អ្នកភូមិចុងកោះ នៃសង្កាត់ផ្សារឆ្នាំង ក្រុងកំពង់ឆ្នាំង មួយចំនួន ក្នុងចំណោមពលរដ្ឋខ្មែរ និងចាម ៤៣៣គ្រួសារនៅទីនោះ បារម្ភអាជ្ញាធរផ្ដល់សំណងផលប៉ះពាល់មិនសមរម្យពីគម្រោងអភិវឌ្ឍន៍ច្រាំងទន្លេ។ ក្រុមពលរដ្ឋកាន់តែបារម្ភខ្លាំង បន្ទាប់ពីមន្ត្រីជំនាញបោះបង្គោលឫស្សីបាញ់ថ្នាំក្រហម កំណត់ព្រំស្ថាបនាផ្លូវមួយខ្សែប៉ះពាល់ដល់លំនៅឋានពួកគាត់។
នៅក្នុងដំណើរការរៀបចំសណ្ដាប់ធ្នាប់ និងអភិវឌ្ឍន៍សួនច្បារ ឬច្រាំងទន្លេប្រវែងជិតបីគីឡូម៉ែត្រចាប់ពីមុខវត្តលោកយាយទេព រហូតដល់ស្ថានីយទឹកស្អាតអានកូ (Anco) នៅក្រុងកំពង់ឆ្នាំង របស់អាជ្ញាធរ កំពុងធ្វើឲ្យពលរដ្ឋព្រួយបារម្ភផង និងទន្ទឹងរង់ចាំមើលការអភិវឌ្ឍផង។ នៅគ្រាដែលផ្ទះអែបច្រាំងទន្លេចំនួន ៣១៥ខ្នង នឹងត្រូវរុះរើចេញនាថ្ងៃអនាគត មានផ្ទះចំនួន ៦១ខ្នងទៀតប៉ះចំគម្រោងធ្វើផ្លូវ ដែលត្រូវកែសម្រួលផ្ទះ ឬវាយចោល។
ប្រជាពលរដ្ឋម្នាក់ លោក ហុត វណ្ណា ថ្លែងនៅថ្ងៃទី៤ ខែធ្នូ ថា រូបលោក និងអ្នកភូមិផ្សេងទៀតមិនប្រឆាំងនឹងការអភិវឌ្ឍរបស់រដ្ឋាភិបាលឡើយ ប៉ុន្តែបង្គោលឫស្សីបាញ់ថ្នាំក្រហមដែលបោះកាលពីចុងខែវិច្ឆិកា នោះ បានប៉ះផ្ទះគាត់ស្ទើរពាក់កណ្ដាល។ ហេតុនេះអាជ្ញាធរមានសមត្ថកិច្ចត្រូវតែរកដីបន្ថែមទៅផ្នែកខាងក្រោយផ្ទះ ឬប៉ះប៉ូវសំណងឲ្យបានសមរម្យទៅនឹងតម្លៃផ្ទះរបស់លោកជាមុន៖ «គេហៅទៅប្រជុំមួយចំនួនដែរ ដូចគាតនៅខាងណោះទៅប្រជុំៗសុំដំណោះស្រាយរកទីតាំងឲ្យនៅកន្លែងណាអត់ពិតប្រាកដ អ៊ីចឹងគាត់កាន់តែព្រួយបារម្ភទៅៗ។ ខ្ញុំសំណូមពរឲ្យអាជ្ញាធរដែនដីទាំងអស់ បើវាស់វែងប៉ះពាល់អ៊ីចឹងទៅហើយ មានគោលនយោបាយយ៉ាងណាអីយ៉ាងណា មេត្ដាជួយផ្ដល់ព័ត៌មានឲ្យប្រជាពលរដ្ឋក្នុងភូមិខ្ញុំដឹងជាមុនផង»។
ឆ្លើយតបបញ្ហានេះអភិបាលរងខេត្តកំពង់ឆ្នាំង និងជាប្រធានគណៈកម្មការរៀបចំសណ្ដាប់ធ្នាប់ និងសោភ័ណភាពក្រុងលោក ស៊ុន សុវណ្ណារិទ្ធិ បញ្ជាក់ថា អាជ្ញាធរ និងមន្ត្រីជំនាញនៃមន្ទីរសាធារណការ កំពុងសិក្សាពីផលប៉ះពាល់ដោយវាស់វែងបោះបង្គោលកំណត់ទីតាំងធ្វើផ្លូវ ហើយរបាយការណ៍ទាក់ទងនឹងផលប៉ះពាល់នេះនឹងដាក់ជូនអភិបាលខេត្ត ឬក្រុមគណៈអភិបាលខេត្តពិនិត្យថ្ងៃខាងមុខ៖ «ទាល់តែយើងសិក្សាភាពប៉ះពាល់ហើយអស់ បានយើងចាប់ផ្ដើមធ្វើ។ (ជិន ជេដ្ឋា៖ ប្រវែងប៉ុន្មានដែរផ្លូវហ្នឹង?) ពីដើមនោះមកដល់ផ្លូវចុងកោះប្រហែល ១.៧០០ម៉ែត្រ ប៉ុន្តែពីត្រង់ហ្នឹងទៅថ្នល់ជាតិលេខ៥ទៀត ចេញទៅវាមានពីចំណុចទី១ ផ្លូវខ្សាម និងទី២ អាចផ្លូវតូតាល់ ប៉ុន្តែវាអត់ទាន់ច្បាស់ទេជំនាញកំពុងសិក្សា»។
លោកបន្ថែមថា គ្រប់ជំហាននៃដំណើរការអភិវឌ្ឍនេះមានការសិក្សាពីលទ្ធភាព និងផលប៉ះពាល់ជាមុនត្រឹមត្រូវ ខណៈអាជ្ញាធរកំពុងប្រឹងប្រែងរៀបចំហេដ្ឋារចនាសម្ពន្ធ ជាពិសេសផ្លូវចេញពីផ្សារក្រោមកាត់តាមទីតាំងពលរដ្ឋរស់នៅនោះ នឹងស្ថាបនាឆ្ពោះទៅភ្ជាប់ផ្លូវជាតិលេខ៥ ដើម្បីបង្កភាពងាយស្រួលដល់អ្នកភូមិ។ លោកស្នើកុំឲ្យពលរដ្ឋបារម្ភខ្លាំងពេក ព្រោះការអភិវឌ្ឍនឹងធ្វើឲ្យប្រសើរជាងមុន។
អាជ្ញាធរខេត្តកំពង់ឆ្នាំង មានគម្រោងរៀបចំសណ្ដាប់ធ្នាប់ និងអភិវឌ្ឍតាមមាត់ទន្លេផ្សារក្រោម រយៈពេល ៥ឆ្នាំ គឺគិតចាប់ពីឆ្នាំ២០១៥។ គម្រោងនេះបានអនុម័តឲ្យអនុវត្តដោយក្រុមប្រឹក្សាខេត្ត ហើយអាជ្ញាធរដែលចុះអនុវត្តគម្រោងធ្លាប់អះអាងថា គ្រប់ផ្ទះរបស់ពលរដ្ឋមិនត្រូវបានរុះរើដោយពុំមានសំណង ឬគោលនយោបាយដោះដូរនោះទេ ត្បិតផ្ទះមួយចំនួនតាមមាត់ទន្លេរស់នៅមិនស្របច្បាប់។
ការអភិវឌ្ឍបានប៉ះពាល់តូបលក់ដូរពលរដ្ឋចំនួន ២០៣តូប ផ្ទះសម្បែងពលរដ្ឋជាង ៣០០ខ្នង។ បច្ចុប្បន្នតូបលក់ដូរ និងផ្ទះទាំងនេះមិនទាន់រុះរើចេញទេ ខណៈអាជ្ញាធរកំពុងរៀបចំកន្លែងផ្លាស់ទីថ្មី។
ច្បាប់អស្សាមិករណ៍ត្រង់ជំពូក១ មាត្រា២ បានធានាការដកសិទ្ធិស្របច្បាប់លើកម្មសិទ្ធិឯកជនដោយសមរម្យ និងយុត្តិធម៌។ ច្បាប់នេះក៏ធានាការទូទាត់សំណងជាមុនដោយសមរម្យ និងយុត្តិធម៌ ហើយបម្រើផលប្រយោជន៍សាធារណៈ និងផលប្រយោជន៍ជាតិ ដោយធ្វើការអភិវឌ្ឍហេដ្ឋារចនាសម្ព័ន្ធរូបវន្តសាធារណៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។