អាជ្ញាធរខណ្ឌ៧មករា នៅថ្ងៃទី២២ មករា បានចេញលិខិតកោះហៅពលរដ្ឋទាំង១០គ្រួសារ ដែលតែងចេញតវ៉ាទាមទារផ្ទះនៅបុរីកីឡា ឲ្យចូលទៅរកដំណោះស្រាយ ដើម្បីបញ្ចប់ទំនាស់រ៉ាំរ៉ៃ នៅថ្ងៃទី២៣ មករា វេលាម៉ោង៨ព្រឹក។ ពលរដ្ឋនៅសហគមន៍បុរីកីឡា សង្ឃឹមថា ពួកគេនឹងទទួលផ្ទះ ឬ លុយ ២៥,០០០ដុល្លារ តាមសំណូមពររបស់ពួកគេ។
តំណាងសហគមន៍បុរីកីឡា អ្នកស្រី សរ ស៊ន ប្រាប់ថា អាជ្ញាធរខណ្ឌ បានជូនដំណឹងឲ្យពលរដ្ឋទាំង១០គ្រួសារ និងពលរដ្ឋមួយចំនួនទៀត ក្នុងចំណោមប្រពលរដ្ឋ ៣០គ្រួសារ ឲ្យទៅសាលាខណ្ឌ៧មករា ដើម្បីពិភាក្សារកដំណោះស្រាយ។ អ្នកស្រីសង្ឃឹមថា ពួកគាត់នឹងទទួលយកផ្ទះ ឬ លុយ២៥,០០០ដុល្លារ តាមសំណើ ដើម្បីឲ្យពួកគាត់មានលទ្ធភាពទិញផ្ទះរស់នៅក្នុងបុរីកីឡាដូចដើមវិញ។
អ្នកស្រី សរ ស៊ន ប្រាប់ថា ពួកគាត់មានសង្ឃឹមដោយសារ កាលពីសប្ដាហ៍មុន អាជ្ញាធរខណ្ឌ៧មករាបានទៅស្កាត់ពួកគាត់ ដើម្បីឲ្យផ្អាកការតវ៉ាមុខភូមិគ្រឹះម្ចាស់ក្រុមហ៊ុន ផាន អ៊ីមិច ដើម្បីរង់ចាំដំណោះស្រាយ។ អ្នកស្រីសង្កេតឃើញថា ប៉ុន្មានថ្ងៃមកនេះ មានចិនមកឈរត្រួតពិនិត្យមើល អគារ (F) ដែលពួកគាត់រស់នៅ ដូច្នេះអ្នកស្រីសង្ឃឹមថា នឹងទទួលបានដំណោះស្រាយជុំវិញរឿងនេះ៖ «មីងចង់បានផ្ទះនៅបុរីកីឡា ដូចមីងដាក់ញត្តិទៅសាលាក្រុងសប្ដាហ៍មុនអ៊ីចឹង ហើយមីងទាមទារលុយ២៥០០០ដុល្លារ ដើម្បីទិញផ្ទះបាននៅបុរីកីឡា ឲ្យមីងទៅភូមិអណ្ដូងមីងអត់ទៅទេ។ តែសាលាក្រុងគាត់បញ្ជាក់ហើយថា អត់មានផ្ទះទេ នៅបុរីកីឡា អត់មានផ្ទះទេ ហើយសាលាខណ្ឌ លោក លឹម សុភា ( អភិបាលខណ្ឌ៧មករា ) ក៏គាត់និយាយដែរ កុំនិយាយរឿងផ្ទះបុរីកីឡា ព្រោះអីអត់មានផ្ទះទេ បើអត់មានផ្ទះទេ ឲ្យតែលុយមក ពួកមីងអាចទិញផ្ទះបាន ព្រោះផ្ទះនៅបុរីកីឡាមានគេលក់ច្រើនណាស់ នៅជាន់ទី៤ ទី៥ អី»។
អភិបាលខណ្ឌ៧មករា លោក លឹម សុភា ធ្លាប់បានចេញលិខិតកោះហៅពលរដ្ឋបុរីកីឡា ដែលនៅសេសសល់ ទៅរកដំណោះស្រាយនៅសាលាខណ្ឌម្ដងរួចហើយ កាលពីថ្ងៃទី២៥ ធ្នូ ឆ្នាំ២០១៧។ ការកោះហៅរបស់អភិបាលខណ្ឌ៧មករា ធ្វើឡើងនៅក្រោយថ្ងៃផុតឱសានវាទរបស់សាលាក្រុង ដែលបញ្ជាឲ្យក្រុមពលរដ្ឋបុរីកីឡាទាំង ១១គ្រួសារទទួលបានសំណង និងចាកចេញពីផ្ទះ ទៅរស់នៅភូមិអណ្ដូង ជាយរាជធានីភ្នំពេញ។ កាលណោះ សហគមន៍មានជម្លោះដីធ្លីបុរីកីឡា ថា ដំបូងនៅពេលលឺដំណឹងថា អភិបាលខណ្ឌកោះហៅដើម្បីរកដំណោះស្រាយ ពួកគាត់សប្បាយចិត្តណាស់ ប៉ុន្តែ ធាតុពិតគឺជារូបភាពគំរាមពលរដ្ឋឲ្យទទួលយកដំណោះស្រាយមិនសមរម្យទៅវិញ។
ពលរដ្ឋទាំង១០គ្រួសារ ដែលមិនទាន់បញ្ចប់ជម្លោះ អះអាងថា ពួកគាត់ទទួលយកតែជម្រើសទាំងពីរ ប៉ុណ្ណោះ គឺទទួលយកអគារនៅបុរីកីឡា ឬលុយ ២៥០០០ដុល្លារ សម្រាប់ទិញអគារមករស់នៅវិញ។
ជុំវិញការកោះហៅពលរដ្ឋមានជម្លោះដីធ្លីរ៉ាំរ៉ៃ ឲ្យចូលរួមប្រជុំរកដំណោះស្រាយដីធ្លី នៅសាលាខណ្ឌ៧ មករា នៅថ្ងៃទី២៣ មករា សង្គមស៊ីវិល ធ្វើការផ្នែកសិទ្ធិមនុស្ស និងដីធ្លី មានសង្ឃឹមថា អាជ្ញាធរ នឹងផ្ដល់ដំណោះស្រាយយ៉ាងសមរម្យ ឲ្យពលរដ្ឋមានជម្លោះដីធ្លីនៅសហគមន៍បុរីកីឡា យ៉ាងពិតប្រាកដ។
អ្នកនាំពាក្យសមាគមសិទ្ធិមនុស្សអាដហុក (Adhoc) លោក ស៊ឹង សែនករុណា ជំរុញឲ្យអាជ្ញាធរគោរពពាក្យសន្យា ដោយឈប់បោកបញ្ឆោតពលរដ្ឋក្រីក្រ ដែលរងគ្រោះនៅសហគមន៍បុរីកីឡាតទៅទៀត ព្រោះកាលពីសប្ដាហ៍មុន អាជ្ញាធរបានសន្យាថា ផ្ដល់សំណងឲ្យអ្នកបុរីកីឡា ក្នុងសប្ដាហ៍នេះ។ លោក ស៊ឹង សែនករុណា មើលឃើញថា ប្រសិនបើករណីពលរដ្ឋរងគ្រោះនៅបុរីកីឡា ត្រូវបិទបញ្ចប់ដោយសំណងសមរម្យ ពលរដ្ឋអាចទទួលយកបាន អាជ្ញាធរ និងរដ្ឋាភិបាល នឹងទទួលបានប្រជាប្រិយភាព និងការគោរពពីពលរដ្ឋ។ ប៉ុន្តែ ប្រសិនបើអាជ្ញាធរ នៅតែភូតកុហកពលរដ្ឋបន្តទៀត ជម្លោះរ៉ាំរ៉ៃ នឹងនៅតែបន្តរំខានអាជ្ញាធរ ឬអាចរងការរិះគន់ពីពលរដ្ឋរងគ្រោះបន្ថែមទៀត៖ «នាពេលថ្មីៗនេះយើងឃើញថា មានការចេញអះអាងដោះស្រាយ យើងសង្ឃឹមថា អាជ្ញាធរនឹងដោះស្រាយ ហើយយើងសង្ឃឹមថាអាជ្ញាធរផ្ដោត និងយកចិត្តទុកដាក់ដោះស្រាយជូនពួកគាត់បាទ»។
ចំណែកអ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត សរសើរអាជ្ញាធរមូលដ្ឋាននៅរាជធានីភ្នំពេញថា បានខិតខំដោះស្រាយឲ្យពលរដ្ឋរងគ្រោះនៅបុរីកីឡាបានច្រើនគ្រួសារណាស់ ល្មមដល់ពេលបញ្ចប់ជម្លោះនេះឲ្យអស់ នៅត្រឹមសប្ដាហ៍ក្រោយនេះហើយ៖ «ពិបាកនឹងទស្សន៍ទាយដែរពីព្រោះដូចដែលខ្ញុំបានជម្រាបអញ្ចឹងប្រជាពលរដ្ឋគាត់ជួបប្រទះអស់ហើយ អ្វីដែរអាជ្ញាធរធ្លាប់សន្យាជាមួយពួកគាត់ ដូចជាការសន្យាខ្យល់ឲ្យពួកគាត់អ៊ីចឹងដល់ពេលកំណត់អត់ឃើញហៅទៅដោះស្រាយអីផងនឹងដូចនេះ អាជ្ញាធរ ត្រូវដោះស្រាយទៅបាទ កុំទុកអាទម្លាប់អាក្រក់អីទាំងអស់នឹងឆាប់ដោះស្រាយទៅបាទ»។
ជាច្រើនឆ្នាំមកនេះ ពលរដ្ឋនៅសហគមន៍បុរីកីឡា អះអាងថា ពួកគាត់រស់នៅប្រៀបដូចជនអនាថា លើដីរបស់ខ្លួនឯង។ ពួកគាត់ហៅការអភិវឌ្ឍនោះ ជាការបំផ្លាញសុភមង្គល និងអនាគតរបស់កូនប្រុសស្រីពួកគាត់។ បើទោះជាយ៉ាងណា ពលរដ្ឋទាំង១១គ្រួសារ ប្ដេជ្ញាថា ពួកគាត់នឹងរកដំណោះស្រាយនៅតាមស្ថានទូតនានា តាមរយៈញត្តិ និងការតវ៉ា វេចមុង ភួយ ទៅដេកតវ៉ា នៅមុខភូមិគ្រឹះរបស់ម្ចាស់ក្រុមហ៊ុន ផាន អ៊ីមិច បើនៅតែគ្មានដំណោះស្រាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។