អាជ្ញាធរ​ខេត្ត​កំពង់ធំ​គ្រោង​ចុះ​ពិនិត្យ​ជម្លោះ​ដីធ្លី​ពលរដ្ឋ​ជាង​៣០០​គ្រួសារ

0:00 / 0:00

ក្រុម​ប្រឹក្សា​ខេត្ត​កំពង់ធំ មក​ពី​គណបក្ស​សង្គ្រោះ​ជាតិ ផ្ញើ​លិខិត​មួយ​ទៅ​អភិបាល​ខេត្ត ឲ្យ​ជួយ​ដោះស្រាយ​បញ្ហា​ដី​របស់​ពលរដ្ឋ​នៅ​ឃុំ​ស្រឹង ស្រុក​ប្រាសាទសំបូរ ជាង ៣០០​គ្រួសារ បន្ទាប់​ពី​ពួក​គាត់​ត្រូវ​អាជ្ញាធរ​មិន​អនុញ្ញាត​ឲ្យ​ចូល​ដាំ​ដំណាំ​លើ​ដី​របស់​ខ្លួន ដោយ​អះអាង​ថា​ជា​ដី​ដែល​អាជ្ញាធរ​ផ្ដល់​សម្បទាន​សង្គមកិច្ច​ទៅ​ឲ្យ​ពលរដ្ឋ​នៅ​ខេត្ត​កំពង់ចាម។

យ៉ាង​ណា អាជ្ញាធរ​បញ្ជាក់​ថា នឹង​ចុះ​ពិនិត្យ​លើ​ភាព​ជាក់ស្ដែង​លើ​ករណី​ជម្លោះ​ដីធ្លី​របស់​ពលរដ្ឋ​ទាំង​នោះ​ឲ្យ​បាន​ច្បាស់លាស់​ក្នុង​ពេល​ឆាប់ៗ។

ដី​មាន​ជម្លោះ​ដែល​សមាជិក​ក្រុមប្រឹក្សា​ខេត្ត ផ្ញើ​លិខិត​ឲ្យ​អភិបាល​ខេត្ត​កំពង់ធំ ពិនិត្យ​ឡើង​វិញ និង​ចាត់​វិធានការ គឺ​បន្ទាប់​ពី​ដី​តំបន់​នោះ​ជាង ១​ពាន់​ហិកតារ (១.៤២៧​ហិកតារ) ត្រូវ​អាជ្ញាធរ​ខេត្ត​សម្រេច​ស្នើសុំ​ឲ្យ​រាជ​រដ្ឋាភិបាល ធ្វើ​អនុបយោគ​ជា​ដី​សម្បទាន​សង្គមកិច្ច​សម្រាប់​ពលរដ្ឋ ៣៨៥​គ្រួសារ​មក​ពី​ខេត្ត​កំពង់ចាម។ ការ​ស្នើសុំ​នោះ បណ្ដាល​ឲ្យ​ពលរដ្ឋ​នៅ​ឃុំ​ស្រឹង ស្រុក​ប្រាសាទសំបូរ ៣២៩​គ្រួសារ​ដែល​បាន​អាស្រ័យ​ផល គឺ​រង​ផល​ប៉ះពាល់ ពីព្រោះ​មាន​ពលរដ្ឋ​មក​ពី​ខេត្ត​កំពង់ចាម និង​អាជ្ញាធរ​រារាំង​ពួក​គាត់​មិន​ឲ្យ​ចូល​ធ្វើ​ស្រែ​ចម្ការ​លើ​ដី​របស់​ខ្លួន​បាន។

យ៉ាង​ណា អភិបាល​ខេត្ត​កំពង់ធំ លោក អ៊ុត សំអន មាន​ប្រសាសន៍​នៅ​ថ្ងៃ​ទី​៥ កុម្ភៈ ថា ខាង​លោក​នឹង​បង្កើត​គណៈកម្មាធិការ​មួយ ដើម្បី​ចុះ​ទៅ​ពិនិត្យ​លើ​តំបន់​ដី​ជម្លោះ​ជា​ថ្មី​ទៀត មុន​នឹង​ឈាន​ទៅ​សម្រេច​ថា​ដោះស្រាយ​យ៉ាង​ណា។ លោក​បន្ត​ថា កន្លង​មក​អាជ្ញាធរ​ខេត្ត​បាន​ចុះ​សិក្សា​វាយ​តម្លៃ​ម្តង​រួច​ហើយ ទើប​ឯកភាព​បញ្ជូន​សំណើ​របស់​ពលរដ្ឋ​នៅ​ខេត្ត​កំពង់ចាម ទៅ​អាជ្ញាធរ​ថ្នាក់​ជាតិ ដើម្បី​ស្នើសុំ​ដី​សម្បទាន​សង្គមកិច្ច ប៉ុន្តែ​អាជ្ញាធរ​ថ្នាក់​ជាតិ​មិន​ទាន់​សម្រេច​យ៉ាង​ណា​ទេ។

លោក​បន្ថែម​ថា ក្នុង​អំឡុង​ពេល​ថ្នាក់​ជាតិ​មិន​ទាន់​សម្រេច ដី​នៅ​តំបន់​នោះ​មិន​ទាន់​ក្លាយ​ជា​ដី​សម្បទាន​សង្គមកិច្ច ចំណែក​ពលរដ្ឋ​ដែល​ធ្លាប់​បាន​អាស្រ័យ​ផល​ហើយ គឺ​ពួក​គាត់​អាច​បន្ត​ធ្វើ​លើ​ដី​របស់​ខ្លួន​បន្ត​ទៀត។ ដោយ​ឡែក​អាជ្ញាធរ ហាមប្រាម​ចំពោះ​តែ​ពលរដ្ឋ​ចូល​ទៅ​ទន្ទ្រាន​ថ្មី​ប៉ុណ្ណោះ៖ «អ៊ីចឹង​សម្រាប់​គោលការណ៍​របស់​អាជ្ញាធរ​កន្លង​មក​ហើយ​នេះ​នៅ​ពេល​ពលរដ្ឋ​កំពង់ចាម ស្នើ គឺ​ប្រសិន​បើ​អាជ្ញាធរ​ផ្តល់​ឲ្យ​យ៉ាង​ណា​នោះ គឺ​យើង​មិន​អាច​ផ្តល់​ឲ្យ​ទាំង​ដី​ដែល​ប្រជាជន​បាន​ប្រើប្រាស់​ទេ»

លោក​បន្ថែម​ថា ចំពោះ​ពលរដ្ឋ​ដែល​ទើប​នឹង​ចូល​កាន់​កាប់​ថ្មី គឺ​អាជ្ញាធរ​ត្រូវ​មើល​ភាព​ក្រីក្រ​ពិត​ប្រាកដ​ជា​មុន​សិន ទើប​ដោះស្រាយ​ជូន​ពួក​គាត់​តាម​ក្រោយ។

ការ​អះអាង​ដូច​នេះ បន្ទាប់​ពី​សមាជិក​ក្រុមប្រឹក្សា​ខេត្ត​កំពង់ធំ មក​ពី​គណបក្ស​សង្គ្រោះ​ជាតិ ផ្ញើ​លិខិត​មួយ​ជូន​អភិបាល​ខេត្ត​កាល​ពី​ថ្ងៃ​ទី​២ កុម្ភៈ។ ក្នុង​លិខិត​នោះ​ឲ្យ​ដឹង​ថា មាន​ពលរដ្ឋ ៣២៩​គ្រួសារ​នៅ​ឃុំ​ស្រឹង ស្រុក​ប្រាសាទសំបូរ ដែល​មាន​ដី​ជាង ២​ពាន់​ហិកតារ (២.៣៥៨​ហិកតារ) នៅ​ឃុំ​ទំរីង ស្រុក​សណ្ដាន់ បាន​អាស្រ័យ​ផល​ជាច្រើន​ឆ្នាំ​មក​ហើយ។ ប៉ុន្តែ​ក្រោយ​ពេល​អាជ្ញាធរ​ដាក់​ដី​របស់​ពួក​គាត់ ឲ្យ​ឋិត​នៅ​ក្នុង​គម្រោង​ដី​សម្បទាន​សង្គមកិច្ច​ឲ្យ​ពលរដ្ឋ​នៅ​ខេត្ត​កំពង់ចាម គឺ​ធ្វើ​ឲ្យ​ពួក​គាត់​មិន​អាច​ចូល​ធ្វើ​ស្រែ​ចម្ការ​បាន​ឡើយ។ ក្នុង​លិខិត​ដដែល​បញ្ជាក់​ថា មាន​ពលរដ្ឋ​ពីរ​នាក់​ដែល​អះអាង​ថា​ជា​តំណាង​ពលរដ្ឋ​នៅ​ខេត្ត​កំពង់ចាម គឺ​រារាំង​មិន​ឲ្យ​ពួក​គាត់​ចូល​ទៅ​ធ្វើ​ចម្ការ​បាន ហើយ​ថែម​ទាំង​ប្រើ​កាំភ្លើង​បាញ់​គំរាម​ពលរដ្ឋ​ទៀត​ផង។

យ៉ាង​ណា អភិបាល​ខេត្ត​កំពង់ធំ បដិសេធ​ថា​មិន​មាន​ករណី​បាញ់​គំរាម​ពលរដ្ឋ​មិន​ឲ្យ​ចូល​ធ្វើ​ចម្ការ​នោះ​ទេ ព្រោះ​តំណាង​ពលរដ្ឋ​នៅ​ខេត្ត​កំពង់ចាម ដែល​បោះ​ទីតាំង​នៅ​លើ​ដី​នោះ គឺ​ជា​អ្នក​ឃ្លាំ​មើល​ប៉ុណ្ណោះ មិន​ទាន់​មាន​សិទ្ធិ​ជា​ម្ចាស់​ទេ ហើយ​ការ​ប្រើប្រាស់​អាវុធ​យ៉ាង​ណា គឺ​ខាង​កម្លាំង​រដ្ឋបាល​ព្រៃ​ឈើ​បាញ់​គំរាម​ករណី​បទល្មើស​ព្រៃ​ឈើ។

ទោះ​បី​យ៉ាង​ណា​ក៏ដោយ សមាជិក​ក្រុមប្រឹក្សា​ខេត្ត​កំពង់ធំ មក​ពី​គណបក្ស​សង្គ្រោះ​ជាតិ លោក ស៊ុន ចន្ធី មើល​ឃើញ​ថា ដី​តំបន់​នោះ គឺ​ពលរដ្ឋ​បាន​អាស្រ័យ​ផល​រួច​មក​ហើយ​មែន ប៉ុន្តែ​ថ្មីៗ​នេះ​បែរ​ជា​អាជ្ញាធរ​ខេត្ត​ឯកភាព​ដាក់​ដី​របស់​ពួក​គាត់​ធ្វើ​អនុបយោគ​ទៅ​ជា​ដី​សម្បទាន​សង្គមកិច្ច​ឲ្យ​ពលរដ្ឋ​ខេត្ត​ផ្សេង​ទៅ​វិញ។ លោក​បារម្ភ​ថា ប្រសិន​បើ​ដី​ដែល​ស្នើសុំ​បែរ​មិន​បាន​ធ្លាក់​ដល់​ដៃ​របស់​ពលរដ្ឋ​នៅ​កំពង់ចាម ទេ វា​នឹង​អាច​ធ្លាក់​ទៅ​លើ​អាជ្ញាធរ​ខេត្ត​កំពង់ធំ ដើម្បី​ធ្វើ​ជា​ប្រយោជន៍​ផ្ទាល់​ខ្លួន៖ «ដោយសារ​ពលរដ្ឋ​នៅ​ខេត្ត​កំពង់ចាម លោក​មិន​មាន​ពេលវេលា​មក​កាន់​កាប់​គ្រប់គ្រង​នៅ​លើ​ដី​តំបន់​នោះ​ពិត​ប្រាកដ​ទេ»

លោក ស៊ុន ចន្ធី ហាក់​ស្រប​ទៅ​នឹង​ការ​ស្នើសុំ​របស់​ពលរដ្ឋ​នៅ​ស្រុក​ប្រាសាទសំបូរ ដោយ​លោក​ថា អាជ្ញាធរ​គប្បី​ស្វែងរក​ដំណោះស្រាយ​ឲ្យ​បាន​ប្រសើរ​ទាំង​សង​ខាង ពោល​គឺ​ពួក​គាត់​អាច​មាន​ដី​កាន់​កាប់​ទាំងអស់​គ្នា។ ដោយ​ឡែក​ដី​សម្បទាន​សង្គមកិច្ច​កន្លែង​ណា​ប៉ះពាល់​ដល់​ពលរដ្ឋ​មូលដ្ឋាន គប្បី​អាជ្ញាធរ​ស្វែងរក​កន្លែង​ផ្សេង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។