អ្នក​ភូមិ​នៅ​ព្រៃវែង​ចោទ​អាជ្ញាធរ​មូលដ្ឋាន​ថា​ឃុបឃិត​គ្នា​លក់​ដី​សាលាឆទាន

ដោយ ហ៊ុំ ចំរើន
2014.08.28

អ្នក​ភូមិ​នៅ​ស្រុក​ពោធិ៍រៀង ខេត្ត​ព្រៃវែង ប្រមាណ ៣០០​នាក់ ចោទ​ប្រកាន់​អាជ្ញាធរ​ប៉ូលិស​មូលដ្ឋាន ថា​ឃុបឃិត​គ្នា​លក់​ដី​សាលាឆទាន​ដែល​ជា​សម្បត្តិ​សាធារណៈ​របស់​រដ្ឋ ធ្វើ​ជា​ប្រយោជន៍​បុគ្គល​ដោយ​មិន​មាន​ការ​ឯកភាព​ពី​ប្រជាពលរដ្ឋ។

ការ​ចោទ​ប្រកាន់​នេះ កើត​ឡើង​បន្ទាប់​ពី​ពួក​គាត់​នាំ​គ្នា​ទៅ​សាងសង់​សាលាឆទាន​ជា​ថ្មី ប៉ុន្តែ​បែរ​ជា​ត្រូវ​អាជ្ញាធរ​រារាំង។ ករណី​នេះ ក្រុម​អ្នក​ភូមិ​បាន​នាំ​គ្នា​ផ្ដិត​ស្នាម​មេដៃ ដាក់​ទៅ​សាលា​ខេត្ត​អោយ​ជួយ​រក​ដំណោះស្រាយ។

អ្នក​ភូមិ​នៅ​តំបន់​ដី​ដែល​អាជ្ញាធរ​រារាំង អំពាវនាវ​ឲ្យ​អភិបាល​ខេត្ត​ព្រៃវែង និង​មន្ត្រី​ពាក់ព័ន្ធ ត្រួត​ពិនិត្យ​ដី​សាលាឆទាន​នោះ​ទុក​ជា​ប្រយោជន៍​រួម​របស់​ប្រជាពលរដ្ឋ សម្រាប់​រៀបចំ​ពិធី​បុណ្យ​ទាន​ប្រចាំ​ភូមិ។

តំណាង​អ្នក​ភូមិ​ម្នាក់ គឺ​លោក អំ វ៉ាត រស់នៅ​ភូមិ​ត្នោត ឃុំ​កំពង់ឫស្សី ស្រុក​ពោធិ៍រៀង ខេត្ត​ព្រៃវែង ថ្លែង​នៅ​ថ្ងៃ​ទី​២៨ សីហា ថា អាជ្ញាធរ​ប៉ូលិស​ស្រុក រារាំង​មិន​ឲ្យ​អ្នក​ភូមិ​សាងសង់​សាលាឆទាន​ដែល​មាន​ទីតាំង​ស្ថិត​នៅ​ទីប្រជុំជន នៅ​ភូមិ​ត្នោត ឃុំ​កំពង់ឫស្សី នោះ​ទេ។ លោក​បន្ត​ថា ហេតុ​ដែល​អាជ្ញាធរ​ហាម​ឃាត់ ដើម្បី​យក​ដី​ទៅ​លក់​ដោះ​ដូរ​ធ្វើ​ជា​ប៉ុស្តិ៍​ប៉ូលិស​ថ្មី ហើយ​ការ​ដោះ​ដូរ​នោះ ជា​ដី​សាធារណៈ​របស់​អ្នក​ភូមិ ដោយ​មិន​មាន​ការ​ឯកភាព​ពី​ប្រជាពលរដ្ឋ​ឡើយ៖ «មាន​ដី​សម្រាប់​ធ្វើ​បុណ្យ​បន្តិចបន្តួច គេ​គ្រាន់​តែ​មក​សុំ​ជ្រក​កោន​ហ្នឹង គេ​បែរ​ជា​យក​ដី​យើង​យក​លក់​តាម​អំពើ​ចិត្ត​ទៅ​វិញ​នេះ។ ប្រជាជន​កើត​ទុក្ខ​មិន​សុខ​ចិត្ត​ឡើយ។ ដូច្នេះ ដី​ហ្នឹង​វា​មិន​មែន​ជា​ដី​ពួក​គេ​ផង​ហ្នឹង គេ​គ្រាន់​តែ​មក​សុំ​ជ្រក​កោន តើ​គេ​មក​យក​ដី​យើង​មក​លក់​ទៅ​កើត​នេះ»

លោក​បន្ត​ថា ផ្ទៃ​ដី​សាលាឆទាន​ទំហំ​ទទឹង​ប្រមាណ ១៦​ម៉ែត្រ បណ្ដោយ ៤០​ម៉ែត្រ ស្ថិត​នៅ​ភូមិ​ត្នោត។ ដី​នោះ​ដើម​ឡើយ ជា​ដី​សាលាឆទាន​ចាស់ ហើយ​អាជ្ញាធរ​បាន​សុំ​ដាក់​ស្នាក់​ការ​ប៉ូលិស​បណ្ដោះអាសន្ន​ក្បែរ​នោះ​រហូត​មក​ទល់​សព្វថ្ងៃ។ ក្រោយ​មក អាជ្ញាធរ​ពង្រីក​ធ្វើ​ផ្លូវ​នៅ​តំបន់​នោះ ហើយ​អ្នក​ភូមិ​ក៏​បាន​រុះរើ​សាលាឆទាន​ចេញ​បណ្ដោះអាសន្ន។ លោក​ថា កាល​ពី​ថ្ងៃ​ទី​២៧ សីហា អ្នក​ភូមិ​បាន​នាំ​គ្នា​សាងសង់​សាលាឆទាន​ជា​ថ្មី​ឡើង​វិញ តែ​ពេល​នោះ ត្រូវ​អាជ្ញាធរ​រារាំង​មិន​ឲ្យ​សាងសង់។

ឆ្លើយ​តប​នឹង​បញ្ហា​នេះ អធិការ​នគរបាល​ស្រុក​ពោធិ៍រៀង លោក អ៊ុង សុផាន មាន​ប្រសាសន៍​ថា អាជ្ញាធរ​ប៉ូលិស​មិន​បាន​រារាំង​អ្នក​ភូមិ​ធ្វើ​សាលាឆទាន​នោះ​ទេ ប្រសិន​បើ​ពួក​គាត់​មាន​ដី​គ្រប់គ្រាន់​នោះ តែ​ការ​សាងសង់​នោះ​ប៉ះពាល់​ដល់​ដី​សាធារណៈ។ ចំណែក​ឯ​រឿង​ការ​ដោះ​ដូរ​ដី​នោះ លោក​មិន​បាន​បញ្ជាក់​ថា​យ៉ាង​ណា​នោះ​ទេ គឺ​គ្រាន់​តែ​លើក​ឡើង​ថា ជា​ដី​របស់​ប៉ូលិស​យូរ​មក​ហើយ៖ «តាៗ ហើយ​គណៈកម្មការ ហើយ​ក្រុម​ប្រឹក្សា​ឃុំ​អី គាត់​មក​ពិភាក្សា​ទៅ​ថា​ធ្វើ​ទៅ​វា ទី​១​វា​បាំង​អា​កន្លែង​កែង​ម្ខាង​វា​ផ្លូវ​វា ៤​ជ្រុង ហើយ​ទី​២ ធ្វើ​ហើយ​គង់​តែ​ប្រាំ​ហ្នឹង គេ​ពង្រីក​វា​ខាត​លុយ​យើង​ដដែល។ ហើយ​ខ្ញុំ​អត់​មាន​ឃាត់​ទេ បើ​បង​ប្អូន​ចង់​ធ្វើ​ក៏​ធ្វើ​ទៅ ខ្ញុំ​និយាយ​អ៊ីចឹង​ណា​បង!»

ទោះ​យ៉ាង​នេះ​ក្ដី អ្នក​ភូមិ​ឲ្យ​ដឹង​ថា ដី​សម្រាប់​សាងសង់​ប៉ុស្តិ៍​ប៉ូលិស​មាន​រួច​ទៅ​ហើយ តែ​អាជ្ញាធរ​ប៉ូលិស​មិន​ព្រម​ទៅ​សាងសង់​នោះ​ទេ ដោយ​យល់​ឃើញ​ថា ដី​សាលាឆទាន​របស់​អ្នក​ភូមិ​ជិត​ទីប្រជុំជន​មាន​តម្លៃ ហើយ​ឃុបឃិត​គ្នា​យក​ដី​នោះ​លក់​ក្នុង​រូបភាព​សាងសង់​ប៉ុស្តិ៍​ប៉ូលិស​ថ្មី។

មន្ត្រី​ផ្នែក​ដីធ្លី និង​ធនធាន​ធម្មជាតិ​សមាគម​សិទ្ធិ​មនុស្ស​អាដហុក (adhoc) លោក ចាន់ សុវ៉េត មាន​ប្រសាសន៍​ថា ដី​សាធារណៈ​ដែល​ប្រជាពលរដ្ឋ​លើក​ឡើង​នោះ ប្រសិន​បើ​ពួក​គាត់​រៀបចំ​ធ្វើ​ជា សាលាឆទាន​ឡើង​វិញ​ដើម្បី​ផល​ប្រយោជន៍​រួម ហើយ​អាជ្ញាធរ​យក​ដី​នោះ​ដោះ​ដូរ​ខុស​ពី គោលការណ៍​ច្បាប់​មិន​អាច​ទៅ​រួច​ឡើយ៖ «អ៊ីចឹង​ចង់​ឲ្យ​និយាយ​ថា​ប្រជាពលរដ្ឋ​គាត់​អាច​ទៅ​ជជែក​ជាមួយ​អាជ្ញាធរ​មូលដ្ឋាន ហើយ​មូលដ្ឋាន​ចាំ​មើល​ថា​តើ​ពលរដ្ឋ​ត្រូវ​ការ​ទុក​ដី​នេះ​ដើម្បី​អី? បើ​គាត់​យក​ដី​ហ្នឹង​ជា​ដី​ឯកជន​សម្រាប់​បម្រើ​ឯកជន អា​ហ្នឹង​ប្រជាជន​ការ​ដែល​គាត់​ធ្វើ​អ៊ីចឹង​វា​ខុស។ ហើយ​អាជ្ញាធរ​ប្រសិន​ជា​គាត់​យក​ដី​ហ្នឹង​សម្រាប់​ផ្ទេរ​ប្ដូរ​ទៅ​ឲ្យ​អ្នក​ដទៃ​ទៀត ដោយ​គ្មាន​បាន​អនុវត្ត​ត្រឹមត្រូវ​គោលការណ៍​ច្បាប់​ត្រឹមត្រូវ អា​ហ្នឹង​ក៏​ជា​អំពើ​ខុស​ច្បាប់​ដែរ។ អ៊ីចឹង​បាន​ថា​អឺ! ប្រជាជន​មាន​សិទ្ធិ​ក្នុង​ការ​ការពារ​ដី​សាធារណៈ​ហ្នឹង ហើយ​រៀបចំ​សាលាឆទាន​ឡើង​វិញ»

អ្នក​ភូមិ​មិន​បាន​សាងសង់​សាលាឆទាន​តាម​គម្រោង​របស់​ពួក​គាត់ សង់​នៅ​លើ​ដី​នោះ​នៅ​ឡើយ​ទេ។ ពួក​គាត់​ខឹង​សម្បា​អាជ្ញាធរ​ប៉ូលិស ដែល​រារាំង​មិន​ឲ្យ​សង់​សាលាឆទាន ហើយ​បាន​នាំ​គ្នា​ផ្ដិត​ស្នាម​មេដៃ​បាន​ប្រមាណ​ជាង ៣០០​នាក់ គ្រោង​ដាក់​តវ៉ា​ទៅ​សាលា​ខេត្ត​ព្រៃវែង ឲ្យ​ជួយ​ដោះស្រាយ​បញ្ហា​នេះ​ក្នុង​ពេល​ឆាប់ៗ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។