មន្ត្រីសង្គមស៊ីវិលជំរុញឲ្យអាជ្ញាធរខេត្តក្រចេះបែងចែកដីធ្លីជូនពលរដ្ឋឲ្យមានតម្លាភាព
2015.09.01
មន្ត្រីសង្គមស៊ីវិល ជំរុញឲ្យអាជ្ញាធរខេត្តក្រចេះ បែងចែកដីធ្លីឲ្យមានតម្លាភាពជូនពលរដ្ឋ។ ការលើកឡើងនេះ បន្ទាប់ពីបញ្ជីឈ្មោះបែងចែកដីធ្លីចំនួន ១០៤គ្រួសារ ហាក់ធ្វើឡើងដោយមិនច្បាស់លាស់ និងមានភាពចម្រូងចម្រាសច្រើន ព្រមទាំងមានពលរដ្ឋចំនួន ៣៧គ្រួសារផ្សេងទៀត នៅមិនទាន់មានឈ្មោះក្នុងបញ្ជីបែងចែកដីធ្លីនៅឡើយ។ ការទាមទារឲ្យអាជ្ញាធរដោះស្រាយដីធ្លីជូនពួកគាត់ដោយតម្លាភាពនេះ ធ្វើឡើងភ្លាមៗនៅខណៈអភិបាលរងខេត្ត បានចុះទៅអង្កេតលើដីទំនាស់មុននឹងធ្វើការដោះស្រាយជូនពលរដ្ឋ។
អភិបាលរងខេត្តក្រចេះ និងមន្ត្រីសុរិយោដីខេត្ត រួមទាំងមន្ត្រីសង្គមស៊ីវិល នៅថ្ងៃទី៣១ សីហា បានចុះស្រាវជ្រាវដីជម្លោះនៅឃុំឃ្សឹម ស្រុកស្នួល ទាក់ទិនពលរដ្ឋចំនួន ៣៧គ្រួសារ នៅមិនទាន់មានឈ្មោះក្នុងបញ្ជីបែងចែកដីធ្លីក្នុងចំណោមពលរដ្ឋចំនួន ១០៤គ្រួសារ។
ការចុះស្រាវជ្រាវនេះ ធ្វើឡើងបន្ទាប់ពីមានភាពចម្រូងចម្រាសនៃការបែងចែកដីធ្លីរបស់អាជ្ញាធរស្រុក ទាក់ទងការស្រង់ស្ថិតិបញ្ជីឈ្មោះពលរដ្ឋចំនួន ១០៤គ្រួសារ អាចមានភាពមិនប្រក្រតី ដោយសារតែមានពលរដ្ឋមិនមានដីកាន់កាប់ជាក់ស្តែង បែរជាមានឈ្មោះក្នុងបញ្ជីទៅវិញ។ ចំណែកពលរដ្ឋមានដីកាន់កាប់ជាក់ស្តែង បែរជាអត់មានឈ្មោះក្នុងបញ្ជី។
អភិបាលរងខេត្តក្រចេះ ដែលបានចុះអង្កេតករណីនេះ គឺលោក ហឿ ស៊ីយ៉ែម។ លោកបញ្ជាក់យ៉ាងខ្លីថា ការដោះស្រាយបញ្ហានេះ គោលដៅសំខាន់ គឺទាល់តែមានការចូលរួមពីក្រុមពលរដ្ឋ អាជ្ញាធរ និងសង្គមស៊ីវិល ដើម្បីប្រឹក្សាលម្អិត និងស្វែងរកដំណោះស្រាយ ធ្វើយ៉ាងណាអាចទទួលយកបានទាំងអស់គ្នា។ លោកថា ជាជំហានដំបូង អាជ្ញាធរនឹងដោះស្រាយការសម្អាតបញ្ជីឈ្មោះបែងចែកដីធ្លី ដែលមានឈ្មោះពលរដ្ឋចំនួន ១០៤គ្រួសារ ដែលលោកជឿជាក់ថា នឹងទទួលបានលទ្ធផលស្ទើរតែ ១០០%៖ «ពេលនេះលទ្ធផលជាវិជ្ជមាន យើងនៅតែផ្ទៀងផ្ទាត់ទេ អ៊ីចឹងដំណាក់កាលដំបូង គឺយើងសម្អាតបញ្ជីសិន ដើម្បីឲ្យគាត់ទាំងសងខាងហ្នឹង គឺគាត់ទទួលយកបានទាំងអស់គ្នា»។
ទាក់ទងករណីនេះដែរ តំណាងពលរដ្ឋ លោក សឹម ពៅ បារម្ភចំពោះគោលការណ៍កំណត់បែងចែកដីធ្លីរបស់អាជ្ញាធរដែលតម្រូវរំលាយដី ហើយពុះដីជាឡូឲ្យស្មើៗគ្នា ដើម្បីបែងចែកជូនពលរដ្ឋចំនួន ១០៤គ្រួសារ។ លោកថា គោលការណ៍នេះមានពលរដ្ឋចំនួន ៧៣គ្រួសារក្នុងចំណោមពលរដ្ឋចំនួន ១០៤គ្រួសារ ដែលមិនយល់ព្រម និងសំណូមពរឲ្យអាជ្ញាធរខេត្តរកយន្តការផ្សេង គឺធ្វើយ៉ាងណាឲ្យពលរដ្ឋដែលមានដីធ្លីពិតប្រាកដ អាចមានលទ្ធភាពអាស្រ័យផលលើដីរបស់ខ្លួនបាន៖ «ក្រែងតែអាជ្ញាធរគាត់បានស្រង់បញ្ជីឈ្មោះហើយ ដើរតាមគ្រួសារនីមួយៗហើយ បានជាគាត់ហ្នឹងយកដីទៅអង្កន់វិញដដែល អាហ្នឹងហើយដែលធ្វើឲ្យប្រជាពលរដ្ឋមិនកក់ក្តៅក្នុងចិត្ត»។
កាលពីឆ្នាំ២០១១ ក្រុមពលរដ្ឋចំនួន ១០៤គ្រួសារ ធ្លាប់ប្តឹងផ្តល់ជាមួយក្រុមហ៊ុនវៀតណាម ប៊ិញភឿក២ ទាក់ទិនការរំលោភដីធ្លី។ រហូតមកដល់ខែកុម្ភៈ ឆ្នាំ២០១៤ អាជ្ញាធរខេត្តក្រចេះ បានកាត់ដីពីក្រុមហ៊ុន ប៊ិញភឿក២ ចំនួនជាង ២៥០ហិកតារ (២៥០.៥៦ហិកតារ) មកឲ្យពលរដ្ឋចំនួន ១០៤គ្រួសារ គ្រប់គ្រងតាមទំហំដីផ្សេងៗគ្នា ហើយមានពលរដ្ឋខ្លះទៀតត្រូវបានក្រុមហ៊ុនកាត់ដីយក។
ទាក់ទងបញ្ហានេះ ប្រធានផ្នែកដីធ្លីនៃសមាគមអាដហុក (ADHOC) លោក ឡាត់ គី មានប្រសាសន៍បញ្ជាក់ថា គោលការណ៍សម្អាតបញ្ជីស្ដែងចេញពីលទ្ធផលវិជ្ជមានយ៉ាងសំខាន់ ដើម្បីរកឃើញនូវការពិត និងជាទំនុកចិត្តសម្រាប់ពលរដ្ឋដែលមានដីធ្លីពិតប្រាកដ និងមានឈ្មោះក្នុងបញ្ជី។ លោក ឡាត់ គី កត់សម្គាល់ថា បញ្ជីឈ្មោះពលរដ្ឋចំនួន ១០៤គ្រួសារ អាចនឹងមានឈ្មោះពលរដ្ឋផ្សេងទៀត មិនមែនជាអ្នកកាន់កាប់អាស្រ័យផលជាក់ស្តែង៖ «ការដោះស្រាយដែលមានភាពប្រឈមខ្លាំងនៅចំពោះមុខបច្ចុប្បន្ននេះ គឺទាក់ទិនទៅនឹងបងប្អូនដែលគេហៅថា កាន់កាប់អាស្រ័យផលលើដីជាក់ស្តែងអត់មានឈ្មោះ ដូច្នេះបញ្ហាហ្នឹង គឺបញ្ហាអាទិភាពមួយទៀត គឺបញ្ហាអាទិភាពទី១ គឺបញ្ហាបញ្ជីឈ្មោះ ដែលត្រូវសម្អាតបញ្ជីឈ្មោះតម្លាភាព និងគណនេយ្យភាពនៅចំពោះបងប្អូនដែលអ្នកកាន់កាប់អាស្រ័យជាក់ស្តែង»។
អាជ្ញាធរស្រុកស្នួល អនុវត្តគោលការណ៍បែងចែកដីចំនួនជាង ២០០ហិកតារ ជូនពលរដ្ឋចំនួន ១០៤គ្រួសារ។ ក្នុងនោះ ពលរដ្ឋមួយគ្រួសារទទួលបានដីចំនួន ២ហិកតារ មានដីភូមិ ដីចម្ការ និងដីលិចទឹក ឋិតនៅភូមិស្រែថ្មី ឃុំឃ្សឹម ស្រុកស្នួល ក៏ប៉ុន្តែគោលការណ៍នេះរងការជំទាស់ពីពលរដ្ឋចំនួន ៧៣គ្រួសារ ក្នុងចំណោមពលរដ្ឋចំនួន ១០៤គ្រួសារ ដោយសំអាងថា អាជ្ញាធររំលាយដីដែលពួកគេធ្លាប់អាស្រ័យផល ហើយពុះជាឡូ៕