ពលរដ្ឋដែលមានជម្លោះដីធ្លីនៅក្រុងកំពត ខេត្តកំពត ចោទអភិបាលរងខេត្តនេះថា រំលោភលើកិច្ចសន្យាទិញលក់ដីរបស់គាត់ និងទាមទាររកយុត្តិធម៌ក្នុងរឿងនេះ។ ឆ្លើយតបនឹងការចោទនេះ អភិបាលរងខេត្តកំពត លោក ជឹង ផល្លា អះអាងថា លោកនឹងប្រគល់លុយឲ្យគ្រប់ចំនួន បើសិនម្ចាស់ដីព្រមសរសេរលិខិតប្រគល់ដីនោះឲ្យទៅលោកជាអ្នកទិញត្រឹមត្រូវ។
ពលរដ្ឋមួយគ្រួសាររស់នៅភូមិបឹងតាព្រាម សង្កាត់ត្រើយកោះ ក្រុងកំពត ខេត្តកំពត ប្ដឹងលោកអភិបាលរងខេត្តកំពត ថារំលោភលើកិច្ចសន្យាទិញលក់ដីទំហំ ១ហិកតារ។
លោកស្រី ឈឿន ចំរើន រស់នៅភូមិបឹងតាព្រាម សង្កាត់ត្រើយកោះ ក្រុងកំពត ខេត្តកំពត ឲ្យដឹងថា នៅឆ្នាំ១៩៨២ ក្រុមគ្រួសារគាត់មករស់នៅក្នុងភូមិបឹងតាព្រាម ហើយកាប់ដីជើងភ្នំដូង ដាំដំណាំ។ ឆ្នាំ២០០៨ អភិបាលរងខេត្តកំពត លោក ជឹង ផល្លា មកសុំទិញដីនោះយកទំហំ ១ហិកតារ ជាដីជាប់មាត់សមុទ្រក្បែរជើងភ្នំដូង។ លោក ជឹង ផល្លា ចរចាឲ្យតម្លៃដី ១ម៉ែត្រការ៉េ ១២ដុល្លារ ហើយបានកក់ប្រាក់ពីឆ្នាំ២០០៨ រហូតដល់ឆ្នាំ២០១៣ សរុបជាង ៦ម៉ឺនដុល្លារ តែនៅខ្វះ ៥ម៉ឺន ៨ពាន់ដុល្លារទៀត។ នៅឆ្នាំ២០១៤ ក្រុមគ្រួសារគាត់សុំប្រាក់ថ្លៃដីបង្គ្រប់ តែ លោក ជឹង ផល្លា មិនចង់ឲ្យ ហើយចរចាតាមរយៈអាជ្ញាធរភូមិឃុំ សុំបង់ឲ្យគាត់តែ ៥ពាន់ ទៅ ៨ពាន់ដុល្លារ គឺគ្រប់ចំនួន និងទាមទារឲ្យឪពុកម្តាយគាត់ផ្ទេរសិទ្ធិដី។ បញ្ហានេះ ទើបគ្រួសារគាត់ប្ដឹងទៅតុលាការតែម្តង។
លោកស្រី ឈឿន ចំរើន៖ «កាលគាត់កក់នៅក្នុងឆ្នាំ២០០៨ ហ្នឹង គាត់ឲ្យម្តង ១ម៉ឺន ២ម៉ឺនអ៊ីចឹង តែក្នុងកំឡុងហ្នឹងគាត់ហ្នឹងក៏ឲ្យកូនគូលីគាត់ហ្នឹង ទៅរៀបខឿនព័ទ្ធជុំវិញដីហ្នឹង ដល់បន្ទាប់មក ម្តាយឪពុកខ្ញុំគាត់តាមទារលុយពីលោកឯកឧត្តម ជឹង ផល្លា។ ដល់ហើយ គាត់ថាដីហ្នឹងអត់មានប័ណ្ណកម្មសិទ្ធិទេ បើសិនចង់បានលុយជំពាក់ហ្នឹង ធ្វើម៉េចឲ្យបានប័ណ្ណកម្មសិទ្ធិឲ្យមកខ្ញុំ បានខ្ញុំហ្នឹងប្រគល់លុយដែលជំពាក់ហ្នឹងឲ្យអ្នកទាំងពីរអស់»។
លោក ជឹង ផល្លា អភិបាលរងខេត្តកំពត និងជាអ្នកទិញដីពីក្រុមគ្រួសារនោះ អះអាងថា ម្ចាស់ដីចង់យកលុយថ្លៃដីគ្រប់ចំនួន តែមិនព្រមផ្ទេរសិទ្ធិកាន់កាប់ដី ហើយប្ដឹងចោទរូបលោកថារំលោភកិច្ចសន្យាទិញលក់។ លោកថា ប្រាក់នឹងប្រគល់ឲ្យថ្លៃដីគ្រប់ចំនួន បើម្ចាស់ដីសរសេរលិខិតផ្ទេរសិទ្ធិត្រឹមត្រូវ៖ «អ៊ីចឹង បើគាត់ធ្វើលិខិតប្រគល់សិទ្ធិឲ្យគេទៅ គេនឹងប្រគល់លុយឲ្យគាត់ អានេះលក្ខខណ្ឌនៃការលក់ទិញ គឺអ៊ីចឹង។ ដោយឡែក រហូតមកដល់ពេលនេះ រហូតម៉ោងនិយាយនេះ គាត់អត់ទាន់ធ្វើលិខិតឲ្យខ្ញុំសោះ តើខ្ញុំឲ្យលុយគាត់ម៉េចកើត»។
មេធាវីការពារក្តីឲ្យពលរដ្ឋ លោក ពៅ ស្រីសួគ៌ ឲ្យដឹងថា សាលាដំបូងខេត្តកំពត នឹងបើកសវនាការនៅថ្ងៃទី១៥ ខែកញ្ញា។ លោកថា ការប្ដឹងនេះ គឺទាមទារយកប្រាក់លក់ដីគ្រប់ចំនួនដែល លោក ជឹង ផល្លា នៅខ្វះ ៥ម៉ឺន ៨ពាន់ដុល្លារទៀត។ លោកថា អ្នកនាំ លោក ជឹង ផល្លា ទិញដីជម្លោះនោះ សុទ្ធតែជាអាជ្ញាធរភូមិ ឃុំ ស្រុក ខេត្ត ដែលចេះដឹងច្បាប់ តែមិនអនុវត្តតាមច្បាប់៖ «អ៊ីចឹងខាងកូនក្តីខ្ញុំ គឺគាត់ព្យាយាមធ្វើការសម្របសម្រួលក្រៅប្រព័ន្ធតុលាការ រហូតតាំងពីពេលដែលគាត់ទិញហ្នឹង ក៏ប៉ុន្តែភាគីអ្នកទិញហ្នឹង គឺគាត់ហាក់ដូចជាគ្មានឆន្ទៈនៅក្នុងការសម្របសម្រួល និងប្រគល់ប្រាក់ដែលនៅខ្វះឲ្យមកខាងខ្ញុំទេ»។
អភិបាលរងខេត្តកំពត លោក ជឹង ផលា្ល ឲ្យដឹងថា ក្នុងនាមជាអាជ្ញាធរដឹកនាំខេត្ត និងជាអ្នកអនុវត្តច្បាប់ លោកគោរពច្បាប់ មិនបំពានលើជនណាទេ។ លោកបានទិញដីស្របច្បាប់ មិនចាប់បង្ខំឡើយ។
មេធាវីសមាគមអាដហុក (adhoc) ខេត្តកំពត អ្នកស្រី ទ្រី ឈូន ឲ្យដឹងថា ដោយមើលឃើញថា ដើមបណ្ដឹងជាក្រុមគ្រួសារស្ថិតក្នុងភាពជាពលរដ្ឋទន់ខ្សោយទ្រព្យសម្បត្តិផង អាចងាយរងគ្រោះក្នុងការប្ដឹងចោទអភិបាលរងខេត្តកំពត ផង ទើបសមាគមអាដហុក បញ្ជូនអ្នកស្រីឲ្យជួយការពារក្តីមួយនេះដែរ។ អ្នកស្រីបន្តថា នៅខេត្តកំពត ជម្លោះដីរវាងអ្នកមានអំណាចលើពលរដ្ឋទន់ខ្សោយ កើតមានច្រើនករណី ប៉ុន្តែសមាគមអាដហុក ទើបទទួលបណ្ដឹងមួយនេះឲ្យជួយការពារក្តីទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។