សហគមន៍ជនជាតិដើមភាគតិចព្នងរស់នៅស្រុកចិត្របូរី ខេត្តក្រចេះ ចោទប្រកាន់ក្រុមហ៊ុនសម្បទានវៀតណាម ប៊ិញភឿក សៃហ្កន (Bin Phoeuk Saigon) ថារំលោភឈូសឆាយដីសហគមន៍ដើម្បីពង្រីកយកដីដាំកៅស៊ូនិងចោទក្រុមអាជ្ញាធរមូលដ្ឋានដោះស្រាយទំនាស់ក្នុងភាពលំអៀងទៅលើក្រុមហ៊ុន។
ប្រជាពលរដ្ឋរស់នៅភូមិផ្អៀរ ឃុំថ្មី នៅថ្ងៃច័ន្ទ ទី២៥ ខែសីហា ព្រមានថា នឹងប្រើអំពើហិង្សាប្រសិនក្រុមហ៊ុនមិនបញ្ឈប់ការរំលោភសិទ្ធិរស់នៅ និងដីធ្លីរបស់អ្នកភូមិ។ ការព្រមាននេះធ្វើឡើងបន្ទាប់ពីកម្មករក្រុមហ៊ុនមុនបានដឹកជញ្ជូនកូនកៅស៊ូបំណងដាំដុះលើដីកំពុងមានទំនាស់មិនទាន់ដោះស្រាយរួចរាល់កាលពីសប្ដាហ៍មុន។
អ្នកភូមិឈ្មោះ ឃី យន់ រៀបរាប់ថា ប្រជាពលរដ្ឋជិត ២០០គ្រួសារ មិនឯកភាពតាមដំណោះស្រាយរបស់មន្ត្រីជំនាញ និងអាជ្ញាធរមូលដ្ឋានទេ ហើយទាមទារឲ្យដោះស្រាយផ្ដល់ដីជូនប្រជាពលរដ្ឋតាមប្រសាសន៍និងគោលការណ៍របស់លោកនាយករដ្ឋមន្ត្រី ហ៊ុន សែន ពីព្រោះដីទំនាស់ជាដីត្រៀមបម្រុង និងជាដីដែលអ្នកអភិរក្សប្រើប្រាស់អាស្រ័យផលច្រើនឆ្នាំមកហើយ។
លោកបន្តថា ក្រុមហ៊ុនក៏បានប្រើប្រាស់កម្មករប្រើចម្ពាមកៅស៊ូបាញ់គោក្របីអ្នកភូមិមិនឲ្យទៅស៊ីស្មៅលើដីទំនាស់ទៀតផង៖ «ឥឡូវត្រៀមដាំហើយ យកកូនមកអស់ហើយ គេសង់ផ្ទះនៅត្រង់ហ្នឹង។ ប៉ុន្តែប្រជាពលរដ្ឋថា បើអ្នកឯងមានសិទ្ធិដាំ ប្រជាពលរដ្ឋក៏មានសិទ្ធិដកដែរ ប៉ុន្តែយើងប្រាប់គេមុន ប៉ុន្តែដំណោះស្រាយមិនទាន់មាន»។
ករណីនេះ អ្នកភូមិបានដាក់ពាក្យប្ដឹងតវ៉ាទៅអាជ្ញាធរថ្នាក់មូលដ្ឋានឃុំ ស្រុក ខេត្ត ៥លើក ចាប់ពីដើមឆ្នាំ២០១៤ ប៉ុន្តែដំណោះស្រាយរបស់អាជ្ញាធរមូលដ្ឋានពីរលើកត្រូវបានអ្នកភូមិភាគច្រើនបដិសេធ។
ឆ្លើយតបការចោទប្រកាន់នេះ មេការក្រុមហ៊ុន ប៊ិញ ភឿក សៃហ្កន លោក កែវ សុវណ្ណ អះអាងថា ក្រុមហ៊ុនមិនបានរំលោភសិទ្ធិប្រជាពលរដ្ឋដូចការចោទនោះឡើយ។ លោកថា តំណាងសហគមន៍អាជ្ញាធរមូលដ្ឋាន មន្ត្រីជំនាញ និងតំណាងក្រុមហ៊ុនបានដោះស្រាយឯកភាពគ្នាកាត់ចេញដីប៉ះពាល់ប្រជាពលរដ្ឋរួចហើយ កាលពីខែឧសភា។ លោកទទួលស្គាល់ថា កម្មករក្រុមហ៊ុនបានប្រើចម្ពាមកៅស៊ូបាញ់គោក្របីអ្នកភូមិមែន ដោយសារតែគោក្របីនោះចូលបំផ្លាញដំណាំក្រុមហ៊ុន។
របាយការណ៍អង្កេតរបស់សមាគមអាដហុក (Adhoc) ខេត្តក្រចេះ ឲ្យដឹងថា ប្រជាពលរដ្ឋជិត ២០០គ្រួសារក្នុងចំណោមប្រជាពលរដ្ឋសរុប ២៥០គ្រួសារក្នុងភូមិ បានដាក់ពាក្យប្ដឹងជំទាស់មិនទទួលយកដំណោះស្រាយរបស់មន្ត្រីអាជ្ញាធរនោះទេ។
មន្ត្រីផ្នែកអង្កេតប្រចាំខេត្តក្រចេះ លោក ហេង ភារៈ ថ្លែងថា អាជ្ញាធរគួរអនុវត្តអនុសាសន៍របស់ប្រមុខរាជរដ្ឋាភិបាលគឺផ្តល់អាទិភាពចំពោះប្រជាពលរដ្ឋដែលមានទំនាស់ដីធ្លីជាមួយក្រុមហ៊ុន៖ «ជាក់ស្ដែងបន្ទាប់ពីបានដោះស្រាយរួចប្រជាពលរដ្ឋបានផ្ដិតមេដៃដាក់មកអាដហុក ឲ្យជួយអន្តរាគមន៍រហូតដល់ ១៩៧គ្រួសារ។ អ៊ីចឹងការមិនទទួលយកវាលើសលប់»។
ទាក់ទិនទំនាស់ប្រជាពលរដ្ឋនិងក្រុមហ៊ុននេះដែរ អភិបាលរងខេត្តក្រចេះ លោក ហឿ ស៊ីយ៉ែម អះអាងថា នៅសប្ដាហ៍ក្រោយនេះលោកនឹងអញ្ជើញភាគីពាក់ព័ន្ធដោះស្រាយបញ្ហានេះឡើងវិញ។
លោកថាអនុសាសន៍របស់ប្រមុខរាជរដ្ឋាភិបាលនឹងត្រូវយកមកអនុវត្តក្នុងការដោះស្រាយទំនាស់នេះ៖ «ក៏យើងជួយប្រជាពលរដ្ឋយើងដែរ ដើម្បីជីវភាពរបស់គាត់ អាហ្នឹងសំខាន់ជាក់ស្ដែង។ ល្ងាចនេះខ្ញុំហៅចៅហ្វាយស្រុក ចិត្របូរី មកជជែកគ្នាដើម្បីរកពេលចុះទៅជួបប្រជាពលរដ្ឋជម្រាបគាត់ តើសំណូមពរគាត់យ៉ាងម៉េច សំណូមពរក្រុមហ៊ុនយ៉ាងម៉េច ដើម្បីរកយ៉ាងណាសម្របសម្រួលឲ្យបានផលប្រយោជន៍ទាំងសងខាង»។
ប្រជាពលរដ្ឋភូមិថ្មីបានធ្វើការតវ៉ាដោយចាប់ឃាត់គ្រឿងចក្រក្រុមហ៊ុន ៧គ្រឿង ខណៈក្រុមហ៊ុនបញ្ជាឲ្យកម្មករយកគ្រឿងចក្រឈូសឆាយពង្រីកដីសម្បទានដែលអ្នកភូមិអះអាងថា បំពានលើដីប្រជាពលរដ្ឋ ប៉ុន្តែបានប្រគល់ឲ្យក្រុមហ៊ុនវិញបន្ទាប់ពីអាជ្ញាធរបានសម្របសម្រួលថានឹងដោះស្រាយបញ្ហាជូនអ្នកភូមិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។