ប្រជាពលរដ្ឋច្រើនរយគ្រួសារ នៅខេត្តសៀមរាប និងខេត្តព្រះវិហារ កំពុងប្រឈមមុខបញ្ហាទំនាស់ដីធ្លី ដោយសារទាហានរំលោភយកខ្លះ អ្នកមានអំណាច និងក្រុមហ៊ុនរំលោភយកខ្លះ។ បច្ចុប្បន្ន ដោយសារទំនាស់នេះ ក្រុមអ្នកភូមិជាច្រើន កំពុងស្វះស្វែងគ្រប់មធ្យោបាយ ដើម្បីតវ៉ាតាមផ្លូវច្បាប់ ចំណែកអ្នកខ្លះទៀតក៏ធ្វើពិធីបួងសួង សូមឱ្យវត្ថុសក្ដិសិទ្ធិ ជួយការពារដីធ្លីរបស់ពួកគេ កុំឱ្យបាត់បង់ ជាដើម។
ក្រុមប្រជាពលរដ្ឋជិត ៣០គ្រួសារ នៅភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប បានលើកគ្នាមកមុខសាលាខេត្ត កាលពីព្រឹកថ្ងៃច័ន្ទ ទី១១ ខែសីហា បំណងជំរុញឱ្យអភិបាលខេត្តដោះស្រាយដីស្រែចម្ការរបស់ពួកគេ ដែលទាហានរំលោភយកជាច្រើនឆ្នាំមកហើយ ឱ្យបានឆាប់រហ័ស។
ក្រុមអ្នកភូមិដែលមានកាន់ឯកសារពាក់ព័ន្ធនឹងរឿងដីធ្លីជាច្រើននៅក្នុងដៃ អះអាងកាលពីព្រឹកថ្ងៃច័ន្ទ ថា ពួកគេចំនួន ២៧គ្រួសារ ខកខានធ្វើស្រែចម្ការរយៈពេល ៣ឆ្នាំមកហើយ ដោយសារកងទាហានប្រដាប់អាវុធចេះតែទៅហាមឃាត់ និងគំរាមកំហែង។ អ្នកភូមិបញ្ជាក់ថា ដីស្រែ និងចម្ការរបស់ពួកគេចំនួន ១២០ហិកតារ នៅតំបន់អូរព្រានគង់ ដែលធ្លាប់កាន់កាប់តាំងតែពីអំឡុងឆ្នាំ២០០២-២០០៣ ហើយក៏មានសលាកបត្រ ដែលក្រុមនិស្សិតស្ម័គ្រចិត្តវាស់វែងរួចហើយ ក៏ត្រូវទាហានក្នុងវរៈលេខ២៥៤ ចំណុះឱ្យកងពលតូចលេខ៥ ប្រកាសថាជាដីរបស់កងទ័ពទៅវិញ៖ «ប្រុស៖ កងទ័ពកងពលលេខ៥ វរៈ២៥៤ ឈ្មោះ ឆាំ ឡាំ ហាមឃាត់ពួកខ្ញុំមិនឱ្យចូលធ្វើដីរបស់ខ្ញុំរៀងខ្លួនហ្នឹងទេ។ ដីនេះបើមិនមែនដីរបស់ពួកខ្ញុំមែនទែន គឺមិនហ៊ានតវ៉ាទេ។ ខ្ញុំអត់មានអីហូបទេ ប្រជាពលរដ្ឋគ្រប់គ្នាហ្នឹងវេទនាណាស់។ ស្រី៖ អត់មានដីធ្វើស្រែចម្ការ អត់មានបាយហូបហ្នឹងខ្វះខាត ដូចឈឺអត់មានលុយមើលកូន ទៅខ្ចីបុលគេ ១សងជា២ជាបី កូនចៅឡើងស៊ីឈ្នួលគេរហូតដល់ថៃ។ ដោះស្រាយពន្យារពេលរហូត ថ្ងៃនេះថាថ្ងៃនោះ ចាំគេៗឱ្យរង់ចាំរហូតតាំងពីខែ៣ រហូតដល់ឥឡូវនេះ»។
មេឃុំស្រែណូយ លោក ឆែម សាវឿន ទទួលស្គាល់ថា ប្រជាពលរដ្ឋដែលកំពុងតវ៉ាដីធ្លីនេះ គឺពិតជាមានសលាកបត្រវាស់វែងដោយក្រុមនិស្សិតស្ម័គ្រចិត្តមែន ហើយអាជ្ញាធរបានព្យាយាមដោះស្រាយជាច្រើនលើកច្រើនសា ក៏ប៉ុន្តែទាហានហាក់មានចេតនាមិនចង់ដោះស្រាយទេ។
ចំណែកនៅឯឃុំភ្នំត្បែង២ ស្រុកគូលែន ខេត្តព្រះវិហារ វិញ អាជ្ញាធរឃុំអះអាងថា ក្រុមហ៊ុន ហ្វីភី ម៉ាឡេស៊ី (Fephy Malaysia) កំពុងដើរបោះបង្គោលកំណត់ព្រំដីសម្បទានសេដ្ឋកិច្ច ដែលធ្វើឱ្យប៉ះពាល់ដីស្រែចម្ការប្រជាពលរដ្ឋជាច្រើនភូមិ។ បន្ទាប់ពីប្រមូលផ្ដុំគ្នាតវ៉ាប្រឆាំងក្រុមហ៊ុនជាច្រើនថ្ងៃមក កាលពីថ្ងៃទី១០ ខែសីហា ក្រុមអ្នកភូមិក្ដាក់ ប្រមាណជាង ១០០គ្រួសារ បាននិមន្តព្រះសង្ឃធ្វើពិធីបួងសួង និងសែនព្រេនដល់អារុក្ខអារក្ខអ្នកតា ឱ្យជួយការពារដីស្រែចម្ការរបស់ពួកគេ កុំឱ្យក្រុមហ៊ុនរំលោភយកបាន។
បុរសចំណាស់ម្នាក់នៅភូមិក្ដាក់ លោក ឃួន សំរិទ្ធ មានប្រសាសន៍ថា អ្នកភូមិរបស់លោកជាច្រើនគ្រួសារ ក្រៅពីធ្វើស្រែចម្ការ គឺប្រកបរបរចិញ្ចឹមសត្វគោក្របី។ លោក ឃួន សំរិទ្ធ ព្រួយបារម្ភថា បើក្រុមហ៊ុនម៉ាឡេស៊ី បោះបង្គោលយកដីស្រែចម្ការអស់ គឺមិនត្រឹមតែមនុស្សទេដែលពុំមានដីធ្វើកសិកម្មចិញ្ចឹមជីវិត សូម្បីតែសត្វគោក្របី ក៏ពុំមានវាលស្មៅស៊ីដែរ៖ «បួងសួងសុំឱ្យក្រុមហ៊ុន កុំមកចូលយកទឹកដីប្រជាពលរដ្ឋក្ដាក់ សូមឱ្យអ្នកតាម្ចាស់ទឹកម្ចាស់ដី ម្ចាស់ព្រៃព្រឹក្សាអ្នកថែរក្សាទឹកដីនេះ សូមឱ្យដកក្រុមហ៊ុនទៅវិញ»។
សមាគមការពារសិទ្ធិមនុស្សអាដហុក (Adhoc) ខេត្តព្រះវិហារ និងខេត្តសៀមរាប សម្ដែងកង្វល់យ៉ាងខ្លាំងចំពោះបញ្ហាទាំងនោះ ដោយថា ជាច្រើនឆ្នាំមកហើយ ទំនាស់ដីធ្លីរវាងប្រជាពលរដ្ឋជាមួយទាហាន ជាមួយអ្នកមានអំណាច និងក្រុមហ៊ុន គឺមានច្រើនករណី ដែលអាជ្ញាធរមិនទាន់ដោះស្រាយ។
បញ្ហាអូសបន្លាយនេះ ធ្វើឱ្យប្រជាពលរដ្ឋខ្លះត្រូវជាប់ពន្ធនាគារ ក្រុមគ្រួសារកសិករជាច្រើនគ្មានដីធ្វើកសិកម្មចិញ្ចឹមជីវិត និងធ្វើឱ្យប្រជាពលរដ្ឋដែលកំពុងតែក្រីក្រស្រាប់ ខាតពេលវេលា និងប្រាក់កាស ដើម្បីតវ៉ារកដំណោះស្រាយរឿងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។