ប្រជាពលរដ្ឋខេត្តកោះកុង ប្រមាណ ៣០០នាក់ តំណាងឲ្យអ្នករងគ្រោះដីធ្លីជាង ៥០០គ្រួសារ ដែលមានវិវាទជាមួយក្រុមហ៊ុនស្ករអំពៅថៃ ចំនួន ២ បានប្រមូលផ្តុំគ្នាហែក្បួនដាក់ញត្តិជូនអភិបាលស្រុកស្រែអំបិល និងស្រុកបុទុមសាគរ ឲ្យជួយដោះស្រាយទំនាស់រ៉ាំរ៉ៃរយៈពេល ១០ឆ្នាំមកនោះ។
តំណាងប្រជាពលរដ្ឋមានជម្លោះដីធ្លីចំនួន ៤ឃុំ ស្ថិតក្នុងស្រុកស្រែអំបិល និងស្រុកបុទុមសាគរ ខេត្តកោះកុង គឺលោក ឱម ផុន និងលោកស្រី ផាវ ញ៉ឺង និយាយប្រាប់វិទ្យុអាស៊ីសេរីថា ការហែក្បួននៅព្រឹកថ្ងៃសុក្រ ទី២៥ ខែមីនា គឺដើម្បីដាក់ញត្តិជូនអភិបាលស្រុកទាំងពីរឲ្យជួយអន្តរាគមន៍កាត់ឆ្វៀលដីកសិកម្មពលរដ្ឋចេញពីគម្រោងវិនិយោគរបស់ក្រុមហ៊ុនស្ករអំពៅ កោះកុង (Koh Kong Sugar) និងក្រុមហ៊ុន ផ្លែនថេសិន អ៊ីនដាសស្ទ្រី (Plantation Industry) របស់អ្នកវិនិយោគថៃ ឲ្យស្របតាមគោលនយោបាយស្បែកខ្លារបស់ប្រមុខរាជរដ្ឋាភិបាល បានដាក់ឲ្យអនុវត្តដើម្បីឲ្យពួកគាត់មានដីបង្កបង្កើនផលដំណាំកសិកម្មដូចដើមវិញ។
ពលរដ្ឋអះអាងថា ចាប់តាំងពីក្រុមហ៊ុនទាំងពីរទទួលបានសិទ្ធិវិនិយោគពីរដ្ឋាភិបាលដើម្បីអភិវឌ្ឍដំណាំអំពៅនាមូលដ្ឋាននេះតាំងពីឆ្នាំ២០០៦ មក គឺក្រុមហ៊ុនបានធ្វើទុក្ខបុកម្នេញពលរដ្ឋ ប្លន់យកដីកសិកម្មជាបន្តបន្ទាប់មានរយៈពេល ១០ឆ្នាំទៅហើយ ប៉ុន្តែអាជ្ញាធរចាប់ពីថ្នាក់ក្រោមរហូតដល់ថ្នាក់ជាតិ មិនជួយរកដំណោះស្រាយជូនពលរដ្ឋទេ។
តំណាងពលរដ្ឋឲ្យដឹងថា ពួកគាត់ធ្លាប់ដាក់ពាក្យបណ្ដឹងស្នើសុំកិច្ចអន្តរាគមន៍ពីគ្រប់ស្ថាប័នពាក់ព័ន្ធថ្នាក់ក្រោមជាតិ រហូតដល់ស្ថាប័នកំពូលៗ នៃរាជរដ្ឋាភិបាល ឲ្យជួយអន្តរាគមន៍ចំពោះបញ្ហាដីធ្លីនេះដែរ ប៉ុន្តែមិនទាន់មានដំណោះស្រាយទេ គិតមកដល់ថ្ងៃទី២៥ ខែមីនា ហើយក្រុមហ៊ុនបានដាំដំណាំអំពៅនៅលើដីដែលពួកគាត់ធ្លាប់បង្កបង្កើនផល៖ «សំណូមពរដល់សម្ដេច ហ៊ុន សែន និងថ្នាក់ដឹកនាំអន្តរក្រសួងពាក់ព័ន្ធទាំងអស់ឲ្យជួយកាត់ឆ្វៀលដីចេញពីគម្រោងវិនិយោគរបស់ក្រុមហ៊ុនស្ករអំពៅ កោះកុង និងក្រុមហ៊ុន ផ្លែនថេសិន អ៊ីនដាសស្ទ្រី ជូនពលរដ្ឋពួកខ្ញុំជាង ៥០០គ្រួសារ មានផ្ទៃដីសរុបជាង ២ពាន់ហិកតារ បានបង្កបង្កើនផលកសិកម្មដូចដើមវិញ»។
វិទ្យុអាស៊ីសេរី មិនទាន់អាចទាក់ទងតំណាងក្រុមហ៊ុនស្ករអំពៅថៃ ទាំង ២ក្រុមហ៊ុន ដើម្បីបំភ្លឺលើកង្វល់ពលរដ្ឋជុំវិញទំនាស់ដីធ្លីនេះបានទេ នៅថ្ងៃទី២៥ ខែមីនា។ ប៉ុន្តែអាជ្ញាធរស្រុកស្រែអំបិល និងស្រុកបុទុមសាគរ ខេត្តកោះកុង ដែលចេញមកទទួលញត្តិរបស់ពលរដ្ឋ សន្យានាំយកកង្វល់ពលរដ្ឋដាក់ជូនអាជ្ញាធរថ្នាក់ខេត្ត ឬថ្នាក់ជាតិពិចារណា។
អភិបាលស្រុកស្រែអំបិល លោក ទួន សីលា ដែលចេញមកទទួលយកញត្តិពលរដ្ឋនៅពីមុខសាលាស្រុកបានសន្យាថា នឹងនាំយកញត្តិពលរដ្ឋដាក់ជូនថ្នាក់ដឹកនាំខេត្ត ដើម្បីឈានដល់កោះហៅតំណាងក្រុមហ៊ុនស្ករអំពៅ មកប្រជុំដោះស្រាយវិវាទដីធ្លីនេះជាថ្មីទៀត។
លោក ទួន សីលា សន្យានៅចំពោះមុខពលរដ្ឋថា នឹងផ្ដល់ចម្លើយនៃកង្វល់ដីធ្លីជូនពលរដ្ឋវិញ នៅសប្ដាហ៍ខាងមុខ ក្រោយទទួលបានចម្លើយពីថ្នាក់ដឹកនាំខេត្ត ឬថ្នាក់ដឹកនាំថ្នាក់ជាតិ។
ទាក់ទងនឹងបញ្ហាជម្លោះដីធ្លីនេះ មន្ត្រីសង្គមស៊ីវិលឃ្លាំមើលការអភិវឌ្ឍសង្គមរិះគន់អាជ្ញាធរដោះស្រាយដីធ្លីរបស់រដ្ឋាភិបាលថា អសមត្ថភាពដោះស្រាយជម្លោះដីធ្លីដ៏រ៉ាំរ៉ៃរវាងក្រុមហ៊ុនស្ករអំពៅថៃ ជាមួយពលរដ្ឋខេត្តកោះកុង ដោយទុកឲ្យទំនាស់នេះអូសបន្លាយពេល ១០ឆ្នាំដោយគ្មានដំណោះស្រាយ។
មន្ត្រីសម្របសម្រួលអង្គការលីកាដូ (LICADHO) ប្រចាំខេត្តកោះកុង លោក អ៊ិន គង់ជិត ដែលតាមឃ្លាំមើលសកម្មភាពហែញត្តិរបស់ពលរដ្ឋដែរនោះ មានប្រសាសន៍ថា មកដល់ដំណាក់កាលនេះគួរល្មមថ្នាក់ដឹកនាំរដ្ឋាភិបាល ឬអាជ្ញាធរថ្នាក់ជាតិ ជួយលុបបំបាត់ភាពអយុត្តិធម៌ដែលកើតមាននៅក្នុងសង្គម ហើយងាកមកផ្ដល់យុត្តិធម៌ជូនពលរដ្ឋក្រីក្រឲ្យមានយុត្តិធម៌ឡើងវិញ។
លោកសង្កត់ធ្ងន់ថា ដីធ្លីកសិកម្ម ឬដីលំនៅឋានធ្លាប់រស់នៅ និងបង្កបង្កើនផលរបស់ពលរដ្ឋតាំងពីដូនតារៀងមក មិនគួរត្រូវបាត់បង់ដោយសាររដ្ឋាភិបាលផ្ដល់ដីសម្បទានសេដ្ឋកិច្ចជូនក្រុមហ៊ុនវិនិយោគទៀតទេ។ ករណីនេះ រដ្ឋាភិបាលក៏គួរងាកមកពិចារណាពីកង្វល់ពលរដ្ឋ ឈានដល់ផ្ដល់យុត្តិធម៌ជូនពួកគាត់ឲ្យទទួលបានសិទ្ធិមានលំនៅឋាន និងសិទ្ធិរស់នៅឲ្យមានសុវត្ថិភាពឡើងវិញ៖ «យើងឃើញថា ក្រុមហ៊ុនស្ករអំពៅទាំងពីរបានកាន់កាប់ដី និងដាំអំពៅលើដីពលរដ្ឋទាំងពីរស្រុកនៅខេត្តកោះកុងនេះ ចំនួន ១០ឆ្នាំមកហើយ ហើយពេលនេះពលរដ្ឋរងគ្រោះជាម្ចាស់ដីស្នើឲ្យរដ្ឋាភិបាលកាត់ឆ្វៀល ដីកសិកម្មពួកគាត់ចេញពីគម្រោងវិនិយោគរបស់ក្រុមហ៊ុនស្ករអំពៅ ជូនពួកគាត់ប្រើប្រាស់ដូចពេលមុនវិញ»។
មន្ត្រីអង្គការលីកាដូ លោក អ៊ិន គង់ជិត ថ្លែងថា មិនជំទាស់ផែនការអភិវឌ្ឍប្រទេសរបស់រាជរដ្ឋាភិបាលទេ ប៉ុន្តែការអភិវឌ្ឍនានា គួរតែមិនត្រូវឲ្យប៉ះពាល់ដល់ការរស់នៅ ឬសេចក្តីសុខរបស់ប្រជាពលរដ្ឋតាមមូលដ្ឋាននីមួយៗទេ ទើបពលរដ្ឋមានសុភមង្គលទាំងអស់គ្នា។
តំណាងពលរដ្ឋរងគ្រោះដីធ្លីទាំង ៤ឃុំ ដែលហែញត្តិស្នើសុំកាត់ឆ្វៀលដីពីគម្រោងវិនិយោគរបស់ក្រុមហ៊ុនស្ករអំពៅថៃ មកពីឃុំជីខលើ ឃុំជីខក្រោម ឃុំដងពែង ស្រុកស្រែអំបិល និងឃុំកណ្ដោល ស្រុកបុទុមសាគរ ខេត្តកោះកុង។
តំណាងពលរដ្ឋអះអាងថា ទំនាស់ដីធ្លីជាមួយក្រុមហ៊ុនស្ករអំពៅ កោះកុង និងក្រុមហ៊ុន ផ្លែនថេសិន អ៊ីនដាសស្ទ្រី របស់ពួកគាត់ បានកើតឡើងតាំងពីឆ្នាំ២០០៦ មកម្ល៉េះ ហើយពួកគាត់ក៏ធ្លាប់បានដាក់ញត្តិស្នើសុំកិច្ចអន្តរាគមន៍ពីស្ថាប័នកំពូលៗថ្នាក់ជាតិឲ្យជួយដោះស្រាយ ប៉ុន្តែមិនទាន់មានលទ្ធផលនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។