ប្រជាពលរដ្ឋដែលមានវិវាទដីធ្លីជាង ៣០០នាក់ មកពីស្រុកថ្ពង និងស្រុកឱរ៉ាល់ នៃខេត្តកំពង់ស្ពឺ ដែលមានវិវាទដីធ្លីជាមួយក្រុមហ៊ុនផលិតស្ករស ចំនួន២ គឺក្រុមហ៊ុនភ្នំពេញ ស៊ូហ្គើរ (Phnom Penh Sugar) និងក្រុមហ៊ុនកំពង់ស្ពឺ ស៊ូហ្គើរ (Kampong Speu Sugar) បាននាំគ្នាដាក់ញត្តិសុំឲ្យរដ្ឋមន្ត្រីក្រសួងដែនដី នគរូបនីយកម្ម និងសំណង់ ជួយអន្តរាគមន៍ដោះស្រាយវិបត្តិដីធ្លីជូនពួកគេ។
អ្នកភូមិដែលកាន់ញត្តិជាច្រើនដុំនៅនឹងដៃ បានស្នើឲ្យរដ្ឋមន្ត្រីក្រសួងដែនដី ដែលទើបកាន់តំណែងថ្មី លោក ជា សុផារ៉ា អន្តរាគមន៍ទៅលោកឧកញ៉ា លី យ៉ុងផាត់ ដោះស្រាយសំណងដីធ្លីឲ្យពួកគេយ៉ាងឆាប់រហ័ស។
បុរសអ្នកភូមិម្នាក់មកពីភូមិគោក ឃុំអមលាំង ស្រុកថ្ពង លោក អ៊ឹម គង់ បានចោទថា ក្រុមហ៊ុនភ្នំពេញ ស៊ូហ្គើរ របស់លោកឧកញ៉ា លី យ៉ុងផាត់ បានព័ទ្ធឈូសឆាយរំលោភយកដីអ្នកភូមិដាំដើមអំពៅតាំងពីឆ្នាំ២០១០ មកមិនដែលចរចាផ្ដល់សំណងជូនពួកគាត់ឡើយ។ ពួកគាត់ចង់ឲ្យក្រុមហ៊ុនប្រគល់ដីឲ្យពលរដ្ឋប្រកបរបរ និងប៉ះប៉ូវសំណងខូចខាតកាលពីពេលកន្លងមក៖ «ពលរដ្ឋមួយចំនួនដែលគាត់ប៉ះពាល់ដីគ្មានសល់មួយចង្អាមណាក៏អត់មានដែរ គាត់រកមួយថ្ងៃរស់មួយថ្ងៃ រងទុក្ខ លំបាក គាត់ស្រែកយំរាល់ថ្ងៃដើម្បីតវ៉ាទាមទាររកយុត្តិធម៌ជូនប្រជាពលរដ្ឋ ឬមួយក៏ភាពយុត្តិធម៌ដើម្បីខ្លួនគាត់។ ខ្ញុំឈឺចិត្តណាស់ ខ្ញុំនិយាយអួលដើមក ស្នើឲ្យក្រសួងដែនដីគាត់ដោះស្រាយជូនប្រជាពលរដ្ឋ ព្រោះអីលោកឧកញ៉ា លី យ៉ុងផាត់ គាត់មិនដោះស្រាយជូនពលរដ្ឋទេ ព្រោះគាត់ដឹងថា ខ្លួនគាត់ជាអ្នកយកដីពលរដ្ឋ។ ខ្ញុំពឹងក្រសួងដែនដី ឲ្យគាត់ជួយពួកខ្ញុំរកយុត្តិធម៌ និងដំណោះស្រាយជូនពលរដ្ឋដែលរងផលប៉ះពាល់សហគមន៍ខ្ញុំទាំងអស់ ខ្ញុំសង្ឃឹម ១០០% សង្ឃឹមថា ក្រសួងដែនដី គាត់ទើបឡើងតំណែងថ្មីនេះ គាត់រកដំណោះស្រាយជូនពលរដ្ឋ ព្រោះអីគាត់ចង់ស្តាកេរ្តិ៍ឈ្មោះដែលគាត់ទើបឡើងតំណែងថ្មី»។
តំណាងពលរដ្ឋភូមិផ្លោច ឃុំត្រពាំងជោរ ស្រុកឱរ៉ាល់ លោក សឹង សុខុម ថ្លែងថា ក្រុមហ៊ុននេះធ្លាប់ចរចាជាមួយពលរដ្ឋដទៃផ្ដល់សំណងក្នុងមួយគ្រួសារពី ៥០០ដុល្លារ ដល់ ២.៥០០ដុល្លារ ប៉ុន្តែពួកគាត់ពុំអាចទទួលយកបានទេ។ លោកថា ពលរដ្ឋ ១២៤គ្រួសារដែលមកនេះ មិនទទួលយកសំណងតាមគោលការណ៍នេះឡើយ ពីព្រោះជាមធ្យមអ្នកភូមិបាត់បង់ដីពី ៣ហិកតារ ទៅ ៦ហិកតារក្នុងមួយគ្រួសារ៖ «បើប្រៀបធៀបយើងទៅទិញគេ មកឥឡូវនេះ ស្តង់ដារមួយហិកតារ ៥ពាន់ហើយ នៅតំបន់ខ្ញុំហ្នឹង បើគាត់សងតែ ៥០០ តើយើងទៅទិញដីណាបាន»។
ក្នុងរឿងជម្លោះដីធ្លីនេះដែរ អ្នកស្រី ទេព វន្នី ដែលបច្ចុប្បន្នរស់នៅតំបន់បឹងកក់ រាជធានីភ្នំពេញ ដែលបានទៅដាក់ញត្តិដែរនោះថ្លែងថា អ្នកស្រីនិងក្រុមគ្រួសារបានទិញដីនៅស្រុកថ្ពង អំឡុងឆ្នាំ២០០៧ ដោយមានឯកសារទិញលក់ និងចុះហត្ថលេខាដឹងឮតាំងពីថ្នាក់ភូមិរហូតដល់ខេត្ត។ ប៉ុន្តែត្រូវរងការរំលោភយកដាំដើមអំពៅដោយក្រុមហ៊ុនភ្នំពេញ ស៊ូហ្គើរ ទៅវិញ៖ «បើ គិតសម្រាប់គ្រួសារខ្ញុំផ្ទាល់ ឈ្មោះខ្ញុំតែម្ដងគឺ ៥ហិកតារ តែបើជាមួយបងស្រីខ្ញុំ និងក្រុមគ្រួសារសាច់ញាតិខាងប្ដីខ្ញុំទៀតជិត ៤០ហិកតារត្រូវបានក្រុមហ៊ុនភ្នំពេញ ស៊ូហ្គើរ រំលោភយក ហើយមកដល់ថ្ងៃនេះ មួយរៀលលុយខ្មែរខ្ញុំអត់ដែលបានទទួលដំណោះស្រាយណាមួយពីក្រុមហ៊ុន នេះទេ»។
ឆ្លើយតបនឹងការដាក់ញត្តិរបស់ពលរដ្ឋនេះ សមាជិកក្រុមទទួលញត្តិនៃក្រសួងដែនដីនគរូបនីយកម្ម និងសំណង់ លោក ឡាយ ផល្លឹម បានសន្យាថា ក្រសួងនឹងចាត់ការលើបញ្ហានេះ បន្ទាប់ពីបានទទួលញត្តិពីពលរដ្ឋ។ លោកថា ក្រុមការងារជំនាញនឹងពិនិត្យសំណុំរឿងនេះ រួចសុំគោលការណ៍ដោះស្រាយទៅលោករដ្ឋមន្ត្រី៖ «ខ្ញុំអត់ទាន់បានដឹងរឿងហ្នឹងទេ ប៉ុន្តែរុញទៅចាំមើលជំនាញគេស្រាវជ្រាវថាម៉េច? ខ្ញុំនឹងប្រគល់លេខទូរស័ព្ទទៅជំនាញឲ្យទាក់ទងគ្នា»។
ក្រុមអង្គការសង្គមស៊ីវិល និងមន្ត្រីអង្គការសហប្រជាជាតិក៏បានចូលរួមឃ្លាំមើល ការប្រមូលផ្ដុំគ្នាដាក់ញត្តិនេះដែរ។ បើទោះជាមន្ត្រីក្រសួងទទួលយកញត្តិពីពួកគេ អ្នកភូមិអះអាងថា បើសិនជាគ្មានដំណោះស្រាយទេនោះ ពួកគេនឹងបន្តតវ៉ាទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។