ប្រជាពលរដ្ឋមានទំនាស់ដីធ្លីប្រមាណ ៧០នាក់ មកពី ៣សហគមន៍ផ្សេងគ្នា នាំគ្នាតវ៉ានៅមុខសាលាខេត្តបន្ទាយមានជ័យ នៅព្រឹកថ្ងៃទី១១ ខែមករា ដើម្បីជំរុញឲ្យអាជ្ញាធរខេត្តជួយរកដំណោះស្រាយជូនពួកគាត់។
ក្រុមអ្នកតវ៉ាទាំងអស់នោះ អ្នកខ្លះមកពីស្រុកថ្មពួក ស្រុកអូរជ្រៅ និងសហគមន៍ដីធ្លីផ្លូវរថភ្លើងនៅក្រុងប៉ោយប៉ែត។
តំណាងក្រុមអ្នកតវ៉ាម្នាក់មកពីសហគមន៍ដីធ្លីផ្លូវរថភ្លើង សង្កាត់ផ្សារកណ្ដាល ក្រុងប៉ោយប៉ែត លោក វន វ័ន ផ្ដល់សម្ភាសន៍ឲ្យអាស៊ីសេរី នៅមុខសាលាខេត្តបន្ទាយមានជ័យ នៅព្រឹកថ្ងៃទី១១ ខែមករា ថា មូលហេតុដែលពួកគាត់តវ៉ា ដោយសារពួកគាត់ទទូចឲ្យអាជ្ញាធរក្រុងប៉ោយប៉ែត ដោះស្រាយសំណងប៉ះពាល់ចំនួន ៣៧លើកមកហើយ តែគ្មានដំណោះស្រាយនោះទេ។ លោកអះអាងថា ការតវ៉ាលើកនេះ គឺអាជ្ញាធរខេត្តបានត្រឹមសម្របសម្រួលជាមួយពួកគាត់ដោយថា នឹងចុះទៅពិនិត្យមើលឡើងវិញដល់ទីកន្លែងរស់នៅរបស់ពួកគាត់ ដើម្បីធ្វើរបាយការណ៍ទៅអន្តរក្រសួងវាយតម្លៃតាមការជាក់ស្ដែង៖ «ដល់ពេលគាត់និយាយអ៊ីចឹងមានន័យថា អាជ្ញាធរអត់ទទួលខុសត្រូវទេ ដែលរស់នៅចម្ងាយពីផ្លូវរថភ្លើង ៧ម៉ែត្រកន្លះ អ៊ីចឹងប្រជាពលរដ្ឋវេទនាដដែល ព្រោះអីគ្មានផ្លូវដើរចេញចូលផ្ទះ ហើយរវល់តែភ័យព្រួយមិនបានទៅរកស៊ីឆ្ងាយពីផ្ទះជាដើម»។
អាស៊ីសេរីមិនអាចទាក់ទងអភិបាលខេត្តបន្ទាយមានជ័យ លោក សួន បវរ ដើម្បីសុំអត្ថាធិប្បាយបន្ថែមជុំវិញបញ្ហានេះបានទេ នៅរសៀលថ្ងៃទី១១ ខែមករា ដោយលោកប្រាប់ថា ជាប់រវល់ធ្វើសន្និបាត។ ប៉ុន្តែក្រុមអ្នកតវ៉ាអះអាងថា អាជ្ញាធរខេត្តសន្យាថា នឹងបញ្ជូនមន្ត្រីសាលាខេត្តចុះទៅជួបដោះស្រាយបញ្ហាជូនប្រជាពលរដ្ឋមកពីស្រុកថ្មពួក នៅថ្ងៃទី១៨ ខែមករា ខាងមុខ។
ទោះជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ការដោះស្រាយរបស់អាជ្ញាធរនេះ ហាក់គ្រាន់តែជាការសម្របសម្រួលបន្ទន់ចិត្តក្រុមអ្នកតវ៉ា ដើម្បីបញ្ចៀសបញ្ហាមួយគ្រាប៉ុណ្ណោះ។ លោកកត់សម្គាល់ថា កន្លងទៅអាជ្ញាធរខេត្តច្រើនតែបង្កើតគណៈកម្មការឲ្យចុះទៅពិនិត្យមើលដីទំនាស់ ប៉ុន្តែពុំបានដោះស្រាយអ្វីជូនពលរដ្ឋឡើយ៖ «កន្លែងខ្លះដោះស្រាយហើយ មិនទាន់បានប្រគល់ដីជូនភាគីទេ ដូចជាដីទំនាស់រវាងប្រជាពលរដ្ឋ និងទាហាននៅស្រុកព្រះនេត្រព្រះ ដោះស្រាយចប់អស់ហើយ។ ចំណែកពលរដ្ឋកំពុងតែរងចាំការប្រកាសប្រគល់ដី ប៉ុន្តែអត់ឃើញអាជ្ញាធរទៅប្រគល់ដីឲ្យពួកគាត់»។
លោក ស៊ុំ ច័ន្ទគា បន្ថែមថា បញ្ហាទំនាស់ដីធ្លីនៅខេត្តមួយនេះមិនទាន់ដោះស្រាយមានជិត ៣០០ករណី។
ក្រុមអ្នកតវ៉ាបានត្រឡប់ទៅផ្ទះវិញ នៅព្រឹកថ្ងៃទី១១ ខែមករា ដដែល បន្ទាប់ពីអភិបាលខេត្តបន្ទាយមានជ័យ ចេញមកជួយសម្របសម្រួលជាមួយពួកគាត់។ ពួកគាត់អះអាងថា ប្រសិនបើអាជ្ញាធរមិនដោះស្រាយដូចការសន្យាទេ ពួកគាត់នឹងតវ៉ាសាជាថ្មីទៀតក្នុងពេលឆាប់ៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។