តំណាងប្រជាពលរដ្ឋមកពីឃុំបឹងប្រាំ ខេត្តបាត់ដំបង អះអាងពីការពន្យារពេលក្នុងការដាក់ញត្តិ ដោយលើកឡើងថា ត្រូវបំពេញឯកសារផ្លូវច្បាប់មួយចំនួនទៀត និងញត្តិដែលគ្រោងនឹងដាក់នៅតាមស្ថាប័នសំខាន់ៗរបស់រដ្ឋ នៅមិនទាន់ធ្វើរួចរាល់នៅឡើយ។
លោក ឆាន មុន្នី ដែលអះអាងថាជាតំណាងឲ្យប្រជាពលរដ្ឋជិត ២០០នាក់ ដែលធ្វើដំណើរពីខេត្តបាត់ដំបង ដើម្បីមកដាក់ញត្តិនៅរាជធានីភ្នំពេញ ឲ្យដឹងកាលពីព្រឹកថ្ងៃទី២៧ ខែតុលា ថា នៅពេលនេះ ពួកគាត់កំពុងរៀបចំធ្វើញត្តិនៅឡើយ។ លោកបន្តថា ប្រហែលក្នុងពេល ២ ឬ ៣ថ្ងៃទៀត បានចាប់ដើរដាក់ញត្តិ៖ «វាមិនទាន់ទៀងនៅឡើយ ព្រោះថាយើងមិនទាន់ធ្វើហើយ។ ប្រហែលជាអាចស្អែក ឬខានស្អែក ឬមួយខានស្អែកមួយ ពីព្រោះយើងខ្ញុំមកនេះ គឺបើសិនជាមិនមានការដោះស្រាយជូនប្រជាពលរដ្ឋរងគ្រោះពិតប្រាកដទេ គឺយើងខ្ញុំមិនឡើងទៅវិញទេ គឺយើងខ្ញុំហែរាល់ពីរថ្ងៃម្ដង ឬបីថ្ងៃម្ដង ដែលតាមលទ្ធភាពប្រជាពលរដ្ឋធ្វើទៅបាន»។
ប្រជាពលរដ្ឋដែលឡើងមកតវ៉ាពីខេត្តបាត់ដំបង ដើម្បីស្នើសុំឲ្យរដ្ឋាភិបាល ជួយដោះស្រាយនៅពេលនេះ គឺពុំមែនមកតែពីឃុំបឹងប្រាំ នៃស្រុកបវេល នោះទេ ក្នុងនោះនៅមានប្រជាពលរដ្ឋមួយចំនួនទៀតមកពីស្រុកគាស់ក្រឡ ផងដែរ។ សព្វថ្ងៃ ពួកគាត់ដែលមានគ្នាប្រមាណ ២០០នាក់ កំពុងបន្តស្នាក់នៅក្នុងវត្តក្តីចាស់ ក្នុងសង្កាត់ជ្រោយចង្វារ។
ដោយឡែកដីនៅឃុំបឹងប្រាំ ស្រុកបវេល ខេត្តបាត់ដំបង មានទំនាស់ចាប់តាំងពីឆ្នាំ២០០៦ មកម្ល៉េះ។ មូលហេតុដែលមានទំនាស់នេះ ប្រជាពលរដ្ឋចោទប្រកាន់ថា មេឃុំបឹងប្រាំ លោក ឈា នី បានរៀបចំដីសម្បទានសង្គមកិច្ចជាន់លើប្លង់ នៃដីសមាហរណកម្មរបស់យោធាខ្មែរក្រហមកាត់រំសាយ ដែលមានទំហំជាង ១ពាន់ហិកតារ (១.០៨០ហិកតារ)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។