មេឃុំនៅឃុំតេជោអភិវឌ្ឍ ស្រុកឈូក ខេត្តកំពត ដាក់ពាក្យប្ដឹងកងទ័ពជើងទឹកលេខ៣១ បំពានដីអ្នកស្រុក ដែលមានប្លង់កម្មសិទ្ធ ជាង៦០គ្រួសារ។
លោក ជីម សឿន ជាមេឃុំថ្លែងថាពលរដ្ឋក្នុងភូមិក្បាលដំរី មានប្លង់កម្មសិទ្ធដីរួចរាល់ស្រាប់តែមានកងទ័ពជើងទឹក នៅកងពលលេខ៣១ យកកាំភ្លើងភ្ជង់ប្រជាពលរដ្ឋ មិនឲ្យដាំដុះក្នុងដីពួកគាត់មានប្លង់។ លោកថាដោយសារតែប្រជាពលរដ្ឋមានប្លង់កម្មសិទ្ធ អាជ្ញាធរឃុំ កំពុងរៀបចំពាក្យប្ដឹងទៅតុលាការ៖ «ខ្ញុំដាក់ពាក្យបណ្ដឹងទៅតុលាការតែម្ដង។ ខ្ញុំកំពុងតែចាត់ការរឿងនឹងហើយ»។
មេភូមិក្បាលដំរី លោក ឈឹម ជុំ ឲ្យដឹងថាក្នុងភូមិក្បាលដំរីមានពលរដ្ឋរស់នៅ ៦២៩គ្រួសារ ក្នុងនោះពលរដ្ឋ៦១គ្រួសារ ត្រូវកងទ័ពជើងទឹកក្រោមបញ្ជាឧត្ដមនាវី សាន សាម៉ន រារាំងមិនឲ្យអ្នកភូមិដាំដុះលើដីខ្លួនបាន។
វិទ្យុអាស៊ីសេរីមិនអាចទាក់ទងលោក សាន សាម៉ន ឧត្តមនាវីកងទ័ពជើងទឹកដែលរងនូវការចោទពីអាជ្ញាធរឃុំតេជោអភិវឌ្ឍបានទេ នៅថ្ងៃ២៧ ខែឧសភា ឆ្នាំ២០១៤។
ឃុំតេជោអភិវឌ្ឍ ត្រូវបានក្រសួងមហាផ្ទៃ ទទួលស្គាល់នៅពេលបោះឆ្នោតជ្រើសរើសក្រុមប្រឹក្សា ឃុំសង្កាត់ឆ្នាំ២០១២មកទេ។ ឃុំតេជោអភិវឌ្ឍ មាន៦ភូមិក្នុងនោះមានភូមិក្បាលដំរី ភូមិជ្រៃបាក់ ភូមិតេជោអភិវឌ្ឍ ភូមិអន្លង់ក្មេងលេង ភូមិអង្កាញ់ និងភូមិពង្រក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។