ប្រជាពលរដ្ឋរស់នៅលើអគារប៊ូឌីង នៅតែអះអាងមិនព្រមចាកចេញពីអគារ ប្រសិនបើទីតាំងថ្មីដែលផ្ដល់ឲ្យនោះ មិនអាចប្រកបរបរចិញ្ចឹមជីវិត និងឆ្ងាយពីកន្លែងធ្វើការ ឬសាលារៀន។ ប៉ុន្តែអ្នកនាំពាក្យសាលារាជធានីភ្នំពេញ ថាមិនបានដឹងពីគម្រោងផ្លាស់ប្ដូរទីលំនៅរបស់ពលរដ្ឋនៅឡើយទេ។
ពលរដ្ឋរស់នៅអគារប៊ូឌីង ផ្ដើមជជែកគ្នាឡើងវិញរឿងផ្លាស់ប្ដូរកន្លែងរស់នៅថ្មី បន្ទាប់ពីពួកគេទទួលដំណឹងពីអាជ្ញាធរមូលដ្ឋានថា ឲ្យពលរដ្ឋទៅរស់នៅក្នុងបុរីមួយឈ្មោះថា រុងរឿង នៅត្រើយម្ខាងក្នុងខណ្ឌជ្រោយចង្វារ។ ទោះសាលារាជធានីភ្នំពេញ បដិសេធថា គ្មានគម្រោងប្ដូរកន្លែងរស់នៅក៏ដោយ ប៉ុន្តែពួកគេមិនជឿលើការអះអាងនោះទេ។
ពលរដ្ឋម្នាក់រស់នៅអគារប៊ូឌីង លោក សែម សាវុធ ប្រាប់ថា អាជ្ញាធរមូលដ្ឋានផ្ដល់អគារឲ្យពលរដ្ឋជាថ្នូរនៃការចាកចេញ ប៉ុន្តែមិនមានផ្ដល់ជាថវិកាទេ។ ពលរដ្ឋរូបនេះ ស្នើទៅអាជ្ញាធរពាក់ព័ន្ធ ពិសេសសាលារាជធានីភ្នំពេញ ផ្ដល់ព័ត៌មាននេះ ឲ្យបានច្បាស់លាស់ដល់ពលរដ្ឋជាជាងការជូនដំណឹងណាមួយដែលមិនផ្លូវការ៖ «គេឲ្យយើងអ្នកផ្ទះនៅក្រោម នៅក្រោម អ្នកនៅលើ នៅលើដដែល គេអត់ឲ្យលុយទេ។ ឮថា ផ្ទះតូចជាងកន្លែងថ្មីត្រូវដោះដូរជាលុយថែមទៀតផង»។
តាមការបញ្ជាក់របស់ពលរដ្ឋ នេះមិនមែនជាលើកទី១ទេដែលអាជ្ញាធរមូលដ្ឋានជូនដំណឹងពីការផ្លាស់ប្ដូរទីតាំងរស់នៅរបស់ពលរដ្ឋនៅអគារប៊ូឌីង។ តាមរបាយការណ៍របស់ក្រុមការងារពិសេសសិទ្ធិលំនៅឋានដែលស្រាវជ្រាវនៅឆ្នាំ២០១៥ ពលរដ្ឋរស់នៅអគារប៊ូឌីង មានពីរភូមិ ស្មើនឹងពលរដ្ឋចំនួន ២.៤៨៣នាក់ និងមាផ្ទះជិត ៥០០ខ្នងផ្ទះ។ អគារនេះ នៅកណ្ដាលក្រុង ក្នុងខណ្ឌចំការមន នៃរាជធានីភ្នំពេញ ជាតំបន់ដែលដីមានតម្លៃថ្លៃកប់ពពក។
ពលរដ្ឋម្នាក់ទៀតប្រកបរបរលក់ដូរ លោកស្រី ស្រេង សុផា ទាមទារឲ្យការផ្ដល់ទីតាំងថ្មី អាចឲ្យលោកស្រីប្រកបរបររកស៊ីបានដើម្បីចិញ្ចឹមជីវិត ហើយនៅជិតសាលារៀន។ ប៉ុន្តែលោកស្រីថា ប្រសិនបើកន្លែងរស់នៅថ្មីនោះ មិនអាចប្រកបរបរចិញ្ចឹមជីវិតបានទេ គឺលោកស្រីមិនចាកចេញនោះទេ៖ «និយាយឲ្យចំទៅឲ្យតែផ្ទះហ្នឹង គេឲ្យសមរម្យ អាចប្រកបមុខរបររកស៊ីបាន ខ្ញុំគិតពិចារណាទៅ ប៉ុន្តែបើរកស៊ីមិនបានខ្ញុំមិនទៅទេ»។
ទាក់ទងរឿងនេះ អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ថា រហូតមកទល់នេះ អាជ្ញាធរគ្មានគម្រោងណាមួយឲ្យពលរដ្ឋរស់នៅលើអគារប៊ូឌីង ចាកចេញពីអគារទេ។ លោកថា សាលារាជធានីមិនទាន់មានគម្រោងជាមួយក្រុមហ៊ុនណាមួយដើម្បីអភិវឌ្ឍន៍តំបន់អគារប៊ូឌីងនេះទេ។
នាយកក្រុមការងារពិសេសសិទ្ធិលំនៅឋាន លោក សៀ ភារម្យ យល់ថា ការផ្ដល់ដំណឹងរបស់អាជ្ញាធរនៅពេលនេះ ជាសញ្ញាល្អមួយនៃការផ្ដល់សំណងដល់ពលរដ្ឋ ប្រសិនបើមានការបណ្ដេញចេញ។ លោកស្នើឲ្យភាគីពាក់ព័ន្ធត្រូវរកដំណោះស្រាយសមស្របណាមួយជាមួយពលរដ្ឋ ឬត្រូវចរចាឲ្យច្រើនដង និងតម្លាភាព ដើម្បីឲ្យគ្រប់ភាគីអាចទទួលបាន៖ «ខ្ញុំគិតថា ជាដំណើរការល្អ បើសិនជាអាជ្ញាធរធ្វើដូច្នេះ ឲ្យពលរដ្ឋរស់នៅអគារប៊ូឌីង អាចទៅមើលអគារថ្មី ថាតើគាត់អាចរស់នៅបានឬទេ»។
លោក សៀវ ភារម្យ ឲ្យដឹងដែរថា កន្លងមកបុគ្គលិកក្រុមហ៊ុន អូ.ស៊ី.អាយ.ស៊ី (OCIC) ធ្លាប់ប្រាប់លោកថា ក្រុមហ៊ុនចង់ឲ្យពលរដ្ឋដែលកំពុងរស់នៅលើអគារប៊ូឌីង ទៅរស់នៅអគារបុរីរុងរឿង។ ពលរដ្ឋ និងសង្គមស៊ីវិលដែលធ្វើការងារទាក់ទងរឿងនេះ ស្នើឲ្យអាជ្ញាធរផ្ដល់ដំណោះស្រាយដោយបើកការជជែកឲ្យបានទូលាយ ដែលមិនមែនជាការបណ្ដេញចេញដូចករណីតំបន់បឹងកក់ បុរីកីឡា ដីក្រហម ឬតំបន់ថ្មគោល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។