ប្រជាពលរដ្ឋជាច្រើនគ្រួសារនៅស្រុកឈូក ខេត្តកំពត ប្រតិកម្មនឹងអាជ្ញាធរខេត្តដែលបិទផ្សាយបញ្ជីឈ្មោះអ្នកត្រូវទទួលបានប័ណ្ណកម្មសិទ្ធិដីធ្លី មិនមានឈ្មោះពួកគាត់ តែបែរជាមានឈ្មោះពលរដ្ឋនៅតំបន់ផ្សេងទៅវិញ។ អាជ្ញាធរខេត្តកំពត ស្នើឲ្យពលរដ្ឋប្ដឹងតវ៉ាករណីនេះទៅអង្គភាពជំនាញ ដើម្បីរកដំណោះស្រាយ។
ប្រជាពលរដ្ឋជាង ១០០គ្រួសារនៅភូមិព្រៃព្រាយ ឃុំត្រពាំងភ្លាំង ស្រុកឈូក ខេត្តកំពត សម្ដែងការមិនពេញចិត្ត និងក្តីព្រួយបារម្ភនៅពេលឃើញបញ្ជីឈ្មោះអ្នកត្រូវទទួលបានកម្មសិទ្ធិដីធ្លី មិនមែនជាពួកគាត់ គឺឃើញមានឈ្មោះពលរដ្ឋផ្សេងទៅវិញ។
តំណាងប្រជាពលរដ្ឋ លោក យន់ មុំ ថ្លែងប្រាប់អាស៊ីសេរី នៅថ្ងៃទី២៧ ខែមីនា ថា ពលរដ្ឋបានទៅកាន់កាប់ និងបង្កបង្កើនផលនៅលើដីរបស់ខ្លួនតាំងពីឆ្នាំ២០០៤ រហូតមក។ ក្រោយមក ពួកគាត់បានស្នើសុំដីទាំងនោះពីរដ្ឋ រហូតមានការសម្រេចពីរដ្ឋាភិបាលឲ្យអង្គភាពជំនាញចុះវាស់វែងដីទាំងនោះចែកជូនពលរដ្ឋ។
លោកបន្តថា អង្គភាពជំនាញបានចុះវាស់វែងដីនោះជាច្រើនលើក និងបានបញ្ចប់ការវាស់វែងនៅចុងឆ្នាំ២០១៦ ក៏ប៉ុន្តែលោកអះអាងថា បញ្ជីឈ្មោះអ្នកត្រូវទទួលបានប័ណ្ណកម្មសិទ្ធិដែលទើបត្រូវបានបិទផ្សាយដោយអាជ្ញាធរ បែរជាមិនឃើញមានឈ្មោះពលរដ្ឋដែលធ្លាប់កាន់កាប់ដីនោះសូម្បីតែ ១គ្រួសារ តែបែរជាមានឈ្មោះអ្នកដែលពួកគាត់មិនដែលស្គាល់ទៅវិញ។ លោកបន្តទៀតថា ក្រុមពលរដ្ឋកំពុងព្រួយបារម្ភខ្លាចបាត់បង់ដីធ្លីដែលខ្លួនធ្លាប់កាន់កាប់នោះ៖ «ឈ្មោះដែលគាត់ (អាជ្ញាធរ) ដាក់ អត់មានឈ្មោះអ្នកវាស់វែងដីនៅក្នុងហ្នឹងសោះ។ ខ្ញុំឆ្ងល់មិនដឹងថា គាត់យកឈ្មោះពីណាយកមកដាក់ ខ្ញុំមើលអត់យល់។ ស្គាល់តែប៉ុន្មាននាក់មិនដឹង ហើយស្គាល់ហ្នឹងគឺគាត់អត់មានដីនៅហ្នឹងទេ ហើយអ៊ីចឹងបានជាពួកខ្ញុំតវ៉ារឿងដីហ្នឹង។ ពួកគាត់ធ្វើការកន្លងមកធ្វើអត់មានត្រឹមត្រូវ»។
កាលពីចុងឆ្នាំ២០១៥ កន្លងទៅ រាជរដ្ឋាភិបាលបានសម្រេចកាត់ដីទំហំជាង ៥០០ហិកតារ (៥២៣.១៣ហិកតារ) ចេញពីគម្របព្រៃឈើឆ្នាំ២០០២ និងធ្វើអនុបយោគជាដីឯកជនរបស់រដ្ឋ សម្រាប់ប្រទានកម្មជាកម្មសិទ្ធិជូនប្រជាពលរដ្ឋ ១០៣គ្រួសារនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
ជុំវិញការព្រួយបារម្ភរបស់ពលរដ្ឋនេះ អភិបាលរងខេត្តកំពត លោក ស៊ឹម វុទ្ធា ស្នើឲ្យពលរដ្ឋដាក់ពាក្យបណ្ដឹងទៅមន្ត្រីជំនាញ ដើម្បីតវ៉ាករណីនេះតាមនីតិវិធីក្នុងរយៈពេលពីរសប្ដាហ៍ក្រោយការបិទផ្សាយបញ្ជីឈ្មោះ៖ «មិនអាចសំអាងទៅលើភាគីណាមួយបានទេ។ រវាងភាគីគាត់ គាត់ថា គេអត់មានឈ្មោះ ចំណែកភាគីគេ គេថា គាត់អត់មានឈ្មោះ អ៊ីចឹងអ្វីដែលសំខាន់គឺសូមឱ្យពួកគាត់អញ្ជើញទៅដល់កន្លែងបិទផ្សាយ ហើយធ្វើពាក្យបណ្តឹងច្បាស់លាស់ និងជម្រាបជូនខាង (មន្ត្រី) ជំនាញ។ ខ្ញុំជឿថា កន្លងមក ទាំងបងប្អូនភាគីទីមួយក្តី ភាគីទីពីរក្តី សុទ្ធតែបានវាស់ហើយ ដាក់ឈ្មោះគាត់ ប៉ុន្តែយើងមិនដឹងថា ត្រូវឱ្យនរណា។ អ៊ីចឹងឱ្យគាត់ទៅអាចខុសពីទំហំ ឬព្រំប្រទល់ ឬអាចជាន់ (ដី) គ្នាទាំងស្រុង។ អ៊ីចឹងខាងជំនាញ គេនឹងវាយតម្លៃហើយនៅពេលណាមានទំនាស់ ហើយគាត់បានប្តឹងពិតប្រាកដនៅពេលបិទផ្សាយហ្នឹង គឺចំណេញផលប្រយោជន៍ពួកគាត់ មានន័យថា មិនបានប្រគល់ជូនភាគីណាមួយទេ»។
មន្ត្រីស៊ើបអង្កេតសមាគមអាដហុក (ADHOC) ប្រចាំខេត្តកំពត លោក ហេង ភារៈ ចាត់ទុកនេះជាភាពមិនប្រក្រតីមួយដែលអាជ្ញាធរជំនាញត្រូវចុះត្រួតពិនិត្យឲ្យបានល្អិតល្អន់ ចៀសវាងការផ្តល់ប័ណ្ណកម្មសិទ្ធិដល់អ្នកមិនមែនជាពលរដ្ឋពិតប្រាកដដែលធ្លាប់កាន់កាប់ដីនោះ។ លោកក៏ជំរុញឲ្យពលរដ្ឋប្ដឹងតវ៉ាករណីនេះទៅកាន់អង្គភាពជំនាញនៅថ្នាក់ខេត្តផងដែរ៖ «ថ្នាក់ជាតិគាត់បានចេញជាសេចក្តីសម្រេចឱ្យវាស់វែងដីជូនប្រជាពលរដ្ឋ ប៉ុន្តែដល់ពេលបញ្ជីឈ្មោះជាក់ស្ដែងអត់មានឈ្មោះគាត់ហ្នឹង អ៊ីចឹងការដោះស្រាយបែបហ្នឹងមិនចប់ទេ។ អញ្ចឹងដោះស្រាយចប់បានលុះត្រាតែប្រជាពលរដ្ឋជាអ្នកស្នើសុំ ត្រូវធ្វើស្ថិតិ ឬក៏ផ្តល់ជាបញ្ជីឈ្មោះជូនគាត់ ដើម្បីចេញប្លង់នោះទើបចប់ ហើយបើនៅតែមានការបង្វែងដាន បន្លំបែបហ្នឹង ប្រហែលជាមិនចប់ទេ»។
ទោះបីជាយ៉ាងណា ក្រុមពលរដ្ឋអះអាងថា ពួកគាត់មិនមានជំនឿលើអាជ្ញាធរខេត្តថាអាចដោះស្រាយករណីនេះបានឡើយ ហើយពួកគាត់អះអាងថា នឹងលើកគ្នាមកតវ៉ា និងដាក់ពាក្យបណ្ដឹងតាមក្រសួងពាក់ព័ន្ធមួយចំនួននៅរាជធានីភ្នំពេញ នៅថ្ងៃទី២៨ មីនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។