Opens in new windowព្រៃសហគមន៍កំពង់ក្រសាំង នៅស្រុកឆែប ខេត្តព្រះវិហារ គឺជាតំបន់ដែលសម្បូរធនធានធម្មជាតិ ដែលធ្វើឲ្យប្រជាពលរដ្ឋ និងសត្វពាហនៈជាច្រើន តែងពឹងផ្អែកដើម្បីជីវិតរស់នៅប្រចាំថ្ងៃជាយូរមកហើយ។ ក៏ប៉ុន្តែបច្ចុប្បន្ន ព្រៃនេះត្រូវបានក្រុមហ៊ុនឯកជនមួយ កំពុងដើរបាញ់ថ្នាំពណ៌ធ្វើជាសញ្ញាសម្គាល់នៅតាមដើមឈើ ក្នុងបំណងយកដីព្រៃឈើទីនោះធ្វើជាដីសម្បទានសេដ្ឋកិច្ច។
តើប្រជាពលរដ្ឋដែលធ្លាប់តែរស់នៅ ហើយពឹងផ្អែកលើព្រៃសហគមន៍នោះ មានប្រតិកម្មយ៉ាងណាចំពោះការចង់ដណ្ដើមយកដីព្រៃសហគមន៍ ទៅធ្វើជាប្រយោជន៍ក្រុមហ៊ុននេះ?
ក្រុមអ្នកភូមិកំពង់ក្រសាំង នៃឃុំកំពង់ស្រឡៅ២ ស្រុកឆែប ដែលនៅមិនឆ្ងាយប៉ុន្មានពីព្រំដែននៃប្រទេសឡាវ កំពុងព្រួយបារម្ភ និងភ័យខ្លាចបាត់បង់ដីព្រៃសហគមន៍ ដែលពួកគេធ្លាប់រស់នៅដោយពឹងផ្អែកជាយូរមកហើយ។
ការព្រួយបារម្ភ បានកើតមានឡើងបន្ទាប់ពីពួកគេឃើញមនុស្សរបស់ក្រុមហ៊ុន ដែលពួកគេមិនស្គាល់ បានដើរបាញ់ថ្នាំពណ៌ជាសញ្ញាសម្គាល់បំណងពង្រីកយកផ្ទៃដី ហើយមិនមានអាជ្ញាធរមូលដ្ឋានថ្នាក់ណាមួយជួយដោះស្រាយអ្វីសោះនោះ។
បណ្ដាញដើម្បីសកម្មភាពសហគមន៍ការពារព្រៃឈើ និងធនធានធម្មជាតិ ស៊ី.អិន.អេ (CNA) នៅឃុំកំពង់ស្រឡៅ២ គឺលោក គឿង ផន។ លោកមានប្រសាសន៍កាលពីរសៀលថ្ងៃអង្គារ ទី១ ខែកញ្ញា ថា ជាច្រើនថ្ងៃមកហើយ គឺក្រុមអ្នកភូមិកំពង់ក្រសាំង បានតវ៉ាជំទាស់ទៅនឹងមនុស្សរបស់ក្រុមហ៊ុនដែលយកថ្នាំពណ៌ ដើរបាញ់នៅតាមដើមឈើក្នុងតំបន់ព្រៃសហគមន៍។ លោក គឿង ផន បញ្ជាក់ថា មានមន្ត្រីបរិស្ថាន និងអាជ្ញាធរភូមិ-ឃុំខ្លះ បានពាក់ព័ន្ធក្នុងសកម្មភាពនាំក្រុមហ៊ុនដើរបាញ់ថ្នាំពណ៌ ធ្វើជាសញ្ញាកំណត់ព្រំប្រទល់ដីនៅតាមដើមឈើនេះ ក៏ប៉ុន្តែនៅពេលដែលគេហៅប្រជាពលរដ្ឋទៅចូលរួមប្រជុំ ហើយអ្នកភូមិសួររកឈ្មោះក្រុមហ៊ុន និងម្ចាស់ឈ្មោះអ្វី គេមិនបានប្រាប់ឡើយ។
បណ្ដាញដើម្បីសកម្មភាពសហគមន៍ការពារព្រៃឈើ និងធនធានធម្មជាតិដដែលបញ្ជាក់ថា តាមការពិនិត្យទៅលើសញ្ញាដែលគេបាញ់ថ្នាំពណ៌នៅតាមដើមឈើនោះ គឺក្រុមហ៊ុនមានបំណងដណ្ដើមដីព្រៃសហគមន៍ប្រមាណជាង ៤០០ហិកតារ៖ «ដីហ្នឹងជាតំបន់រស់នៅមានឃ្វាលគោ ឃ្វាលក្របី ប្រើប្រាស់ឫស្សី ត្រីសាច់ ក្នុងនោះគ្រប់បែបយ៉ាងទាំងអស់។ ឥឡូវនេះប្រជាជនវាយស្លាកនៅតាមមាត់ទន្លេថា ប្រឆាំងមិនឲ្យក្រុមហ៊ុនយកដីទាំងនោះធ្វើជាប្រយោជន៍ឯកជនដាច់ខាត»។
ប៉ុន្តែទាំងអាជ្ញាធរស្រុកឆែប និងមន្ត្រីរដ្ឋបាលព្រៃឈើ បានឆ្លើយដូចគ្នាថា គេពុំទាន់បានដឹងថា មានក្រុមហ៊ុនណាមួយបំណងចូលទៅកាន់កាប់តំបន់ព្រៃសហគមន៍នោះទេ។
អភិបាលស្រុកឆែប លោក សុខ សានតារា មានប្រសាសន៍ថា កាលពីថ្ងៃទី៣១ ខែសីហា កន្លងទៅ គឺលោកបានចុះទៅពិនិត្យនៅតំបន់ព្រៃសហគមន៍កំពង់ក្រសាំង នោះ គឺលោកឃើញមានតែភាពមិនប្រក្រតីមួយចំនួន ដោយប្រជាពលរដ្ឋនាំគ្នាចូលទៅសង់ផ្ទះរស់នៅខុសច្បាប់ ក៏ប៉ុន្តែចំពោះរឿងដែលថា មានក្រុមហ៊ុនឯកជនបំណងចូលទៅកាន់កាប់ដីនោះ គឺទាំងមន្ត្រីរដ្ឋបាលព្រៃឈើ និងសហគមន៍ព្រៃឈើខ្លួនឯង មិនទាន់រាយការណ៍ឲ្យលោកដឹងនៅឡើយ៖ «សហគមន៍នៅកំពង់ក្រសាំង ហ្នឹងគ្រប់គ្រងដោយមេព្រៃ ក៏ប៉ុន្តែរបាយការណ៍ខាងមេព្រៃអត់ឃើញមានដាក់មកខ្ញុំទេ ហើយខាងសហគមន៍ក៏អត់មានរាយការណ៍ដែរ»។
ចំណែកនាយសង្កាត់រដ្ឋបាលព្រៃឈើស្រុកឆែប លោក សេង លាង ក៏បានឆ្លើយថា ពេលនេះ គឺលោកកំពុងមានជំងឺ ហើយសម្រាកនៅផ្ទះ។ ដូច្នេះ លោកមិនទាន់ដឹងរឿងដែលថា មានក្រុមហ៊ុនបំណងចូលទៅយកដីព្រៃសហគមន៍នោះទេ។
ទោះយ៉ាងណា មន្ត្រីផ្នែកតស៊ូមតិរបស់អង្គការពន្លកខ្មែរ លោក ប៉ិក សោភ័ណ អះអាងថា ប្រជាពលរដ្ឋនៅភូមិកំពង់ក្រសាំង បានប្ដឹងមករូបលោកតាមរយៈទូរស័ព្ទ ស្ដីពីបញ្ហាដែលថាមានក្រុមហ៊ុនដែលគេមិនស្គាល់ឈ្មោះ កំពុងធ្វើសកម្មភាពដណ្ដើមយកដីព្រៃសហគមន៍នោះ។ លោក ប៉ិក សោភ័ណ បញ្ជាក់ថា ក្រុមអង្គការក្រៅរដ្ឋាភិបាល គ្រោងនឹងសហការគ្នាដើម្បីចុះស៊ើបអង្កេតករណីនេះនៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។