្ស៉ិត រ៉ូយ៉ាល់ នៅ​កម្ពុជា ដើម្បី​សុំ​ការ​បំភ្លឺ​បាន​ទេ​នៅ​ថ្ងៃ​ទី​១៦ កុម្ភៈ។

ពលរដ្ឋ​ដែល​ត្រូវ​បង្ខំ​ផ្លាស់​ទីលំនៅ លោក ស៊ឹម ផល ប្រាប់​ថា លោក​បាន​បាត់បង់​ដី​ស្រែ ២០​ហិកតារ។ លោក​ត្អូញត្អែរ​ថា កន្លែង​ថ្មី​ដែល​គ្រួសារ​លោក​រស់នៅ ខ្វះខាត​ទឹក​សម្រាប់​ប្រើប្រាស់ គ្មាន​ដី​គ្រប់គ្រាន់​សម្រាប់​ធ្វើ​ស្រែ​ចម្ការ ហើយ​នៅ​ឆ្ងាយ​ពី​ទីតាំង​សាលា​រៀន​របស់​កូនៗ​លោក៖ «ពិបាក​ណាស់ គឺ​ចង្អៀត​ចង្អល់​តាំង​ពី​ក្រុមហ៊ុន​ដាំ​អំពៅ​ចឹង​ទៅ គាប​សង្កត់​រឿង​គោ​ពពែ ការ​ដឹក​អូស​ចេញ​ចូល ការ​រក​ស៊ី​របស់​ប្រជាពលរដ្ឋ​តាម​ដង​អូរ មិន​អាច​ចូល​ផ្ដេសផ្ដាស​បាន​ទេ»

គម្រោង​វិនិយោគ​ស្ករ​អំពៅ​របស់​ក្រុមហ៊ុន​ភ្នំពេញ​ស៊ូហ្គើរ បង្ខំ​ប្រជាជន​រាប់​រយ​គ្រួសារ​ឲ្យ​ផ្លាស់​ទីលំនៅ។ អ្នក​ភូមិ​ដែល​ត្រូវ​គេ​បណ្ដេញ​ចេញ ត្អូញត្អែរ​ថា ការ​រស់នៅ​ប្រចាំ​ថ្ងៃ​កំពុង​ខ្វះខាត​ស្បៀង ដោយ​គ្មាន​ដី​គ្រប់គ្រាន់​សម្រាប់​ធ្វើ​ស្រែ​ចម្ការ។ ចំណែក​សង្គម​ស៊ីវិល ក៏​មើល​ឃើញ​ថា មាន​ពលកម្ម​កុមារ​នៅ​ក្នុង​ចម្ការ​អំពៅ​ផង​ដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល