ពលរដ្ឋជាង១០នាក់តំណាងអោយពលរដ្ឋមានជម្លោះដីធ្លីជាង ១០០គ្រួសារ នៅស្រុកបុទុមសាគរ និងស្រុកគិរីសាគរ ខេត្តកោះកុង នៅព្រឹកថ្ងៃទី ១០ តុលា នាំគ្នាឡើងមករាជធានីភ្នំពេញ ដើម្បីសុំអន្តរាគមន៍ ពីប្រធានរដ្ឋសភា លោក ហេង សំរិន ឲ្យផ្អាកសកម្មភាពក្រុមហ៊ុនចិន យូញៀន ឌីវិឡូបមេន គ្រុប (Union Development Group Co.Ltd)។
ពលរដ្ឋបានអះអាងថាក្រុមហ៊ុន បានរំលោភដីស្រែចម្ការពួកគាត់កំពុងដាំដុះ ហើយពួកគាត់សុំអោយឆ្វៀលផ្ទៃដីជិត ២ពាន់ហិកតារ (១.៩៨៩) ចេញពីគម្រោងរបស់ក្រុមហ៊ុន។
លោក សុខ សាន តំណាងពលរដ្ឋម្នាក់បានឲ្យដឹងថា លោក អេង ឆៃអ៊ាង ប្រធានគណៈកម្មការទី១រដ្ឋសភា បានទទួលញត្តិរបស់លោក ហើយលោកសន្យាថា លោកនិងក្រុមការងារនឹងចុះទៅសិក្សាដល់ដីកំពុងមានជម្លោះនោះក្នុងពេលខាងមុខ។
សំឡេង
លោក អ៊ិន គង់ជិត អ្នកសម្របសម្រួលអង្គការលីកាដូ (Licadho) ខេត្តកោះកុងស្នើអោយសភាគួរកោះហៅរដ្ឋមន្ត្រីក្រសួងបរិស្ថាន ឬនាយករដ្ឋមន្ត្រី ដើម្បីឆ្លើយបំភ្លឺ ព្រោះនេះជាគម្រោងធំ បានជម្លៀសប្រជាជនជាច្រើនគ្រួសារ ដែលមិនគួរគ្រាន់តែចុះទៅសិក្សាដល់មូលដ្ឋានឡើយ។
ពលរដ្ឋដែលរងផលប៉ះពាល់ទាំងនោះមកពី៥ ភូមិ គឺភូមិជ័យសែន និងភូមិសំរុងតាកែវ ឃុំព្រែកខ្សាច់ នៃស្រុកគិរីសាគរ និងភូមិចម្លងគោ នៃឃុំថ្មស និងភូមិតានូន ភូមិបាក់រនាស់ នៃឃុំតានូន ស្រុកបុទុមសាគរ ខេត្តកោះកុង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។