ប្រតិភូក្រសួងរៀបចំដែនដី នគរូបនីយកម្ម និងសំណង់ នៃព្រះរាជាណាចក្រកម្ពុជា ចុះអនុស្សរណៈយោគយល់គ្នាជាមួយក្រសួងដីធ្លី ហេដ្ឋារចនាសម្ព័ន្ធ និងដឹកជញ្ជូននៃសាធារណរដ្ឋកូរ៉េ នៅថ្ងៃទី១៥ សីហា ដើម្បីកសាងផែនការប្រើប្រាស់ដីធ្លី និងប្លង់លម្អិតនគរូបនីយកម្ម ក្រោមគោលគំនិតទីក្រុងទំនើបបែបបច្ចេកវិទ្យា (Smart City's Concept) នៅតាមខេត្ត-ក្រុង និងទីប្រជុំជននៅកម្ពុជា។
អនុស្សរណៈយោគយល់គ្នារវាងក្រសួងជំនាញនៃប្រទេសទាំងពីរ ធ្វើឡើងក្នុងគោលបំណងពង្រឹងកិច្ចសហប្រតិបត្តិការលើការងាររៀបចំដែនដី និងនគរូបនីយកម្ម ព្រមទាំងការងារលំនៅឋានសាធារណៈ។
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ដែលដឹកនាំប្រតិភូទៅបំពេញទស្សនកិច្ចនៅទីក្រុងសេអ៊ូល (Seoul) នៃសាធារណរដ្ឋកូរ៉េ បានសរសេរនៅក្នុងហ្វេសប៊ុក (facebook) របស់លោកនៅថ្ងៃទី១៥ សីហា ថា តាមរយៈអនុស្សរណៈយោគយល់គ្នានេះ កម្ពុជា និងកូរ៉េ នឹងធ្វើសហប្រតិបត្តិការរួមគ្នាលើកិច្ចការងារចំនួនបួនសំខាន់។
នោះ គឺការកសាងច្បាប់ស្ដីពីការរៀបចំដែនដី និងនគរូបនីយកម្ម ការកសាងលំនៅឋានសាធារណៈ ការបណ្តុះបណ្តាលធនធានមនុស្ស ការកសាងផែនការប្រើប្រាស់ដី និងប្លង់លម្អិតនៃការស្ថាបនាទីក្រុងតាមបែបបច្ចេកវិទ្យាទំនើប ដោយយកខេត្តព្រះសីហនុ ជាទីក្រុងសាកល្បង។
សារព័ត៌មាន ឌឹ ខូរៀ ហឺរ៉ល (The Korea Herald) របស់កូរ៉េខាងត្បូង ចេញផ្សាយកាលពីថ្ងៃទី១៥ សីហា បានដកស្រង់សម្ដីមន្ត្រីក្រសួងដីធ្លី ហេដ្ឋារចនាសម្ព័ន្ធ និងដឹកជញ្ជូននៃសាធារណរដ្ឋកូរ៉េ ថាកូរ៉េ នឹងជួយជំរុញឲ្យមានការស្ថាបនាទីក្រុងដ៏មានសក្ដានុពល និងមិនបង្កផលប៉ះពាល់ដល់បរិស្ថាននៅកម្ពុជា ដោយប្រើប្រាស់បច្ចេកវិទ្យាព័ត៌មានចុងក្រោយបង្អស់របស់ខ្លួន។
សាស្ត្រាចារ្យផ្នែកស្ថាបត្យកម្ម បណ្ឌិត តាំង សុចិត្រវិទូ ដែលបញ្ចប់ការសិក្សាពីសាកលវិទ្យាល័យ ហាវ៉ៃ (University of Hawaii) សហរដ្ឋអាមេរិក មានប្រសាសន៍ថា ទីក្រុងទំនើបតាមបែបបច្ចេកវិទ្យា (Smart City) ជាគម្រោងដ៏ល្អសម្រាប់កម្ពុជា ក្នុងការអភិវឌ្ឍទីក្រុងរបស់ខ្លួនដែលខ្វះការរីកចម្រើន ជាពិសេសលោកមានជំនឿថា បើកម្ពុជា មានការប្ដេជ្ញាចិត្តខ្ពស់ កម្ពុជា នឹងអាចអនុវត្តគម្រោងនេះបានដោយជោគជ័យ ដោយសារជំនួយពីកូរ៉េខាងត្បូង ដែលជាប្រទេសជោគជ័យក្នុងការអនុវត្តគម្រោងបែបនេះ។
បណ្ឌិត តាំង សុចិត្រវិទូ ថ្លែងថា « កូរ៉េ គាត់ជួយហ្នឹងល្អហើយ ប៉ុន្តែសំខាន់ យើងទេ។ ប្រជាជនយើង រដ្ឋាភិបាលយើង តើយើងត្រូវត្រៀមខ្លួនធ្វើយ៉ាងម៉េច ? ដើម្បីឲ្យយល់ពីផែនការត្រូវអភិវឌ្ឍ ទិសដៅរបស់យើង។ ខ្លួនយើងនេះ តើយើងចង់ទៅឯណាឲ្យប្រាកដប្រជា ក្លាយទៅជាទីក្រុងរបៀបណាឲ្យប្រាកដប្រជា ? យើងមិនអាចចេះតែចម្លងយកមកដាក់អីបាន ដូចដែលយើងនិយាយចឹងទេ ពីព្រោះវាមានទាក់ទងនឹងវប្បធម៌ អរិយធម៌ និងចំណេះដឹងទូទៅរបស់ប្រជាជន »។
អ្នកជំនាញផ្នែកស្ថាបត្យកម្មរូបនេះមើលឃើញថា កម្ពុជា មានបញ្ហាមួយចំនួនដែលអាចជាឧបសគ្គក្នុងការសម្រេចឲ្យបាននូវគម្រោងទីក្រុងទំនើបតាមបែបបច្ចេកវិទ្យានេះ។ បញ្ហាទាំងនោះ មានជាអាទិ៍ កង្វះថវិកាអនុវត្តគម្រោង បញ្ហាសីលធម៌សង្គម និងជីវភាពរស់នៅរបស់ប្រជាជន៖ « អ្វីដែលខ្ញុំបារម្ភមែនទែនហ្នឹង គឺចំណេះដឹងទូទៅរបស់ប្រជាជនខ្មែរទាក់ទងទៅនឹង អ្វីទៅការរស់នៅក្នុងទីក្រុងទំនើប។ យើងត្រូវរៀបចំអត្តចរិតរបៀបណា ? យើងត្រូវរៀបចំសីលធម៌សង្គម និងសីលធម៌សាធារណៈហ្នឹងកម្រិតណា ? ដើម្បីជួយជំរុញការអភិវឌ្ឍឲ្យទៅលឿន។ បញ្ហាសំខាន់មួយទៀត គឺសេដ្ឋកិច្ចយើងហ្នឹង។ តើរដ្ឋាភិបាលមានលុយគ្រប់គ្រាន់ទេនៅក្នុងការអនុវត្ត ឬអភិវឌ្ឍប្រព័ន្ធបច្ចេកវិទ្យាទាំងអស់នោះ ? កែសម្រួលហេដ្ឋារចនាសម្ព័ន្ធដែលចាស់ទ្រុឌទ្រោមហ្នឹង ឲ្យទៅជាថ្មីទំនើបទាន់គេហ្នឹង យើងមានលទ្ធភាពទេ ? បើរាជរដ្ឋាភិបាលមានលទ្ធភាព ជាការល្អហើយ បូករួមនឹងការកែសម្រួលចំណេះដឹងទូទៅរបស់ប្រជាជន ពិសេសចំណេះដឹងទាក់ទងនឹងការរស់នៅ និងសីលធម៌សង្គមឲ្យបានល្អ។ ខ្ញុំថាយើងអាចទៅហើយ »។
ទីក្រុងទំនើបតាមបច្ចេកវិទ្យា (Smart City) សំដៅដល់ទីក្រុងដ៏មានសក្ដានុពល និងមិនបង្កផលប៉ះពាល់ដល់បរិស្ថាន អមទៅដោយហេដ្ឋារចនាសម្ព័ន្ធសម្បូរបែប រួមមាន ផ្លូវថ្នល់ ថាមពល ទឹក និងបរិស្ថានល្អ ព្រមទាំងប្រព័ន្ធសុវត្ថិភាព ដែលពឹងផ្អែកលើព័ត៌មាន និងបច្ចេកវិទ្យាទំនាក់ទំនង ព្រមទាំងភាពស្វ័យប្រវត្តិក្នុងការគ្រប់គ្រង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។