ពលរដ្ឋសហគមន៍ថ្មគោល រស់នៅជាប់របងអាកាសយានដ្ឋានអន្តរជាតិភ្នំពេញ ប្រមាណជាង ៣០នាក់ ដាក់ញត្តិទៅទីស្ដីការគណៈរដ្ឋមន្ត្រីនៅព្រឹកថ្ងៃទី១០ ខែឧសភា ស្នើសុំឲ្យសហការជាមួយសហគមន៍ដើម្បីស្វែងរកការដោះស្រាយសមរម្យ និងផ្ដល់យុត្តិធម៌ចំពោះការពង្រីកអាកាសយានដ្ឋានអន្តរជាតិភ្នំពេញ ដែលធ្វើឲ្យប៉ះពាល់ដីធ្លីពលរដ្ឋជាង ៥០០គ្រួសារ។
ពលរដ្ឋសហគមន៍ថ្មគោលអះអាងថា ពួកគាត់ធ្លាប់បានតវ៉ាសុំអន្តរាគមន៍ជាច្រើនលើកមកហើយជាមួយនឹងអាជ្ញាធរមូលដ្ឋាន និងស្ថាប័នពាក់ព័ន្ធនានា តែនៅមិនទាន់ឃើញមានលទ្ធផលណាមួយនៅឡើយ។ ចំណែកឯសង្គមស៊ីវិលរិះគន់ថា អាជ្ញាធរមូលដ្ឋានគ្មានឆន្ទៈដោះស្រាយជម្លោះដីធ្លីនេះឲ្យបានចប់នោះទេ។
តំណាងសហគមន៍ថ្មគោល លោកស្រី ភួង សុភាព ឲ្យដឹងថា ការពង្រីកអាកាសយានដ្ឋានអន្តរជាតិភ្នំពេញ បានធ្វើឲ្យប៉ះពាល់ដីធ្លីពលរដ្ឋជាង ៥៣១គ្រួសារ ចាប់ឆ្នាំ២០១២ មក រហូតមកដល់ពេលនេះ ពួកគាត់មិនទាន់ទទួលបានសំណងណាមួយឡើយ។ លោកស្រីបន្តថា ការដាក់ញត្តិទៅរដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោក សុខ អាន នៅពេលនេះ គឺដើម្បីស្នើសុំឲ្យស្ថាប័ននេះពន្លឿនការចុះហត្ថលេខាលើសៀវភៅផែនការឲ្យបានឆាប់ និងស្នើសុំឲ្យធ្វើសន្និសីទកាសែតបង្ហាញពីការពង្រីកអាកាសយានដ្ឋានអន្តរជាតិភ្នំពេញ ព្រមទាំងផលប៉ះពាល់ឲ្យបានច្បាស់លាស់ ដើម្បីឈានទៅការផ្ដល់សំណង់ជូនពលរដ្ឋ៖ « ការអភិវឌ្ឍរបស់សម្ដេចដែលបង្កកដីរបស់ពួកយើងខ្ញុំ ធ្វើឲ្យប្រជាជនធ្លាក់ខ្លួនក្រទៅៗ។ ចឹងពួកខ្ញុំមិនអាចទទួលយកបាន។ ចឹងបើសិនណាការសន្យារបស់គាត់មិនពិតក្នុងរយៈពេល ១ខែ ពួកខ្ញុំនឹងមកតវ៉ាទៀត »។
ខ្លឹមសារសរសេរនៅលើបដា និងញត្តិរបស់ពលរដ្ឋដែលបានដាក់ជូនទីស្តីការគណៈរដ្ឋមន្ត្រីនៅថ្ងៃទី១០ ខែឧសភា បង្ហាញថា សាជីវកម្មហិរញ្ញវត្ថុអន្តរជាតិ (IFC) ជាអ្នកផ្ដល់ប្រាក់កម្ចីដើម្បីឲ្យមានការអភិវឌ្ឍពង្រីកអាកាសយានដ្ឋានអន្តរជាតិនោះ។ ញត្តិដដែលបញ្ជាក់ថា ក្រោយការអភិវឌ្ឍនេះ គ្រួសារពលរដ្ឋមួយចំនួនដែលមានដីធ្លីមិនអាចសាងសង់ផ្ទះបាន និងអ្នកដែលមានផ្ទះក៏មិនអាចជួសជុល លក់ និងបញ្ចាំបាន ដែលធ្វើឲ្យពួកគាត់ជំពាក់បំណុលគេ និងការរឹបអូសផ្ទះពីធនាគារក៏មាន។
ការតវ៉ា និងដាក់ញត្តិរបស់ពលរដ្ឋសហគមន៍ថ្មគោល នៅទីស្ដីការគណៈរដ្ឋមន្ត្រី មានការរារាំងខ្លះពីសមត្ថកិច្ច ខណៈក្រុមអ្នកតវ៉ាព្យាយាមស្រែកតវ៉ានៅខាងមុខស្ថាប័ននេះ ប៉ុន្តែការរារាំងនេះ មិនមានប៉ះទង្គិចដោយហិង្សាណាមួយឡើយ។
ផ្ទុយទៅវិញ ទីប្រឹក្សាអមទីស្ដីការគណៈរដ្ឋមន្ត្រីទទួលបន្ទុកទទួលពាក្យបណ្ដឹងលោក សេង សាវន បានចេញមកជួប និងទទួលញត្តិពីក្រុមពលរដ្ឋ ព្រមទាំងសន្យាជួយអន្តរាគមន៍ជូនពលរដ្ឋឆាប់ៗនេះ។
ចំណែកឯនាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ សោកស្ដាយដែលអាជ្ញាធរគ្មានឆន្ទៈដោះស្រាយបញ្ចប់បញ្ហាដីធ្លីក្នុងសហគមន៍ថ្មគោល និងតំបន់ដទៃទៀត។ លោក សៀ ភារម្យ បន្តថា ទោះជាគ្មានទិន្នន័យច្បាស់លាស់បញ្ជាក់ពីទំហំផ្ទៃដីប៉ះពាល់នៅសហគមន៍ថ្មគោលសរុប ប៉ុន្តែលោកស្នើឲ្យរដ្ឋាភិបាលគួរតែផ្ដល់ព័ត៌មានជាក់លាក់ណាមួយជុំវិញគម្រោងនេះជូនពលរដ្ឋ និងត្រូវតែមានឆន្ទៈផ្ដល់សំណងសមរម្យដែលពលរដ្ឋចង់បាន៖ « បើសិនបើរដ្ឋាភិបាលមិនដោះស្រាយទេ ពលរដ្ឋគាត់នៅតែតវ៉ាចឹង ព្រោះពួកគាត់ដូចក្មេងទារទឹកដោះចឹង គាត់មិនព្រមឈប់ទារ បើមិនដោះស្រាយ។ ចឹងរដ្ឋាភិបាលត្រូវតែពិចារណាឡើងវិញ »។
ទោះបីជាមានការសន្យាពីមន្ត្រីទីស្ដីការគណៈរដ្ឋមន្ត្រីយ៉ាងណាក៏ដោយ ក្រុមអ្នកតវ៉ាដីធ្លីនៅសហគមន៍ថ្មគោល អះអាងថា ពួកគាត់ប្ដេជ្ញាថា នឹងនៅតែបន្តតវ៉ាជាថ្មីទៀតរហូតទទួលបានដំណោះស្រាយសំណងសមរម្យពីរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។