ប្រជាពលរដ្ឋនៅឃុំក្រយា ស្រុកសន្ទុក ខេត្តកំពង់ធំ លើកឡើងថា ពួកគេចង់ឃើញមានការដាក់ទោសទណ្ឌដល់មន្ត្រីអាជ្ញាធរ ឬមន្ត្រីជំនាញទាំងឡាយណាដែលបានយកតួនាទីរបស់ខ្លួន មករំលោភយកដីពួកគាត់។ ការលើកឡើងនេះ ក្រោយពេលសាលាដំបូងខេត្តកំពង់ធំ បានសម្រេចចាត់ចែងដីជម្លោះរវាងប្រជាពលរដ្ឋជាង ២០គ្រួសារជាមួយរដ្ឋបាលព្រៃឈើខេត្តកំពង់ធំ ជូនប្រជាពលរដ្ឋជាបណ្ដោះអាសន្នកាលពីពេលថ្មីៗនេះ។
ក្រោយពេលសាលាដំបូងខេត្តកំពង់ធំ សម្រេចចាត់ចែងដីធ្លីជូនប្រជាពលរដ្ឋនៅភូមិថ្មសំលៀង ឃុំក្រយា ជាបណ្ដោះអាសន្ន ធ្វើឲ្យប្រជាពលរដ្ឋសប្បាយរីករាយ។
បន្ថែមពីនេះ ពួកគាត់ស្នើឲ្យតុលាការសម្រេចផ្ដល់ដីដែលកំពុងមានវិវាទជាមួយរដ្ឋបាលព្រៃឈើខេត្តកំពង់ធំ មកឲ្យពួកគាត់ជាផ្លូវការ ជៀសវាងមានបញ្ហាពេលក្រោយ។ លើសពីនេះទៀត ពលរដ្ឋក៏ចង់ឃើញចំណាត់ការរបស់តុលាការ ចំពោះមន្ត្រីអាជ្ញាធរណាដែលយកអំណាច និងតួនាទី មកគាបសង្កត់ពួកគាត់ទៀតផង។
តំណាងពលរដ្ឋ ២១គ្រួសារនៅភូមិថ្មសំលៀង លោកស្រី យ៉ែម ហេង ឲ្យដឹងថា ដីប្រជាពលរដ្ឋជាង ២០គ្រួសារដែលបានចូលកាន់កាប់ជាបន្តបន្ទាប់ក្រោយឆ្នាំ២០០០ ត្រូវបានខាងមន្ត្រីរដ្ឋបាលព្រៃឈើខេត្តកំពង់ធំ ឈូសឆាយធ្វើឲ្យប៉ះពាល់ដល់ដំណាំផ្សេងៗរបស់អ្នកភូមិកាលពីពេលកន្លងទៅ។ លោកស្រីបន្តថា នាយខណ្ឌរដ្ឋបាលព្រៃឈើ លោក តិប ញាតា ជាអ្នកបញ្ជាឲ្យបក្ខពួកទៅឈូសឆាយដីពួកគាត់ ដោយបញ្ជាក់ថាជាដីរបស់រដ្ឋបាលព្រៃឈើសម្រាប់ដាំកូនឈើឡើងវិញ ប៉ុន្តែធាតុពិត ពលរដ្ឋអះអាងថា គឺឈូសឆាយដើម្បីយកដីពលរដ្ឋលក់ឲ្យឈ្មួញច្រើនជាង៖ « ដាំកូនឈើមិនសមទេ ព្រោះជាដីដែលប្រជាពលរដ្ឋកាន់កាប់តាំងពីឆ្នាំ២០០០ ឲ្យតែមុនបទបញ្ជា០១ »។
កាលពីថ្ងៃទី២៥ កុម្ភៈ ចៅក្រមសាលាដំបូងខេត្តកំពង់ធំ លោក វង្ស សិរី បានចេញដីកាចាត់ចែងដីធ្លីជាង ១០០ហិកតារជាបណ្ដោះអាសន្នជូនប្រជាពលរដ្ឋ ២១គ្រួសារនៅភូមិថ្មសំលៀង ឃុំក្រយា និងពលរដ្ឋនៅឃុំបាក់ស្នា។ ក្នុងលិខិត សម្រេចមិនឲ្យ លោក តិប ញាតា ជានាយខណ្ឌរដ្ឋបាលព្រៃឈើកំពង់ធំ និងតតិយជន ឬជនផ្សេងទៀតដែលតំណាងឲ្យ លោក តិប ញាតា ទៅឈូសឆាយដំណាំ ព្រមទាំងធ្វើសកម្មភាពផ្សេងៗលើដីប្រជាពលរដ្ឋចំនួន ២១គ្រួសារ នៅចំណុចភូមិថ្មសំលៀង ជាបណ្ដោះអាសន្ន ដោយរង់ចាំតុលាការសម្រេចដល់រឿងអង្គសេចក្តីជាមុន។
ឆ្លើយតបនឹងការចោទប្រកាន់នេះ នាយខណ្ឌរដ្ឋបាលព្រៃឈើកំពង់ធំ លោក តិប ញាតា មានប្រសាសន៍នៅថ្ងៃទី២៩ កុម្ភៈ ថា លោកនៅមិនទាន់ទទួលបានលិខិតនោះ និងមិនទាន់ដឹងច្បាស់ថា តុលាការចាត់ចែងដីនៅចំណុចណាប្រាកដទេ។ លោកបញ្ជាក់ថា ប្រសិនបើដីនោះស្ថិតនៅចំចំណុចរបស់រដ្ឋបាលព្រៃឈើធ្លាប់ប្ដឹងប្រជាពលរដ្ឋកាលពីឆ្នាំ២០១៣ ចំពោះការចូលកាន់កាប់ដីព្រៃរបស់រដ្ឋដោយខុសច្បាប់នោះ លោកនឹងប្ដឹងជំទាស់។ បន្ថែមពីនេះ លោកថានៅតំបន់ដីជម្លោះជាមួយខាងរដ្ឋបាលព្រៃឈើ គឺគ្មានប្រជាជនណាម្នាក់ចូលទៅកាន់កាប់តាំងពីឆ្នាំ២០០០ ឡើយ ប៉ុន្តែជាពលរដ្ឋចូលទៅកាន់កាប់ក្រោយបទបញ្ជា០១ របស់រាជរដ្ឋាភិបាល ដែលចេញកាលពីឆ្នាំ២០១២ ទៅវិញ។ លោកបដិសេធថា ការឈូសឆាយដីកន្លងមក មិនមែនសម្រាប់លក់ចែកគ្នានោះទេ ប៉ុន្តែដើម្បីរៀបចំដាំកូនឈើឡើងវិញប៉ុណ្ណោះ៖ « ប៉ុន្តែផ្ទៃដី ២១គ្រួសារអីណាហ្នឹង វាមិនសមហេតុផលទេ។ ២១គ្រួសារទៅគ្រប់គ្រងដើមស្វាយចន្ទី បួនប្រាំដើមហ្នឹង ដឹងថាមិនមែនអ៊ីចឹងទេ ប្រាកដជាគាត់បំពានហើយ »។
លោកបន្តទៀតថា ដីតំបន់នោះអាជ្ញាធរបានវាស់វែងជូនប្រជាពលរដ្ឋរួចរាល់ហើយ លើកលែងតែពលរដ្ឋចូលទៅកាន់កាប់ក្រោយបទបញ្ជា០១ របស់រាជរដ្ឋាភិបាល ហើយករណីនេះ ខាងលោកត្រូវត្រួតពិនិត្យឲ្យបានត្រឹមត្រូវ ជៀសវាងមានការរំលោភដីរបស់រដ្ឋបន្ថែមទៀត។
ដោយឡែកតំណាងពលរដ្ឋមួយរូបទៀត លោក ប្រាក់ សំអុល និយាយថា ដោយសារអាជ្ញាធរមិនបានវាស់វែងដីជូនពួកគាត់ពេលនោះ ទើបធ្វើឲ្យបញ្ហានេះមានភាពចម្រូងចម្រាសឡើង។ លោកថា ពលរដ្ឋចាប់ផ្ដើមតវ៉ា ព្រមទាំងសុំកិច្ចអន្តរាគមន៍ពីមន្ត្រីពាក់ព័ន្ធ ក្រោយពេលខាងរដ្ឋបាលព្រៃឈើចូលទៅឈូសឆាយដំណាំពួកគាត់កាលពីខែវិច្ឆិកា ឆ្នាំ២០១៥។ យ៉ាងនេះក្តី លោករីករាយក្រោយពេលដឹងថា តុលាការសម្រេចចាត់ចែងដីទាំងនោះជូនពួកគាត់ ប៉ុន្តែលោកស្នើឲ្យមន្ត្រីអាជ្ញាធរ អនុវត្តច្បាប់ឲ្យបានត្រឹមត្រូវ ជៀសវាងយកតួនាទីមកធ្វើបាបប្រជាពលរដ្ឋ៖ « ចាប់ដាំជាហូរហែតាំងពីអើយមក មិនដែលមានពីណាហាមឃាត់ ទើបតែប៉ុន្មានខែមុនហ្នឹងមានការហាមឃាត់។ បើឃាត់តាំងពីអើយមក គឺមិនបញ្ហាអីទេ »។
ជាមួយគ្នានេះ ប្រធានអង្គការសិទ្ធិមនុស្សដើម្បីតម្លាភាព និងសន្តិភាព អ្នកស្រី ម៉ម ស៊ីថា ដែលបានតាមដានរឿងនេះ មានប្រសាសន៍ថា ប្រជាពលរដ្ឋមានទាំងសាក្សី ព្រមទាំងដំណាំដើមស្វាយចន្ទីរបស់ខ្លួនដែលអាចបញ្ជាក់ថា ពួកគេបានចូលកាន់កាប់មុនបទបញ្ជា០១ របស់រាជរដ្ឋាភិបាល។ អ្នកស្រីបន្ថែមថា កន្លងមក ការអនុវត្តច្បាប់របស់មន្ត្រីរដ្ឋបាលព្រៃឈើនៅមិនទាន់បានត្រឹមត្រូវ។ ម្យ៉ាង ពួកគេមិនបានគោរពតាមគោលការណ៍ច្បាប់ទៀតផង ដូចជាករណីចូលឈូសឆាយដំណាំ ឬដីលំនៅឋានប្រជាពលរដ្ឋដោយគ្មានការជូនដំណឹងជាមុន ជាដើម៖ « ក្រោយពេលមានពាក្យបណ្ដឹងរបស់ប្រជាពលរដ្ឋ គប្បីត្រូវមានការស្រាវជ្រាវ ការស៊ើបអង្កេតជុំវិញការយកអំណាចរដ្ឋទៅប្រើប្រាស់ »។
អ្នកស្រី ម៉ម ស៊ីថា យល់ថា បញ្ហាដីធ្លីនៅតែកើតមានឡើង ដោយសារតែអាជ្ញាធរមូលដ្ឋានមិនបានយកចិត្តទុកដាក់ដោះស្រាយជូនប្រជាពលរដ្ឋ។ មន្ត្រីសង្គមស៊ីវិលរូបនេះលើកឡើងទៀតថា ដើម្បីជៀសវាងការចោទប្រកាន់គ្នាទៅវិញទៅមក អាជ្ញាធរត្រូវប្រើប្រាស់យន្តការដោះស្រាយបញ្ហាដីធ្លីជូនប្រជាពលរដ្ឋឲ្យបានច្បាស់លាស់ ព្រមទាំងអនុវត្តច្បាប់ឲ្យបានត្រឹមត្រូវ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។