ប្រជាពលរដ្ឋនៅឃុំត្រពាំងព្រីង ស្រុកតំបែរ ខេត្តត្បូងឃ្មុំ គ្រោងនឹងឡើងទៅដាក់ពាក្យបណ្ដឹងទៅស្ថាប័នរដ្ឋសភា និងស្ថាប័នធំៗផ្សេងទៀតនៅថ្ងៃទី១ ឬទី២ ខែមិថុនា ជុំវិញបញ្ហាជម្លោះដីធ្លីជាមួយក្រុមហ៊ុនចិន។ ការគ្រោងឡើងទៅដាក់ពាក្យបណ្ដឹងរបស់ពលរដ្ឋ គឺដើម្បីជួយពន្លឿនការដោះស្រាយបញ្ហាដីធ្លីជូនពួកគាត់ឲ្យបានឆាប់រហ័ស។
ការលើកឡើងរបស់ពលរដ្ឋពេលនេះ បន្ទាប់ពីពួកគាត់បានស្វែងរកកិច្ចអន្តរាគមន៍ពីអាជ្ញាធរមូលដ្ឋានរហូតដល់ថ្នាក់ខេត្ត ប៉ុន្តែនៅមិនទាន់ទទួលបានផលអ្វីនៅឡើយ។ ពលរដ្ឋថែមទាំងចោទអាជ្ញាធរមូលដ្ឋាន រហូតដល់មន្ត្រីថ្នាក់ស្រុកខ្លះ ថាបានជួយការពារឲ្យក្រុមហ៊ុនចិន ថែមទៀត។
លើសពីនេះ ពលរដ្ឋចោទប្រកាន់អាជ្ញាធរថា បានបោកប្រាស់ប្រជាពលរដ្ឋដើម្បីយកដីកេរពីដូនតា និងជាដីសហគមន៍រួមរបស់ពួកគាត់ ទៅលក់ឲ្យក្រុមហ៊ុនចិន មួយឈ្មោះ ហាម៉ីនីវិន អិនវេសមេន (HAMENIVEN Investment) ទៀតផង។
តំណាងពលរដ្ឋម្នាក់នៅភូមិស្រែប្រាំង ឃុំត្រពាំងព្រីង លោក សុង ហុង មានប្រសាសន៍ថា ការសម្រេចឡើងទៅដាក់ពាក្យប្ដឹងដល់ស្ថាប័នធំៗនៅរាជធានីភ្នំពេញ គឺដើម្បីឲ្យស្ថាប័នជាតិទាំងនោះបានដឹងឮពីទុក្ខលំបាករបស់ពួកគាត់ និងជួយស្វែងរកយុត្តិធម៌ជុំវិញករណីដីធ្លីនេះ៖ «ឯកសារហ្នឹងយើងបានផ្ដិតមេដៃត្រៀមរួចហើយ។ ថ្ងៃច័ន្ទ ហ្នឹង យើងនឹងធ្វើដំណើរទៅដើម្បីខាងលើគេដឹងថាថ្នាក់ខេត្តដំណោះស្រាយអីដល់ណាអីដល់ណា? ហើយក្នុងនាមខ្ញុំជាប្រជាពលរដ្ឋ ខ្ញុំចង់បានតែយុត្តិធម៌»។
ជម្លោះដីធ្លីប្រមាណ ៦១៦ហិកតារ ដែលជាប្រភេទដីព្រៃលិចទឹកនៅឃុំត្រពាំងព្រីង កើតឡើងចាប់តាំងពីឆ្នាំ២០១១ បន្ទាប់ពីមានអាជ្ញាធរស្រុក ឃុំ និងភូមិមួយចំនួន បានដើរបញ្ចុះបញ្ចូលពលរដ្ឋឲ្យផ្ដិតមេដៃលក់ដីព្រៃសហគមន៍នៅក្នុងឃុំទៅឲ្យក្រុមហ៊ុនចិន ដោយប្រើទម្រង់លិខិតមួយមានភាពមិនច្បាស់លាស់ និងមានលក្ខណៈបង្ខិតបង្ខំផង។ កាលណោះពលរដ្ឋព្រមផ្ដិតមេដៃលក់ដីឲ្យក្រុមហ៊ុនចិន គឺមួយចំហៀងដែលមានផ្ទៃដីប្រមាណ ៣០០ហិកតារប៉ុណ្ណោះ ព្រោះផ្ទៃដីមួយចំហៀងទៀត គឺជាដីពលរដ្ឋធ្លាប់អាស្រ័យផល និងជាកន្លែងប្រកបរបរនេសាទ និងរកអនុផលពីធម្មជាតិ។
ប៉ុន្តែ កាលពីខែមេសា ឆ្នាំ២០១៥ ថ្មីៗនេះ ខាងក្រុមហ៊ុនចិន បានយកគ្រឿងចក្រជាច្រើនគ្រឿងទៅជីកប្រឡាយលើកទំនប់ព័ទ្ធដីតំបន់នោះទាំងអស់ ដើម្បីកុំឲ្យពលរដ្ឋអាចចូលធ្វើស្រែចម្ការលើដីរបស់ខ្លួនបាន ទើបបណ្ដាលឲ្យផ្ទុះការតវ៉ាឡើង។ ពលរដ្ឋនៅភូមិស្រែប្រាំង ១៧៥គ្រួសារ ដែលរងផលប៉ះពាល់ពីគម្រោងអភិវឌ្ឍន៍របស់ក្រុមហ៊ុនចិន នាំគ្នាឃាត់គ្រឿងចក្រនោះរហូតដល់ក្រុមហ៊ុនយល់ព្រមផ្អាក បើទោះបីជាមានអាជ្ញាធរមកគំរាមកំហែងពួកគាត់ក៏ដោយ។
ទាក់ទងបញ្ហានេះ អតីតអភិបាលស្រុកតំបែរ លោក ឆឹង ពិសិដ្ឋ មានប្រសាសន៍ថា បញ្ហាកើតឡើងថ្មីៗនេះ លោកមិនបានដឹងទេ ព្រោះជាតួនាទីរបស់អភិបាលស្រុកថ្មី។ ចំណែកការដើរផ្ដិតមេដៃពលរដ្ឋលក់ដីសាធារណៈរបស់រដ្ឋទៅឲ្យក្រុមហ៊ុនចិន កាលពីឆ្នាំ២០១១ ក្នុងអាណត្តិរបស់លោកជាអភិបាលស្រុកនោះ លោកបដិសេធថា មិនបានពាក់ព័ន្ធទេ។ ចំណែកការដាក់ពាក្យប្ដឹងរូបលោកយ៉ាងណានោះ គឺជាសិទ្ធិរបស់ពលរដ្ឋ៖ «ខ្ញុំអត់មានដឹងទេ ខាងគេអ្នកលក់អ្នកទិញហ្នឹង។ ខ្ញុំអាជ្ញាធរបានត្រឹមមានសិទ្ធិសម្របសម្រួលប៉ុណ្ណោះ»។
យ៉ាងណា ច្បាប់ជលផលឆ្នាំ២០០៦ មាត្រា១០២ គឺចែងពីការដាក់ទោសទណ្ឌដល់សកម្មភាពទាំងឡាយណាដែលបង្កឡើងដោយមន្ត្រីអាជ្ញាធរដែនដី មន្ត្រីនគរបាល កងយោធា និងមន្ត្រីផ្សេងៗទៀតដែលបានធ្វើអន្តរាគមន៍ដោយផ្ទាល់ ឬប្រយោល ជួយដល់អាជីវកម្មជលផល ឬរារាំងដល់មន្ត្រីជលផលក្នុងការបំពេញភារកិច្ច គឺត្រូវផ្ដន្ទាទោសពី ១ឆ្នាំទៅ ៣ឆ្នាំ និងត្រូវពិន័យជាប្រាក់ពី ៥លានរៀល ដល់ ៥០លានរៀល។
ទោះបីយ៉ាងណាក៏ដោយ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តត្បូងឃ្មុំ ដែលចុះអង្កេតបញ្ហានេះ លោក នាង សុវ៉ាត មានប្រសាសន៍ថា អាជ្ញាធរនៅទីនោះ ពិសេសអភិបាលស្រុកតំបែរ ទាំងថ្មីទាំងចាស់ គឺមានចំណែកពាក់ព័ន្ធក្នុងរឿងនេះ។ លោកក៏គ្រោងនឹងបញ្ជូនសំណើរបស់ពលរដ្ឋទៅស្ថាប័នពាក់ព័ន្ធ រួមមាន ដាក់ទៅអង្គភាពប្រឆាំងអំពើពុករលួយ ទៅគណៈកម្មការទី១ និងទី១០ នៃរដ្ឋសភា ដើម្បីឲ្យអាជ្ញាធរនៅខេត្តត្បូងឃ្មុំ បង្ហាញឯកសារទាំងអស់ជុំវិញបញ្ហាដីធ្លីកើតឡើង និងស្នើឲ្យស៊ើបអង្កេតរកជនដែលយកលិខិតស្នាមលក់ដីសាធារណៈរបស់រដ្ឋទៅឲ្យប្រជាពលរដ្ឋកាលពីពេលមុននោះ។ បន្ថែមពីនេះទៀត មានករណីខ្លះត្រូវដាក់ពាក្យប្ដឹងទៅតុលាការតែម្តង ដូចជាករណីក្រុមហ៊ុនចិន យកគ្រឿងចក្រទៅជីកប្រឡាយបិទផ្លូវសាធារណៈរបស់ពលរដ្ឋជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។