ពលរដ្ឋដែលមានជម្លោះដីធ្លីរ៉ាំរ៉ៃក្នុងតំបន់បឹងប្រាំ ស្រុកបវេល ខេត្តបាត់ដំបង អំពាវនាវសុំឲ្យអាជ្ញាធរពាក់ព័ន្ធ ជួយអន្តរាគមន៍យកគោយន្តយកមកប្រើប្រាស់វិញ បន្ទាប់ពីមេឃុំបឹងប្រាំ ដកហូតយក និងរក្សាទុកនៅសាលាឃុំ ជាថ្នូរនឹងគំរាមឲ្យអោយពលរដ្ឋយល់ព្រមផ្ដល់ដីទំហំ ៤ហិកតារ។
គោយន្តរបស់ពលរដ្ឋទាំងនោះ ត្រូវមេឃុំដកហូតទុកកាលពីថ្ងៃទី១៨ កក្កដា ក្នុងពេលដែលគោយន្តត្រូវបានម្ចាស់រក្សាទុកក្នុងខ្ទមស្រែ។
មេឃុំបឹងប្រាំ មកពីគណបក្សប្រជាជនកម្ពុជា រងការចោទប្រកាន់ថា បានចាប់គោយន្តពីក្នុងដីស្រែដែលជាចំណុចមានទំនាស់ដ៏រ៉ាំរ៉ៃ ជាថ្នូរនឹងការបង្ខំឲ្យពលរដ្ឋប្រគល់ដី ៤ហិកតារ។
រស់នៅភូមិក្រពើ៤០ ឃុំបឹងប្រាំ ស្រុកបវេល ខេត្តបាត់ដំបង លោក ជ័យ វាសនា ឲ្យដឹងនៅថ្ងៃទី២៩ សីហា ថា លោក ឈា នី មេឃុំបឹងប្រាំ បានបញ្ជាឲ្យនគរបាលឃុំចុះចាប់គោយន្តរបស់ខ្លួននៅក្នុងរោងស្រែ ដែលធ្លាប់អាស្រ័យផលជារៀងរាល់ឆ្នាំ។ រស់នៅក្នុងបន្ទុកដែលមានប្រពន្ធពិការភ្នែកទាំងសង្ខាង ហើយលោកក៏ជាមនុស្សត្រចៀកធ្ងន់ស្ដាប់អ្វីមិនសូវឮ បញ្ហាដោយសារប៉ះពាល់នឹងគ្រាប់ផ្លោងក្នុងសម័យសង្គ្រាមផងនោះ លោក ជ័យ វាសនា ចោទប្រកាន់ លោក ឈា នី ដែលធ្លាប់ជាអតីតអ្នកទោសព្រោះរឿងដីធ្លីដែរ មុននឹងក្លាយជាមេឃុំនេះថា ការចាប់គោយន្តរបស់លោកទៅទុកនៅសាលាឃុំនេះ គឺពុំមានអ្វីក្រៅពីបង្ខំឲ្យគ្រួសាររបស់លោក ប្រគល់ដីចំនួន ៤ហិកតារ ជាថ្នូរនឹងបានគោយន្តមកវិញ៖ «វាមានមូលហេតុបង មានមូលហេតុ។ វាតាមដេញចាប់ខ្ញុំ ដេញចាប់ខ្ញុំដល់ចាប់ខ្ញុំមិនបាន វាយកគោយន្ត។ ចាប់ខ្ញុំបង្ខំឲ្យផ្ដិតមេដៃប្រគល់ដីឲ្យគេ ៤ហិកតារ។ ដល់ពេលអ៊ីចឹង ខ្ញុំមិនឯកភាព ខ្ញុំរត់គេចខ្លួន គេតាមចាប់ខ្ញុំ ដល់ចាប់ខ្ញុំមិនបាន គេចាប់គោយន្តយកទៅ»។
ដីនៅចំណុចបឹងប្រាំ នេះ គឺមានទំនាស់ដ៏រ៉ាំរ៉ៃជាយូរឆ្នាំមកហើយ ដែលដោះមិនចេញតាំងពីអាណត្តិរបស់អតីតអភិបាលខេត្ត លោក ប្រាជ្ញ ច័ន្ទ រហូតមកដល់អាណត្តិរបស់ លោក ច័ន្ទ សុផល។
ក្រុមគ្រួសារ លោក ជ័យ វាសនា គឺជាភាគីដែលមានទំនាស់មួយក្នុងចំណោមភាគីទំនាស់ ៣០៣គ្រួសារផ្សេងទៀត ដែលមានជម្លោះដីធ្លីជាមួយមេឃុំ លោក ឈា នី លើដីជាង ៦០០ហិកតារ។ ជាថ្មីម្ដងទៀត កាលពីថ្ងៃទី១៨ សីហា ប្រជាពលរដ្ឋជាង ១០០នាក់ តំណាងឲ្យជាង ៣០០គ្រួសារ បានធ្វើដំណើរថ្មើរជើងមកតវ៉ានៅមុខសាលាខេត្តបាត់ដំបង ដើម្បីស្នើសុំឲ្យអភិបាលជួយកិច្ចអន្តរាគមន៍។ គិតមកដល់ពេលនេះ ការសន្យារបស់អភិបាលខេត្តបាត់ដំបង នៅមិនទាន់ឃើញឆ្លើយតបនៅឡើយទេ។
លោក ជ័យ វាសនា អះអាងថា ក្រុមគ្រួសាររបស់លោកបានគ្រប់គ្រងលើដី ៨ហិកតារ ក្នុងនោះ ៤ហិកតារ មានប្លង់កម្មសិទ្ធិ។ ដោយឡែក ៤ហិកតារផ្សេងទៀត អាជ្ញាធរមិនព្រមចេញប្លង់ឲ្យឡើយ។
អតីតអ្នកទោសព្រោះរឿងដីធ្លី មុននឹងបានក្លាយជាមេឃុំបឹងប្រាំ របស់គណបក្សប្រជាជនកម្ពុជា លោក ឈា នី អះអាងថា លោកមិនមែនចេះតែចាប់ឡើយ។ លោកចោទប្រកាន់ថា លោក ជ័យ វាសនា ទៅវិញទេដែលចូលទៅឈូសឆាយទាំងបំពានលើដីដែលត្រូវបែងចែក សម្រាប់ជនក្រីក្រផ្សេងទៀត។ លោកបន្តថា លោកនឹងមិនទុកគោយន្តនេះធ្វើអ្វីនោះទៀតផង ប៉ុន្តែឲ្យ លោក ជ័យ វាសនា ព្រមផ្ដិតមេដៃទទួលស្គាល់ពីបទល្មើសដែលបានកើតឡើងជាមុនសិន មុននឹងប្រគល់គោយន្តឲ្យវិញ៖ «ទីមួយ ខ្ញុំប្រគល់គោយន្ត ប៉ុន្តែទីពីរ ខ្ញុំសូមឲ្យ លោក ជ័យ វាសនា ដែលជាម្ចាស់គោយន្តហ្នឹង ឲ្យគាត់ទទួលស្គាល់ការរំលោភបំពានភ្ជួររាស់ដីកម្មសិទ្ធិរបស់ប្រជាពលរដ្ឋជាង ១០គ្រួសារត្រូវឲ្យបញ្ឈប់។ បញ្ឈប់ការភ្ជួររាស់ ហើយប្រគល់ដីហ្នឹងឲ្យគេវិញ ដែលជាម្ចាស់កម្មសិទ្ធិ។ អាហ្នឹងខ្ញុំប្រគល់ឲ្យគោយន្តហើយ»។
អ្នកសម្របសម្រួលសមាគមអាដហុក (Adhoc) ប្រចាំខេត្តបាត់ដំបង លោក យិន ម៉េងលី ចាត់ទុកការចាប់គោយន្តមករក្សាទុក គឺជារឿងខុសច្បាប់ទាំងស្រុង ដោយពុំមានដីកាពីតុលាការ ហើយរឹតតែខុសទៅទៀតនោះ ការចាប់គោយន្តនេះវាពុំមែនធ្វើឡើងដោយមានបទល្មើសទៀតផង។ លោកទម្លាក់ការទទួលខុសត្រូវក្នុងរឿងនេះថា គឺជាកំហុសរបស់មន្ត្រីនគរបាលយុត្តិធម៌ ដែលបណ្ដោយឲ្យភាគីដែលមានឥទ្ធិពល ហើយអនុវត្តដោយបំពានថែមទៀតប្រឆាំងពលរដ្ឋ៖ «យើងកំពុងឆ្ងល់ថាតើមន្ត្រីនគរបាលយុត្តិធម៌ប៉ុស្តិ៍ ឬក៏មន្ត្រីនគរបាលយុត្តិធម៌នៃអធិការដ្ឋាន ឬក៏ស្នងការដ្ឋាននគរបាលខេត្តហ្នឹង លោកដឹងអត់រឿងហ្នឹង។ លោកដឹងថា ការដែលទៅយកអ៊ីចឹង ហើយមានការចូលរួមពីមន្ត្រីរបស់លោកនោះទៅចូលរួម ហើយយកមកទុកអ៊ីចឹង វាជាអំពើល្មើសនឹងច្បាប់អត់»។
ប្រជាពលរដ្ឋនិយាយថា ប្រភេទដីស្រែដែលកំពុងមានវិវាទជាង ៣.៦០០ហិកតារនេះ ក្នុងនោះមានទាំងដីរបស់ លោក ជ័យ វាសនា ផង បានបន្តអូសបន្លាយតាំងពីឆ្នាំ២០០៦ មកម្ល៉េះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។