ប្រជាពលរដ្ឋនៅឃុំបន្ទាយស្ទោង ស្រុកស្ទោង ខេត្តកំពង់ធំ ប្រមាណ ២០គ្រួសារលើកគ្នាទៅឃាត់គ្រឿងចក្រមួយគ្រឿង ព្រោះបានទៅភ្ជួររាស់លើដីដែលកំពុងមានទំនាស់ នៅព្រឹកថ្ងៃទី២២ មិថុនា។ ពលរដ្ឋយល់ថាជារឿងមិនត្រឹមត្រូវឡើយ ពីព្រោះដីតំបន់នោះ អាជ្ញាធរមិនទាន់ដោះស្រាយឲ្យបានចប់សព្វគ្រប់ ស្របតាមការទាមទាររបស់អ្នកភូមិឡើយ។ ចំណែកអាជ្ញាធរមូលដ្ឋានបញ្ជាក់ថា នឹងចុះពិនិត្យលើបញ្ហានេះ។
គ្រឿងចក្រមួយគ្រឿង និងកម្លាំងសមត្ថកិច្ច ដែលបានដាក់លើដីមានវិវាទ សម្រេចដកចេញពីតំបន់ដីមានទំនាស់វិញនៅម៉ោងប្រមាណ ១២ ថ្ងៃត្រង់ ថ្ងៃទី២២ មិថុនា។ ការសម្រេចដកចេញនោះ ក្រោយពេលមានប្រជាពលរដ្ឋប្រមាណ ២០នាក់ លើកគ្នាទៅរារាំងមិនឲ្យភ្ជួរលើដីដែលកំពុងមានទំនាស់ឡើយ ដោយរង់ចាំការដោះស្រាយជាមុន។ ទោះបីជាកម្លាំងសមត្ថកិច្ច និងគ្រឿងចក្រដកចេញពីតំបន់ដីមានទំនាស់ក៏ដោយ ប៉ុន្តែប្រជាពលរដ្ឋនៅតែបារម្ភខ្លាចសកម្មភាពភ្ជួររាស់ នឹងកើតមានបន្តទៀត ប្រសិនបើអាជ្ញាធរមិនបានដោះស្រាយចប់សព្វគ្រប់ទេនោះ។
ពលរដ្ឋនៅឃុំបន្ទាយស្ទោង លោក សិត វឿន ឲ្យដឹងថា មូលហេតុពលរដ្ឋលើកគ្នាទៅហាមឃាត់ត្រាក់ទ័រដែលបានចូលទៅភ្ជួរដីតំបន់ព្រៃកន្សោមអក ពីព្រោះដីតំបន់នោះនៅមិនទាន់ដោះស្រាយឡើយ។ លោកបន្តថា កន្លងមក អាជ្ញាធរខេត្តបានសម្រេចមិនឲ្យបុគ្គលណាម្នាក់ប៉ះពាល់ដីមានវិវាទទេ ព្រោះត្រូវរង់ចាំការដោះស្រាយជាមុន៖ « ចិត្តខ្ញុំជាប្រជាពលរដ្ឋនេះ ចង់ស្នើសុំឲ្យអាជ្ញាធរឲ្យជួយដោះស្រាយ ខាង ខេត្តខាងអី ជួយដោះស្រាយឲ្យបានហើយ កុំឲ្យមានការព្រួយបារម្ភខាត ពេលវេលា និងយាមកាមកន្លែងដីមានទំនាស់ហ្នឹង » ។
ពលរដ្ឋសង្ស័យថា គ្រឿងចក្រចូលទៅភ្ជួរដីតំបន់មានជម្លោះជារបស់អភិបាលរងស្រុកស្ទោង បញ្ជូនទៅ ដោយអមជាមួយកម្លាំងសមត្ថកិច្ចប្រមាណ ៥នាក់ទៅជាមួយផង។
ដីតំបន់ព្រៃកន្សោមអក ដែលមានទំហំ ២៥ហិកតារ ដើមឡើយជាតំបន់ដីចម្ការវិលជុំរបស់អ្នកភូមិ ប៉ុន្តែក្រោយមក អាជ្ញាធរហាមឃាត់មិនឲ្យពលរដ្ឋចូលទៅដាំដុះទៀតឡើយ ដោយបញ្ជាក់ថាជាដីព្រៃជម្រកសត្វ។ នៅឆ្នាំ២០១៤ មេឃុំបន្ទាយស្ទោង និងអភិបាលរងស្រុកស្ទោង លោក តូច វិចិត្រ បានយកគ្រឿងចក្រទៅឈូសឆាយដីព្រៃតំបន់នោះ ដើម្បីធ្វើជាកម្មសិទ្ធិផ្ទាល់ខ្លួន។ បន្ទាប់ពីមានប្រជាពលរដ្ឋនៅក្នុងឃុំជាច្រើនគ្រួសារតវ៉ាខ្លាំង ទើបមេឃុំ និងអភិបាលរងស្រុក សម្រេចកាត់ចំណែកដីខ្លះប្រគល់ជូនប្រជាពលរដ្ឋ ប៉ុន្តែអ្នកភូមិជិត ៤០គ្រួសារ ស្នើសុំរក្សាដីតំបន់កន្សោមអក ទាំងអស់ ដាក់ជាសម្បត្តិរួមវិញ ទើបពួកគាត់សុខចិត្ត។
ទាក់ទងបញ្ហានេះ មេឃុំបន្ទាយស្ទោង លោក សូត អ៊ុល មានប្រសាសន៍ថា លោកមិនទាន់ទទួលបានព័ត៌មានជុំវិញការលើកគ្នាទៅឃាត់គ្រឿងចក្រនៅឡើយទេ ព្រោះពលរដ្ឋមិនបានប្ដឹងមកអាជ្ញាធរឃុំ។ ចំណែកគ្រឿងចក្រនោះ លោកមិនបានដឹងថាជារបស់អ្នកណាបញ្ជូនទៅទេ៖ « បើខ្ញុំមិនបានដឹងរឿងផង តើឲ្យខ្ញុំមានវិធានការម៉េចកើត? បើប្រជាពលរដ្ឋមិនបានប្រាប់ខ្ញុំផង។ ឥឡូវលោកឯងមកដោះស្រាយទៅ បើគេប្ដឹងឯណោះហើយ » ។
យ៉ាងនេះក្តីលោកបញ្ជាក់ថា កន្លងមក បញ្ហាដីធ្លីមួយនេះធ្លាប់ដោះស្រាយរួចទៅហើយ ដោយខាងលោក និងអភិបាលរងស្រុក បានប្រគល់ចំណែកដីមួយចំនួនទៅឲ្យអ្នកភូមិ ប៉ុន្តែនៅមានបញ្ហាស្មុគស្មាញខ្លះ ទើបដំណើរការដោះស្រាយត្រូវផ្អាកទៅវិញ។
មន្ត្រីសម្របសម្រួលអង្គការការពារសិទ្ធិមនុស្សលីកាដូ (LICADHO) ខេត្តកំពង់ធំ លោក ញូង សាមឿន បញ្ជាក់ថា តាមច្បាប់ភូមិបាល ដីមានទំនាស់គឺមិនអនុញ្ញាតឲ្យបុគ្គលណាម្នាក់ចូលទៅកាន់កាប់ធ្វើជាកម្មសិទ្ធិ ដើម្បីបម្រើប្រយោជន៍របស់ខ្លួនបានទេ លើកលែងតែដីតំបន់នោះត្រូវបានដោះស្រាយចប់៖ « បើនិយាយរឿងផលប៉ះពាល់វិញ ទីមួយ គឺប៉ះពាល់ទៅលើផ្លូវច្បាប់។ ទាក់ទងអ្នកមានអំណាចដែលបានទៅទន្ទ្រានលើដីដែលមិនទាន់បានដោះស្រាយចប់ » ។
លោកមើលឃើញថា វិវាទដីធ្លីមួយនេះ អាជ្ញាធរខេត្តចេះតែពន្យារពេលក្នុងការដោះស្រាយ ហាក់ទុកឱកាសឲ្យមន្ត្រីមានអំណាចរំលោភបំពានលើប្រជាពលរដ្ឋ។
ទោះបីជាយ៉ាងណា អ្នកភូមិនៅតែប្រកាន់ជំហរថា នឹងបន្តហាមឃាត់ចំពោះសកម្មភាពភ្ជួររាស់ ឬកាន់កាប់ដីតំបន់មានទំនាស់រហូត ទាល់តែអាជ្ញាធរសម្រេចដោះស្រាយស្របតាមការទាមទាររបស់ពួកគាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។