បច្ចុប្បន្ន ដីព្រៃសហគមន៍អណ្ដូងបរ នៅឃុំបេង នៃស្រុកបន្ទាយអំពិល កំពុងតែបាត់បង់ទៅៗ ធ្វើឲ្យសហគមន៍ទីនោះពិបាកនឹងការពារ។ ការបាត់បង់ បានកើតមានឡើងដំបូងគេនៅពេលដែលទាហាន បានបញ្ជូនកម្លាំងទៅបោះទីតាំងដើម្បីការពារព្រំដែនដែលជាប់ជាមួយប្រទេសថៃ ហើយថ្មីៗមានក្រុមហ៊ុនខ្លះបានចូលទៅធ្វើការដ្ឋានកិនថ្មភ្នំថែមទៀត។
តំណាងសហគមន៍ការពារព្រៃឈើអណ្ដូងបរ នៅខេត្តឧត្តរមានជ័យ បានបន្លឺសញ្ញាប្រាប់ទៅមន្ត្រីរដ្ឋាភិបាលថា ដីព្រៃសហគមន៍ដែលពួកគេទទួលការពារទំហំជាង ៦.១០០ហិកតារ អាចនឹងបាត់បង់ទាំងស្រុងក្នុងពេលដ៏ខ្លីខាងមុខ ប្រសិនបើរដ្ឋាភិបាលនៅតែមិនចាត់វិធានការជួយការពារទេ។
ក្តីព្រួយបារម្ភរបស់សហគមន៍ការពារព្រៃឈើ បានកើតឡើងនៅពេលដែលគេមើលឃើញថា កងទាហានបានចូលទៅកាន់កាប់ដីព្រៃនោះអស់ជាច្រើនរយហិកតារទៅហើយ ក៏ប៉ុន្តែថ្មីៗនេះមានក្រុមហ៊ុនកិនថ្មចំនួនពីរទៀត ក៏បានចូលទៅតំបន់ភ្នំចង្ក្រានយក្ស និងភ្នំកំបោរ ហើយយកតំបន់ព្រៃនោះធ្វើជាកន្លែងការដ្ឋានថែមទៀត។
ប្រធានសហគមន៍ការពារព្រៃឈើអណ្ដូងបរ គឺលោក កើត ម៉ាប់។ លោកអះអាងនៅរសៀលថ្ងៃអង្គារ ទី៣ ខែមករា ថា ចាប់តាំងពីអំឡុងឆ្នាំ២០១២ ទាហានជាច្រើនវរបានចូលទៅយកដីព្រៃសហគមន៍របស់លោក ធ្វើជាទីតាំងអស់ជាច្រើនរយហិកតារ ហើយបច្ចុប្បន្ន មានក្រុមហ៊ុនចំនួនពីរទៀត ក៏ចូលទៅយកដីព្រៃសហគមន៍ធ្វើជាកន្លែងការដ្ឋានកិនថ្មដែរ។ ក្រៅពីនោះ ដីព្រៃសហគមន៍ខ្លះទៀត ត្រូវអ្នកមានអំណាចដណ្ដើមយក ហើយជួលឲ្យប្រជាពលរដ្ឋឈូសឆាយធ្វើជាចម្ការដំឡូងមី។
លោក កើត ម៉ាប់ ប៉ាន់ប្រមាណថា បច្ចុប្បន្ន ដីព្រៃសហគមន៍អណ្ដូងបរ បានបាត់បង់ស្ទើរតែទាំងស្រុង គឺនៅសេសសល់ប្រហែលជាង ២០០ហិកតារប៉ុណ្ណោះ៖ « ខ្ញុំចង់ឲ្យរដ្ឋាភិបាលជួយដោះស្រាយចំពោះការរំលោភលើដីព្រៃសហគមន៍នេះ។ តាំងពីឆ្នាំ២០១២ ខ្ញុំបានប្ដឹងទៅក្រសួងកសិកម្ម ដាក់ទៅរដ្ឋសភា ទៅខុទ្ទកាល័យនាយករដ្ឋមន្ត្រី ក៏ប៉ុន្តែមិនឃើញមានដំណោះស្រាយអ្វីទេ »។
លោក កើត ម៉ាប់ អំពាវនាវឲ្យរដ្ឋាភិបាល និងក្រសួងពាក់ព័ន្ធ ជួយចាត់វិធានការការពារដីព្រៃសហគមន៍អណ្ដូងបរឲ្យបានគង់វង្សតទៅទៀត។
កាលពីឆ្នាំ២០០៩ ប្រជាពលរដ្ឋនៅឃុំបេង នៃស្រុកបន្ទាយអំពិល បានចុះកិច្ចព្រមព្រៀងជាមួយក្រសួងកសិកម្ម រុក្ខាប្រមាញ់ និងនេសាទ ដើម្បីការពារព្រៃឈើអណ្ដូងបរ ទំហំជាង ៦.១០០ហិកតារឲ្យនៅគង់វង្ស។
អភិបាលស្រុកបន្ទាយអំពិល លោក ហាំង ម៉េង បានឆ្លើយតបថា លោកមិនទាន់បានទទួលព័ត៌មានដូចអ្វីដែលសហគមន៍ព្រួយបារម្ភនោះនៅឡើយទេ។ លោក ហាំង ម៉េង បញ្ជាក់ថា បញ្ហាដែលក្រុមហ៊ុនចូលទៅធ្វើការដ្ឋានថ្មនៅភ្នំចង្ក្រានយក្ស នោះ មិនមានអ្វីគួរឲ្យព្រួយបារម្ភដល់ដីព្រៃសហគមន៍ទេ ពីព្រោះតែរដ្ឋាភិបាលបានអនុញ្ញាតឲ្យទៅដឹកជញ្ជូនថ្មយកមកធ្វើផ្លូវជាតិលេខ៥៨ មួយរយៈប៉ុណ្ណោះ៖ « ក្រុមហ៊ុនយកថ្មធ្វើផ្លូវធ្វើអីហ្នឹង មានការសម្រេចពីរដ្ឋាភិបាលដែរ ចប់ភារកិច្ចរបស់គេ គឺគេនឹងប្រគល់មកឲ្យរដ្ឋាភិបាលវិញហើយ »។
ចំណែកបញ្ហាទាហានចូលទៅធ្វើទីតាំងនៅលើដីព្រៃសហគមន៍ទៀតសោត លោក ហាំង ម៉េង ពន្យល់ថា ដីព្រៃសហគមន៍ គឺជាដីរបស់រដ្ឋ ហើយទាហានដែលចូលទៅធ្វើទីតាំងការពារព្រំដែន ក៏ជាកងទ័ពរបស់រដ្ឋ បើមិនឲ្យយកដីរបស់រដ្ឋធ្វើជាទីតាំង តើឲ្យយកដីមកពីណា?
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន មានប្រសាសន៍ថា អាជ្ញាធរគួរតែជួយដោះស្រាយលើបញ្ហាដីព្រៃសហគមន៍អណ្ដូងបរ ដែលចេះតែបាត់បង់ទៅៗនេះ ពីព្រោះកាលពីមុន រដ្ឋជាអ្នកប្រគល់ឲ្យសហគមន៍ការពារ ដូច្នេះមិនគួរធ្វើអ្វីៗដោយមិនប្រាប់សហគមន៍ គឺអាងតែជាដីរបស់រដ្ឋបែបនេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។