នៅព្រឹកថ្ងៃអង្គារ ទី១០ ខែមិថុនា ប្រជាពលរដ្ឋជិត ៦០គ្រួសារ រស់នៅភូមិ៣ ក្នុងសង្កាត់ស្រះចក ខណ្ឌដូនពេញ បានឈរលើកបដាតវ៉ាតាមបណ្តោយផ្លូវសហព័ន្ធរុស្ស៊ី ដើម្បីស្នើដល់ប្រមុខដឹកនាំរដ្ឋាភិបាលកម្ពុជា ជួយអន្តរាគមន៍ផ្តល់ប័ណ្ណកម្មសិទ្ធិដីធ្លីជូនពួកគាត់។
ការប្រមូលផ្តុំរបស់ប្រជាពលរដ្ឋ ធ្វើឡើងនៅលើទីតាំងភូមិ៣ នៅតាមបណ្តោយផ្លូវសហព័ន្ធរុស្ស៊ី ទល់មុខទីស្ដីការគណៈរដ្ឋមន្ត្រី ដោយមានលើកបដា និងពាក់អាវ ឬមួកមាននិម្មិតសញ្ញាគណបក្សប្រជាជនកម្ពុជា ផង។
ក្រុមប្រជាពលរដ្ឋបានទទូចដល់លោកនាយករដ្ឋមន្ត្រី ហ៊ុន សែន ជួយអន្តរាគមន៍ផ្តល់ប័ណ្ណកម្មសិទ្ធិដីធ្លី និងសៀវភៅគ្រួសារជូនពលរដ្ឋ ដែលធ្លាប់រស់នៅលើដីនេះតាំងពីឆ្នាំ១៩៧៩ មក។
ពលរដ្ឋបញ្ជាក់ថា បច្ចុប្បន្ននេះ ដីធ្លី និងលំនៅឋានកំពុងរស់នៅរបស់ពួកគាត់ អាជ្ញាធរក្រុងមានគម្រោងបណ្ដេញ ដើម្បីយកដីអភិវឌ្ឍវិស័យផ្សេងៗ៖ «ពេលជួយប្រជាពលរដ្ឋបាន សូមដក ស.ជ.ណ លេខ៧១៤ហ្នឹងចេញទៅ អាណិតប្រជាពលរដ្ឋផង។ សំណូមពរហើយសំណូមពរទៀត សម្ដេចសូមជួយប្រជាជនផង ហើយជំហររបស់ប្រជាជន ដាច់ខាតមិនចាកចេញពីភូមិ៣ហ្នឹងដែរ។ ៣០ឆ្នាំហើយអត់ទាន់មានប័ណ្ណគ្រួសារទេ គឺគេអត់ធ្វើឲ្យទេ គឺមានតែសៀវភៅស្នាក់នៅ។ ហើយយើងសំណូមពរឲ្យជួយធ្វើប័ណ្ណគ្រួសារឲ្យផង ព្រោះអីប្រជាជនគេមានប័ណ្ណគ្រួសារគ្រប់គ្នា ហេតុអីពលរដ្ឋនៅម្តុំហ្នឹងអត់មានប័ណ្ណគ្រួសារ។ ផ្ទះនៅជួរមុខផ្លូវសហព័ន្ធរុស្ស៊ីហ្នឹងហ្មង ប៉ុន្តែប័ណ្ណគ្រួសារក៏អត់មាន អីក៏អត់មានដែរ ហើយគេចង់គិតថាប្រជាជនយ៉ាងម៉េច បានជាគេអត់ចេញប័ណ្ណគ្រួសារឲ្យអ៊ីចឹង»។
ទោះយ៉ាងណា មិនមានមន្ត្រីរដ្ឋាភិបាលចេញមុខជួបតំណាងប្រជាពលរដ្ឋជិត ៦០គ្រួសារ នៅភូមិ៣ ដែលឈរលើកបដាតវ៉ានៅថ្ងៃអង្គារ ទី១០ ខែមិថុនា នៅឡើយទេ។ ប្រជាពលរដ្ឋបញ្ជាក់ថា នឹងប្រមូលផ្តុំគ្នាតវ៉ាបន្តទៀតនៅព្រឹកថ្ងៃពុធ ទី១១ ខែមិថុនា។
ទាក់ទិនបញ្ហានេះ តាមលិខិតជូនដំណឹងពីទីស្ដីការគណៈរដ្ឋមន្ត្រី មានចុះហត្ថលេខាថ្ងៃទី១៦ ខែមិថុនា ឆ្នាំ២០១១ បានសម្រេចថា ដីរដ្ឋមានទំហំផ្ទៃក្រឡាសរុបប្រមាណជាង ៨ពាន់ម៉ែត្រការ៉េ (៨.១៥០) មានទីតាំងនៅតាមបណ្តោយផ្លូវសហព័ន្ធរុស្ស៊ី ក្នុងសង្កាត់ស្រះចក ខណ្ឌដូនពេញ ទុកជូនក្រសួងសេដ្ឋកិច្ច និងហិរញ្ញវត្ថុ ដើម្បីសាងសង់ទីស្នាក់ការកណ្ដាល នៃគណៈកម្មការមូលបត្រកម្ពុជា។ ទោះជាបែបនេះក្តី ប្រជាពលរដ្ឋជិត ៦០គ្រួសារ ដែលមានលំនៅឋាននៅលើដីនោះ មិនព្រមចាកចេញតាមការទាមទាររបស់រដ្ឋាភិបាលទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។