Opens in new windowពលរដ្ឋជិត ៣០គ្រួសាររស់នៅក្នុងភូមិតេជោអន្លង់ក្មេងលេង ស្រុកឈូក ខេត្តកំពត ទទូចឲ្យអាជ្ញាធរខេត្ត និងរាជរដ្ឋាភិបាល ជួយដោះស្រាយបញ្ចប់ទំនាស់ដីធ្លីរបស់ពួកគាត់ជាមួយក្រុមយោធា នៃកងពលតូចលេខ៣១ ឲ្យបានឆាប់រហ័ស។ ពលរដ្ឋអះអាងថា បើមិនមានដំណោះស្រាយ ពួកគាត់នឹងមិនខ្លាចក្នុងការប្រើអំពើហិង្សា តទល់នឹងក្រុមយោធាដែលមានបំណងគ្រប់គ្រងដីទំនាស់នោះឡើយ។
ប្រជាពលរដ្ឋភូមិតេជោអន្លង់ក្មេងលេង នៃឃុំតេជោអភិវឌ្ឍន៍ ខេត្តកំពត ចំនួន ២៧គ្រួសារ កំពុងទន្ទឹងរង់ចាំដំណោះស្រាយពីសំណាក់អាជ្ញាធរខេត្ត ជុំវិញទំនាស់ដីធ្លីមួយកន្លែងដែលជាប់ពាក់ព័ន្ធនឹងក្រុមយោធា នៃកងពលតូចលេខ៣១។
ពលរដ្ឋភូមិតេជោអន្លង់ក្មេងលេង លោក ទិត ស៊ាវ បានឲ្យវិទ្យុអាស៊ីសេរី ដឹងនៅថ្ងៃទី៤ តុលា ថា រូបលោក និងពលរដ្ឋដទៃទៀត ចង់ឲ្យអាជ្ញាធរអន្តរាគមន៍ដោះស្រាយបញ្ហានេះឲ្យបានឆាប់រហ័ស ដើម្បីឲ្យពួកគាត់អាចបង្កបង្កើនផលលើដីនោះបាន។ លោកបន្តថា លោក និងពលរដ្ឋដទៃទៀត នៅតែប្រកាន់ជំហរមិនឲ្យមានការឈូសឆាយណាមួយនៅលើដីទំនាស់ឡើយ។ លោកបញ្ជាក់ទៀតថា ពួកលោកនឹងឡើងមកតវ៉ានៅរាជធានីភ្នំពេញ ដើម្បីស្នើសុំអន្តរាគមន៍ពីលោកនាយករដ្ឋមន្ត្រី ហ៊ុន សែន បើសិនជាអាជ្ញាធរខេត្តព្រងើយកន្តើយមិនដោះស្រាយឲ្យពួកគាត់៖ «យើងរស់នៅក្រោមអាជ្ញាធរដែនដីរបស់គេ បើយើងដាក់ទៅតាមហ្នឹងហើយ មេភូមិ មេឃុំ គេគាំទ្រហើយ ហើយបើអាជ្ញាធរស្រុក-ខេត្ត មិនដោះស្រាយ អាហ្នឹងទៅតាមដំណើរទៅ។ មានតែប្រជាពលរដ្ឋប្រើអំពើហិង្សាទៅតាមហ្នឹងឯង»។
លោក ទិត ស៊ាវ បញ្ជាក់ថា ពលរដ្ឋកាន់តែមានកំហឹង និងជំហរដាច់ខាត ក្រោយពេលដែលក្រុមយោធានៃកងពលតូចលេខ៣១ ដឹកនាំដោយ លោក គង់ ឡុំ បានយកគ្រឿងចក្រមកឈូសឆាយលើដីទំនាស់កាលពីថ្ងៃទី៣០ ខែកញ្ញា កន្លងទៅ។
ការឈូសឆាយ បានបង្កឲ្យមានការប្រឈមមុខដាក់គ្នារវាងពលរដ្ឋប្រមាណ ១០០នាក់ និងកងទាហានរាប់សិបនាក់ ដែលប្រដាប់ដោយកាំបិត និងដំបង ប៉ុន្តែមិនបានផ្ទុះជាអំពើហិង្សាណាមួយឡើយ ដោយសារមានការសម្របសម្រួលពីអាជ្ញាធរភូមិ-ឃុំ។
អនុប្រធានភូមិតេជោអន្លង់ក្មេងលេង លោក ឱ សារិទ្ធ បានបញ្ជាក់ថា កងយោធាបានឈូសឆាយដីទំហំ ៦ហិកតារ ដែលប៉ះពាល់ដល់ពលរដ្ឋ ២៧គ្រួសារ រស់នៅក្នុងភូមិតេជោអន្លង់ក្មេងលេង ឃុំតេជោអភិវឌ្ឍន៍ ខេត្តកំពត។ ទំនាស់ដីធ្លីនេះ ផ្ដើមចេញពីការស្នើសុំរបស់មន្ត្រីសុរិយោដីខេត្តកំពត នូវដីមួយកន្លែង ដើម្បីយកទីតាំងធ្វើជាកន្លែងដាក់ឈើ និងសម្ភារៈសំណង់ អំឡុងពេលស្ថាបនាភូមិករឲ្យយោធិនចូលនិវត្តន៍កាលពីឆ្នាំ២០១០។ ប៉ុន្តែនៅពេលបញ្ចប់ការសាងសង់ ពលរដ្ឋមិនអាចទៅធ្វើការបង្កបង្កើនផលដូចមុនឡើយ ពោលគឺដីនេះត្រូវបាន លោក គង់ ឡុំ ជាមេបញ្ជាការកងពលតូចលេខ៣១ អះអាងថា ជាដីរបស់លោកទៅវិញ។
អភិបាលរងខេត្តកំពត លោក ហេង វន្ធា ដែលទទួលបន្ទុកខាងដីធ្លី នៅតែអះអាងថា លោកមិនទាន់ទទួលបានរបាយការណ៍ស្ដីពីទំនាស់ដីធ្លីនេះនៅឡើយ ចាប់តាំងពីថ្ងៃទី៣០ កញ្ញា រហូតមកដល់ថ្ងៃទី៤ តុលា។ ហេតុដូចនេះ លោកមិនអាចកំណត់បានថា នឹងចុះដោះស្រាយទំនាស់ដីនេះនៅពេលណាបានឡើយ៖ «អាហ្នឹងខ្ញុំអត់ទាន់ឃើញរបាយការណ៍គេបញ្ជូនមកទេ។ ខ្ញុំអត់ទាន់បានទទួលទេ ចាំមើលសិន ព្រោះថ្ងៃសៅរ៍-អាទិត្យ»។
ផ្ទុយពីការលើកឡើងរបស់អភិបាលរងខេត្ត ប្រធានភូមិតេជោអន្លង់ក្មេងលេង លោក ទឹម ហុង បានអះអាងថា លោកបានធ្វើរបាយការណ៍ និងបញ្ជូនទៅក្រុមប្រឹក្សាឃុំ ដើម្បីបញ្ជូនបន្តទៅថ្នាក់ស្រុក និងខេត្តរួចរាល់ហើយ។ មកទល់នឹងពេលនេះ លោកក៏កំពុងរង់ចាំចំណាត់ការពីអាជ្ញាធរខេត្ត ដូចប្រជាពលរដ្ឋក្នុងភូមិដែរ៖ «ខ្ញុំនឹងរង់ចាំមើលថា តើដំណោះស្រាយគេដោះ ឬគេទុកឲ្យនៅរ៉ាំរ៉ៃតទៅទៀត។ ខ្ញុំនឹងព្យាយាមគ្រប់ទាំងអស់ ដើម្បីជួបឯកឧត្តមអភិបាលខេត្ត ជួបលោកអភិបាលស្រុក ឬអង្គការក្រៅរដ្ឋាភិបាលផ្សេងៗ ដែលខ្ញុំចង់អំពាវនាវដើម្បីរកដំណោះស្រាយមិនចង់ឲ្យនៅរ៉ាំរ៉ៃ»។
ចំណែកមេឃុំតេជោអភិវឌ្ឍន៍ លោក សាន គ្រីយ៉ា វិញ បានឆ្លើយថា លោកបានធ្វើរបាយការណ៍រួចរាល់ហើយ ប៉ុន្តែលោកមិនបានធ្វើអត្ថាធិប្បាយអ្វីច្រើនទេ ដោយលោកបិទទូរស័ព្ទភ្លាមៗ។
ភូមិតេជោអន្លង់ក្មេងលេង មានពលរដ្ឋជិត ៤០០គ្រួសារ (៣៩៩គ្រួសារ) កំពុងរស់នៅ។ ពលរដ្ឋ ២៧គ្រួសារ ដែលមានដីស្ថិតក្នុងទីតាំងទំនាស់ គឺជាគ្រួសារយោធិនពិការ គ្រួសារយោធិនកាត់រំសាយ និងខ្លះទៀតជាពលរដ្ឋសាមញ្ញ។
មន្ត្រីអង្គការសិទ្ធិមនុស្សអាដហុក (ADHOC) ប្រចាំខេត្តកំពត លោក ហេង ភារៈ បានថ្លែងថា អាជ្ញាធរខេត្តមិនគួរទុកបណ្តោយឲ្យមានការប្រឈមមុខដាក់គ្នារវាងពលរដ្ឋ និងក្រុមយោធានោះឡើយ៖ «អ្វីដែលគាត់ទាមទារ គឺដើម្បីយកជាដីលំនៅឋានទេ ដើម្បីគាត់មានលំនៅឋានសមរម្យ»។
ដោយមានអតីតភាពជាយោធា ពលរដ្ឋក្នុងភូមិតេជោអន្លង់ក្មេងលេង មិនត្រឹមតែមិនភ័យខ្លាចចំពោះវត្តមានក្រុមទាហាន នៃកងពលតូចលេខ៣១ ប៉ុន្តែថែមទាំងហ៊ានងើបតតាំងជាមួយក្រុមទាហានទាំងនោះទៀតផង។ ដោយស្ថិតក្នុងស្ថានភាពបែបនេះហើយ ទើបអាជ្ញាធរមូលដ្ឋាន និងមន្ត្រីអង្គការសិទ្ធិមនុស្ស អំពាវនាវដល់មន្ត្រីថ្នាក់ខេត្ត និងរាជរដ្ឋាភិបាល ពន្លឿនការដោះស្រាយទំនាស់នេះឲ្យបានឆាប់ ដើម្បីបញ្ចៀសអំពើហិង្សាណាមួយ ដែលអាចផ្ទុះឡើងរវាងពលរដ្ឋ និងក្រុមយោធា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។