រដ្ឋាភិបាល​ដាក់​កំហិត​ឲ្យ​ពលរដ្ឋ​នៅ​អគារ​ប៊ូឌីង​លក់​បន្ទប់​តម្លៃ​១.៤០០​ដុល្លារ​អាមេរិក​១​ម៉ែត្រការ៉េ

ដោយ ប្រាជ្ញ ចេវ
2017.05.12
អគារ​ប៊ូឌីង ៦២២ ២០១៦ ទិដ្ឋភាព​នៅ​តំបន់​អគារ​ប៊ូឌីង ស្ថិត​ក្នុង​ខណ្ឌ​ចំការមន រាជធានី​ភ្នំពេញ នៅ​ថ្ងៃ​ទី​២៤ ខែ​កុម្ភៈ ឆ្នាំ​២០១៦។
RFA

រដ្ឋមន្ត្រី​ក្រសួង​ដែនដី ដាក់​កំហិត​ឲ្យ​ពលរដ្ឋ​រស់​ក្នុង​អគារ​ប៊ូឌីង​លក់​បន្ទប់​ក្នុង​តម្លៃ ១.៤០០​ដុល្លារ​អាមេរិក​ក្នុង​មួយ​ម៉ែត្រការ៉េ។ លោក ជា សុផារ៉ា ប្រាប់​ឲ្យ​ពលរដ្ឋ​ដែល​ទទួល​យក​តម្លៃ​នេះ ទៅ​បំពេញ​បែបបទ​ឯកសារ​ដើម្បី​រង់ចាំ​យក​លុយ ចំណែក​មិន​អ្នក​មិន​ព្រម​លក់​បន្ទប់​ក្នុង​តម្លៃ​នេះ លោក​ទុក​ឲ្យ​នៅ​ម្ដុំ។

ការ​សម្រេច​នេះ​ធ្វើ​ឡើង​ក្នុង​ពិធី​ជួប​ជាមួយ​អ្នក​ប៊ូឌីង នា​ទីស្ដីការ​ក្រសួង​ដែនដី នៅ​ព្រឹក​ថ្ងៃ​ទី​១២ ខែ​ឧសភា។ ទោះ​ជា​យ៉ាង​ណា តំណាង​ពលរដ្ឋ​ប្រមាណ ៥០០​នាក់ ដែល​ចូលរួម អ្នក​ខ្លះ​សម្ដែង​ការ​សាទរ​ក្នុង​ការ​ទទួល​យក​ការ​កំណត់​តម្លៃ​នេះ តែ​អ្នក​ខ្លះ​ទៀត​មិន​ព្រម​ទទួល​យក​ការ​កំណត់​តម្លៃ​នេះ​ទេ ដោយ​ពួកគេ​ទាមទារ​តម្លៃ​ជាង ២.០០០​ដុល្លារ​ក្នុង​មួយ​ម៉ែត្រការ៉េ។

រដ្ឋមន្ត្រី​ក្រសួង​ដែនដី នគរូបនីយកម្ម និង​សំណង់ លោក ជា សុផារ៉ា បញ្ជាក់​ថា ចំពោះ​អ្នក​យល់​ព្រម​តាម​ការ​កំណត់​នេះ អាច​មក​បំពេញ​បែបបទ​បណ្ដើរៗ ដើម្បី​ទទួល​ប្រាក់​នៅ​ពេល​ខាង​មុខ។ លោក​បន្ត​ថា ពលរដ្ឋ​ដែល​លក់​តាម​តម្លៃ​លោក​កំណត់ នឹង​ត្រូវ​រើ​អីវ៉ាន់​ចេញ​ពី​ផ្ទះ​ចាប់​ពី​ថ្ងៃ​ទី​៦ ខែ​មិថុនា ឆ្នាំ​២០១៧ ត​ទៅ ដោយ​លោក​ទុក​រយៈពេល​មួយ​ខែ​ក្នុង​ការ​រុះរើ៖ «បង​ប្អូន​ណា​ដែល​ឯកភាព​ជាមួយ​ខ្ញុំ កុំ​បាច់​យប់​យូរ​សុបិន​ច្រើន ស៊ីញ៉េ​កុងត្រា​ហើយ​យក​លុយ​ចុះ នរណា​ជំទាស់​ឲ្យ​នៅ​ម្ដុំ​ចុះ!»

ក្រៅ​ពី​ការ​កំណត់​តម្លៃ​នេះ លោក ជា សុផារ៉ា ប្រកាស​ឧបត្ថម្ភ​ប្រាក់​ពលរដ្ឋ​នៅ​តាម​បន្ទប់​នីមួយៗ​ចំនួន ១០០​ដុល្លារ ជា​សោហ៊ុយ​សម្រាប់​រើ​អីវ៉ាន់។ លោក​ថែម​ទាំង​និយាយ​បែប​លេងសើច​ថា លោក​នឹង​ផ្ដល់​សារុង​មួយ ក្រមា​មួយ​ដល់​ពលរដ្ឋ​ទៀត​ផង។ ប៉ុន្តែ​នៅ​ពេល​លោក​រដ្ឋមន្ត្រី​ប្រកាស​ជំហរ​ម៉ឺងម៉ាត់​កំណត់​ទិញ​ផ្ទះ​តម្លៃ ១.៤០០​ដុល្លារ​អាមេរិក​ក្នុង​មួយ​ម៉ែត្រការ៉េ ពលរដ្ឋ​ប្រមាណ ១០០​នាក់​ក្នុង​ចំណោម​អ្នក​ចូល​រួម​ប្រជុំ នាំ​គ្នា​ចេញ​ពី​ក្រៅ​បន្ទប់​ប្រជុំ ព្រោះ​មិន​ពេញចិត្ត​ការ​កំណត់​តម្លៃ​នេះ។ក្រុម​អ្នក​ទាំង​នោះ​ទាមទារ​ថ្លៃ​លក់​បន្ទប់​ប្រមាណ ២.០០០​ដុល្លារ​ក្នុង​មួយ​ម៉ែត្រការ៉េ។

រដ្ឋមន្ត្រី​ក្រសួង​ដែនដី នគរូបនីយកម្ម និង​សំណង់ លោក ជា សុផារ៉ា [ស្ដាំ] និយាយ​ទៅ​រក​ប្រធាន​ក្រុមហ៊ុន​អារ៉ាកាវ៉ា (Arakawa) លោក អាឡិច យ៉ាស៊ូម៉ូតុ (Alex Yasumoto) [ឆ្វេង] ដែល​ជា​ក្រុមហ៊ុន​ទទួល​បាន​សិទ្ធិ​សាងសង់​អគារ​ប៊ុឌីង នៅ​ថ្ងៃ​ទី​១២ ខែ​ឧសភា ឆ្នាំ​២០១៧។ RFA/Brach Chev
រដ្ឋមន្ត្រី​ក្រសួង​ដែនដី នគរូបនីយកម្ម និង​សំណង់ លោក ជា សុផារ៉ា [ស្ដាំ] និយាយ​ទៅ​រក​ប្រធាន​ក្រុមហ៊ុន​អារ៉ាកាវ៉ា (Arakawa) លោក អាឡិច យ៉ាស៊ូម៉ូតុ (Alex Yasumoto) [ឆ្វេង] ដែល​ជា​ក្រុមហ៊ុន​ទទួល​បាន​សិទ្ធិ​សាងសង់​អគារ​ប៊ុឌីង នៅ​ថ្ងៃ​ទី​១២ ខែ​ឧសភា ឆ្នាំ​២០១៧។ RFA/Brach Chev
RFA/Brach Chev

ក្រោយ​ចប់​កិច្ច​ប្រជុំ ស្ត្រី​ម្នាក់​វ័យ​ជា ៧០​ឆ្នាំ លោកស្រី ជា លិការ ដែល​អះអាង​ថា រស់​នៅ​អគារ​ប៊ូឌីង ជាង ២០​ឆ្នាំ​មក​ហើយ យក​ឯកសារ​ទៅ​បំពេញ ព្រោះ​លោកស្រី​យល់​ព្រម​លក់​បន្ទប់​តាម​តម្លៃ​របស់​លោក ជា សុផារ៉ា កំណត់៖ «ខ្ញុំ​អត់​មាន​ជំទាស់​អី​ទេ គេ​នៅ​ជំទាស់​ជា​រឿង​របស់​គេ។ តម្លៃ​នេះ​ខ្ញុំ​យល់​ថា​សមរម្យ​ហើយ លុយ​នេះ​ខ្ញុំ​យក​ទុក​ចែក​កូន​ចែក​ចៅ»

​ប៉ុន្តែ​អ្នក​រស់​នៅ​អគារ​ប៊ូឌីង​ម្នាក់​ទៀត លោកស្រី ទូច រស្មី មិន​យល់​ដូច្នេះ​ទេ។ លោកស្រី​ថា ការ​កំណត់​ទិញ​បន្ទប់​ក្នុង​តម្លៃ ១.៤០០​ដុល្លារ​ក្នុង​មួយ​ម៉ែត្រការ៉េ មិន​អាច​ឲ្យ​លោកស្រី​យក​លុយ​នោះ​ទិញ​ផ្ទះ​នៅ​ភ្នំពេញ ដើម្បី​រស់​នៅ​បាន​ទេ។ លោកស្រី​ទាមទារ​លក់​បន្ទប់​តម្លៃ​ជាង ២.០០០​ដុល្លារ​ក្នុង​មួយ​ម៉ែត្រការ៉េ៖ «ធម្មតា​ទេ មនុស្ស​ម្នាក់​គំនិត​មួយ អ៊ីចឹង ៤៩៣​គ្រួសារ មិន​អាច​គំនិត​ដូច​គ្នា​ទេ»

នាយក​ប្រតិបត្តិ​នៃ​អង្គការ​ក្រុម​ការងារ​ពិសេស​សិទ្ធិ​លំនៅឋាន លោក សៀ ភារម្យ យល់​ថា ភាគី​ក្រសួង និង​ក្រុម​ពលរដ្ឋ​ដែល​មិន​ទាន់​យល់ព្រម​លក់​បន្ទប់​ត្រូវ​ជជែក​គ្នា​បន្ត​ទៀត​ដើម្បី​រក​ចំណុច​រួម​មួយ។ ទោះ​បែប​នេះ​ក្ដី មន្ត្រី​សង្គម​ស៊ីវិល​រូប​នេះ នៅ​តែ​ចង់​ឃើញ​ពលរដ្ឋ​ទទួល​យក​ការ​អភិវឌ្ឍ​នៅ​នឹង​កន្លែង​ដោយ​រង់ចាំ​ជិត ៤​ឆ្នាំ​ក្រោយ​ការ​សាងសង់​អគារ​ថ្មី ដែល​លោក​យល់​ថា ពលរដ្ឋ​នឹង​ទទួល​ប្រយោជន៍​ច្រើន​ជាង​ការ​យក​លុយ​ហើយ​ចាកចេញ៖ «ខ្ញុំ​គិត​ថា បើ​ពលរដ្ឋ​រង់ចាំ​ការ​អភិវឌ្ឍ​នៅ​នឹង​កន្លែង​ទៅ​រស់​នៅ​បន្ទប់​ខុនដូ​ទំនើប​ជា​រឿង​ល្អ​មែនទែន ប៉ុន្តែ​បទពិសោធន៍​អភិវឌ្ឍន៍​នៅ​នឹង​កន្លែង​កន្លង​មក​ធ្វើ​ឲ្យ​ពលរដ្ឋ​ខ្លាច»

ការ​កំណត់​តម្លៃ​ទិញ​បន្ទប់​ពលរដ្ឋ​តម្លៃ ១.៤០០​ដុល្លារ​ក្នុង​មួយ​ម៉ែត្រការ៉េ របស់​លោក ជា សុផារ៉ា បែប​នេះ មិន​មែន​ជា​លើក​ទី​មួយ​ទេ។ កាល​ពី​ដើម​ខែ​មេសា លោក ជា សុផារ៉ា កំណត់​តម្លៃ ១.២៦៣​ដុល្លារ ទាមទារ​តម្លៃ ២.២០០​ដុល្លារ​ក្នុង​មួយ​ម៉ែត្រការ៉េ។

ក្រុមហ៊ុន​របស់​ជប៉ុន មួយ​ឈ្មោះ អារ៉ាកាវ៉ា (Arakawa) ទទួល​បាន​សិទ្ធិ​សាងសង់​អគារ​កម្ពស់ ២១​ជាន់ នៅ​ទីតាំង​អគារ​ប៊ូឌីង ដែល​ត្រូវ​ចំណាយ​ពេល​ប្រមាណ ៤​ឆ្នាំ ក្នុង​ទំហំ​ទឹក​ប្រាក់​ជាង ៨០​លាន​ដុល្លារ។

រដ្ឋមន្ត្រី​ក្រសួង​ដែនដី នគរូបនីយកម្ម និង​សំណង់ លោក ជា សុផារ៉ា បាន​អះអាង​ប្រាប់​ពលរដ្ឋ​ថា ការ​ផ្ដល់​តម្លៃ ១.៤០០​ដុល្លារ ជា​តម្លៃ​ខ្ពស់​ដែល​ត្រូវ​កែប្រែ​លក្ខខណ្ឌ​ជាមួយ​ក្រុមហ៊ុន ដោយ​អនុញ្ញាត​ឲ្យ​ក្រុមហ៊ុន​ជប៉ុន អាច​សាងសង់​សណ្ឋាគារ​ទំនើប​ពី ២១​ជាន់ ទៅ ៣០​ជាន់ ព្រោះ​ក្រុមហ៊ុន​ចំណាយ​លុយ​ទិញ​បន្ទប់​របស់​ពលរដ្ឋ​អស់​ច្រើន។

លោក ជា សុផារ៉ា ព្យាយាម​គេច​មិន​ឆ្លើយ​សំណួរ​របស់​ក្រុម​អ្នក​កាសែត​ដែល​តាម​សួរ​លោក​ថា តើ​ក្រសួង​ដែន​ដី នឹង​ដោះស្រាយ​យ៉ាង​ណា​ចំពោះ​ពលរដ្ឋ​ដែល​មិន​ព្រម​លក់​បន្ទប់​របស់​ខ្លួន​ក្នុង​តម្លៃ ១.៤០០​ដុល្លារ​ក្នុង​មួយ​ម៉ែត្រការ៉េ​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។