ប្រជាពលរដ្ឋនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត រកឃើញថា អ្នកដែលមានឈ្មោះក្នុងបញ្ជីក្បាលដីទាំងប៉ុន្មានដែលអាជ្ញាធរបានបិទផ្សាយកន្លងទៅនោះ គឺជាអ្នកឈរឈ្មោះឲ្យឈ្មួញទិញដី ដែលកន្លងទៅធ្លាប់បានប្រើហិង្សាលើពលរដ្ឋ។ ពួកគេសំណូមពរឲ្យអាជ្ញាធរជំនាញខេត្តកំពត បញ្ឈប់ការបិទផ្សាយបញ្ជីក្បាលដី និងវាស់វែងដីនោះសាជាថ្មី។
បន្ទាប់ពីនាំគ្នាឡើងមកតវ៉ានៅក្រសួងរៀបចំដែនដី កាលពីសប្ដាហ៍មុន ក្រុមប្រជាពលរដ្ឋជាង ១០០គ្រួសារ រស់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត បាននាំគ្នាដាក់បណ្ដឹងជាបន្តបន្ទាប់ប្រឆាំងទាស់ទៅនឹងការបិទផ្សាយបញ្ជីក្បាលដីដែលមិនមានឈ្មោះពួកគាត់។
តំណាងប្រជាពលរដ្ឋ លោក ថន សុខា បញ្ជាក់ប្រាប់អាស៊ីសេរី នៅថ្ងៃទី៣ មេសា ថា ប្រជាពលរដ្ឋបានដាក់ពាក្យបណ្ដឹងបានជាង ៨០បណ្ដឹងហើយ ដើម្បីប្រឆាំងទាស់នឹងអ្នកដែលមានឈ្មោះក្នុងបញ្ជីក្បាលដី ដែលត្រូវបានបិទផ្សាយដោយជំនាញសុរិយោដីខេត្តកំពត៖ « សុំសំណូមពរឲ្យគាត់ឈប់បិទផ្សាយកន្លែង ១០៣គ្រួសារហ្នឹង ឲ្យផ្អាកត្រឹមហ្នឹង ចង់ឲ្យអាជ្ញាធរមកវាស់វែង ហើយអ្នក ១០៣គ្រួសារហ្នឹង បើគាត់មានដីនៅកន្លែងហ្នឹងដែរ ឲ្យគាត់មកឈរមក។ អ្នកដែលមានដីទាំងប៉ុន្មាន សូមឲ្យវាស់ម្តងទៀត ដោយឲ្យមកឈរលើដីហ្នឹងទាំងអស់គ្នា តែបើអ្នកអត់ដីទេ សូមឲ្យផ្ដន្ទាទោសតាមច្បាប់ » ។
លោក ថន សុខា និងក្រុមប្រជាពលរដ្ឋដែលបានឡើងមកតវ៉ានៅរាជធានីភ្នំពេញកាលពីសប្ដាហ៍មុន បានអះអាងដូចគ្នាថា អ្នកមានឈ្មោះក្នុងបញ្ជីដែលត្រូវទទួលបានប្លង់កម្មសិទ្ធិនោះ គឺមិនមែនជាម្ចាស់ដីពិតប្រាកដនោះទេ ប៉ុន្តែពួកគេគឺជាអ្នកឈរឈ្មោះឲ្យឈ្មួញដី ដែលចាំទិញដីនោះយកក្រោយពេលទទួលបានប័ណ្ណកម្មសិទ្ធិ។ ពួកគាត់អះអាងដែរថា ឈ្មួញដីនោះគឺជាអ្នកមានលុយ និងមានអំណាច ដែលតែងគំរាមកំហែង និងប្រើហិង្សាបង្ខំពលរដ្ឋឲ្យចាកចេញពីផ្ទះសម្បែង និងដីធ្លីរបស់ពួកគាត់។
ឆ្លើយតបរឿងនេះ អភិបាលរងខេត្តកំពត លោក ស៊ឹម វុទ្ធា បញ្ជាក់ថា វាមិនសំខាន់ថាមាន ឬមិនមានឈ្មួញដីនៅពីក្រោយបញ្ហានេះទេ ប៉ុន្តែសំខាន់ត្រង់ថា តើប្រជាពលរដ្ឋបានដាក់បណ្ដឹងប្រឆាំងទាស់ករណីនេះហើយ ឬនៅ។ លោកថា បើសិនជាពលរដ្ឋបានដាក់បណ្ដឹងតវ៉ាហើយ ដីទាំងនោះនឹងមិនត្រូវបានផ្តល់ជូនជនណាម្នាក់ឡើយ គឺត្រូវរង់ចាំដំណោះស្រាយពីអាជ្ញាធរជំនាញ។ ដោយឡែកចំណុចណាដែលមិនមានការប្ដឹងទាស់ទេ ដីនោះនឹងត្រូវបានផ្តល់ជូនតាមបញ្ជីឈ្មោះដែលមាន៖ « ទោះជាមានការបិទផ្សាយហើយក៏ដោយ ចំណុចដែលមានទំនាស់មិនអាចចេញបានទេ អ៊ីចឹងវានៅតែមានការឃ្លុំទុកមួយ ព្រោះចាត់ថាជាដីទំនាស់ដោយមិនប្រគល់ឲ្យភាគីណាមួយទេ។ បងប្អូនត្រូវតែយល់ពីសិទ្ធិនេះ។ ទីមួយ សិទ្ធិទៅពិនិត្យតវ៉ាដល់កន្លែង សិទ្ធិបង្ហាញឯកសារ ភស្តុតាង និងសាក្សី។ ទីពីរ សិទ្ធិធ្វើការប្ដឹងផ្តល់ ហើយទីបី បងប្អូនត្រូវតែតាមមើលទៀតថាតើពេលគេបិទផ្សាយចេញបញ្ជីក្បាលដី គេដាក់ថាកន្លែងទំនាស់ ឬឃ្លុំទុកដែរឬអត់ » ។
អាស៊ីសេរី មិនអាចទាក់ទងប្រធានមន្ទីរសុរិយោដីខេត្តកំពត លោក យិន វុឌ្ឍ បានទេនៅថ្ងៃទី៣ មេសា ដើម្បីស្រាយបំភ្លឺជុំវិញរឿងនេះ ដោយទូរស័ព្ទចូលជាច្រើនដង ប៉ុន្តែមិនមានអ្នកទទួល។
ទាក់ទងរឿងនេះ មន្ត្រីស៊ើបអង្កេតសមាគមអាដហុក (ADHOC) ខេត្តកំពត លោក ហេង ភារៈ ជំរុញឲ្យអាជ្ញាធរជំនាញចុះសិក្សាករណីនេះឲ្យបានច្បាស់លាស់ ដើម្បីផ្តល់ជាកម្មសិទ្ធិដីធ្លីជូនដល់ប្រជាពលរដ្ឋក្រីក្រពិតប្រាកដ ចៀសវាងការផ្តល់ប័ណ្ណកម្មសិទ្ធិដល់អ្នកមិនមែនជាពលរដ្ឋធ្លាប់កាន់កាប់ដីនោះ ជាពិសេសលោកស្នើឲ្យអាជ្ញាធរជំនាញ ស៊ើបអង្កេតការលើកឡើងរបស់ពលរដ្ឋ ដែលថាមានឈ្មួញដីនៅពីក្រោយខ្នងបញ្ហានេះ និងជាអ្នកឲ្យពលរដ្ឋផ្សេងមកឈរឈ្មោះ ដើម្បីទទួលផលពីដីប្រទានកម្មរបស់រដ្ឋនេះ៖ « ខាងសមាគមអាដហុក សំណូមពរដល់មន្ត្រីពាក់ព័ន្ធ និងមន្ត្រីសុរិយោដីខ្លួនឯងដែលធ្វើកិច្ចការប្រទានកម្មជូនពលរដ្ឋ រកឲ្យឃើញជាក់លាក់ថា តើបុគ្គលដែលបានបិទឈ្មោះហ្នឹង មានបុគ្គលនៅពីខាងក្រោយ ដើម្បីចាំកេងប្រវ័ញ្ចផលចំណេញបន្ទាប់ពីពួកគាត់បានដីហើយដែរឬទេ។ បើសិនជារកឃើញបែបនេះមែន អ៊ីចឹងវាជាករណីមួយដែលរំលោភទៅនឹងការផ្តល់ប្រទានកម្មជូនពលរដ្ឋហើយ » ។
កាលពីចុងឆ្នាំ២០១៥ កន្លងទៅ រាជរដ្ឋាភិបាលបានសម្រេចកាត់ដីទំហំ ៥២៣,១៣ហិកតារ ចេញពីគម្របព្រៃឈើឆ្នាំ២០០២ និងធ្វើអនុបយោគជាដីឯកជនរបស់រដ្ឋ សម្រាប់ប្រទានកម្មជាកម្មសិទ្ធិជូនប្រជាពលរដ្ឋ ១០៣គ្រួសារនៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។
ប្រជាពលរដ្ឋនៅភូមិព្រៃពាយ អះអាងថា បើសិនជាមិនមានដំណោះស្រាយសមស្របនោះទេ ពួកគាត់នឹងលើកគ្នាទៅតវ៉ាតាមអង្គភាពជំនាញពាក់ព័ន្ធជាបន្តទៀត ព្រោះមានតែដីធ្លីនេះហើយដែលជាក្តីសង្ឃឹមរបស់ពួកគាត់ ក្នុងការប្រកបរបរចិញ្ចឹមជីវិតទៅថ្ងៃមុខទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។