នៅថ្ងៃទី១៤ ខែកក្កដា នេះ ប្រជាពលរដ្ឋជាង ៥០នាក់មកពីសហគមន៍ចំនួន៩ ដែលរស់នៅតាមបណ្តោយផ្លូវរថភ្លើងក្នុងខណ្ឌទួលគោក និងខណ្ឌឫស្សីកែវ បានប្រមូលផ្ដុំគ្នាជាថ្មីទៀតនៅខាងមុខសាលាក្រុង ដើម្បីទាមទារឲ្យលោក ប៉ា សុជាតិវង្ស អភិបាលសាលារាជធានីភ្នំពេញ ឲ្យផ្ដល់ព័ត៌មានលម្អិតពីគម្រោងអភិវឌ្ឍន៍ផ្លូវថ្នល់នៅពីលើគន្លងផ្លូវរថភ្លើងចាស់ ពីចំណុចស្ថានីយរថភ្លើងទៅដល់ចំណុចគីឡូម៉ែត្រលេខ៦។
ប្រជាពលរដ្ឋ ៩សហគមន៍អះអាងថា រហូតមកដល់ពេលនេះនៅមិនធ្លាប់ទទួលបានព័ត៌មានច្បាស់លាស់នៅឡើយ ពីគម្រោងអភិវឌ្ឍន៍ផ្លូវថ្នល់នៅពីលើគន្លងផ្លូវរថភ្លើងចាស់ ពីចំណុចស្ថានីយរថភ្លើងទៅដល់ចំណុចគីឡូម៉ែត្រលេខ៦ បើទោះបីជាពួកគេតវ៉ាសុំឲ្យសាលាក្រុង ផ្តល់ព័ត៌មានជាច្រើនលើកច្រើនសាក្តី។
តំណាងសហគមន៍ទួលសង្កែ ស្ថិតនៅក្រុមទី៦ គីឡូម៉ែត្រលេខ៦ លោកស្រី ថា ម៉េងគួន ឲ្យដឹងថា ការយឺតយ៉ាវផ្ដល់ព័ត៌មានពីការធ្វើផ្លូវថ្នល់លើផ្លូវរថភ្លើងរបស់លោក ប៉ា សុជាតិវង្ស អភិបាលសាលារាជធានីភ្នំពេញ កំពុងធ្វើឲ្យពលរដ្ឋរស់នៅទាំងភ័យខ្លាចក្រែងដូចជាពលរដ្ឋនៅតំបន់បឹងកក់ បុរីកីឡា ឬដីក្រហម ដែលរដ្ឋាភិបាលធ្លាប់បានបណ្ដេញចេញក្នុងពេលកន្លងមក ក្រោមលេសថាយកតំបន់ទាំងនោះធ្វើការអភិវឌ្ឍ។
ពលរដ្ឋរូបនេះបន្តថា គោលបំណងលើកគ្នាតវ៉ា គឺសុំឲ្យលោក ប៉ា សុជាតិវង្ស បកស្រាយឲ្យច្បាស់ពីគម្រោងអភិវឌ្ឍន៍ ថាមានគម្រោងអ្វីខ្លះ? តើទីតាំងជាក់លាក់នៅកន្លែងណា? តើពេលណានឹងត្រូវអនុវត្តគម្រោង? ហើយថាតើមានគ្រួសារប៉ុន្មានដែលនឹងត្រូវរងផលប៉ះពាល់ប៉ុណ្ណោះ?៖ « គម្រោងរបស់សាលាក្រុងពុំដែលមកធ្វើវេទិកាសាធារណៈជូនពលរដ្ឋ ថាអភិវឌ្ឍនៅត្រឹម ណា នោះទេ។ ដូច្នេះពួកយើង ចង់បាន ការអភិវឌ្ឍ ណា ដែលមាន ការចូលរួមទាំងអស់គ្នា។ សាលាក្រុង សូមកុំ បន្តឲ្យ ពលរដ្ឋអ្វី ខ្លាច បន្តទៀត »។
ការតវ៉ារបស់ពលរដ្ឋទាំង ៩សហគមន៍ដែលតវ៉ាដោយលើកបដា និងដាក់ញត្តិទៅកាន់សាលារាជធានីភ្នំពេញ មិនត្រូវរារាំងណាមួយឡើយ។
ក្រោយការតវ៉ារបស់ប្រជាពលរដ្ឋអស់រយៈពេលជិត ១ម៉ោងមក មន្ត្រីសាលាក្រុងបានអញ្ជើញតំណាងសហគមន៍ទាំង៩ ចូលជួបពិភាក្សា ប៉ុន្តែការពិភាក្សានេះមិនទទួលបានលទ្ធផលណាមួយឡើយ។
តំណាងសហគមន៍ភូមិ២៣ លោកស្រី ហ៊ន ពៅ ដែលបានចូលជួបជាមួយនឹងមន្ត្រីសាលារាជធានីភ្នំពេញ បញ្ជាក់ថា បច្ចុប្បន្ន មន្ត្រីសាលារាជធានីភ្នំពេញបដិសេធសំណើពួកគាត់ក្នុងការធ្វើវេទិកាសាធារណៈ ព្រោះគម្រោងអភិវឌ្ឍន៍នោះស្ថិតក្នុងការសិក្សានៅឡើយ ដែលចម្លើយនោះវាមិនស្របទៅនឹងអ្វីដែលលោក ប៉ា សុជាតិវង្ស បានឲ្យដឹងនៅក្នុងបណ្ដាញសង្គមរបស់គាត់។ លោកស្រីបន្តថា ការលើកឡើងរបស់សាលាក្រុងនៅពេលនេះ បានធ្វើឲ្យពួកគាត់ខកចិត្តខ្លាំង ព្រោះពួកគាត់គ្មានបំណងជំទាស់គម្រោងអភិវឌ្ឍន៍របស់សាលាក្រុងនោះឡើយ៖ « ឯកឧត្តម ប៉ា សុជាតិវង្ស លោកថា បានសិក្សាហើយៗ ហើយលោកបានចុះទៅផ្ទាល់ដល់សហគមន៍យើងពីរដងហើយនៅក្នុង ផេក ( ទំព័រហ្វេសប៊ុក ) របស់គាត់ ។ ប៉ុន្តែ អ្នកនាំពាក្យ គាត់ និយាយថា កំពុងតែរៀបចំក្រុមការងារចុះទៅសិក្សា ។ អ៊ីចឹងព័ត៌មានវា ហាក់ដូចជា អត់ ដូចគ្នា ។ អ៊ីចឹងហើយយើងស្នើសុំជួបលោកអភិបាលផ្ទាល់តែម្តងនៅថ្ងៃទី១៤ ខែ៧ ហ្នឹង ហើយ អ្វីដែល ខ្ញុំតវ៉ា គឺ គ្រាន់តែ សុំព័ត៌មានប៉ុណ្ណោះ គ្មានបំណងជំទាស់ អីឡើយ អ្វីរាល់ ការអភិវឌ្ឍ ត្រូវតែ ឲ្យប្រជាពលរដ្ឋដឹង »។
វិទ្យុអាស៊ីសេរី មិនអាចទាក់ទងអ្នកនាំពាក្យសាលារាជធានីភ្នំពេញ លោក ជិន ប៊ុនធឿន បាននៅឡើយនៅថ្ងៃទី១៤ ខែកក្កដា។
ទាក់ទិននឹងបញ្ហានេះ នាយកប្រតិបត្តិក្រុមការងារពិសេសសិទ្ធិលំនៅឋាន លោក សៀ ភារម្យ បានស្នើថា សាលាក្រុងគួរមានយន្តការច្បាស់លាស់ ដោយផ្ដល់ព័ត៌មានតាមវេទិកាសាធារណៈឲ្យបានឆាប់ ដើម្បីឲ្យប្រជាពលរដ្ឋមានទំនុកចិត្តឡើងវិញ៖ « យើងមើលប្រជាពលរដ្ឋ មិនជំទាស់ នឹងការអភិវឌ្ឍ អី នោះទេ តែសូមឲ្យមានសំណង ពន្យល់គាត់ឲ្យច្បាស់ ពិសេសធ្វើការអភិវឌ្ឍទទួលបានផលទាំងអស់គ្នា មិន រីកចម្រើន តែ អ្នកមាន តែប៉ះពាល់ អ្នកក្រ នោះឡើយ ។ គួរតែបើកវេទិកាឲ្យបានឆាប់ »។
ពលរដ្ឋទាំង ៩សហគមន៍ ទុកពេលឲ្យសាលាក្រុង ១សប្ដាហ៍ទៀត តែប្រសិនបើនៅតែគ្មានការឆ្លើយតបណាមួយពីសាលាក្រុងនោះ ពួកគាត់ប្រកាន់ជំហរហែក្បួនដាក់លិខិតអន្តរាគមន៍ទៅក្រសួងរៀបចំដែនដី នគរូបនីយកម្ម និងសំណង់ និងផ្ទះលោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។