ពលរដ្ឋមានបញ្ហាដីធ្លីតំបន់បឹងកក់ ក្រុម ២៤គ្រួសារដែលមិនទាន់ដោះស្រាយចប់សព្វគ្រប់ នាំគ្នាទៅទាមទារបីចំណុចធំៗ គឺស្នើសុំប្លង់កម្មសិទ្ធិ រៀបចំហេដ្ឋារចនាសម្ព័ន្ធ និងស្នើសុំឲ្យសាលាក្រុងភ្នំពេញពន្លឿនដោះស្រាយបញ្ហាដល់ពួកគេ។ ការទាមទាររបស់ពលរដ្ឋក្រោយពីលោក ហ៊ុន សែន ប្រកាសជាលើកទីពីរឲ្យសាលាក្រុងភ្នំពេញ ដោះស្រាយបញ្ចប់បញ្ហាដីធ្លីតំបន់បឹងកក់។
មួយថ្ងៃក្រោយពីប្រមុខរដ្ឋាភិបាលប្រកាសឲ្យអភិបាលក្រុងភ្នំពេញ ដោះស្រាយបញ្ចប់បញ្ហាដីធ្លីតំបន់បឹងកក់ ក្រុមពលរដ្ឋដែលសាលាក្រុងដោះស្រាយមិនទាន់ចប់រួចរាល់នោះ លើកសំណើជាថ្មីដើម្បីសុំឲ្យសាលាក្រុងពន្លឿនដោះស្រាយបញ្ហាផ្លូវ ទឹក ភ្លើង លូ និងការផ្តល់ប័ណ្ណកម្មសិទ្ធិដីធ្លីរបស់ពួកគាត់ដែលអូសបន្លាយនាពេលកន្លងទៅ។
តំណាងក្រុមពលរដ្ឋតំបន់បឹងកក់ លោក ចាន់ ពុទ្ធិស័ក្តិ ដែលបានដាក់ញត្តិជូនមន្ត្រីសាលាក្រុង ឲ្យអាស៊ីសេរីដឹងនៅថ្ងៃទី២៣ ខែសីហា ថា មន្ត្រីសាលាក្រុងសន្យានឹងដោះស្រាយបញ្ហាផ្លូវ ទឹក ភ្លើងដល់ពលរដ្ឋ។ ដោយឡែកករណីពលរដ្ឋពីរគ្រួសារមិនទាន់បានប័ណ្ណកម្មសិទ្ធិដីធ្លី លោក ចាន់ ពុទ្ធិស័ក្តិ ប្រាប់ទៀតថា មន្ត្រីជំនាញនឹងប្រជុំគ្នាសិន ហើយពេលប្រជុំចប់ ពួកគេនឹងយកលទ្ធផលនោះផ្តល់ទៅអភិបាលក្រុងភ្នំពេញជាអ្នកសម្រេចចិត្ត៖ « ជាពិសេស គឺទឹក និងភ្លើង ព្រោះពលរដ្ឋសុំតពីគេសេវាថ្លៃមែនទែន ទឹកមួយគូប ពីរពាន់រៀល ហើយភ្លើងមួយគីឡូវ៉ាត់ ពីរពាន់រៀល »។
សាលារាជធានីភ្នំពេញ កាលពីខែមេសា ឆ្នាំ២០១៧ ប្រកាសដាក់ឱសានវាទបញ្ចប់បញ្ហាដីធ្លីនៅតំបន់បឹងកក់។ អាជ្ញាធរអំពាវនាវឲ្យពលរដ្ឋនៅតំបន់បឹងកក់ ចំនួន ៧គ្រួសារ ទៅទទួលយកដីដែលអាជ្ញាធរកំណត់ឲ្យ។
ប៉ុន្តែតំណាងសហគមន៍បឹងកក់រូបនេះប្រាប់ថា សព្វថ្ងៃបញ្ហាដីធ្លីនៅបឹងកក់មិនមែននៅសល់តែពលរដ្ឋ ៧គ្រួសារ ដែលសព្វថ្ងៃមិនមានឈ្មោះកាន់កាប់ដីធ្លីនោះទេ ក៏មានពលរដ្ឋមានឈ្មោះទទួលបានដីធ្លីរបស់ខ្លួនវិញ ប៉ុន្តែគ្មានប័ណ្ណកម្មសិទ្ធិ និងអ្នកបានប័ណ្ណកម្មសិទ្ធិ តែតំបន់របស់ពួកគេមិនទាន់បានរៀបចំប្រព័ន្ធផ្លូវ ទឹក ភ្លើង ជាដើម។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី ប្រាប់ថា សាលារាជធានីនឹងមានកិច្ចប្រជុំជាមួយអ្នកបឹងកក់នៅថ្ងៃខាងមុខ ប៉ុន្តែលោកមិនទាន់ដឹងថា កិច្ចប្រជុំនេះនឹងធ្វើឡើងនៅពេលណានៅឡើយទេ។
កាលពីថ្ងៃទី២២ ខែសីហា ក្រោយពីពលរដ្ឋសហគមន៍បឹងកក់ លោកស្រី ហុង សុខហេង ស្នើទៅលោក ហ៊ុន សែន ជួយដោះស្រាយបញ្ចប់បញ្ហាដីធ្លីតំបន់បឹងកក់ លោកនាយករដ្ឋមន្ត្រី ហ៊ុន សែន បញ្ជាឲ្យអភិបាលរាជធានីភ្នំពេញដោះស្រាយបញ្ចប់ ខណៈបញ្ហាដីធ្លីនៅតំបន់នេះបានអូសបន្លាយជាង ១០ឆ្នាំមកហើយ។
ក្នុងពេលនោះដែរ លោក ហ៊ុន សែន សួរបែបឌឺដងពីយុទ្ធនាការថ្ងៃច័ន្ទពណ៌ខ្មៅ ដែលយុទ្ធនាការតស៊ូមតិនេះ ក្រុមពលរដ្ឋធ្វើកាលណោះទាមទារឲ្យដោះលែងមន្ត្រីអាដហុក (ADHOC) ៤រូប និងអគ្គលេខាធិការរង គ.ជ.ប មួយរូប៖ « ស្អី ! អាប្លែកម៉ានដេចឹងហែស (Black Monday) ម៉េចទៅហើយ ! ហឹស !»។
តំណាងសហគមន៍បឹងកក់ដ៏លេចធ្លោ អ្នកស្រី ទេព វន្នី ក៏ត្រូវសមត្ថកិច្ចចាប់ខ្លួនជាថ្មីកាលពីខែសីហា ឆ្នាំ២០១៦ ពេលអ្នកស្រីធ្វើយុទ្ធនាការថ្ងៃច័ន្ទពណ៌ខ្មៅ ទាក់ទងសំណុំរឿងចាស់ករណីហិង្សាក្បែរផ្ទះលោក ហ៊ុន សែន កាលពីឆ្នាំ២០១៣ កន្លងទៅ ដែលសព្វថ្ងៃនេះ អ្នកស្រីកំពុងជាប់ឃុំនៅពន្ធនាគារដដែល។
សកម្មជនដីធ្លីតំបន់បឹងកក់ កញ្ញា សុង ស្រីលាភ យល់ថា ការចាប់ខ្លួនអ្នកស្រី ទេព វន្នី ជាថ្មីនេះ គឺមានជាប់ពាក់ព័ន្ធនឹងការតស៊ូមតិថ្ងៃច័ន្ទពណ៌ខ្មៅរបស់ពលរដ្ឋតំបន់បឹងកក់។ កញ្ញាបន្តថា ការចាប់ខ្លួនជាការបំបាក់ស្មារតីពលរដ្ឋ និងអ្នកស្រី ទេព វន្នី មិនឲ្យមានការទាមទារ៖ « តាំងពីយើងធ្វើយុទ្ធនាការថ្ងៃច័ន្ទពណ៌ខ្មៅ រហូតដល់ថ្ងៃទី១៥ ខែសីហា រហូតដល់មានការចាប់ខ្លួនអ្នកស្រី ទេព វន្នី ខ្ញុំជឿជាក់ថាមានជាប់ពាក់ព័ន្ធនឹងយុទ្ធនាការថ្ងៃច័ន្ទពណ៌ខ្មៅ ដោយសារអ្នកស្រី ទេព វន្នី គាត់ក្លាហាន ហើយចូលរួមក្នុងការធ្វើយុទ្ធនាការដោះលែងមន្ត្រីសង្គមស៊ីវិលយ៉ាងសកម្ម »។
ក្រោយពីមានការចាប់ខ្លួនអ្នកស្រី ទេព វន្នី ជាងមួយឆ្នាំនេះ កញ្ញា សុង ស្រីលាភ ឲ្យដឹងថា ពលរដ្ឋសហគមន៍បឹងកក់ចំនួន ៧នាក់ផ្សេងទៀតកំពុងរងបណ្តឹងនៅតុលាការ។ ជម្លោះដីធ្លីក្នុងសហគមន៍នេះបានកើតឡើងតាំងពីឆ្នាំ២០០៧ ក្រោយពីរដ្ឋាភិបាលបានអនុញ្ញាតឲ្យក្រុមហ៊ុន ស៊ូកាគូ (Shukaku) ធ្វើការអភិវឌ្ឍសម្រាប់រយៈពេល ៩៩ឆ្នាំ ក្នុងទឹកប្រាក់ប្រមាណ ៧៩លានដុល្លារសហរដ្ឋអាមេរិក លើផ្ទៃដីចំនួនជិត ១៣៣ហិកតារ។
ប៉ុន្តែក្រោយពីមានជម្លោះព្រោះការបណ្តេញពលរដ្ឋចេញ លោក ហ៊ុន សែន សម្រេចកាត់ដីឲ្យពលរដ្ឋជាង ១២ហិកតារ ឲ្យពលរដ្ឋដើម្បីអភិវឌ្ឍនៅនឹងកន្លែងកាលពីឆ្នាំ២០១១។ យ៉ាងណាក៏ដោយចុះ វិបត្តិដីធ្លីតំបន់បឹងកក់មិនបានបញ្ចប់ឡើយ និងបានអូសបន្លាយរហូតមកដល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។