តាមគម្រោង ក្បួនដង្ហែ គឺចេញពីតំបន់បឹងកក់ ទៅរមណីយដ្ឋានវត្តភ្នំ និងទៅតុលាការកំពូល។ ប៉ុន្តែ ពួកគេត្រូវហាមឃាត់ដោយអាជ្ញាធរសមត្ថកិច្ចចម្រុះជាច្រើនសិបនាក់ ដែលត្រូវដាក់ពង្រាយបិទគ្រប់ច្រកចេញចូលទៅតំបន់បឹងកក់។ ស្របគ្នានោះ ឡានមួយគ្រឿងរបស់អង្គការសិទ្ធិមនុស្ស ក៏ត្រូវឃាត់ទុក ដោយសារជាប់ពាក់ព័ន្ធនឹងការជួយដឹកជញ្ជូនសម្ភារៈអោយអ្នកបឹងកក់។
អ្នកបឹងកក់ បានព្យាយាមជម្នះលើការរារាំងរបស់ក្រុមសមត្ថកិច្ច ដោយបានទៅប្រមូលផ្ដុំគ្នានៅរមណីយដ្ឋានវត្តភ្នំ និងនាំគ្នាហែក្បួនទៅតវ៉ានៅខាងមុខតុលាការកំពូល ទាមទារអោយមានការដោះលែង អ្នកស្រី យ៉ោម បុប្ផា។
តំណាងអ្នកបឹងកក់ អ្នកស្រី ទេព វន្នី មានប្រសាសន៍ថា គោលបំណងសំខាន់បំផុត គឺទាមទារអោយអាជ្ញាធរពាក់ព័ន្ធ ត្រូវផ្ដល់យុត្តិធម៌ដល់ អ្នកស្រី យ៉ោម បុប្ផា។
ក្រុមអ្នកតវ៉ា ពាក់អាវពណ៌ខ្មៅ និងក្បាំងលើក្បាល មានរូបថត អ្នកស្រី យ៉ោម បុប្ផា។ ពួកគេបាននាំគ្នាអង្គុយតម្រៀបគ្នាអោយចេញជាលេខ ៣៦៥ បន្ទាប់មកបានបង្ហោះប៉ោងៗចំនួន ៣៦៥ ដែរ ដែលជាចំនួនថ្ងៃនៃការជាប់ពន្ធនាគាររបស់ អ្នកស្រី យ៉ោម បុប្ផា។
កូនប្រុសរបស់ អ្នកស្រី យ៉ោម បុប្ផា កុមារា លួស លីហួ ថ្លែងថា គេសូមអោយដោះលែងម្ដាយមកវិញ ព្រោះគេដឹងថា ម្ដាយគេគ្មានកំហុសឡើយ។
អ្នកស្រី យ៉ោម បុប្ផា ដែលមានវ័យ ៣០ឆ្នាំ ជាប់ពន្ធនាគារបានរយៈពេល ១ឆ្នាំហើយ បន្ទាប់ពីត្រូវសាលាដំបូងរាជធានីភ្នំពេញ កាត់អោយមានទោស ៣ឆ្នាំ ហើយក្រោយមកត្រូវសាលាឧទ្ធរណ៍សម្រេចបន្ធូរបន្ថយអោយមកជាប់ទោស ២ឆ្នាំវិញ ក្នុងសំណុំរឿងអំពើហិង្សាមួយនៅក្នុងភូមិ។ ចំណែកសម្ភារៈមួយចំនួនរបស់អ្នកតវ៉ា រួមមានបដា អាវយឺតមួយចំនួន ទង់ជាតិ មេក្រូ ស្គរ និងផ្កាឈូកត្រូវអាជ្ញាធរមានសមត្ថកិច្ចរារាំងមិនឲ្យយកចេញពីភូមិ ដោយសម្អាងថា អ្នកភូមិពុំបានច្បាប់អនុញ្ញាតអោយធ្វើការហែក្បួនឡើយ។
ទីបំផុត អ្នកភូមិសម្រេចផ្ញើសម្ភារៈមួយចំនួននឹងឡានរបស់មជ្ឈមណ្ឌលសិទ្ធិមនុស្សកម្ពុជា ហើយក៏ត្រូវអាជ្ញាឃាត់ទៀត និងមានបំណងឆែកឆេរឡានដោយគ្មានដីកា ព្រមទាំងចង់យកឡាននោះទៅខណ្ឌដូនពេញ ដោយចោទប្រកាន់ថា បានដឹកជញ្ជូនសម្ភារៈដែលនឹងនាំអោយក្បួនបាតុកម្មខុសច្បាប់។ ស្របគ្នានេះ ស្គរ បដា និងទង់ជាតិរបស់អ្នកបឹងកក់ ត្រូវនាំទៅរក្សាទុកនៅខណ្ឌដូនពេញ។
មន្ត្រីមជ្ឈមណ្ឌលសិទ្ធិមនុស្សកម្ពុជា លោក វ៉ាន់ សូផាត មានប្រសាសន៍ថា ការឃាត់ឡានរបស់អង្គការសិទ្ធិមនុស្សនៅពេលនេះ គឺជាការគំរាមកំហែងដល់អ្នកការពារសិទ្ធិមនុស្សដទៃទៀត ដែលហ៊ានចេញមុខការពារសិទ្ធិសេរីភាពបញ្ចេញមតិរបស់ពលរដ្ឋ។
១-
២-
៣-
៤-
៥-
៦-
៧-
៨-
៩-
១០-
១១-
បន្ទាប់ពីមានការចរាចរដោះស្រាយដោយមានអន្តរាគមន៍ពីតំណាងអង្គការសហប្រជាជាតិ និងតំណាងសហគមន៍អឺរ៉ុប នៅកន្លែងកើតហេតុ គឺខាងក្រោយស្ថានទូតបារាំង គេឃើញព្រះរាជអាជ្ញារងអមសាលាដំបូងរាជធានីភ្នំពេញ ចុះទៅដោយផ្ទាល់ ដើម្បីធ្វើអោយការឆែកឆេរឡានបានទៅជាស្របច្បាប់ បន្ទាប់មកបានអនុញ្ញាតអោយយកឡាននោះចេញ។
មន្ត្រីសមាគមសិទ្ធិមនុស្សអាដហុក (Adhoc) លោក ចាន់ សុវ៉េត បានហៅការរារាំងតាមគ្រប់រូបភាពរបស់កម្លាំងមានសមត្ថកិច្ច ទៅលើការតវ៉ារបស់អ្នកបឹងកក់ គឺជាការរំលោភបំពានច្បាប់ដែលធានាសិទ្ធិសេរីភាពក្នុងជួបប្រជុំ និងការតវ៉ារបស់ពលរដ្ឋ។
ឆ្លើយតបនឹងការចោទប្រកាន់នេះ នាយកទីចាត់ការសាលារាជធានីភ្នំពេញ លោក ឡុង ឌីម៉ង់ បញ្ជាក់ថា តាំងពីដើមដល់ចប់ បាតុកម្មរបស់អ្នកបឹងកក់ គឺពុំមានច្បាប់អនុញ្ញាត។ ចំណែកអង្គការមិនមែនរដ្ឋាភិបាល ដែលចូលមកពាក់ព័ន្ធក្នុងរឿងនេះ គឺជាអ្នកលើកទឹកចិត្តអោយអ្នកភូមិធ្វើខុសច្បាប់។
នៅថ្ងៃគ្រប់រយៈពេល ១ឆ្នាំនៃការជាប់ពន្ធនាគាររបស់ អ្នកស្រី យ៉ោម បុប្ផា នេះ ក្រុមអង្គការជាតិ និងអន្តរជាតិការពារសិទ្ធិមនុស្ស ក៏បានទាមទារអោយដោះលែងអ្នកស្រីដែរ ដោយសម្អាងថា អ្នកស្រី យ៉ោម បុប្ផា គឺជាអ្នកទោសមនសិការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។