Opens in new windowផ្លូវលំមួយខ្សែចម្ងាយ ១៥០ម៉ែត្រ កាត់ ២ភូមិ គឺភូមិធន់មន់ខាងជើង និងភូមិធន់មន់ខាងត្បូង ក្នុងសង្កាត់បារាយណ៍ ក្រុងដូនកែវ ខេត្តតាកែវ មានការខូចខាតច្រើន។ អ្នករស់នៅភូមិធន់មន់ខាងជើង មានការលំបាកធ្វើដំណើរ បានទិញដីច្រើនឡានចាក់បំពេញកន្លែងខូចខាតនោះ ប៉ុន្តែអ្នករស់នៅភូមិធន់មន់ខាងត្បូង មួយគ្រួសារ មិនអនុញ្ញាតឲ្យជួសជុលផ្លូវទេ។ បញ្ហានេះ អាជ្ញាធរភូមិទាំងពីរ បានចុះសម្របសម្រួល។
ចៅសង្កាត់បារាយណ៍ ក្រុងដូនកែវ ខេត្តតាកែវ លោក ម៉ែន ចឹម អះអាងនៅថ្ងៃទី៥ ខែកញ្ញា ថា ក្រោយពីអាជ្ញាធរភូមិ និងសង្កាត់ បានចុះសម្របសម្រួល ប៉ុន្តែភាគីទាំងសងខាងមិនសុខចិត្ត គាត់ក៏បញ្ជូនបណ្ដឹងទៅសាលាក្រុងបន្តទៀត។ លោកថ្លែងបន្តថា ភាគីពាក់ព័ន្ធមានទាំងមន្ត្រីសុរិយោដី ជួយសម្របសម្រួល ព្រោះការជួយកសាងផ្លូវពីសប្បុរសជនហាក់ជួយកាត់បន្ថយថវិការបស់ជាតិ ក្នុងការជួសជុលផ្លូវដែរ ប៉ុន្តែភាគីទាំងពីរ ប្រកាន់ជំហរតឹងរ៉ឹង មិនអត់ឱនឲ្យគ្នា ទើបគាត់បញ្ជូនបណ្ដឹងឲ្យសាលាក្រុងដូនកែវ ដោះស្រាយ៖ «ប្ដឹងដល់សង្កាត់ គេអត់ព្រម បញ្ជូនទៅខាងក្រុង ក្រុងគេដោះស្រាយមិនទាន់ចប់ទេ មិនដឹងជាអ្នកណាយល់ព្រមផ្ដិតមេដៃឯកភាពគ្នាយល់ព្រមផង គឺខាងនាង សុខ ហ្នឹង គាត់ទៅទិញគ្រឿងសម្ភារៈ ប្រាប់មេភូមិធ្វើតែម្តង ម៉្លោះហើយសកម្មភាពមិនទាន់បានចប់ពីអភិបាលក្រុងទេ»។
លោកស្រី ប៉ាញ សុខ អ្នកជួយជួសជុលផ្លូវលំដែលពុះចែកដីម្ខាងភូមិធន់មន់ខាងជើង និងម្ខាងភូមិធន់មន់ខាងត្បូង ឲ្យដឹងថា រាល់ឆ្នាំគាត់លំបាកធ្វើដំណើរពេក ដោយសាររថយន្តធំៗដឹកស្រូវដឹកអង្ករចេញចូលញឹកពេក ធ្វើឲ្យផ្លូវខូចជ្រៅៗ ទើបជួយទិញដីចាក់បំពេញកន្លែងខូចខាត។ គាត់បានចាក់ដីបណ្ដើរៗរហូតមកដល់មុខផ្ទះគ្រួសារ ម៉ម ហួយ គាត់ឃើញដីខូងជ្រៅពេក ក៏ចាក់ដីច្រើនឡាន ប៉ុន្តែនៅពេលភ្លៀង ដីហូរចូលដីភូមិគ្រួសារ ម៉ម ហួយ នោះ។ គាត់ក៏ទិញថ្ម ១ឡានយកទៅរៀបទប់ដី កុំឲ្យហូរចូលភូមិគេទៀត ស្រាប់តែគ្រួសារនោះប្ដឹងជំទាស់មិនឲ្យគាត់ជួសជុលផ្លូវទេ៖ «ហើយផ្ទះខ្ញុំនៅចុងគេ បើប្អូនមិនធ្វើបានអីចូលផ្ទះ។ គាត់មានចេតនាបំផ្លាញខ្ញុំមិនឲ្យចូលផ្ទះរួច គេថាឲ្យខ្ញុំធ្វើម៉េចធ្វើទៅ។ គេថាឯងដើរតាមណាដើរទៅ ខាងគេទុកគេធ្វើ ធ្វើតែខាងឯងទៅ»។
ពលរដ្ឋក្នុងភូមិធន់មន់ខាងជើង និងភូមិធន់មន់ខាងត្បូង លោក ស៊ុន ផល្លី ហៅ ផល្លី ទូច អះអាងថា គាត់ស្នើសុំឲ្យភាគីជំទាស់ ជួយបន្ទន់ឥរិយាបថ ព្រោះការជួយជួសជុលផ្លូវ មិនងាយមានសប្បុរសជនចេញមុខមិនឲ្យអ្នកភូមិជួយចេញលុយនោះទេ៖ «ព្រោះម្នាក់ហ្នឹងផ្ទះគាត់អត់ជួយចាក់ដីចាក់អី ដល់ហើយផ្លូវថ្នល់វាចេះតែបាក់។ ដល់គេចាក់ដីឲ្យអស់ច្រើន ហើយគេយកថ្មរៀបបាំងដីកន្លែងបាក់វារើចេញ»។
មេភូមិធន់មន់ខាងជើង លោក កែវ អយ ថ្លែងថា គាត់ចូលទៅសម្របសម្រួល ស្រាប់តែគ្រួសារ ម៉ម ហួយ យកដុំថ្មគប់ និងប្រើពាក្យអសុរោះមកលើអាជ្ញាធរ ទើបលោកមិនអាចសម្របសម្រួលបាន ព្រោះគ្រួសារនោះជាពលរដ្ឋភូមិផ្សេង៖ «ថ្នល់នេះចែកជាពីរ ហើយខ្ញុំបានដោះស្រាយថាថ្នល់នេះមិនមែនថ្នល់បុគ្គលណាមួយទេ គឺជាសម្បត្តិរួមរបស់បងប្អូនប្រជាជនក្នុងមូលដ្ឋានយើង សម្រាប់ដើរទាំងអស់គ្នា ប៉ុន្តែមុខផ្ទះអ្នកណា គឺអ្នកហ្នឹងត្រូវថែរក្សាថ្នល់ធ្វើបានហើយ។ ដល់កាលណាគេខ្លាំងអ៊ីចឹង មេភូមិ ខ្ញុំត្រឹមសម្រុះសម្រួល សម្រុះសម្រួលមិនត្រូវ យើងខ្ញុំក៏រាយការណ៍ទៅសង្កាត់»។
វិទ្យុអាស៊ីសេរី មិនអាចទាក់ទងគ្រួសារ ម៉ម ហួយ ដែលរងនូវការចោទថា ជំទាស់ការជួសជុលផ្លូវនោះបានទេ នៅថ្ងៃទី៥ ខែកញ្ញា។
ប៉ុន្តែអាជ្ញាធរភូមិធន់មន់ខាងត្បូង លោក សាយ ស៊ន ឲ្យដឹងថា គ្រួសារ លោកស្រី ប៉ាញ សុខ និងគ្រួសារ ម៉ម ហួយ បានទំនាស់គ្នាយូរហើយ មិនមែនទើបតែជំទាស់គ្នារឿងជួសជុលផ្លូវចូលផ្ទះនេះទេ។ លោកថា ភាគីទាំងសងខាងយកឈ្នះចាញ់រៀងៗខ្លួន មានតែច្បាប់ទេទើបអាចកាត់សេចក្តីបានយុត្តិធម៌៖ «ហើយបានប្តឹងផ្តល់ទៅដល់ចៅសង្កាត់ ទៅដល់សាលាក្រុងអី គេចុះមកមើលមកអី គេថាទុកឲ្យគេនៅម្ខាងគេធ្វើទៅ ព្រោះផ្លូវវាមួយចំហៀងម្នាក់»។
អាជ្ញាធរភូមិធន់មន់ខាងជើង ឲ្យដឹងថា ផ្លូវទំនាស់នោះមានទទឹង ៤ម៉ែត្រ បណ្តោយ ១៥០ម៉ែត្រ។ ផ្លូវនោះបានកសាងដោយកងវិស្វកម្មសម្ដេចតេជោ ហ៊ុន សែន ច្រើនឆ្នាំហើយ។ នៅពេលទឹកចូលព្រែកផ្លូវលិចទឹក និងបង្កការខូចខាតផ្លូវកាន់តែបែកភក់ជ្រៅខ្លាំង ទើបមានអ្នករស់នៅតាមផ្លូវនោះ ស្ម័គ្រចិត្តចេញលុយចាក់ដីកន្លែងបែកភក់ជ្រៅៗនោះ។ លោកបន្តថា ផ្លូវនោះ មន្ត្រីសុរិយោដី បានវាស់ពង្រីកទទឹងពី ៤ម៉ែត្រទៅដល់ ៦ម៉ែត្រ ហើយថវិកាពីរដ្ឋាភិបាល ក៏មិនទាន់មានគម្រោងជួសជុល ដើម្បីពង្រីកផ្លូវនោះដល់ទំហំកំណត់នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។