សមត្ថកិច្ចនិងក្រុមសន្តិសុខខណ្ឌ ដូនពេញ រារាំងនិងរុញច្រានពលរដ្ឋដែលមានជម្លោះដីធ្លីជិត ១០០នាក់ មិនឲ្យទៅជួបតំណាងរាស្ត្រ ខណៈដែលតំណាងរាស្ត្រទាំងពីរគណបក្ស បន្តប្រជុំវិសាមញ្ញនីតិកាលទី៥ របស់ខ្លួន ដើម្បីបោះឆ្នោតជ្រើសរើសគណៈកម្មការអចិន្ត្រៃយ៍ក្នុងរដ្ឋសភានៅព្រឹកថ្ងៃទី២៧ សីហា។
ពលរដ្ឋតវ៉ាទាំងនោះ ត្រូវបានអាជ្ញាធរនិងក្រុមសន្តិសុខចាប់សែងម្តងៗមួយចេញពីផ្លូវដែលរាំងច្រកចេញរបស់តំណាងរាស្ត្រ ហើយកៀសពួកគាត់ឲ្យមកអែបផ្លូវម្ខាងទៀត ក្បែររបងសួនកម្សាន្តឌ្រីមឡែន (Dream Land)។
ពលរដ្ឋដែលមានជម្លោះដីធ្លីមកពីឡពាង អ្នកភូមិបឹងកក់ អតីតអ្នកបឹងកក់ និងអ្នកបុរីកីឡា សរុបជិត ១០០នាក់ បរាជ័យក្នុងការព្យាយាមជួបតំណាងរាស្ត្រ និងបណ្ដាលឲ្យស្ត្រីតវ៉ា ២នាក់សន្លប់ ក្នុងពេលរុញច្រានគ្នាទៅវិញទៅមកជាមួយសមត្ថកិច្ច។
សហគមន៍មានជម្លោះដីធ្លីទាំងនោះ បំបែកជាពីរក្រុមដើម្បីតវ៉ា។ មួយក្រុម គឺអតីតអ្នកបឹងកក់ ទៅតវ៉ានៅមុខស្ថានទូតសិង្ហបុរី ដើម្បីសាកសួរពីការឆ្លើយតបចំពោះសំណើរបស់ពួកគេ ដែលបានដាក់កាលពីថ្ងៃទី៤ សីហា កន្លងមក។ រីឯមួយក្រុមទៀត មានអ្នកឡពាង អ្នកបឹងកក់ និងបុរីកីឡា មានបំណងទៅតវ៉ានៅមុខផ្ទះលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ។ ប៉ុន្តែត្រូវសមត្ថកិច្ចរារាំង និងឲ្យពួកគេទៅឈតវ៉ានៅសួនច្បារក្បែរវត្តបទុមវតីវិញ។
សមត្ថកិច្ចនិងក្រុមសន្តិសុខខណ្ឌដូនពេញ ប្រមាណជាង ១០០នាក់ ដាក់ប៉ារាស់ដែកមិនឲ្យពួកគេធ្វើដំណើរទៅផ្ទះលោក ហ៊ុន សែន ដើម្បីដាក់ញត្តិ។ ប៉ុន្តែមន្ត្រីខុទ្ទកាល័យ លោក គង់ ចំរើន បានចេញមកទទួលញត្តិពីពលរដ្ឋទាំងនោះ។
មន្ត្រីខុទ្ទកាល័យនាយករដ្ឋមន្ត្រីរូបនេះ ហាក់អត់ធ្មត់មិនតបជាមួយពលរដ្ឋទេ នៅពេលដែលអ្នកតវ៉ាទាំងនោះនិយាយបែបចំអកឡកឡើយកុំឲ្យយកញត្តិរបស់ពលរដ្ឋទៅលាក់ទុកដូចរាល់ដងទៀត៖ «បើមិនទៅដល់ដៃសម្ដេចទេពូ (លោក គង់ ចំរើន) នឹងមានទោសមួយ គឺក្បត់លោកនាយករដ្ឋមន្ត្រី ទី២ បោកប្រាស់ពលរដ្ឋយកញត្តិទៅបោសចោល។ ពូត្រូវទទួលខុសត្រូវព្រោះញត្តិពួកខ្ញុំយកមកច្រើនដងហើយ»។
លោក គង់ ចំរើន ទទួលយកញត្តិម្ដងមួយៗពីសហគមន៍បឹងកក់ អ្នកបុរីកីឡា និងអ្នកឡពាង ដោយស្ងៀមស្ងាត់។ លោកបញ្ជាក់ប្រាប់អ្នកកាសែតថា លោកនឹងបញ្ជូនញត្តិនោះបន្តទៅគណៈកម្មការជំនាញ៖ «ខ្ញុំមាននាទីទទួលពេលខ្ញុំទទួលហើយ ខ្ញុំប្រគល់ជូនគណៈកម្មការ ហើយគណៈកម្មការហ្នឹងគេចាត់ចែងម៉េចទៀត អាហ្នឹងជានាទីរបស់គេ»។
ក្នុងញត្តិទាមទាររបស់អ្នកឡពាង ពួកគេស្នើសុំឲ្យលោកនាយករដ្ឋមន្ត្រី ហ៊ុន សែន ជួយដោះស្រាយបញ្ចប់ជម្លោះដីធ្លីជាមួយក្រុមហ៊ុន ខែ.ឌី.ស៊ី (KDC) របស់ភរិយាលោក ស៊ុយ សែម រដ្ឋមន្ត្រីរ៉ែនិងថាមពល និងស្នើសុំឲ្យដោះលែងសកម្មជនដីធ្លីឡពាង ៥នាក់ និងបញ្ឈប់ការចោទប្រកាន់ទៅលើពលរដ្ឋទាំងអស់។
អ្នកបឹងកក់ ស្នើសុំឲ្យលោក ហ៊ុន សែន ជំរុញឲ្យស្ថាប័នពាក់ព័ន្ធបោះព្រំដីទំហំជាង ១២ហិកតារ (១២.៤៤ហិកតារ) ឲ្យបានច្បាស់ និងបញ្ចូលពលរដ្ឋបឹងកក់ ចំនួន ៤០គ្រួសារ ចូលទៅក្នុងដីជាង ១២ហិកតារ និងផ្ដល់ប្លង់កម្មសិទ្ធិដល់ពួកគេ។
ចំណែកញត្តិអ្នកបុរីកីឡាវិញ ស្នើសុំលោក ហ៊ុន សែន ជំរុញឲ្យក្រុមហ៊ុនផានអ៊ីម៉ិច (Phan Imex) សាងសង់អាគារ២ បន្ថែមទៀត សម្រាប់ពលរដ្ឋដែលសេសសល់។
ក្រុមអ្នកតវ៉ាទាំងនោះ បានឌឺដងទៅសមត្ថកិច្ចដែលរារាំងពួកគេ ព្រមទាំងចាក់ប្រសាសន៍លោក ហ៊ុន សែន កាលពីថ្ងៃទី១៨ សីហា កន្លងមក ដែលលោកបន្ទោសទៅអាជ្ញាធរថា បានរារាំងពលរដ្ឋមកតវ៉ារឿងដីធ្លី ហើយញត្តិដែលពលរដ្ឋដាក់ឲ្យកន្លងមក ក៏មិនបានដល់ដៃលោកថែមទៀត។
យ៉ាងណាក្រោយពីញត្តិពួកគេត្រូវបានមន្ត្រីខុទ្ទកាល័យទទួលយកហើយនោះ អ្នកតវ៉ាទាំងពីរក្រុមបានប្រមូលផ្តុំគ្នាទៅតវ៉ានៅមុខរដ្ឋសភា ដើម្បីជួបតំណាងរាស្ត្រ ប៉ុន្តែត្រូវអាជ្ញាធររារាំង។ ក្រុមសមត្ថកិច្ចនិងអ្នកតវ៉ាបានរុញច្រានគ្នាទៅវិញទៅមក។ អ្នកតវ៉ាខ្លះដោយខឹងពេក បានយកពងមាន់គប់ទៅលើសមត្ថកិច្ច ហើយខ្លះទៀតគប់ទៅលើរូបថតលោក កែប ជុតិមា ដែលពលរដ្ឋអះអាងថា ជាមនុស្សម្នាក់បានបណ្ដោយឲ្យមានការរំលោភដីធ្លីជាច្រើននៅភ្នំពេញ។
ដោយពិបាករុញច្រានពលរដ្ឋឲ្យចេញពីផ្លូវ ខាងសមត្ថកិច្ចបានចាប់សែងអ្នកតវ៉ាម្តងមួយៗ ទៅដាក់សួនច្បារសម្តេច ជួន ណាត ហើយមិនអស់ចិត្តសមត្ថកិច្ចបន្តសែងអ្នកតវ៉ាទាំងនោះចេញពីសួនច្បារនោះទៀត និងទម្លាក់ពួកគេនៅក្បែររបងសួនកម្សាន្តឌ្រីម លែន និងបានរំអុកឲ្យអ្នកតវ៉ាទាំងនោះត្រឡប់ទៅផ្ទះ រហូតយកឡានដឹកក្រុមសន្តិសុខមកដឹកក្រុមអ្នកតវ៉ាទៅផ្ទះ។
មន្ត្រីអង្កេតអង្គការលីកាដូ លោក ឆេង សុភ័ស្ត គិតថា រាជរដ្ឋាភិបាលត្រូវមានយន្តការនិងការស្រាវជ្រាវឲ្យច្បាស់លាស់ ដើម្បីដោះស្រាយបញ្ហាជម្លោះរបស់អ្នកតវ៉ាទាំងនោះ៖ «ស្រាវជ្រាវពិតប្រាកដតើផលប៉ះពាល់វាកើតឡើងពីមូលហេតុអីពិតប្រាកដក្នុងជម្លោះបឹងកក់ បុរីកីឡា និងអ្នកឡពាង»។
លោក ហ៊ុន សែន ប្រកាសជាសាធារណៈ ដោយជំរុញឲ្យអាជ្ញាធរមូលដ្ឋានដោះស្រាយឲ្យមានប្រសិទ្ធភាពចំពោះទំនាស់ដីធ្លីនៅថ្នាក់មូលដ្ឋានរៀងៗខ្លួន។ ជាការកត់សម្គាល់នោះ អាជ្ញាធរខណ្ឌដូនពេញ ហាក់យកចិត្តទុកជាមួយក្រុមអ្នកតវ៉ាខុសពីរាល់ដង ដែលតែងបង្ក្រាបពួកគេមិនឲ្យមកតវ៉ា។ ដោយលើកនេះបានចំណាយប្រាក់ជិត ១០០ដុល្លារ សម្រាប់ជួលម៉ូតូកង់បីចំនួន ១២គ្រឿង ឲ្យក្រុមបាតុករជិត ១០០នាក់ ជិះមកតវ៉ាជាថ្នូរកុំឲ្យពួកគេហែក្បួនស្រែកទាមទារនៅតាមផ្លូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។