អ្នកតវ៉ារឿងដីធ្លីមកពីសហគមន៍បុរីកីឡា ដែលមានការចូលរួមពីអ្នកបឹងកក់ ប្រមាណ ៣០នាក់ នៅព្រឹកថ្ងៃទី៥ ខែសីហា បានលើកគ្នាមកតវ៉ា និងទាមទារឲ្យសាលារាជធានីភ្នំពេញ ពន្លឿនការដោះស្រាយរឿងដីធ្លីដ៏រ៉ាំរ៉ៃ ដែលផ្ទះសម្បែង និងដីធ្លីរបស់ពួកគាត់ ត្រូវក្រុមហ៊ុន ផាន អ៊ីមិច (PhanImex) របស់អ្នកស្រី ស៊ុយ សុផាន ប្រើកម្លាំងសមត្ថកិច្ចចម្រុះ និងគ្រឿងចក្រឈូសកម្ទេច ហើយរំលោភយកកាលពីឆ្នាំ២០១២។
ការតវ៉ានេះ គឺបន្ទាប់ពីពួកគាត់ដឹងថា សាលារាជធានីភ្នំពេញ បានពិភាក្សាជាមួយសង្គមស៊ីវិល និងភាគីក្រុមហ៊ុន ផាន អ៊ីមិច អស់រយៈពេល ២ថ្ងៃកន្លងមក ដើម្បីផ្តល់ដំណោះស្រាយជូនអ្នកមានបញ្ហាដីធ្លីនៅបុរីកីឡា។
តំណាងសហគមន៍បុរីកីឡា អ្នកស្រី ឆាយ គឹមហ៊ន ថ្លែងឲ្យដឹងក្រោយជំនួបជាមួយមន្ត្រីរដ្ឋបាលសាលារាជធានីភ្នំពេញ ថា អ្នកស្រីស្នើសុំឲ្យមានវត្តមានតំណាងអ្នកបុរីកីឡា ចូលរួមការប្រជុំនៅថ្ងៃច័ន្ទ សប្ដាហ៍ក្រោយ ដើម្បីឲ្យដឹងថា ការលើកយកឯកសារអ្នកបុរីកីឡា មកពិភាក្សា និងដោះស្រាយនោះ ពិតជាត្រឹមត្រូវទៅនឹងចំនួនពលរដ្ឋ ១៥៤គ្រួសារ ដែលកំពុងរង់ចាំដំណោះស្រាយពិតប្រាកដដែរឬទេ?
មន្ត្រីរដ្ឋបាលសាលារាជធានីភ្នំពេញ លោក មាស យ៉ាដា បដិសេធមិនផ្តល់ការបកស្រាយណាមួយ ទាក់ទងនឹងចំនួនគ្រួសារពលរដ្ឋរងគ្រោះនៅបុរីកីឡា ប៉ុន្តែលោកស្នើអោយពលរដ្ឋរង់ចាំមើលលទ្ធផលក្រោយការប្រជុំរវាងសាលារាជធានីភ្នំពេញ និងសង្គមស៊ីវិល ដែលធ្វើការលើបញ្ហាដីធ្លី។
ក្នុងវេទិកាសាធារណៈកាលពីថ្ងៃទី១២ ខែសីហា អភិបាលរងសាលារាជធានីភ្នំពេញ លោក ឃួង ស្រេង បានថ្លែងថា ចំនួនពលរដ្ឋដែលរងគ្រោះរឿងដីធ្លីនៅបុរីកីឡា មាន ១៨០គ្រួសារ។
ប្រជាពលរដ្ឋតវ៉ាដីធ្លីនៅបុរីកីឡា នៅតែទទូចឲ្យសាលារាជធានីភ្នំពេញ ជួយជំរុញក្រុមហ៊ុន ផាន អ៊ីមិច របស់ អ្នកស្រី ស៊ុយ សុផាន គោរពតាមកិច្ចសន្យារបស់ខ្លួន ដែលថាសាងសង់ឲ្យគ្រប់ ១០អគារ សម្រាប់ពលរដ្ឋដែលបាត់បង់ដីធ្លី និងផ្ទះសម្បែងក្រោយការបណ្ដេញចេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។