តំណាងកម្មកររបស់ក្រុមហ៊ុន ខេ.ឌី.ស៊ី (KDC) ចំនួន ៦រូប និងអ្នកគាំទ្រជាង ២០០នាក់ ដាក់ញត្តិទៅអង្គការសិទ្ធិមនុស្សមួយចំនួន ដើម្បីឱ្យជួយរកយុត្តិធម៌ដល់ពួកគាត់ដែលរងបួស។ ក្រុមកម្មករទាំងនេះ ក៏តវ៉ាចំពោះការដោះលែងអ្នកភូមិឡពាង ៥នាក់ចេញពីពន្ធនាគារខេត្តកំពង់ឆ្នាំង។
តំណាងកម្មករសំណង់នៅការដ្ឋានរបស់ក្រុមហ៊ុន ខេ.ឌី.ស៊ី ចំនួន ៦រូប នៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង កំពុងស្វែងរកយុត្តិធម៌ដែលគាត់អះអាងថា បានរងរបួសដោយសារអ្នកភូមិឡពាង គប់ដុំថ្ម និងបាញ់ចម្ពាមកៅស៊ូ កាលពីថ្ងៃទី២២ ខែកក្កដា។ ពួកគាត់មិនពេញចិត្តទៅនឹងការដោះលែងអ្នកភូមិឡពាង ៥នាក់ កាលពីថ្ងៃ២៩ សីហា ទេ។
តំណាងកម្មករ និងជាអ្នករបួសមួយរូបឈ្មោះ ស៊ិន ឃីម ថ្លែងនៅថ្ងៃទី៣០ សីហា ថា ការដោះលែងអ្នកភូមិ ៥នាក់នោះ ជារឿងអយុត្តិធម៌សម្រាប់ពួកលោក ព្រោះលោកមិនទាន់បានទទួលសំណងសម្រាប់ការរងរបួស៖ «គឺមិនយុត្តិធម៌សម្រាប់ពួកខ្ញុំទេ។ បើសិនជាដោះលែងក៏យើងត្រូវតែស៊ើបអង្កេតឱ្យបានច្បាស់ កុំឱ្យយើងដោះលែងជនដៃដល់អ៊ីចឹង មានន័យថា ពួកហ្នឹងប្រព្រឹត្តបទល្មើស អ៊ីចឹងហើយបែរជាអត់មានទទួលខុសត្រូវអ្វី ដែលខ្លួនបានធ្វើអ៊ីចឹងវាពិបាក និងក្លាយជាប្រទេសអត់ច្បាប់»។
លោក ស៊ិន ឃីម ថ្លែងថា ពួកលោក ៦នាក់បានរងរបួស ក្នុងពេលដែលកំពុងធ្វើរបងឱ្យក្រុមហ៊ុន ខេ.ឌី.ស៊ី ថ្ងៃទី២២ ខែកក្កដា ហើយមានអ្នកភូមិឡពាង ប្រហែល ៣០នាក់ មកវាយទម្លុះរបង គប់ដុំថ្ម និងបាញ់ចម្ពាមកៅស៊ូលើពួកលោក។
ក្រោយហេតុការណ៍នោះ អ្នកភូមិឡពាង ៥នាក់ ត្រូវបានចាប់ខ្លួនដាក់ពន្ធនាគារខេត្តកំពង់ឆ្នាំង ជាបន្តបន្ទាប់ ដោយចោទពីបទបំផ្លិចបំផ្លាញទ្រព្យសម្បត្តិ និងហិង្សាដោយចេតនាមានស្ថានទម្ងន់ទោស។ អ្នកភូមិទាំង ៥នាក់ ត្រូវបានតុលាការដោះលែងឱ្យនៅក្រៅឃុំវិញ នៅរសៀលថ្ងៃទី២៩ សីហា ដែលខាងកម្មករហៅថាអយុត្តិធម៌។
លោក ស៊ិន ឃីម ហៅការបង្ករបួសស្នាមលើរូបលោកថា ជាការប្រមាថជីវិតលោក ហើយសន្យាថា នឹងបន្តការតវ៉ារបស់ពួកលោករហូតដល់មានដំណោះស្រាយ៖ «ខ្ញុំនៅតែតវ៉ារហូត ដូច លោកស្រី អ៊ុំ សុភី អ៊ីចឹង គាត់ថាគាត់តវ៉ាទាល់តែប្ដីគាត់បានចេញពីពន្ធនាគារ អ៊ីចឹងខ្ញុំតវ៉ាទាល់តែមានដំណោះស្រាយឱ្យខ្ញុំដូចគ្នា»។
លោកអំពាវនាវដល់អង្គការសិទ្ធិមនុស្សនានា រាប់ទាំងការិយាល័យសិទ្ធិមនុស្សអង្គការសហប្រជាជាតិផង ដែលលោកបានដាក់ញត្តិឱ្យជួយស៊ើបអង្កេតឱ្យបានច្បាស់លាស់ និងរកយុត្តិធម៌ដល់ពួកលោកផង។
ទាក់ទងនឹងបញ្ហានេះ មន្ត្រីស៊ើបអង្កេតនៃអង្គការការពារសិទ្ធិមនុស្សលីកាដូ (Licadho) នៅភ្នំពេញ លោក អំ សំអាត មានប្រសាសន៍ថា ការិយាល័យរបស់លោកបានទទួលញត្តិរបស់កម្មករ ខេ.ឌី.ស៊ី នោះហើយ។ លោកបញ្ជាក់ថា ខាងលោកកំពុងពិនិត្យមើលបញ្ហានេះ ដោយមិនប្រកាន់និន្នាការអ្វីទេ។ ក្នុងនាមជាអង្គការសិទ្ធិមនុស្ស គឺខាងលោកនឹងការពារដូចគ្នា៖ «ប៉ុន្តែអ្វីដែលសំខាន់ យើងមើលឫសគល់ គឺឫសគល់នៃការបង្កឱ្យមានអ្នករងគ្រោះ។ អ៊ីចឹងឫសគល់នៃការបង្កឱ្យមានអ្នករងគ្រោះ គឺចេញអំពីបញ្ហាដីធ្លី ដែលក្រុមហ៊ុនមិនព្រមធ្វើការដោះស្រាយជូនពលរដ្ឋ។ ប៉ុន្តែចំណែកពលរដ្ឋ និងកម្មករ យើងចាត់ទុកថាជាជនរងគ្រោះដូចគ្នា»។
លោកទាមទារឱ្យអាជ្ញាធរដែលពាក់ព័ន្ធ និងតុលាការ ឱ្យដោះស្រាយបញ្ហាដីធ្លីដែលក្រុមហ៊ុនមិនព្រមដោះស្រាយកន្លងមក ជាជាងការបង្កឱ្យមានការរងគ្រោះដល់ប្រជាពលរដ្ឋ និងកម្មករជាបន្តទៅទៀត៖ «បើសិនជាអនុសាសន៍ និងប្រសាសន៍របស់សម្ដេច ដែលបានចេញបទបញ្ជា ហើយមិនព្រមដោះស្រាយទេ ឬក៏ក្រុមហ៊ុនណាមិនអនុវត្ត អាជ្ញាធរណាមិនអនុវត្ត ហ្នឹងត្រូវតែចាត់វិធានការតាមផ្លូវច្បាប់ទៅលើមន្ត្រីទាំងអស់នោះ ជាជាងដែលយើងទៅគាបសង្កត់ទៅលើប្រជាពលរដ្ឋ ឬក៏កម្មករនោះ»។
បញ្ហាហិង្សានៅភូមិឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង គឺទាក់ទងនឹងជម្លោះដីធ្លីទំហំ ១៨២ហិកតារ ដែលអូសបន្លាយអស់រយៈពេលជិត ១០ឆ្នាំមកហើយ រវាងអ្នកភូមិ និងក្រុមហ៊ុន ខេ.ឌី.ស៊ី របស់អ្នកស្រី ជា ខេង ដែលជាភរិយារបស់ លោក ស៊ុយ សែម រដ្ឋមន្ត្រីក្រសួងរ៉ែ និងថាមពល។ ភាគីជម្លោះនៅពេលនេះ បានកើនឡើងទៅជាបីភាគី គឺរវាងអ្នកភូមិ និងក្រុមហ៊ុន អំពីការរឹបអូសដីធ្លី និងរវាងអ្នកភូមិ និងក្រុមកម្មករ អំពីបញ្ហាហិង្សានៅក្នុងពេលតវ៉ាទាមទារដីធ្លី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។