មន្ត្រីសង្គមស៊ីវិល និងប្រជាពលរដ្ឋខេត្តព្រះសីហនុ ទាមទារឲ្យរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលគ្រោងនឹងតែងតាំងមកដឹកនាំស្ថាប័ននេះ ជួយទប់ស្កាត់សកម្មភាពឃុបឃិតរំលោភយកដីបឹង អូរធម្មជាតិ ការជីកកកាយដីភ្នំដឹកចាក់លុបយកដីព្រៃកោងកាង ឬព្រៃលិចទឹក ក្រោមរូបភាពមន្ត្រីពាក់ព័ន្ធខេត្តព្រះសីហនុ ផ្ដល់ប្លង់កម្មសិទ្ធិទៅឲ្យបុគ្គល និងឈ្មួញធ្វើកម្មសិទ្ធិ។
មន្ត្រីសម្របសម្រួលអង្គការលីកាដូ (LICADHO) ខេត្តព្រះសីហនុ លោក ប៊ួន ណារិទ្ធិ បង្ហាញកង្វល់ចំពោះការចេញប័ណ្ណកម្មសិទ្ធិទៅលើដីសាធារណៈរបស់រដ្ឋ មានដីចំណីឆ្នេរសមុទ្រ ដីភ្នំ កោះ ដីព្រៃលិចទឹក និងដីបឹងអូរធម្មជាតិជាដើម ផ្ដើមដោយមន្ត្រីបម្រើការងារនៅតាមមន្ទីររៀបចំដែនដីនគរូបនីយកម្ម និងសំណង់ និងថ្នាក់ដឹកនាំខេត្តព្រះសីហនុ នៅពេលកន្លងមកទៅនាំឲ្យបាត់បង់ធនធានធម្មជាតិធ្ងន់ធ្ងរ។
មន្ត្រីសិទ្ធិមនុស្សរូបនេះ ស្នើដល់រដ្ឋមន្ត្រីក្រសួងរៀបចំដែនដី ដែលគេគ្រោងនឹងតែងតាំងថ្មី គួរពិនិត្យមើលសកម្មភាពរបស់មន្ត្រីមួយចំនួនកំពុងបម្រើការងារនៅមន្ទីររៀបចំដែនដីខេត្តព្រះសីហនុ ដែលឈានដល់អាចចេញប្លង់កម្មសិទ្ធិទៅលើដីសាធារណៈរបស់រដ្ឋ ដែលរដ្ឋធម្មនុញ្ញកម្ពុជា បានហាមឃាត់។
លោក ប៊ួន ណារិទ្ធិ៖ «ការធ្វើប្លង់រំលោភយកដីសាធារណៈរបស់រដ្ឋនាខេត្តព្រះសីហនុ កន្លងមក គឺភាគច្រើនចេញពីប្រភពមន្ត្រីសុរិយោដីខេត្តនេះតែម្ដង។ បើសិនជាមន្ត្រីស្ថាប័ននេះ មិនឃុបឃិតចេញប្លង់ទេ គឺគ្មាននរណាមួយអាចរំលោភយកដីសាធារណៈរបស់រដ្ឋយកទៅធ្វើកម្មសិទ្ធិបានទេ។ ដូច្នេះ មានមន្ត្រីពាក់ព័ន្ធនៅក្នុងស្ថាប័នរដ្ឋជាអ្នកចូលរួមចំណែកក្នុងការបំផ្លិចបំផ្លាញធនធានធម្មជាតិរបស់កម្ពុជា។ រីឯអ្នកចេញប្លង់កម្មសិទ្ធិទៅលើដីព្រៃលិចទឹក ឬដីព្រៃកោងកាង ជម្រកត្រីបន្តពូជវិញ គឺខ្ញុំគិតថា បុគ្គលទាំងអស់នោះគឺជាអ្នកបំផ្លាញធនធានធម្មជាតិរបស់ខ្មែរ និងជាអ្នកបំផ្លាញវិស័យទេសចរណ៍របស់ខេត្តព្រះសីហនុ»។
មន្ត្រីសម្របសម្រួលសមាគមអាដហុក (ADHOC) ខេត្តព្រះសីហនុ អ្នកស្រី ជៀប សុធារី ក៏ព្រួយបារម្ភចំពោះការបាត់បង់ធនធានធម្មជាតិមានដីភ្នំ ដីឆ្នេរ ដីព្រៃលិចទឹក ឬព្រៃកោងកាង ជម្រកត្រីបន្តពូជ និងបឹងអូរធម្មជាតិជាដើម ត្រូវមន្ត្រីស្ថាប័នពាក់ព័ន្ធខេត្តព្រះសីហនុ មានមន្ត្រីមន្ទីររៀបចំដែនដី ជាដើម ឃុបឃិតចេញប្លង់កម្មសិទ្ធិជូនបុគ្គលឯកជនដោយគ្មានការទប់ស្កាត់។ អ្នកស្រីបន្តថា ច្បាប់រដ្ឋធម្មនុញ្ញនៃព្រះរាជាណាចក្រកម្ពុជា ចែងថា ដីឆ្នេរ ទន្លេ សមុទ្រ កោះ ដីភ្នំ បឹងអូរធម្មជាតិ និងព្រៃភ្នំជាដើម គឺជាទ្រព្យសម្បត្តិសាធារណៈរបស់រដ្ឋ ដែលផ្នែកពាក់ព័ន្ធត្រូវរួមគ្នាការពារឲ្យបានគង់។
អ្នកស្រី ជៀប សុធារី បានស្នើដល់រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ទើបតែងតាំងថ្មី ពិសេសលោកនាយករដ្ឋមន្ត្រី ហ៊ុន សែន ជួយពិនិត្យទៅលើការផ្ដល់ប័ណ្ណកម្មសិទ្ធិទៅលើទ្រព្យសម្បត្តិសាធារណៈរបស់រដ្ឋ។ ជាងនេះទៀត ក៏ត្រូវផ្ដន្ទាទោស អ្នករួមគំនិតឃុបឃិត បំផ្លាញធនធានធម្មជាតិ ឬបំផ្លាញទ្រព្យសម្បត្តិរដ្ឋយកទៅផ្ដន្ទាទោស និងដកតួនាទីជាដើម ដើម្បីជាការព្រមាន។
ចំណែកប្រធានអង្គការស្រាវជ្រាវជាតិកម្ពុជា (CNRO) សាខាខេត្តព្រះសីហនុ លោក សុខ សុខុម មានប្រសាសន៍ថា រដ្ឋាភិបាលត្រូវតែផ្ដន្ទាទោសមន្ត្រីណាដែលយកទ្រព្យសម្បត្តិរបស់រដ្ឋទៅធ្វើជាទ្រព្យសម្បត្តិឯកជននោះ៖ «ហេតុអ្វីបានជាអាជ្ញាធរខេត្តព្រះសីហនុ មិនគោរពច្បាប់ហើយចេះតែបណ្ដោយកាន់កាប់ដីសាធារណៈរបស់រដ្ឋ ជាពិសេសមន្ត្រីស្ថាប័នជំនាញសុរិយោដីខេត្តព្រះសីហនុ តែម្ដង គឺកន្លងមកធ្លាប់បានចេញប័ណ្ណកម្មសិទ្ធិទៅលើដីភ្នំ ដីចំណីឆ្នេរសមុទ្រជូនបុគ្គលឯកជនជាដើម គឺបញ្ជាក់ឲ្យឃើញថា កំពុងតែបំផ្លិចបំផ្លាញទ្រព្យសម្បត្តិរបស់រដ្ឋ និងរំលោភលើច្បាប់រដ្ឋធម្មនុញ្ញកម្ពុជា»។
នាយខណ្ឌជលផល ខេត្តព្រះសីហនុ លោក នេន ចំរើន ថ្លែងថា នៅក្នុងអាណត្តិដឹកនាំរបស់លោកប៉ុន្មានឆ្នាំមកនេះ គឺលោកប្រឆាំងដាច់ខាតរាល់សកម្មភាពទន្ទ្រានចាក់ដីរំលោភយកបឹងអូរធម្មជាតិ ឬកាន់កាប់ដីព្រៃលិចទឹក ដីព្រៃកោងកាងជាដើម។ ប៉ុន្តែគួរឲ្យសោកស្ដាយទីតាំងទាំងនេះ ត្រូវស្ថាប័នពាក់ព័ន្ធបានចេញប្លង់កម្មសិទ្ធិជូនឯកជន ឬឈ្មួញដោយស្របច្បាប់។ ជាងនេះទៀត ព្រៃលិចទឹក ឬបឹងអូរធម្មជាតិមួយចំនួននៅខេត្តព្រះសីហនុ ក៏ត្រូវគេចាក់ដីលុបព្រៃកោងកាង និងបឹងអូរធម្មជាតិ រានយកដីធ្វើកម្មសិទ្ធិស្ទើរទាំងស្រុងអស់ទៅហើយមានដូចជា ព្រៃកោងកាងនៅជាប់ឆ្នេរអូរត្រេះ ស្ថិតក្នុងសង្កាត់លេខ៣ ក្រុងព្រះសីហនុ។ ព្រៃកោងកាង ដែលដុះនៅជុំវិញបរិវេណបឹងកង្កែប និងបឹងត្រាវជាដើម គឺត្រូវគេចេញប្លង់កម្មសិទ្ធិជូនបុគ្គលឯកជន ស្ទើរទាំងស្រុងអស់ទៅហើយ ហើយសមត្ថកិច្ចស្ថាប័នជលផលខេត្ត ក៏គ្មានសិទ្ធិលូកដៃក្នុងរឿងនេះដែរ។
ទាក់ទិនបញ្ហានេះ អភិបាលខេត្តព្រះសីហនុ លោក យន្ត មីន បានដកដង្ហើមធំដោយបញ្ជាក់ខ្លីថា មិនដឹងជារូបលោកត្រូវដោះស្រាយបែបណាទេ ព្រោះបើហារទៅវាស្លាក់ ហើយបើខ្ជាក់ទៅវាស្លែងចំពោះរាល់សកម្មភាពជីកកកាយដីភ្នំចាក់ដីលុបបឹង អូរធម្មជាតិ និងព្រៃកោងកាង ឬព្រៃលិចទឹកដែលកំពុងកើតមាននៅមូលដ្ឋានខេត្តទេសចរណ៍មួយនេះ ព្រោះឈ្មួញ ឬបុគ្គលឯកជនទាំងនោះ ពួកគេបានបង្ហាញ ប័ណ្ណកម្មសិទ្ធិកាន់កាប់ដីធ្លីស្របច្បាប់ ចេញដោយមន្ត្រីមន្ទីរសុរិយោដីខេត្ត និងថ្នាក់ដឹកនាំខេត្តព្រះសីហនុ អាណត្តិមុនៗ នៅលើទីតាំងដីសាធារណៈរបស់រដ្ឋទាំងនោះ។
បញ្ហានេះ មន្ត្រីសង្គមស៊ីវិលប្រចាំខេត្តព្រះសីហនុ សំដែងការសោកស្ដាយដែលអភិបាលខែត្រ មិនហ៊ានចាត់ការ ឬទប់ស្កាត់សកម្មភាពរំលោភយកទ្រព្យសម្បត្តិរបស់រដ្ឋធ្វើជាកម្មសិទ្ធិឯកជនបែបនេះ។ ពួកគេព្រួយបារម្ភថា បើសិនជាសកម្មភាពនេះនៅតែបន្ត ហើយមន្ត្រីល្មើសច្បាប់មិនទទួលទោសទណ្ឌនោះ ទ្រព្យសម្បត្តិរបស់រដ្ឋនៅក្នុងខែត្រនេះនឹងត្រូវរលាយនៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។