ប្រជាពលរដ្ឋមកពីខេត្តកោះកុង ដែលមានទំនាស់ដីធ្លីជាមួយក្រុមហ៊ុនស្ករអំពៅ លោកឧកញ៉ា ហេង ហ៊ុយ ដាក់លក្ខខណ្ឌជាមួយមន្ត្រីក្រសួងដែនដី នគរូបនីយកម្ម និងសំណង់ មុននឹងទទួលយកដីដោះដូរ។
ក្រុមពលរដ្ឋមានទំនាស់ដីធ្លីមកពីខេត្តកោះកុង បានប្ដូរចិត្តទៅជាបដិសេធភ្លាមៗ នៅព្រឹកថ្ងៃទី៤ មេសា បន្ទាប់ពីទទួលបានការឆ្លើយតបរបស់មន្ត្រីដោះស្រាយបញ្ហាដីធ្លី នៃក្រសួងដែនដី នគរូបនីយកម្ម និងសំណង់។
តំណាងពលរដ្ឋមានទំនាស់ដីធ្លី នៅខេត្តកោះកុង លោកស្រី ផាវ ញ៉ឺង បានបដិសេធដំណោះស្រាយជំហានទីមួយដែលហៀបនឹងត្រូវគ្នារបស់ក្រសួងដែនដី នគរូបនីយកម្ម និងសំណង់ គឺលោក ទេព ធន ពេលលោកមានប្រសាសន៍ថា លុយសំណងនៅមិនទាន់ច្បាស់៖ «ឥឡូវនិយាយប៉ុណ្ណឹងដឹងគ្នាហើយ ដោយឡែកដីលក្ខខណ្ឌគេធ្វើអ៊ីចឹងបានបានសុខ ហើយលុយចាំតាមក្រោយ។ លុយមិនទាន់ដឹងថា រដ្ឋាភិបាលព្រម ឬមិនព្រមទេ។ នុះ! នៅអត់ទៀត ឃើញ ឬអត់? យើងអត់យកដីទេអ៊ីចឹង។ អត់ទាន់យកទេ ចាំមើលឲ្យដឹងសិន ឲ្យដឹងទាំងលុយទាំងដីបានយក បើដីឆ្ងាយណាស់ ខ្ញុំនិយាយអ៊ីចឹង»។
លោក ទេព ធន ប្រធានក្រុមដោះស្រាយវិវាទដីធ្លីទី៨ របស់ក្រសួងដែនដី នគរូបនីយកម្ម និងសំណង់ ព្យាយាមពន្យល់ក្នុងពេលជួបពលរដ្ឋទាំងនោះថា ការរង់ចាំយកទាំងដី និងលុយសំណង គឺអាចស៊ីពេលយូរ៖ «ពីមុនយើងមិនទាន់ច្បាស់អារឿងដី ដោយសារមាន ៧៣គ្រួសារព្រម ក្រៅពីនោះអត់ព្រម។ ឥឡូវយើងព្រមទាំងអស់គ្នាហើយ មែន ឬអត់? មែន! បើព្រមទាំងអស់គ្នាហើយ ខ្ញុំថា ឲ្យយកដីមុនទៅ អាលុយហ្នឹងចាំគិតក្រោយ។ បើថាចាំដំណាលគ្នា នាំតែខកយូរទេ»។
ការបដិសេធដំណោះស្រាយលើកឡើងដោយមន្ត្រីក្រសួងដែនដី នគរូបនីយកម្ម និងសំណង់នោះ ក៏ព្រោះតែពលរដ្ឋទាំងនោះបារម្ភថា កាលណាពួកគាត់សម្រេចចិត្តផ្ដិតមេដៃទទួលយកដីនោះ ពួកគាត់នឹងមិនសង្ឃឹមទទួលបានអ្វីទៀតទេ។
នៅនៅព្រឹកថ្ងៃទី៤ មេសាដដែល ក្រុមពលរដ្ឋទាំងនេះ ក៏មិនសុខចិត្តនឹងការសម្រេចរបស់សាលាឧទ្ធរណ៍ដែលតម្កល់សាលក្រមសាលាដំបូងខេត្តកោះកុង ចាត់ទុកកិច្ចសន្យារបស់អ្នកភូមិជីខ ស្រុកស្រែអំបិល ចំនួន ៥គ្រួសារ ដែលព្រមប្រគល់ដីឲ្យក្រុមហ៊ុនស្ករអំពៅនៅទីនោះ នៅជាបានការដដែល។
ប៉ុន្តែលោស្រី ផាវ ញ៉ឺង ចាត់ទុកកិច្ចសន្យាទាំងនោះមិនប្រក្រតី ធ្វើឡើងក្រោមការគំរាមកំហែង ហើយអ្នកភូមិខ្លះមិនចេះអក្សរ។ ពួកគេប្ដឹងសុំឲ្យតុលាការលុបចោលកិច្ចសន្យាទាំងនេះ៖ «តុលាការគួរតែយកពាក្យនេះមកពិនិត្យ តើគាត់ អ្នកដើមកំណើតនៅទីនោះ បើសិនជាគាត់មិនចាញ់បោកគេ បើមិនការគំរាមកំហែង នៅសុខៗ គាត់សុខចិត្តទៅប្រគល់ដីឲ្យ ហេង ហ៊ុយ ដែរ ឬអត់? អ៊ីចឹងតុលាការគួរតែគិតពិចារណា ហើយជាពិសេស ខ្ញុំសុំឲ្យតុលាការកំពូល ដែលតទៅថ្ងៃមុខ ពួកខ្ញុំនឹងប្ដឹងទៅតុលាការកំពូលទៀត...»។
ទោះជាយ៉ាងនេះក្ដី ក្រុមអ្នកភូមិមកពីខេត្តកោះកុង ទាំងនេះ សម្រេចចិត្តវិលត្រឡប់ទៅផ្ទះវិញសិន ពីព្រោះពួកគាត់អស់លុយចាយវាយក្នុងពេលតវ៉ា ហើយម្យ៉ាងទៀត ទីកន្លែងស្នាក់នៅក្នុងវត្តសាមគ្គីរង្សី នៅភ្នំពេញ ព្រះសង្ឃនឹងត្រូវការរៀបចំសម្រាប់ពិធីបុណ្យចូលឆ្នាំថ្មីនៅសប្ដាហ៍ក្រោយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។