តំណាងសហគមន៍ និងប្រជាពលរដ្ឋភូមិតាំងធ្នឹម ឃុំពេជ្រចង្វា ស្រុកបរិបូរណ៍ ខេត្តកំពង់ឆ្នាំង ជាង ១០នាក់ បានតវ៉ានិងឃាត់គ្រឿងចក្រ ១គ្រឿង ដែលឈូសឆាយធ្វើប្រឡាយទឹកប៉ះពាល់ដីធ្លីរបស់ពួកគាត់ នៅថ្ងៃទី១៨ ខែមករា។ ប៉ុន្តែអភិបាលស្រុកអះអាងថា បញ្ហានេះអាជ្ញាធរបានសម្របសម្រួល និងស្នើឲ្យក្រុមហ៊ុនដកគ្រឿងចក្រផ្អាកឈូសឆាយ រង់ចាំការដោះស្រាយហើយ។
ក្រុមពលរដ្ឋទាមទារឲ្យអាជ្ញាធរ និងមន្ត្រីជំនាញពាក់ព័ន្ធទូទាត់សំណងផលប៉ះពាល់ជាមុនសិន មុននឹងអនុវត្តគម្រោងស្ថាបនាប្រព័ន្ធធារាសាស្ត្រប្រវែងជិត ២០គីឡូម៉ែត្រ កាត់តាមឃុំចំនួន៨ នៃស្រុកបរិបូរណ៍ តែអាជ្ញាធរមិនទាន់ផ្ដល់សំណង ឬដំណឹងជាក់លាក់ណាមួយដល់ពលរដ្ឋក្នុងមូលដ្ឋាន ហើយចាប់ផ្ដើមអនុវត្តគម្រោងតែម្ដង។
ក្រុមហ៊ុន ស៊ីណូហាយត្រូ (Sinohydro) ដែលទទួលបានគម្រោងស្ថាបនាប្រព័ន្ធធារាសាស្ត្រនេះ បានដាក់គ្រឿងចក្រឈូសព្រៃ និងគូសគំនូសមាត់ប្រឡាយ ឋិតនៅភូមិតាំងធ្នឹម នៃឃុំពេជ្រចង្វា ប៉ុន្តែអ្នកភូមិទៅឃាត់មិនឲ្យម្ចាស់គ្រឿងចក្រឈូសឆាយភ្លាមៗ តែហេតុការណ៍នោះមិនឈានដល់ការប្រើអំពើហិង្សានោះទេ។
ប្រជាពលរដ្ឋម្នាក់លោក ហង្ស ផា មានប្រសាសន៍ថា រូបលោកនិងអ្នកភូមិតាំងធ្នឹម ជាង ១០នាក់ផ្សេងទៀត លើកគ្នាទៅរារាំងគ្រឿងចក្រមួយគ្រឿងប្រភេទប៊ុលដូហ្សឺ (Bulldozer) នៅពេលដែលឈូសឆ្លងចូលដល់ដីក្បាលស្រែរបស់លោកប្រហែល ១០ម៉ែត្រ។ លោកថា ក្រុមពលរដ្ឋនឹងរារាំងដាច់ខាតនូវការឈូសឆាយ ព្រោះបើឈូសទៅមុខទៀត នឹងប៉ះពាល់ដល់ដីធ្លីអ្នកភូមិជាច្រើនគ្រួសារទៀត ដែលមិនទាន់ទទួលសំណងអ្វីសោះ៖ «គ្រាន់តែសំណូមពរថា ឲ្យប្រជាពលរដ្ឋទាំងអស់គ្នាជួយដឹងជួយឃើញច្បាស់លាស់ថា គេ (ក្រុមហ៊ុននិងអាជ្ញាធរ) ធ្វើបំពាន ឬសុំប្រជាពលរដ្ឋធ្វើប្រឡាយ»។
ឆ្លើយតបបញ្ហានេះអភិបាល នៃគណៈអភិបាលស្រុកបរិបូរណ៍ លោក ឃួន សៅរុំ ថ្លែងបញ្ជាក់ថា បញ្ហាកើតឡើងដោយសារគ្រឿងចក្ររបស់ក្រុមហ៊ុនឈូសសំអាតព្រៃ និងត្រាស់សេក្បាលទំនប់លើដីរបស់ពលរដ្ឋចំនួនពីរគ្រួសារដែលគាំទ្រគម្រោង ប៉ុន្តែការឈូសនោះបានជ្រុលដល់ដីអ្នកភូមិផ្សេងទៀតដែលមិនទាន់ឯកភាពចំពោះគម្រោងស្ថាបនាប្រព័ន្ធស្រោចស្រពកសិកម្មនេះ។
លោកថា គម្រោងនេះ គឺជាកាចាត់ចែងរបស់រដ្ឋាភិបាល ឬអន្តរក្រសួង ចំណែកអាជ្ញាធរមូលដ្ឋានមិនដឹងស៊ីជម្រៅនោះទេ គឺរង់ចាំតែសម្របសម្រួលជាមួយពលរដ្ឋ។ លោកបង្ហើបថា បច្ចុប្បន្នការសិក្សាពីផលប៉ះពាល់បានចំនួន ៣ឃុំហើយ ក្នុងចំណោមឃុំចំនួន៨ ដែលត្រូវសិក្សាអំពីផលប៉ះពាល់របស់គម្រោងនេះ៖ «ក្រុមហ៊ុន និងរដ្ឋាភិបាលចាប់ផ្ដើមត្រាស់សេ (គូសគំនូស) បើកមាត់ប្រឡាយតែប៉ះដីពលរដ្ឋ ហើយឥឡូវផ្អាកហើយ»។
វិទ្យុអាស៊ីសេរីមិនអាចទាក់ទងតំណាងក្រុមហ៊ុន ស៊ីណូហាយដ្រូ និងមន្ដ្រីក្រសួងធនធានទឹក ដើម្បីបំភ្លឺតបជុំវិញបញ្ហានេះបានទេនៅថ្ងៃទី១៨ ខែមករា។ ប៉ុន្តែអភិបាលរងខេត្តកំពង់ឆ្នាំង លោក ចេង ញ៉ាន់ ធ្លាប់ប្រាប់វិទ្យុអាស៊ីសេរីថា មន្ត្រីរបស់អន្តរក្រសួង និងអាជ្ញាធរមិនទាន់អាចកំណត់តម្លៃ នៃសំណង ឬឆ្លើយតបយ៉ាងណាចំពោះពលរដ្ឋបាននៅឡើយទេ ពីព្រោះក្រុមការងារអន្តរក្រសួងកំពុងសិក្សាពីផលប៉ះពាល់មិនទាន់ចប់សព្វគ្រប់។ បច្ចុប្បន្នមានឃុំចំនួនបី បានសិក្សារួចរាល់ គឺឃុំពេជ្រចង្វា ប៉ះពាល់ចំនួន ១២២គ្រួសារ នៅឃុំអញ្ចាញរូង ចំនួន ១៦៩គ្រួសារ និងឃុំពពេលចំនួន ២២០គ្រួសារ ហើយក្រុមការងារកំពុងសិក្សានៅឃុំពន្លៃបន្តទៀត។
នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាន លោក សៀ ភារម្យ ថ្លែងថា ប្រសិនបើអាជ្ញាធរ ឬក្រុមហ៊ុនអភិវឌ្ឍន៍ប៉ះពាល់លើដីធ្លី និងផ្ទះសម្បែងរបស់ពលរដ្ឋ ដោយមិនបានផ្ដល់សំណងសមរម្យជាមុន ព្រមទាំងផ្តល់ព័ត៌មានជាក់លាក់អំពីគម្រោងនោះ គឺជាការបំពារបំពានលើសិទ្ធិរបស់ប្រជាពលរដ្ឋ។ តាមគំនិតលោកអាជ្ញាធរ ឬក្រុមហ៊ុន គប្បីផ្ដល់សំណងជាមុន និងផ្ដល់ព័ត៌មានឲ្យបានច្បាស់លាស់ ហើយផ្អាកសកម្មភាពទាំងឡាយណាដែលប៉ះពាល់ដល់ផលប្រយោជន៍ពលរដ្ឋ ឬសហគមន៍ទាំងមូល ជាជាងអភិវឌ្ឍន៍លើគំនរទុក្ខរបស់ពលរដ្ឋដែលមន្ត្រីសង្គមស៊ីវិលជាតិ និងអន្តរជាតិតែងតែរិះគន់នោះទេ។
លោក សៀ ភារម្យ៖ «បច្ចុប្បន្នមានប្រជាពលរដ្ឋពឹងពាក់មេធាវីអន្តរជាតិ ដើម្បីប្ដឹងផ្ដល់ទៅតុលាការព្រហ្មទណ្ឌអន្តរជាតិ ទាក់ទងនឹងការបញ្ចេញពលរដ្ឋចេញពីលំនៅឋាន ឬការរឹបអូសយកដីធ្លី ហើយបើក្រុមហ៊ុននៅតែបន្តយ៉ាងដូច្នេះទៀត ខ្ញុំគិតថា ប្រហែលក្រុមហ៊ុនចង់ជំរុញឲ្យតុលាការអន្តរជាតិកាត់ទោសរដ្ឋាភិបាលបច្ចុប្បន្ន ដែលដឹកនាំដោយគណបក្សប្រជាជនកម្ពុជា»។
យោងតាមឯកសារដែលវិទ្យុអាស៊ីសេរី ទទួលបានកាលពីពាក់កណ្ដាលខែវិច្ឆិកា ឆ្នាំ២០១៤ បង្ហាញថា គម្រោងអភិវឌ្ឍន៍ប្រព័ន្ធធារាសាស្ត្រស្ទឹងអាចាង នៅស្រុកបរិបូរណ៍ មានប្រឡាយមេមួយខ្សែប្រវែងជិត ២០គីឡូម៉ែត្រ (១៩.៥០០ម៉ែត្រ) និងប្រឡាយរងចំនួន ១០ខ្សែ ហើយអាចស្រោចស្រពផ្ទៃដីកសិកម្មជាង ១ម៉ឺនហិកតារ (១០.៣០០ហិកតារ) នៅឃុំចំនួន ១០ ក្នុងស្រុកបរិបូរណ៍ និងទឹកផុស ខេត្តកំពង់ឆ្នាំង។ ប្រភពព័ត៌មានពីអាជ្ញាធរមូលដ្ឋានខ្លះបញ្ជាក់ថា ប្រឡាយមេនេះមានទំហំទទឹង ២៦ម៉ែត្រ និងជម្រៅប្រហែល ៥ម៉ែត្រ ស្ថាបនាដោយក្រុមហ៊ុនស៊ីណូហាយដ្រូ ក្នុងទំហំទឹកប្រាក់ជាង ៤៣លានដុល្លារអាមេរិក ជាជំនួយរបស់ប្រទេសចិន ហើយត្រូវប្រើរយៈពេលបីឆ្នាំ និងចាប់ផ្ដើមពីឆ្នាំ២០១៥ ដល់ឆ្នាំ២០១៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។